Read Northwest Gbaya 1 Makabee 11 Bible Online

1 Makabee 11 - Northwest Gbaya bible

1 Makabee 11

¹Wannu Egyptɛ mɔi̧a̧ o wibiro nɛ dɔkaa, hee o nyɛmɛ ka̧ zaŋ gbatɔp ga, in gba dɔka kombon-biro ɓɛɛ a̧ de gɔnta kii nɛ yuwar wen baa nu ko Alɛkzandrɛ e zu kɔ̧-a̧.

²A̧ nɛ́ɛ́ si nu-Syrii, nɛ de wen-ha̧-ga̧a̧mɔ. O wi saaye lɛŋ huia nu-ye kɔ‘i ha̧ a̧; wa wee ti a kpɛ́k nɛ a̧, wen wannu Alɛkzandrɛ ha̧so nú ha̧ bíí mɛ kpɛk for-wi nɛ dea.

³Ɓɛɛ dika tɛ yee ye nɛ Ptolemee ye lɛŋ, a̧ á nɛ o wibiro kɔ̧-a̧ sɛnɛ mɛ pɛm mɔ.

⁴Hee mɔ'ɔ n'aa hɛɗa nɛ́ Azotos ga, wa usa Tua ko geesɔ̧ Dagɔn nɛ bia so wee'i ha̧ a̧. A̧ zɔka Azotos nɛ mɔ ɗaŋa sɛnɛ lɛŋ, in zikanu-a mbɛt, o wɔr nɛ gbisi nɛ́nɛ́ lata lata, in o oi ŋgina bii nɛ bia wee ŋgimbi biro. Wa gbisa so wa yuwar nɛ wannu tɛ̀ɛ̀ ɓir so nɛ́nɛ́.

⁵Wa dala wen tom ko Jonataŋ ha̧ wannu ha̧ see-a mɛ kur; ɓɛɛ a̧ kifi nú-wen na.

⁶Jonataŋ kura nɛ zɔm bíí, nɛ́ɛ́ kpa wannu sɛn Joppé mɛ. Wa kpɛka ŋmaa, ɓɛɛ wa ɔ́ sɛn hi̧i̧.

⁷Jonataŋ ee wannu yuwar hɔ́ nú nanayi Ɛlɛutɛr, ɓɛɛ a̧ si ɗoŋ Jerusalɛm.

⁸Wannu Ptolemee ɔɔ wan zu o ye mɛ ka̧ zaŋ gbatɔp lɛŋ hɔ́ nɛ̀nɛ́ Silisii mɛ́ ka̧ tɔp mɛ, ɓɛɛ a̧ ta so kana nɛ ɗaŋmɔ mɛ de zu Alɛkzandrɛ.

⁹A̧ toma o gasawi si tɛ wannu Demetrius mɛ tɔ̧ ha̧ a̧‘e: «Mɛ́ tɛ, ɛɛ é nu-yɛ in ŋmaa. Mi tɛ ha̧ bokobem kɔ‘m nɛ duka nɛ kòò ko Alɛkzandrɛ ha̧ mɛ́, ɓɛɛ mɛ́ tɛ ɔ wan zu nu ko dáà kɔ-mɛ.

¹⁰Mi iŋ mɔ nɛ zika zu'm há̧ nɛ bokobem kɔ‘m ha̧ a̧ na, wen a̧ kia mɛ gbɛ‘m.»

¹¹Ptolemee tɔ̧ɔ̧ so ɗaŋ wen zu Alɛkzandrɛ hegɔ, wen n'aa kɔ̧ɔ̧ so mɛ ba nu kɔ̧-a̧.

¹²A̧ ɓara bem kɔ̧-a̧ er Alɛkzandrɛ bá ha̧ Demetrius. A̧ kpaia er-deemɔ kɔ̧-a̧ si tɛ Alɛk sandrɛ, ɓɛɛ o bíí iŋ ndaa sɛ́n kɔ̧-a̧.

¹³Ptolemee yee Antiɔk, ɓɛɛ gú laasɔ̧ɔ̧-wan Azii zu; a̧ mɔi̧a̧ laasɔ̧ɔ̧-wan yiitoo á zu-a, wan mɛ nu Egyptɛ in mɛ nu Azii.

¹⁴Ŋgimbi'i ká wannu Alɛkzandrɛ a̧-a̧ so sɛn Silisii, wen nɛ o wi zikanu'i yee so tɛ ŋgazu.

