Read Northwest Gbaya 1 Makabee 10 Bible Online

1 Makabee 10 - Northwest Gbaya bible

1 Makabee 10

¹Tɛ pɛ gɔmŋmaa nɛ pɛ ɓu-mɔɔrɔ-ɗoŋ-kpɔk, Alɛkzandrɛ Epifan, bem ko Antiɔkus nɛ tɛɛ nɛ kombon gbo ka̧ ye Ptolemais, ɓɛɛ bá ye'i. O bíí kpɛka a̧, ɓɛɛ nɛ́ sɛn hi̧i̧ a a̧ ku̧u̧ nɛ naŋ wan kɔ̧-a̧.

²Ŋgimbi nɛ wannu Demetrius zia mɔ‘i, a̧ mɔi̧a̧ o wibiro nɛ dɔkaa, ɓɛɛ a̧ gbo biro si tɛ Alɛkzandrɛ mɛ nɛ́ɛ́ bi ŋmaa in a̧.

³Demetrius yɔra ŋma kalata-ha̧-ga̧a̧mɔ tom ha̧ Jonataŋ, há nɛ́ nu mɛ ha̧ gasi ha̧ a̧.

⁴Wen a̧ tɔ̧ɔ̧ sɛn kɔ̧ see-a̧: «Ɛɛ nɔ́ tɔk in o wi nɔ'ɔ nɛ hayaa, nɛti ha̧ wa mɛ ye ŋmaa in Alɛkzandrɛ, wen aa zu yɛ,

⁵Kà bó hegɔ na, ŋgimbi'i tɛ-Jonataŋ tɛ mbaŋ ɗoŋ o ɗaŋmɔ nd’ɛ́ɛ́ dikiɗa so nɛ a̧ in o nya kɔ̧-a̧, ká bá nɛ dukbíí kɔ̧-a̧ lɛŋ.»

⁶Demetrius ee yuwar ha̧ Jonataŋ mɛ mɔi̧ o wibiro kɔ̧-a̧, ha̧ a̧ de o boi-biro, in mɛ tɔ̧‘e wi nɛ sɛm kɔ‘i. A̧ ha̧nu-a̧ wen gboo o bara-biro mɛ kɔ̧ ŋgara (Jerusalɛm) lɛŋ ha̧ a̧.

⁷Jonataŋ hɔɔ Jerusalɛm, ɓɛɛ tɔr kalata'i nɛ zer dukbíí, in nɛ gbaayí o wi nɛ a̧-a̧ so kɔ̧ ŋgara mbɛt.

⁸Tɛ zia mɔ‘i, zɔm kii dee wa, wen nɛ wannu tɔ̧ɔ̧‘e Jonataŋ a mɔi̧ o war wibiro kɔ‘i

⁹O wi kɔ̧ ŋgara gboo o bara-biro ha̧ Jonataŋ, ɓɛɛ a̧ ha̧ wa há̧ o nam kɔ-wa.

¹⁰Jonataŋ dee ye sɛn Jerusalɛm, ɓɛɛ a̧ ye tɛ mbo aa ɗafi nɛ̀nɛ́ woyo.

¹¹A̧ ha̧nú ha̧ o wi-duk-zu-tom mɛ mbo o garo-ye, in mɛ zik kaya Siɔn nɛ kusa garo sɛka-ta wen ŋgoo a̧, ɓɛɛ wa de hegɔ.

¹²O gɔni-duk nɛ yaa so kɔ̧ o ŋgara, nɛ Bakidɛs mboo lɛŋ, yuu mɔ yak.

¹³O ndé lɛŋ ee taŋgaɗa-pɛm-mɔ kɔ‘i dúk, mɛ si nu kɔ‘i.

¹⁴Nɛ́ sɛn Bɛtsur a'i ee ha̧ o ŋma wi nɛ bɛ̧ɛ̧ so Heembea in o gɛŋga mɛ ɓɔn saaye ɓɛɛ, wen duka so nɛ ŋma fara hu̧si̧-tɛ.

