Read Northwest Gbaya 1 Makabee 1 Bible Online

1 Makabee 1 - Northwest Gbaya bible

1 Makabee 1

¹Alɛkzandrɛ bem ko Filip wannu Masedoan tea so nɛ nu Kittim. Ɗoŋ n'aa gana zu Darius, wannu ko o be-Pɛrsɛ in o be-Mɛdii, tɛ biro, a̧ baa wan oi-aa ku̧u̧naŋ-a nɛ́ zu nù ko o Grɛk,

²ɓɛɛ a̧ yee tɛ bii biro nɛ dɔkaa, ɓar nɛ o zɔm ŋgárá, ɓɛɛ a̧ kum o wannu zu zikanu'i lɛŋ.

³A̧ nɛa hegɔɔ hɔ si mgbiizan mɛ, ɓɛɛ a̧ pɛ o mbɔi oi o zuduk nɛtɛ nɛtɛ nɛ dɔkaa. Nu ga̧-a̧ dezeŋ sɛn ti a̧. Tortɛ baa a̧, ɓɛɛ a̧ ye tɛ gasa zu-a ŋmaŋ nɛ tɛ.

⁴A̧ mɔi̧a̧ o ŋgaŋa wibiro nɛ dɔkaa, tik nɛ zu o zikanu, o zuduk in o nu-wan nɛtɛ nɛtɛ, kai wa nɛ mbana mɛ gbo garama ha̧ a̧.

⁵Ɗoŋ mɔ‘i, a̧ tika zɛ́ɛ́, ɓɛɛ a̧ zɔk fio dɔŋɔɗɔ in a̧.

⁶A̧ saa o tu̧u̧tɛ wi-duk-zu-biro kɔ̧-a̧ lɛŋ, o gbamayari kɔ̧-a̧ nɛ wa gasa kpɔk, ɓɛɛ a̧ mbaŋ nu kɔ̧-a̧ kɛ̧ nɛ wa, nɛti ha̧ a̧ mɛ fe.

⁷Alɛkzandrɛ dee pɛ ɓu-zua-yiitoo tɛ wan, nɛti ha̧ a̧ mɛ fe.

⁸O gasa wi-ya-zu o wibiro kɔ̧-a̧ baa wan kpɔk kpɔk, kóó o ndé ɔ wan zu zikanu kɔ‘i.

⁹Wa lɛŋ, wa hɛra mɛtɛwol-wan zu-wa ɗoŋ fio kɔ̧-a̧; o bezaŋ-wa mbɛt dee kana nɛ kale kpɔk mɔ tɛ pɛ nɛ dɔkaa, ɓɛɛ wa dɛ́m ɗaŋmɔ a zu nu.

¹⁰Ŋma ɗaŋ kpara be-wan gboo nɛ mgbara o wannu nɔ‘i: nɛ́ Antiɔkus Epifan, bem ko wannu Antiɔkus; a̧ duka so nɛ bara-biro sɛn Rɔm, ɓɛɛ a̧ bá wan, nyɛm nɛ pɛ gɔmŋma nɛ pɛ ɓu-taar zua mɔɔrɔ-ɗoŋ-yiiitoo, pɛ wan ko o Grɛk.

¹¹Ŋgimbi'i, o gee-tum-bíí gboo nɛ mgbara o be-Israɛl, ɓɛɛ wa ɔr o bíí nɛ dɔkaa tɔ̧ nɛnɛ‘e «Ɛɛ nɛ́ɛ́ nɔ tɔk in o gɔni duk nɛ yá ka tɛ-yɛ, wɛn ɗoŋ araa nd’ɛ́ɛ́ ara nɛ́nɛ́ nɛ wa'i a̧ o ɗaŋmɔ nɛ dɔkaa hɔɔ nɛ́nɛ́ zu yɛ.»

¹²Wen'i ɔ̧ɔ̧ nyɔɔ tɛ-wa,

¹³Hegɔ o ŋma bíí nɛ dɔkaa mgbara wa yaka nɛ hayaa mɛ zɔk wannu, ɓɛɛ a̧ e war ha̧ wa mɛ ye tɛ o dómɔ ko o gɔni duk,

¹⁴nyɛm nɛ ɗoŋ o deemɔ kɔ-wa. Nɛ́ mɔ'ɔ nɛ wa mboo ŋma tua-saa-ŋgai sɛn Jerusalɛm.