¹⁵Nɛ́ Alɛkzandrɛ be zii mɔ nɛ yaka, a̧ gboo biro si tɛ Ptolemee, wen mɛ bi a̧. Ptolemee gboo biro si tɛ a, nɛ gba gii o ŋgaŋa wibiro, ɓɛɛ nɛ́ɛ́ e yi naŋ-a̧.

¹⁶Alɛkzandrɛ yuu mɔ si nu Arabia, ɓɛɛ wannu Ptolemee gbin biro.

¹⁷Zabdiɛl, ŋma be Arab, ɓira zu Alɛkzandrɛ ɓɛɛ tom ha̧ Ptoléméé.

¹⁸Wannu Ptolemee mbɛt tɛ̀ɛ̀ fe zɛ yiitoo ɗoŋ aa'i, ɓɛɛ o wi saaye kum o wibiro n'aa aa so nɛ kɔ̧ ŋgara nɛ́nɛ́.

¹⁹Demetrius baa wan, nyɛm nɛ pɛ gɔmŋmaa nɛ pɛ ɓu-mɔɔrɔ-ɗoŋ-kpɔk-zua-mɔɔrɔ-doŋ yiitoo.

²⁰Ŋgimbi'i, Jonataŋ mɔi̧a̧ so o wi nu-Judéé, mɛ tik nɛ zu ŋgara nɛ a̧-a̧ so Jerusalɛm. Ɓɛɛ wa nɛ́k o taŋgaɗa-biro nɛ dɔkaa zik nɛ a̧.

²¹Nɛ́ mɔ'ɔ nɛ o ŋma be-Juif nɛ ee yuwar ko Sɔ̧ duk in nɛ sɛn dukbíí kɔ‘i, nɛ̀ɛ̀ kpa wannu mɛ dali ha̧ a̧‘e Jonataŋ tik nɛ ŋgara nɛ biro.

²²Tɛ zia o wen nɔ‘i, see-Demetrius ɗaŋa, ɓɛɛ a̧ kur nɛ hayaa yak si Ptolemais. A̧ yɔra kalata tom ha̧ Jonataŋ mɛ e biro dúk, ɓɛɛ ha̧ a̧ mɛ tɛ̀ɛ̀ kpa a̧ sɛn Ptolemais nɛ hayaa wen zia ŋmaa.

²³Jonataŋ zia hegɔ, ɓɛɛ ha̧ nú ha̧ o bíí mɛ de biro siti. A̧ hoka o ŋma kuti wi mgbara o be-Israɛl, in o wiɗafisɔ̧, a ɗoŋ a̧ ɓɛɛ a̧ nyɔŋ nin-a̧ mɛ nɛ́ yi biro nɛ ta-tɛ-a.

²⁴A̧ pɛ o bu-mbɔi, o lɔr, o laa in o ŋma demɔ nɛtɛ nɛtɛ nɛ dɔkaa yak nɛ̀nɛ́ kpá nɛ wannu, sɛn Ptolemais mɛ, ɓɛɛ wannu kpá desee zu a.

²⁵O ŋma be-Juif nɛ ee yuwar ko Sɔ̧ duk wee baa ɓaawen zu a.

²⁶Bɛɛ, wannu deemɔ si tɛ a, hee o kuti wan dee so ga, ɓɛɛ bá a̧ e nɛ gasawi mgbara o sɛm kɔ‘i

²⁷A̧ ee tom ko gasa wan-ɗafi-sɔ̧ ha̧ a̧ siti woyo, in o kuti gasi n'aa a̧-a̧ so zu-a lɛŋ, ɓɛɛ bá a̧ e mgbara o kuti sɛm kɔ‘i.

²⁸Jonataŋ aka ha̧ wannu mɛ fo nu Judéé in o zikanu ko Samarii taar yinɛ ɗɔɔ garama, ɓɛɛ há̧ nú mɛ ha̧ gba dita kií bu-mbɔi gɔmŋmaa taar ha̧ wannu oi-aa.

²⁹Wannu kpɛka, ɓɛɛ yɔr kalata'e tom ha̧ Jonataŋ:

³⁰«Nɛ́ mi wannu Demetrius, a fan nya'm Jonataŋ in dukbíí Juif.

³¹«Mɔ nd’ɛ́ɛ́ yɔra zu ‘nɛ́ tom ha̧ nam k’ɛ́ɛ́ Lastɛn, nɛ́ mɔ'ɔ nd’ɛ́ɛ́ tom h’ɛ́nɛ́ mɛ zii gba̧a̧‘e:

³²Mi, wannu Demetrius, fana dáà kɔ‘m Lastɛn.

