Read Northwest Gbaya 1 Makabee 12 Bible Online

1 Makabee 12 - Northwest Gbaya bible

1 Makabee 12

¹Ŋgimbi nɛ Jonataŋ zɔka'e mɔ lɛŋ yá nɛ dea wen wi, a̧ hoka o bíí tom si Rɔm mɛ nɛ́ɛ́ fo wen nɔɔtɔk kɔ-wa in o be-Rɔm gboné in mɛ de a̧ woyo.

²A̧ toma o kale kpɔk kalata nɔ‘i si Spartɛ in o ŋma fara.

³O wi nɔ‘i nɛ́ɛ́ hɔ Rɔm, wa mgbɔɔ wa si kɔ̧ Tua-ba-keta ko o wi-duk-ti, ɓɛɛ wa tɔ̧: «Jonataŋ, gasa wan-ɗafi-sɔ̧, in dukbíí Juif toma ɛɛ tɛ́nɛ́ mɛ de sɛm in mɛ nɔ tɔk in'nɛ́ɛ́ woyo, hee wan mɛti ga.»

⁴O wi-duk-ti yɔra o kalata á er-wa mɛ́ kɛ̧ nɛnɛ ha̧ o wi-duk-zu zikanu kpɔk kpɔk lɛŋ, mɛ e ha̧ wa mɛ si nu Judéé zaŋ ga̧a̧mɔ.

⁵Kalata nɛ Jonataŋ yɔra ha̧ o be-Spartɛ nɛ́ mɔ'ɔ:

⁶«Jonataŋ, gasa wan-ɗafi-sɔ̧, o gasa wi-duk-ti ko dukbíí, o wiɗafisɔ̧ in oi o be-Juif lɛŋ fana o nya-wa be-Spartɛ.

⁷Kuti-a nɛti, Areios nɛ ɔɔ so wan zu ‘nɛ́ toma kalata ha̧ Onias, gasa wan-ɗafi-sɔ̧ tɔ̧ nɛnɛ‘e: «Ɛ́nɛ́ nɛ́ o nya-yɛ», hee mɔ nɛ yɔra nɛ ɗoŋ ga.

⁸Onias kpɛka betom nɛ dea nyɛmna, bá kalata tɔ́r, ɓɛɛ kpa'e nɛ́ o nu-wen nɔɔtɔk in dee sɛm a yɔra sɛnɛ nɛ mbetɛ.

⁹Nɛ k’ɛ́ɛ́, kóó nd’ɛ́ɛ́ bó nɛ haazi o mɔ nɔ‘i na, wen nɛ o sa̧-a̧ Kalata nɛ a̧-a̧ er-yɛ há̧ nɛ nɔɔŋgiɗi h’ɛ́ɛ́,

¹⁰ɛɛ toma ŋma bíí nɛnɛ mɛ de sɛm in mɛ nɔ tɔk in'nɛ́ɛ́ woyo, k’ɛ́ɛ́ tɛ̀ɛ̀ ya nɛ o gɔni-duk ti ‘nɛ́, wen pɛ ɔ dɔka nyɛmna n’ɛnɛ toma so nɛ kalata pii tɛ yɛ.

¹¹Ŋgimbi lɛŋ, tɛ o wese gbaŋa in o wese ɔmtɛ k’ɛ́ɛ́, tɛ o ɗafasɔ̧ in kɔfasɔ̧ k’ɛ́ɛ́ lɛŋ, tɛ-yɛ bí ɗoŋ ‘nɛ́ na, wen ɔ dee ha̧ tɛ-wi mɛ duk tɛ o nya-wi.

¹²Ɛɛ de nɛ nyɛŋɛ gasi k’ɛ́nɛ́.

¹³K’ɛ́ɛ́, o ŋgaŋamɔ in o biro dikiɗa yɛ batɛ, o wannu nɛ a̧-a̧ ka̧ tɛ yɛ mbɛt bii ŋmaa in yɛɛ.