¹⁵Wannu Alɛkzandrɛ zia nyɛrɛ o demɔ nɛ Demetrius ha̧nú wen-aa ha̧ Jonataŋ‘i; o bíí ɓaa nyɛrɛ o biro, in o ŋgaŋamɔ nɛ Jonataŋ in o nya-wi dee lɛŋ ha̧ a̧, ká bá nɛ o bɔnɛ nɛ wa zɔka mbɛt.

¹⁶Wannu tɔ̧ɔ̧: «Ɛɛ tɛ kpa ŋma pɛrti bíí hegɔ woyo nde? Ɔ dee h’ɛ́ɛ́ mɛ ba sɛm in a̧, in mɛ ye ŋmaa in a̧ kinii ŋgaɓo.»

¹⁷Alɛkzandrɛ yɔra o wen nɔ'ɔ, ɓɛɛ tom ha̧ a̧:

¹⁸«Wannu Alɛkzandrɛ fana nya kɔ‘i Jonataŋ

¹⁹«Ɛɛ zia nyɛrɛ kɔ-mɛ‘e mɛ nɛ kpɔra wibiro ɓɔnti, ɓɛɛ mɛ nyɛma mɛ dúk sɛm k’ɛ́ɛ́.

²⁰«Nɛ́ hegɔ s’ɛ́ɛ́ e mɛ nɛ gasa wan-ɗafi-sɔ̧ ko dukbíí kɔ-mɛ dika sɔsɔɔ‘i ŋgaɓo, in ha̧‘i mɛ sa mɛ mbɛt’é sɛm ko wannu, ha̧ mɛ mɛ́ dúk nɛ k’ɛ́ɛ́, in ha̧ mɛ mɛ́ kasi sɛm in yɛɛ», ɓɛɛ kpɔk ŋgimbi'i wannu tom gbɛ̧ zɔ̧-laa in mɔɔ-gu-zu nɛ‘i dee nɛ lɔr ha̧ a̧.

²¹Jonataŋ pii o laa-ɗafisɔ̧ nɔ‘i, tɛ mɔɔrɔ-ɗoŋ-yiitoo fiozɛ, mɛ pɛ gɔmŋmaa nɛ ɓu-mɔɔrɔ ɗoŋ-kpɔk, wese gbaŋa Tua-laa. A̧ mɔi̧a̧ o wibiro, ɓɛɛ a̧ de o boi-biro nɛ dɔkaa.

²²Tɛ zia wen'i, see Demetrius ɗaŋa, ɓɛɛ a̧ tɔ̧:

²³«Ɛ́ɛ́ dee bɔɔ hee ge, sa Alɛkzandrɛ dee nɛ sɛm in o Juif ti h’ɛ́ɛ́, kpá nɛ ŋgai siti woyo’ɛ ge?

²⁴«Mi mbɛt, mi tɛ yɔr mɔ ha̧ wa, kán nɛ mɔ nde mi tɛ ha̧ gasi in o mbɔi ha̧ wa, gbakna wa yee ɗoŋ am».

²⁵Ɓɛɛ a̧ yɔr mɔ'ɛ ha̧ wa: «Mi, wannu Demetrius, mi fana dukbíí Juif.

²⁶«Ɛnɛ yora nɛ nɔ̧aa ɗoŋ nɔɔtɔk nd’ɛ́ɛ́ nɔɔ in ‘nɛ́ ɓɔnsɛnɛ. Ɛnɛ ɓɔna nɛ o sɛm k’ɛ́ɛ́; ɛ́nɛ́ wɛ́r si tɛ o wisɛn k’ɛ́ɛ́ na. Ɛɛ zia o mɔ nɔ‘i lɛŋ, ɓɛɛ ɛɛ yá nɛ desee wen mɔ‘i.

²⁷«Ɛnɛ yór kana nɛ ɗoŋ yɛ siti ɓɔnsɛnɛ, ɓɛɛ ɛɛ tɛ ha̧ mɔɔ-oi dee-demɔ k’ɛ́nɛ́ h’ɛ́nɛ́.