¹⁵Wa bii ndola gɔnabɔr-wa, wa gbina sa̧-a̧ nɔɔtɔk, mɛ si ɗoŋ ndaɗi kpɔk in o bii nɛ iŋ Sɔ̧ na, ɓɛɛ wa kifa bara ko ɗaŋmɔ.

¹⁶Ŋgimbi nɛ Antiɔkus zɔka'e wan kɔ‘i nɔɔ mitak kaɗi, a̧ taa mɔ mɛ kifi wannu Egyptɛ mbɛt, wen mɛ ɔ wan zu o nu nɔ‘i yiitoo'i.

¹⁷A̧ yee Egyptɛ nɛ o gba-gii ŋgaŋa wibiro, o keeke-biro, o fɔrɔ in o gba dɔka kombon-biro.

¹⁸A̧ duka zu-a nɛ Ptolemee wannu Egyptɛ, ɓɛɛ Ptolemee pɛ nɛ ndaa ti a̧ yu mɔ yak, siŋ o gba-gii wan-da̧i̧ a dúk.

¹⁹Antiɔkus baa o ŋgaŋa ŋgara nú Egyptɛ lɛŋ, ɓɛɛ a̧ tuturi o mbɔi oi be-nu'i lɛŋ yaknɛ.

²⁰Ɗoŋ n'aa gana Egypt nɛ biro kaɗi, a̧ sia ɗoŋ tɛ pɛ gomŋmaa nɛ ɓu-naar-zu-taar. A̧ kaia o ŋgaŋa wibiro nɛ dɔkaa tik nɛ Israɛl in Jerusalɛm.

²¹Antiɔkus gasa zu ye nɛ kɔ̧ Sa̧a̧-Tua, a̧ baa taŋge-ɗafisɔ̧ nɛ‘i dee nɛ lɔr, dek-e-wee in o mɔ-aa lɛŋ, taŋge-ee-mɔɔɗafisɔ̧ in o be-dele-mɔ-lɛŋ, o be-nyɛk, in o bera-dɔ-fuunyama nɛ‘i de nɛ lɔr, o laa-ɓaɓur in o oi-ee-nu. O mɔ ka̧-yi-zala nutua'i, nɛ wa dee so nɛ lɔr, A̧ ora wa yinɛ mbɛt lɛŋ.

²²

²³A̧ tutura bu-mbɔi, lɔr in o ŋma mɔ nɛ gɛnɛ-a ɔ́ ŋgaya yak nɛ̀nɛ́, ɓɛɛ a̧ kaia o hu̧sa mbɔi n'aa kpaa hi̧i̧ lɛŋ mbɛt.

²⁴Doŋ n’ a̧-a̧ di̧i̧ o mɔ nɔ‘i lɛŋ, ɓɛɛ a̧ si nu kɔ̧-a̧. A̧ kuma so o bíí nyɛmna, a̧ gasi nɛ zu duk nɛ tɛ-a mbɛt.

²⁵Gasa kɔ̧ɔ̧-fio dama zu nu Israɛl lɛŋ.

²⁶O be-wan in o kutiwi yee tɛ aia-nú. O be-ŋgaiwi in o be-zɔŋa ziɓa lɛŋ, dee ko okóò ɗaŋa lɛŋ,

²⁷Wi-ba-koo nɛ mbea ŋmaa nú tɛ gima ai-nú, ɓɛɛ kóò kɔ̧-a̧ dúk nu kɔ̧ fara-ɔɔ kɔ‘i zim nɛ mɔ.

²⁸Nu pii likiliki wen zu bɔnɛ ko o bíí kɔ̧‘i, ɓɛɛ foe tik zu o wi nutua ko Jakɔb lɛŋ.

²⁹Pɛ yiitoo ɗoŋ mɔ‘i, wannu toma ŋma gasawi ba sede-garama dám ɗoŋ o ye ko Juda lɛŋ. A̧ hɔɔ Jerusalɛm nɛ zɔm dɔka wibiro.

³⁰A̧ dee gɔnta tɔ̧́ nɛ de ga̧-a̧ wen sitɛ o wi-saaye, ɓɛɛ wa kɔ̧ɔ̧ dɔá nu-a. Nɛ mɔ'ɔ n'aa tika ye'i gbaŋanyaŋa nɛ biro, de nɛ bɔnɛ ha̧ wa nyɛmna, ɓɛɛ a̧ gbɛ́ o be-Israɛl nɛ dɔkaa.