³³Ɛɛ kpɛka mɛ de nɛ o demɔ sitɛ dukbíí Juif, wen zu o de taamɔ kɔ-wa zu yɛ. Wa nɛ o sɛm k’ɛ́ɛ́, ɓɛɛ wa demɔ in yɛ nɛ yuwar-a.

³⁴Ɛɛ ee wa zu nu Judéé in o zikanu nɔ'ɔ taar'e Aferema, Lydda in Ramataim, siti woyo. Wi ɓara so o zikanu nɔ‘i taar'i, gú nɛ wan mɛ ka̧-a̧ lɛŋ, nɛ́ nu Samarii ha̧ nɛnɛ ha̧ nu Judéé, wen gbaka o wiɗafisɔ̧ nɛ a̧-a̧ Jerusalɛm. Ɛɛ tɛ kpa o garama zu-nyɔnɔ in mɛ zu wayate, nɛ‘i gbo so ti pɛ lɛŋ ha̧ wannu’ɛ, oi-aa.

³⁵Ɛɛ gboo wa yinɛ tɛ yoɓa zu-lumɔ, o garama zu-tɔŋ in o garama ko wannu, in o ŋma garama nɛtɛ nɛtɛ nɛ pii h’ɛ́ɛ́.

³⁶Dika kinii yak nɛ̀nɛ́ sɔ̧ɔ̧i̧, o gɛŋa nɔ'ɔ beka kpai na ndó-ndó-ndó.

³⁷Hegɔ, ɛnɛ yɔr o wen nɛ a̧-a̧ zaŋ kalata’ɛ, ɛnɛ há̧ ha̧ Jonataŋ mɛ gai̧ nɛ kpɛ̧ɛ̧mɔ zu sa̧-a̧ kaya (Jerusalɛm).

³⁸Ŋgimbi nɛ wannu Demetrius zɔka'e ga̧a̧mɔ yee nu-wan kɔ‘i kaɗi, in nɛ ŋma wi-de-ŋgazu bó ɓɔna, a̧ gboo o wibiro kɔ̧-a̧ lɛŋ a nù, ɓɛɛ a̧ fo o nde sinɛ tɛ nam kɔ‘i. Nɛ́ o gɔni wibiro, n'aa hoka mgbara o gɔni-duk mɛ seekisi mɛ a ɓɔna ɓɛɛ. Hegɔ o wibiro, nɛ o dáà kɔ̧-a̧ ee so ha̧ a̧ lɛŋ, ku̧u̧ naŋ sɛna a̧.

³⁹Ŋgimbi nɛ Trifɔn, ŋma kpɔk mgbara o bíí ko Alɛkzandrɛ, zɔka'e o wibiro lɛŋ ku̧i̧ nɛ́ mɔ zu Demetrius, a̧ nɛ́ɛ́ kpa Yamlikos, be-Arab nɛ kasi Antiɔkus bem ko Alɛkzandrɛ.

⁴⁰A̧ yee ɗɛɗɛ Yamlikos mɛ ha̧ bem’ɛi ha̧ a̧ mɛ ba e tɛ wan oi dáà kɔ̧-a̧, ɓɛɛ a̧ ɓá o mɔ nɛ Demetrius ee zu a lɛŋ, in sɛna a̧ nɛ o wibiro sɛ́n so mbɛt ha̧ a̧. A̧ duka hi̧i̧ zɛ dɔk.

⁴¹Jonataŋ toma sitɛ wannu Demetrius, ak nɛ a̧ mbɛt'e a'a fó o wibiro kɔ̧-a̧ nɛ pɛm mɔ kɔ̧ ŋgara Jerusalɛm, in nɛ kɔ̧ o oi ŋgara nɛ́nɛ́ lɛŋ, gbonɛ́; wen wa ɓɔna so kɔ-wa zaŋ bii ŋmaa in Israɛl.

⁴²Demetrius kifa tɔ̧ ha̧ Jonataŋ: «Bó nɛ i̧i̧ a'm tɛ de ha̧ mɛ in ha̧ dukbíí kɔ-mɛ ɓɛɛ na. Ka'm kpa yuwar, mi tɛ dun mɛ in dukbíí kɔ-mɛ nɛ o gasi mbɛt.

⁴³Ɓɛɛ kinii, ɔ dee ha̧ mɛ́ mɛ tom o bíí mɛ ye ɗoŋ am tɛ biro, wen o wibiro kɔ‘m pɛsa lɛŋ, e'm duk»

⁴⁴Jonataŋ toma o kpɔra wibiro booro-taar ha̧ a̧ si Antiɔk mɛ, ɓɛɛ hɔaa kɔ-wa'i pi tortɛ tɛ wannu.