²⁸«Ɛɛ tɛ zir o garama k’ɛ́nɛ́ nɛ dɔka si ɗɔɔ, ɓɛɛ ɛɛ kɛ̧ɛ̧ o mɔ h’ɛ́nɛ́ sɔɔgee mbɛt.

²⁹«Dika sɔsɔɔ‘i, mi ee ‘nɛ́ ge. Mi gbo o Juif lɛŋ yinɛ tɛ o garama, tɛ garama zu tɔŋ in tɛ o garama ko wannu.

³⁰«Dika sɔsɔɔ‘i yak nɛ̀nɛ́ sɔ̧ɔ̧‘i, mi gbɛɛ taar kɛ̧ɛ̧-zu-nyɔnɔ in reeta o wayate nɛ pii ha̧‘m'i nu-Judéé in o zikanu taar n'aa baa sɛn Samarii in Galilé‘i.

³¹«Jerusalɛm tɛ duk nɛ sa̧-a̧ ye ko Sɔ̧; a̧ in o zikanu kɔ̧-a̧ beka yoɓi garama in o zu-lumɔ ɓɔna.

³²«Wan mɛ zu ŋgara Jerusalɛm, mi ee duk, mi ha̧ha̧ gasa wan-ɗafi-sɔ̧: a̧ nyɛma mɛ hok o wi n'aa kɔ̧ɔ̧ wen pɛma a̧ mbɛt.

³³«O be-Juif nɛ‘i kaia so lɛŋ nɛ bara nɛ nu Judéé mɛ pii tɛ o zikanu kɔ‘m, mi gboo wa nɛ ta-tɛ‘m. Wa lɛŋ a gbo ɗɔɔ garama, kóó nɛ wan mɛ zu mɔdai mbɛt.

³⁴«O Juif nɛ a̧-a̧ zu nu-wan kɔ‘m lɛŋ beka gbo garama, kà bó nɛ nyamandoi, tɛ o wese gbooyi, o wese-ɔmtɛ, wese gbaŋa hɔɔ-yizɛ in tɛ o ŋma wese gbooyi nɛ heembea hoka, in tɛ zɛ taar nɛti in nɛ ɗoŋ ha̧ o gbooyi lɛŋ na.

³⁵«Ŋma bíí bó nɛ ŋgai mɛ kpɛr nde wa'a gbo ŋma mɔ ha̧‘i, kà bó nɛ gɔna ɗɛɗɛ-wa zu ŋma mɔ nɛtɛ na.

³⁶«Wi tɛ kai o be-Juif, hee booro-ɓu-taar ga, a zaŋ o wibiro ko wannu, ɓɛɛ wa tɛ bá kana nɛ kale kpɔk sede-zɛ in oi o dɔka wibiro nɛ a̧-a̧ nu-wan'i.

³⁷«O ŋma tɛ nɛ́ɛ́ de tom sɛn kɔ̧ gasa o kpasa ŋgara ko wannu. Wi tɛ a o Juif zu o ŋma mgbak wii-see-tom ko wannu mbɛt. O gasawi kɔ-wa in o wi-duk-zu o bíí kɔ-wa tɛ gbo nɛ mgbara wa, ɓɛɛ o wi nɔ‘i tɛ demɔ nyɛm nɛ ɗoŋ heembea ko o Juif, hee mɔ'ɔ nɛ wannu ha̧so nɛ́ nú ha̧ o be-Judéé lɛŋ ga.

³⁸«Ko o zikanu taar nɛ‘i ɓara so nu-Samarii ha̧ Judéé‘i, wi ndaɗi ɓɔn in nu-Judéé, ɓɛɛ wi zɔk wa hee nɛ kpɔk bíí ga. A̧ dúk nɛ́ ɗɔɔ ŋgai ko wan-ɗafi-sɔ̧.