³¹A̧ tutura o mbɔi saaye, dɔ ye lɛŋ, ɓɛɛ gbin o tua in garo-ye á nu.

³²Wa kaia o okóò in o bem nɛ bara-biro, ɓɛɛ wa pɛ́ o mɔdai yaknɛ.

³³Ɓɛɛ wa ɗafa ye ko David woyo, mbó nɛ ŋga kusa garo nɛ oi o taŋgaɗa zik nɛ̀nɛ́, ɓɛɛ ye'i kifa nɛ́ ŋgara kɔ-wa.

³⁴Wa mɔi̧a̧ o kpara ɗaŋwi, o wi nɛ yu kii Sɔ̧ na, de nɛ ye nɔ̧ nɛnɛ́ mbɛt.

³⁵Wa pɛ́ɛ́ o boi-biro in o mɔɔ-nyɔŋ ká bá nɛ o mbɔi ko o be-Jerusalɛm nɛ wa tutura gbisi hi̧i̧, ɓɛɛ fara'i kifi nɛ gasa mɔ-pi̧-kii tɛ bíí.

³⁶Mɔ‘i duka nɛ ŋma mɔ de ŋmaa in Tua ko Sɔ̧, in ŋma daŋmɔ-nasi Israɛl ŋgimbi lɛŋ.

³⁷Wa dee ha̧ tɔktɛ o wi nɛ wen bó zu wa na mɛ fok a nù zik nɛ Sa̧-a̧ Tua'i, ɓɛɛ wa pi̧ simbo tɛ Sa̧a̧-Fara.

³⁸O be-Jerusalɛm yuu mɔ yak wen zu wa, ɓɛɛ saaye kifi nɛ fara-dukaa ko gɔni-zuduk, ɓɛɛ o be-saaye ya hi̧i̧ hee o be-gɔni-nu ga, ɓɛɛ o mgbak be-saaye e ye'i duk.

³⁹Sa̧a̧-Fara kɔ̧-a̧ ɗaŋa lɛŋ hee ŋga gbara ga; o gbaŋá kɔ̧-a̧ kifa hee wese hi̧i̧-fio ga; o wese ɔmtɛ kɔ̧-a̧ kifa mɔɔ-de-zɛŋ, in gasi kɔ̧-a̧ dee geemɔ.

⁴⁰Zɛkɛɗa-a̧ mbɛt tɛ̀ɛ̀ nyɛm ŋmaa in zɔna a̧ nɛ wa zɔna so nɛti, ɓɛɛ hi̧a̧ -fio kpai gasi kɔ̧-a̧.

⁴¹Wannu ha̧geŋga nde: sɛn nu kɔ‘i, o zuduk nɛ a̧-a̧ sɛnɛ lɛŋ a dúk kpɔk, ɓɛɛ wa a síŋ o dómɔ kɔ-wa a nù.

⁴²O zuduk lɛŋ kɔ̧ɔ̧ɗɔɔ ha̧a̧nú ko wannu.

⁴³O be-Israɛl nɛ dɔkaa kpɛka yuwar-ɗafasɔ̧ kɔ̧-a̧ mbɛt; wa ye tɛ ɗafa o geesɔ̧ gbin nɛ heembea wese-ɔmtɛ mbɛt.

⁴⁴Wannu toma o betom nɛ o kalata-heembea nɔ‘i si Jerusalɛm in si tɛ o gasa ye nu ko Juda, tɔ̧ nɛnɛ‘e: wa a ye tɛ dɔ́mɔ ko o gɔni-duk,

⁴⁵Wa a kaɗi o dɔɔkpoosɔ̧ in ɗafasɔ̧ kɔ-wa lɛŋ in aa zɛzɛ zu Sa̧a̧-Fara mbɛt, wa a e wese-ɔmtɛ in o wese-gbaŋa kɔ-wa tɛ geemɔ,

⁴⁶wa a pi̧ ziimɔ zu Sa̧a̧-Fara in zu o sa̧a̧-mɔ ko Sɔ̧ lɛŋ,

⁴⁷wa a mbo nɛ o taŋge-ɗafisɔ̧, o sa̧a̧-fara, in o tua ko o geesɔ̧, wa a gbɛ́ nɛ́ o ŋgɔya in o saɗi-simbo ɗafi nɛ o geesɔ̧,

⁴⁸ká wa gɔn bɔr o bem kɔ-wa ɓɔna, ɓɛɛ nɛ́ wa a fɛŋ nɛ zu-wa de nɛ o ŋdiŋmɔ in o mɔɔ-nyɛr nɛtɛ nɛtɛ,

⁴⁹nɛ wen nɛ tɔ̧‘i tɛ-wa a bi ɗoŋ Heembea, ɓɛɛ wa a siŋ o geŋga kɔ̧-a̧ a tɛ geemɔ.

