Read Northwest Gbaya ZAKARII 7 Bible Online

ZAKARII 7 - Northwest Gbaya bible

ZAKARII 7

¹Darius ɔɔ wan pɛ naar ɓɛɛ tɛ naar ɔɔ-zɛ tɛ mɔɔrɔ-ɗoŋ-naar fio-zɛ, GASA WAN ee wen nú Zakarii. Duka nɛ zɛ Kislɛu.

²Gasawi ko wannu Bɛtɛl-Arezɛr, in o bíí kɔ‘m toma so bíí mɛ nɛ̀ɛ́ ai nú ti GASA WAN,[9]

³wen tɔ̧a̧-a̧ ha̧ o wi-ɗafi-sɔ̧ nɛ de tom kɔ̧ Tua ko GASA WAN nɛ a̧a̧ nɛ ŋgayamɔ lɛŋ in ha̧ o wi-tɔ̧-wen oi nú Sɔ̧ ndé: «Ɛɛ tɛ hi̧i̧ kɔ̧a̧ tɛ mɔɔrɔ fio-zɛ zim nɛ yì hee mɔ'ɔ n’ɛɛ de tɛnɛ tɛ o dɔka pɛ nɛti ga nde?»

⁴Ɓɛɛ GASA WAN nɛ a̧a̧ nɛ ŋgayamɔ lɛŋ e wen nú‘m hee mɔ'ɔ ga:

⁵«Mɛ̀ tɔ̧́ ha̧ o bíí nù'ɛ lɛŋ in o wi-ɗafi-sɔ̧‘e: ‹Ŋgimbi n’ɛnɛ zima nɛ yì ai nɛ̀ nú tɛ mɔɔrɔ fio-zɛ in tɛ mɔɔrɔ-ɗoŋ-yiitoo fio-zɛ, tɛ pɛ ɓu-mɔɔrɔ-ɗoŋ-yiitoo kinii, mɔ‘i ɛnɛ dee ha̧‘m nde?

⁶Ŋgimbi n’ɛnɛ duk so nyɔŋ nɛ mɔ, nɔ nɛ mɔ, bo nɛ ɛnɛ de so mɔ‘i wen kpaa desee k’ɛ́nɛ́ na nde?› »

⁷Gba̧a̧-wen nɛ GASA WAN ee só nú o kuti wi-tɔ̧-wen oi nú Sɔ̧, ŋgimbi nɛ Jerusalɛm in o be ye nɛ̀ ya zik a̧ yaa só nɛ̀ de-a tɛ ga̧a̧mɔ bo a̧‘i̧ na nde? Ŋgimbi'i o bíí nɛ dɔka-a ɔɔ so si ká̧-zaŋ-mɛ́-ŋgɔn in tɛ Hira-Nù mbɛt.

⁸GASA WAN nɛ a̧a̧ nɛ ŋgayamɔ lɛŋ tɔ̧a̧ ha̧‘m mɛ we ɗoŋ o wen n'aa ee so nú‘m lɛŋ hee mɔ'ɔ ga: «Ɛ̀nɛ̀ ɓá wen nɛ yuwar-a, ɓɛɛ o ndé a̧ de mɔ in ŋma-a nɛ de-a in nɛ kɔ̧ɔ̧mɔ;

¹⁰k’ɛ́nɛ́ nyɔŋ yí o ko-gera, o be-oi, o gɛnɛ, in o wi-kɔsa na; k’ɛ́nɛ́ ta mɔ wen dee ɗaŋmɔ in ŋma'nɛ na mbɛt.»

¹¹Ɓɛɛ o wi nɔ‘i kɔ̧ so mɛ zii wen'i na; wa baa nɛ ŋgazu e ti, kpe nɛ zer-wa sɛnɛ.

¹²See-wa ŋgaya hee ta-kórò[10] ga, wen ka wa tɛɛ zii wen in usamɔ ko GASA WAN nɛ a̧a̧ nɛ ŋgayamɔ lɛŋ nɛ Ɔmi kɔ̧-a̧ tɔ̧ɔ̧ so nɛ nú o kuti wi-tɔ̧-wen oi nú Sɔ̧. Nɛ́ hegɔ sa see GASA WAN nɛ a̧a̧ nɛ ŋgayamɔ lɛŋ nyim zu wa nɛ ŋgaya-a,

¹³ɓɛɛ a̧ tɔ̧: «Héé mɔ'ɔ n'am duka so sa wa, ɓɛɛ wa kɔ̧ mɛ zii na ga, mi mbɛt, wa saa'm ɓɛɛ mi zii na.

¹⁴Mi pɛsa wa dam mgbara o dukbíí nɛ wa iŋ na, ɓɛɛ o bíí ɗaŋ nù oi wa lɛŋ, bíí hɔ fara'i ɓɔna. De nù kɔ-wa nɛ duka so nɛ ɓɔa-a, wa ɗaŋa kifi géé ŋga-gbárà.»