³⁹«Mi ha̧gasa ye Ptolemais in o zikanu nɛ a̧-a̧ in a̧‘i ha̧ Sa̧-a̧ Tua ko Sɔ̧ sɛn Jerusalɛm, wen kaia mbɔi-a de nɛ tom-ɗafasɔ̧.

⁴⁰«Nɛ war kɔ‘m, zaŋ sede-wan nɛ‘i tɛ ndɛm nɛ fara nɛ‘i hoka, mi tɛ ha̧ kɔya-bu-mbɔi hee booro-ɓu-zua-mɔɔrɔ ga, wen tom'i dam ɗoŋ pɛ lɛŋ.

⁴¹«Hee mɔ'ɔ nɛ‘i dee so nɛti ga, kinii oi-mbɔi nɛ tɛ ɓɔn er o gasawi duk-zu-tom lɛŋ, wa tɛ mɔi̧ mɔi̧ gbai wen tom Tua ko Sɔ̧.

⁴²«Ɓɛɛ nɛ kɔya-bu-mbɔi ɓooro-mɔɔrɔ nɛ‘i ndɛm so ti pɛ lɛŋ, hee garama ko Sa̧a̧-Fara ga'i, wi tɛ ha̧ wa há̧ o wiɗafisɔ̧ nɛ a̧-a̧ zu tom.

⁴³«Wi nɛ tɛ yu mɔ nɛ́ɛ́ hu̧si̧ kɔ̧ Tua ko Sɔ̧ sɛn Jerusalɛm in sɛn zikanu kɔ̧-a̧, wen zu ŋma garama ko wannu, kóó ŋma wen nɛtɛ, mi tɛ e a̧ dúk zóóŋ, nɛ oi mbɔi n'aa a̧-a̧ nɛ̀nɛ́ zu nu-wan kɔ‘m mbɛt.

⁴⁴«O mbɔi-mbò sa̧a̧-Fara in wan mɛ ɗafa-a tɛ gbo nɛ kɔ̧ er-wannu.

⁴⁵«O mbɔi-mbò o garo in o ŋgara-zik-Jerusalɛm, in o wan nɛ‘i tɛ mbo nɛ o garo nɛ nu-Judéé nɛ́nɛ́ lɛŋ tɛ gbo nɛ kɔ̧ er-wannu mbɛt.»

⁴⁶Ŋgimbi nɛ Jonataŋ in o dukbíí zia o wen nɔ‘i, wa kpɛk na; wa ee tɛ gee mɔ, wen yi wa ɓɔna so tɛ o ɗaŋmɔ nɛ Demetrius dee so sɛn Israɛl, in o zɔm bɔnɛ n'aa pii zu wa mbɛt.

⁴⁷Wa kɔ̧ɔ̧ nɛ́ ɗɔɔ nu Alɛkzandrɛ, wen wa zɔka'e a̧ nɛ wi-tɔ̧ wen-ha̧-ga̧a̧mɔ ha̧ wa ti, ɓɛɛ wa nɛ ɗoŋ a̧ yaknɛ sɔ̧ɔ̧‘i.

⁴⁸Wannu Alɛkzandrɛ mɔi̧a̧ gba gii wibiro, ɓɛɛ gbo biro si tɛ Demetrius.

⁴⁹O wannu nɔ‘i yiitoo'i ku̧u̧ biro, ɓɛɛ o wibiro ko Alɛkzandrɛ yú mɔ yak. Demetrius nɛ ɗoŋ wa, ɓɛɛ nɛ́ɛ́ gan o wibiro kɔ̧-a̧.

⁵⁰A̧ bii biro nɛ ŋgai, hegɔɔ zɛ de nɛ̀nɛ́. Demetrius tɛɛ fe kale kpɔk wese'i.

⁵¹Alɛkzandrɛ toma wen’ɛ nɛ o gasawi si tɛ Ptolemee, wannu Egyptɛ:

⁵²«Zɔ́k kinii, mi pia nu kɔ‘m, ɓɛɛ mi duk zu kiti-wan ko o dáà kɔ‘m. Mi baa wan, mi mbɔla Demetrius, ɓɛɛ mi ɓár nu kɔ‘m.