⁵⁰Wi nɛ beka mbozu ha̧ heembea ko wannu na, wi tɛ gbɛ́ a̧.

⁵¹Nu-wen nɛ wannu yɔra tom ha̧ o bíí kɔ‘i lɛŋ, nɛ́ mɔ‘i. A̧ hoka o wi-zɔk-tom a zu o be-Juif nɛ́nɛ́, ɓɛɛ a̧ ha̧ nú ha̧ o ye nu ko Juda lɛŋ mɛ ɗafi nɛ geesɔ̧ dam fara lɛŋ.

⁵²Dɔka o be-Juif nɛ ee so Heembea dúk lɛŋ yee ŋmaa in o gasawi nɔ‘i, Wa dee ɗaŋmɔ dam zu nu'i lɛŋ.

⁵³Hegɔ ŋma yuwar be wen o kpasa be-Israɛl na, kana nɛ kia nɛ fara mɛ hu̧si tɛ-wa ɓɛɛ.

⁵⁴Tɛ ɓu-zua-mɔɔrɔ ɔɔ-zɛ ko Kisleu, tɛ pɛ gɔmŋmaa nɛ ɓu-naar-zua mɔɔrɔ, wannu mboo Ɗaŋ Ŋdiŋmɔ e zu fara-dɔɔ-kpoo-sɔ̧ (sɛn Jerusalɛm), ɓɛɛ wa mbo o taŋge-ɗafi-geesɔ̧ sɛn o gasa ye zikanu ko Juda lɛŋ.

⁵⁵Wa duka so mɛ dɔ fuunyama nɛ o nutua in nɛ beegara nɛnɛ.

⁵⁶O kalata Heembea nɛ wa kpaa lɛŋ, wa a̧k, ɓɛɛ wa kaia a tɛ wee.

⁵⁷Kà wa kpa ŋma kalata Nɔɔtɔk tɛ, kóó kà ŋma bíí ɓɔn fara ndak ɗoŋ Heembea ɓɛɛ wa gbé a, nyɛm nɛ ɗoŋ ha̧a̧nú ko wannu.

⁵⁸Fiozɛ lɛŋ, kana nɛ kale kpɔk bɔnɛ‘i a̧ wa de nɛ o be-Israɛl nɛ wa baa tɛ gbina o ha̧a̧nu nɔ‘i.

⁵⁹Dam ɗoŋ ɓu-yiitoo-zua-mɔɔrɔ ɔɔ-zɛ ko fiozɛ lɛŋ, wa ɗafi nɛ sɔ̧ zu taŋge nɛ wa mboo e zu fara-dɔɔ-kpoo-sɔ̧‘i.

⁶⁰Nyɛm nɛ ɗoŋ ha̧a̧nú‘i, wa gbɛ́ o okóò nɛ gɔna bɔr bem kɔ‘i lɛŋ gbɛ́ɛ́, gai nɛ o bem nɔ‘i nɛ ger o naa-wan-aa nɛnɛ, ɓɛɛ wa gbɛɛ o pɛrnam ko o koo nɔ‘i, gú nɛ o wi nɛ gɔna bɔr nɔ‘i lɛŋ.

⁶¹

⁶²Kóó zu i̧i̧ mbɛt, o be-Israɛl nɛ dɔkaa nɔɔ ŋgiɗi, ɓɛɛ kpa ŋgai mɛ nik see wen ka wa tɛ̀ɛ̀ nyɔŋ o mɔ-simbo, kóó gbina Sa̧a̧ Nóó-tɔk.

⁶³Wa kpɛka'e gana so wi fe bá nɛ nyɔŋa o nyɔŋmɔ-simbo, kɔɔ gbina Sa̧a̧ Nɔɔtɔk; ɓɛɛ wa fe kana.

⁶⁴Ŋgimbi nɔ‘i duka nɛ ŋga ŋgimbi nyimsea zu Israɛl.