⁴⁵O wi saaye mɔi̧a̧ ŋmaa sɛn beegara, hee booro gɔmŋmaa nɛ booro-ɓu-yiitoo ga, wen kiaa mɛ gbɛ́ wannu.

⁴⁶Wannu nɛ́ɛ́ hu̧si̧ kɔ̧ kira-wan, ká o wi saaye duna so o beegara kaɗi, ɓɛɛ biro tik nu.

⁴⁷Wannu saa o Juif mɛ ɗoŋ wi; wa mɔi̧a̧ ŋmaa lɛŋ ka tɛ a̧. Wa pɛsa dam saaye lɛŋ, ɓɛɛ wa gbɛ́ o bíí hee booro gɔmŋmaa ga wese'i.

⁴⁸Wese'i mbɛt, wa dɔɔ ye, kai mɔɔ-oi nɛ dɔkaa, ɓɛɛ wannu kpasi.

⁴⁹Ŋgimbi nɛ o wi saaye zɔka'e o Juif baa ye, hee mɔ'ɔ nɛ wa kɔ̧ɔ̧ so ga, tɛ-wa lɛŋ gbina, ɓɛɛ wa a nu-wa tɛ hiɗimɔ, ai nɛ nú ha̧ wannu'e:

⁵⁰«Ɛnɛ nyɛi er-‘nɛ́ mɛ wiiko pii tɛ yɛ, ɓɛɛ nɛ o be-Juif a kaɗi bii ɛ́ɛ́ in bii saaye k’ɛ́ɛ́»

⁵¹Wa aa o boi-biro nu, ɓɛɛ wa kpaa ga̧a̧mɔ mgbara o ŋmaa. O be-Juif kpaa zɔm gasi yi wannu in yi o bíí nu-wan kɔ̧-a̧ lɛŋ. Nin o be-Juif hura dam nu'i lɛŋ, ɓɛɛ wa pɛ gba dɔka mɔɔ-oi si nɛ̀nɛ́ Jerusalɛm.

⁵²Wannu Demetrius daŋa mgbiti zu kiti-wan woyo, ɓɛɛ o bíí ɔm benaŋ tɛ ŋgimbi kɔ̧-a̧‘i.

⁵³Nɛ mɔ'ɔ n'aa era o mɔ n'aa ha̧nú mɛ de lɛŋ, ɓɛɛ a̧ tɛ̀ɛ̀ kpai dukaa kɔ̧-a̧ in Jonataŋ. Demetrius iŋ oi o demɔ nɛ Jonataŋ dea sitɛ a ɓɔna; a̧ pii ɗoŋ tɛ́ɛ́ tu̧ nɛ se-a siti woyo.

⁵⁴Ɗoŋ aa'i, Trifɔn pia in geɗɛk bem Antiɔkus. A̧ dee wan ha̧ a̧, ɓɛɛ hɛr mɛtɛwol-wan zu-a.

⁵⁵O wibiro, nɛ Demetrius gboo so a nu lɛŋ, mɔi̧a̧ si tɛ Trifɔn, ɓɛɛ wa bi Demetrius. Wa gana a̧, ɓɛɛ a̧ yu mɔ yak.

⁵⁶Trifɔn pɛɛ o foro-de-biro, ɓɛɛ nɛ́ɛ́ ɓár Antiɔk.

⁵⁷Daŋa ŋgaiwi Antiɔkus yɔra wen’ɛ tóm ha̧ Jonataŋ: «Mi ee tom ko gasa wan-ɗafi-sɔ̧ er-mɛ siti woyo. Mi ee mɛ nɛ gasawi zu o zikanu naar, mi baa mɛ mgbara o sɛm ko wannu mbɛt.»

⁵⁸A̧ toma o kpana nɛ‘i dee nɛ lɔr in o nyɛk-nyɔŋmɔ ha̧ a̧, ɓɛɛ a̧ e war há̧ a̧ mɛ nɔ mɔ kɔ o be-ɗele nɛ‘i dee nɛ lɔr, ha̧ a̧ mɛ pi o gbɛ̧ laa-wan, in ha̧ a̧ mɛ ɓam wele-lɔr yi-see laa kɔ̧-a̧ mbɛt.