⁵³«Mi bii a̧ nɛ mbetɛ, ɛɛ mbɔla a̧ in o wibiro kɔ̧-a̧ lɛŋ, ɓɛɛ mi dáŋ dúk zu kiti-wan kɔ̧-a̧.

⁵⁴«Kinii ɛɛ kifi sɛm, ɓɛɛ dika sɔsɔɔ‘i, mɛ há̧ bokobem kɔ-mɛ ha̧‘m nɛ kòò. Mi tɛ kifi befɔr-mɛ́, ɓɛɛ mi ha̧o mɔ nɛ nyɛma yi-mɛ in yi-a mbɛt h’ɛ́nɛ́.»

⁵⁵Wannu Ptolemee kifa nú hee mɔ'ɔ ga: «De yongo a dúk zu wese nɛ mɛ́ sia nɛ̀nɛ́ nù ko o dáà kɔ-mɛ, ká mɛ́ duk nɛ nù zu kiti-wan kɔ-wa'i.

⁵⁶«Ɓɛɛ kinii, mi tɛ demɔ nɛ mɛ yɔra'i ha̧ mɛ. Mɔ kpɔk, mɛ tɛ́, ɛɛ kpa ŋmaa sɛn Ptolemais, h’ɛ́ɛ́ mɛ zii ŋmaa sɛ́. Hegɔ, mi tɛ kifi fɔr-mɛ, hee mɔ'ɔ nɛ mɛ tɔ̧ɔ̧ ga.»

⁵⁷Ptolemee kura Egyptɛ in bokobem kɔ‘i Kleopatrɛ, ɓɛɛ wa nɛ́ɛ́ hɔ Ptolemais, nyɛm nɛ pɛ gɔmŋmaa nɛ pɛ ɓu-mɔɔrɔ-ɗoŋ-kpɔk-zua-yiitoo.

⁵⁸Wannu Alɛkzandrɛ wee ti Ptolemee; Ptolémée ha̧bokobem kɔ‘i Kleopatrɛ ha̧ Alɛkzandrɛ, ɓɛɛ wa de gbaŋa-ba-koo'i sɛn Ptolemais dúk dúk, nyɛm nɛ yí deemɔ ko o wannu.

⁵⁹Wannu Alɛkzandrɛ yɔra mɔ ha̧ Jonataŋ mɛ́ tɛ̀ɛ̀ kpa a̧.

⁶⁰Jonataŋ pɛɛ o gba dɔka bíí zununu yak nɛ̀nɛ́ si Ptolemais, ɓɛɛ a̧ nɛ́ɛ́ kpa o wannu nɔ‘i yiitoo'i. A̧ ha̧ o bu-mbɔi, in o lɔr, in o mɔ nɛtɛ nɛtɛ ha̧ wa in ha̧ o sɛm kɔ-wa, ɓɛɛ wa kpá desee zu a.

⁶¹Nɛ mɔ'ɔ nɛ o wi-iŋ-Sɔ̧-na, o wi-á-ma̧a̧da̧ mgbara o be-Israɛl, mɔi̧a̧ ŋmaa mɛ nasi a̧. Wa nɛ́ɛ́ ɗɔ a̧ ha̧ wannu, ɓɛɛ wannu pi nú tɛ wen kɔ-wa'i na.

⁶²A̧ ha̧nú ha̧ wa mɛ kpɔi̧ laa tɛ́ Jonataŋ yinɛ, mɛ pi̧ nɛ o gbɛ̧à laa-wan tɛ a. Ɓɛɛ wa de hegɔ.

⁶³Wannu baa a̧ e nù ka tɛ, ɓɛɛ tɔ̧ ha̧ o ŋgaiwi kɔ‘i: «Ɛnɛ mgbɔ́ a̧ gbónɛ́ si beegara saaye. Ɛnɛ hé mbea ha̧ o bíí‘e; ká ŋma bíí bá ɓaawen zu a gee na, ká‘i gɔn ɗɛɗɛ-a sɔɔgee zu ŋma mɔ na mbɛt.»