⁵⁹A̧ baa nya kɔ̧-a̧ Simɔn e nɛ gasawi duk-zu-biro, tɛ o zikanu mɛ́, mgbara kaya nɛ‘i sa'e «taŋgaɗa Tyr» hɔ́ nɛ̀nɛ́ gbisi nu Egyptɛ-mɛ.

⁶⁰Jonataŋ yaka, ɓɛɛ yár nɛ kur nanayi Efratɛ ndén nɛ tɛ o gasa ye lɛŋ. O wibiro mɛ́ nu Syrii lɛŋ mɔi̧a̧ yá ka̧ tɛ-a̧ mɛ ye biro in a̧. A̧ hɔɔ Askalɔn, ɓɛɛ o be-saaye kpɛk a̧ dúk dúk.

⁶¹A̧ kura hi̧i̧ yak si Gaza, ɓɛɛ o nú-ye kpee so lɛŋ. A̧ tika ye'i, dɔ́ o zikanu mɛ ka̧-a̧ lɛŋ, ɓɛɛ a̧ kai o mɔ ko o wi-saaye.

⁶²O wi Gaza aia nú ha̧ Jonataŋ. A̧ nyɛia̧ er-a mɛ wiiko ha̧ wa; mɔ kpɔk, a̧ kaia o bem ko o gasawi kɔ-wa nɛ bara-biro, tóm si Jerusalɛm; a̧ yara zu o zikanu siti woyo hɔ́ sɛn Damas mɛ.

⁶³Jonataŋ zia'e o gasawi-duk-zu-biro ko Demetrius a̧-a̧ Kedɛs sɛn nu Galiléé in o gba dɔka wibiro, wen foo a zu tom kɔ̧-a̧ yinɛ.

⁶⁴Ɗoŋ n'a̧-a̧ ee so nya kɔ̧-a̧ Simɔn sɛn nu kɔ̧-a̧ kaɗi, a̧ wee ti wa.

⁶⁵Simɔn baa fara nú ye-Bɛtsur kɛr nɛ a̧, bí nɛ a̧, hegɔɔ zɛ dɔk.

⁶⁶O wi-saaye aia nú ha̧ a̧ mɛ kpɛk ga̧a̧mɔ nɛ wa ak er-a, ɓɛɛ a̧ kɔ̧ɗɔaa. Kóó hegɔ‘i mbɛt, a̧ foo wa gbó saaye, bá fara sɛnɛ, ɓɛɛ á o wibiro mɛ pɛm ye'i.

⁶⁷Jonataŋ in o wibiro kɔ‘i dee so gbagari sɛn ka̧ zaŋ Genesarɛ, ɓɛɛ wa hɔ́ sɛn bɔkɔnu Azɔr mɛ tutuyɛ sut.

⁶⁸Ha̧ wa zɔk wo, o gba gii wibiro ko o gɔni-duk nɛ mɔ'ɔ nɛ we ti wa tɛnɛ pii bɔkɔnu’ɛ. Mɔ kpɔk, wa hu̧sa̧ so o ŋma wibiro mgbara kaya wen tika Jonataŋ nɛ kɔrzu.

⁶⁹O gba gii wibiro nɛ̀ɛ̀ si tɛ o be-Juif. O wan nɛ hu̧sa̧ so tɛ‘i too bumɛ̀ɛ̀ a zan, ɓɛɛ biro bá.

⁷⁰O wibiro ko Jonataŋ lɛŋ yuu mɔ yak; kóó kpók ɓɔn na, kana nɛ o wi-duk-zu-biro yiitoo, Matatias bem ko Absalɔm, in Judas bem ko Kalfi a ɓɔna ɓɛɛ.

⁷¹Jonataŋ aka o laa tɛ, ɗú fuunu a zu, ɓɛɛ kɔfi Sɔ̧.

⁷²Hɔɗoŋ-aa, a̧ sii ɗoŋ mɛ bi wa. A̧ pɛsa wa sót sót, ɓɛɛ wa yu mɔ yak.

⁷³Ŋgimbi nɛ o wibiro kɔ̧-a̧ nɛ yuu so mɔ yak zɔka mɔ‘i, wa pia ɗoŋ tɛ a, ɓɛɛ wa ndak o wi nɔ‘i in a̧ hɔ sɛn Kedɛs kɔ̧ gbagari ko o wisɛn ɓɛɛ wa de gbagari kɔ-wa sɛn hi̧i̧.

⁷⁴Wese'i, o bíí fee mgbara o gɔni-duk hee booro taar ga, ɓɛɛ Jonataŋ si ɗoŋ Jerusalɛm.