⁶⁴Ŋgimbi nɛ o wi-e-ɗɔra zɔka gasa a̧ nɛ wa gasi, nyɛm nɛ ɗoŋ wen ko wannu, in gbɛ̧ laawan zu koŋgo-ɓaa-a, wa lɛŋ yuu mɔ yak.

⁶⁵Wannu ha̧gasi, bá nɛ a̧ e mgbara o kuti de sɛm kɔ‘i, ɓɛɛ e a̧ nɛ gasawi zu o wibiro, in gasawi zu zikanu'i mbɛt.

⁶⁶Ɓɛɛ Jonataŋ si ɗoŋ Jerusalɛm zaŋ ga̧a̧mɔ in zaŋ desee.

⁶⁷Tɛ pɛ gɔmŋmaa nɛ pɛ ɓu-mɔɔrɔ-doŋ-kpɔk-zua-mɔɔrɔ, Demetrius 2, bem ko Demetrius 1, tɛ̀ɛ̀ nɛ nu-Krɛtɛ si nù ko o dáà kɔ̧-a̧.

⁶⁸Ŋgimbi nɛ wannu Alɛkzandrɛ zia nɛ nyɛrɛ-a, see-a ɗaŋa nyɛmna, ɓɛɛ a̧ si ɗoŋ Antiɔk woyo.

⁶⁹Demetrius dee wan zu zikanu Koelesyrii ha̧ Apollonius. Apollonius'i mɔi̧a̧ gba dɔka wibiro, nɛ́ɛ́ de gbagari ka̧ ye Jamnia, ɓɛɛ tom tɔ̧ ha̧ Jonataŋ, gasa wan-ɗafi-sɔ̧‘e:

⁷⁰«Ɓaa wi ba zu dúk nɛ ɛɛ, nɛ mɛ ɓɛɛ. Ɓɛɛ nɛ́ wen zu mɛ, a'm kifa nɛ mɔɔ-búù in mɔɔ-zɛkɛɗɛ'ɛ. Wen ge sá mɛ duk duka zu-mɛ nɛ ɛ́ɛ́, nɛ mgbara kaya’ɛ ge?

⁷¹«Kà mɛ nɛ ee ta nɛ o wibiro kɔ-mɛ nɛ mbetɛ, mɛ zir pii tɛ yɛ sɛn bɔkɔnu hɛ̧ɛ̧. Ɛɛ we ŋmaa'i, wen o wibiro, mɛ́ gasa ye lɛŋ, a̧-a̧ ɗoŋ am.

⁷²«Mɛ ak mɔ, á mɛ zii nyɛrɛ kɔ‘m, in nyɛrɛ ko o wi nɛ ye ɗoŋ am'i. O wi nɔ‘i tɔ̧ɔ̧‘e ɛnɛ nyɛm gee nyɛmaa mɛ yor ti yɛ na, wen wa pɛsa so o dáà k’ɛ́nɛ́ sinɛ ɗɔŋ nu kɔ-wa nɛti war yiitoo kaɗi.

⁷³«Mɛ nyɛm mɛ yor ti o ŋyaŋa-biro in o ŋgaŋa gii wibiro, sɛn bɔkɔnu, nɛ mgbara ta, kóó kɔ̧ ta, nɛ fara yu mɔ si sɛnɛ, bó na’ɛ na.»

⁷⁴Ŋgimbi nɛ Jonataŋ zia o wen ko Apollonius'i, zu-a zika yelem. A̧ hoka o bíí booro-ɓu, ɓɛɛ wa gbo Jerusalɛm. Nya kɔ̧-a̧ Simɔn nɛ́ɛ́ kpa a̧ wen gbaka a̧.

⁷⁵A̧ dee gbagari sɛn ka̧ Joppé. O wi saaye'i kpee o nugaro-ye lɛŋ, wen o ŋma wibiro ko Apollonius a̧-a̧ so hi̧i̧. Wa ku̧u̧ biro.

⁷⁶Bele daka o wi saaye, ɓɛɛ wa hu̧i̧ o nugaro-yé, ɓɛɛ Jonataŋ bá Joppé.

⁷⁷Tɛ zia nyɛrɛ mɔ‘i, Apollonius foo o wi-daŋ-nyaŋa booro-taar in o gba gii wibiro á yuwar, ɓɛɛ wa yak si Azotos, hee wa kɔ̧ɔ̧ mɛ ɓir ɓir yak ga; ɓɛɛ ka̧ a̧ zir so zir si bɔkɔnu mbɛt, wen a̧ e so kɔ̧-a̧ tɛ-a nɛ o gba dɔka wi-daŋ-nyaŋa kɔ̧-a̧.

⁷⁸Jonataŋ ndaka pata a̧ nɛ war Azotos, ɓɛɛ o wibiro ku̧ naŋ biro.

⁷⁹Apollonius kaia so o wi-daŋ-nyaŋa booro hu̧si̧ nɛ ɗoŋ.

⁸⁰Jonataŋ kɔɓa pɛ́r nɛ wa tuia nɛ ɗoŋ a̧‘i. O wi-daŋ-nyaŋa kɛra o wibiro kɔ̧-a̧, gbisi nɛ góó si tɛ wa, dika tutuyɛ hegɔɔ zɛ de nɛ̀nɛ́.

⁸¹O wi nɔ‘i dora gari, nyɛm nɛ ɗoŋ mbɔrɔ ko Jonataŋ, ɓɛɛ o nyaŋa ko o wisɛn mbɔi lɛŋ.

⁸²Simɔn kaia o bii kɔ‘i ye nɛ biro, tik nɛ zu o duk-biro wen nɛ o wi-daŋ-nyaŋa mbɔia so lɛŋ. Simɔn mbɔla o wisɛn, ɓɛɛ wa yú mɔ yak.

⁸³O wi-daŋ-nyaŋa pɛsa kpɔk kpɔk dám bɔkɔnu lɛŋ. O wi-yu-mɔ nɔ‘i hɔɔ Azot, ɓɛɛ wa ye kɔ Tua ko Dagɔn, sa̧a̧-fara ko geesɔ̧ kɔ-wa, wen mɛ kpasi.

⁸⁴Jonataŋ dɔɔ Azɔt in oi o ye mɛ ka̧-a̧ lɛŋ. A̧ kaia o mɔ kɔ-wa, ɓɛɛ a̧ pi̧ wee tɛ Tua ko Dagɔn nɛ oi o bíí nɛ hu̧sa̧ so kɔ̧-a̧ lɛŋ.

⁸⁵O bii lɛŋ, nɛ fea ɗɔɔ gbapaa in tɛ wee, dee booro-mɔɔrɔ-ɗoŋ-taar.

⁸⁶Jonataŋ kura hi̧i̧, ɓɛɛ nɛ́ɛ́ ba fara ka̧ Askalɔn. O wi saaye pɛɛ ŋmaa gbonɛ, we nɛ ti a̧ tululu mɛ kpɛk nɛ a̧.

⁸⁷Jonataŋ in o wibiro kɔ‘i sii sɛn Jerusaɛm nɛ gba dɔka o mbɔi-oi-biro.

⁸⁸Ŋgimbi nɛ wannu Alɛkzandrɛ zia nyɛrɛ mɔ‘i, a̧ ha̧o mbe gasi siti ha̧ Jonataŋ.

⁸⁹A̧ toma wele lɔr ha̧ a̧ wen ɓamaa tɛ laa hee wan nɛ‘i de dɔ̧ɔ̧dɔ̧ɔ̧ in o pɛrnam ko wannu’ɛ ga. Ɓɛɛ a̧ ha̧ saaye Akarɔn in zikanu-a lɛŋ ha̧ a̧ nɛ kɔ̧-a̧.