¹⁴Ɛ́ɛ́ kɔ̧́ so mɛ sakali ‘nɛ́, ɛ́nɛ́ in oi o wi nɛ ya ɗoŋ yɛ, gú nɛ o sɛm k’ɛ́ɛ́, tɛ o ŋgimbi biro nɔ‘i na,

¹⁵wen gbakamɔ k’ɛ́ɛ́ tɛ nɛ Yiwese; ɛ́ɛ́ gboo kɔ̧ er o wisɛn k’ɛ́ɛ́, ɓɛɛ foe bá wa.

¹⁶Hegɔ, ɛɛ hoka Numenius bem ko Antiɔkus, in Antipatɛr bem ko Jazɔn, ɓɛɛ ɛɛ tom wa si tɛ o be-Rɔm mɛ ɗafi war gba̧‘a̧ sɛm in nɔɔtɔk mgbara ɛ́ɛ́ in wa woyo.

¹⁷Ɛ́ɛ́ tɔ̧ɔ̧‘e wa a hɔ tɛ‘nɛ́ mbɛt, wa a fan'nɛ́, á̧ wa a ha̧ o kalata zu mbe yuwar sɛm in nɔɔtɔk k’ɛɛ‘i h’ɛ́nɛ́.

¹⁸Ɔ so dee h’ɛ́nɛ́ mɛ kifi nu h’ɛ́ɛ́ zu mɔ‘i.

¹⁹Ɛnɛ zii mɔ nɛ wa toma so ha̧ Onias:

²⁰«Mi Areios, wannu Spartɛ, mi fana Onias, gasa wan-ɗafi-sɔ̧.

²¹«Zaŋ ŋma be kalata nɛ yɔra so zu o be-Spartɛ in o be-Juif, wi kpaa'e wa lɛŋ nɛ́ o nyawi in o bezaŋ Abraham.

²²«Kinii nd’ɛ́ɛ́ iŋa hego kaɗi'i, ɔ dee h’ɛ́nɛ́ mɛ yɔr mɔ zu de dukaa k’ɛ́nɛ́ h’ɛ́ɛ́.

²³«K’ɛ́ɛ́, kifanu k’ɛ́ɛ́ nɛ́ mɔ'ɔ: o mɔdai in o kpaamɔ k’ɛ́nɛ́ lɛŋ nɛ́ k’ɛ́ɛ́, ɓɛɛ o war k’ɛ́ɛ́ nɛ́ k’ɛ́nɛ́. Ɛ́ɛ́ kɔ̧ɔ̧ so h’ɛ́nɛ́ mɛ iŋ mɔ‘i.»

²⁴Jonataŋ zɔka'e o gasawi-duk-zu-biro ko Demetrius pia ɗoŋ woyo, nɛ gba dɔka wibiro gan kuti-a mɛ bi wi.

²⁵A̧ kura mɛ nɛ Jerusalɛm, ɓɛɛ a̧ gbó biro si tɛ-wa si nu ko Hamat, wen a̧ ha̧ so gee be yuwar ha̧ wa mɛ ye nu kɔ̧-a̧ na.

²⁶A̧ toma o wi-kpe-ti-naŋ-mɔ si kɔ̧ gbagari kɔ-wa. O wi nɔ‘i pia ɗoŋ tɔ̧ ha̧ a̧‘e o wisɛn ɗafi nɛ mɔ mɛ tir a zu wa mɛ zaŋ zɛ.

²⁷Tɛ ŋgimbi yee-wese, Jonataŋ ha̧nú ha̧ o bíí kɔ‘i lɛŋ mɛ nyaŋ yá, in mɛ a o boi-biro zɛ́k zɛ́k ka̧ tɛ, ya nɛ̀nɛ́ gɛ́ɗɛ́ gɛ́ɗɛ́ mɔ sa̧ nɛ̀nɛ́. A̧ aa o wi-ya-ti-biro zik nɛ gbagari ɗɛ́kɛ́t.

²⁸Ŋgimbi nɛ o wisɛn kɔɓa'e Jonataŋ in o bíí kɔ‘i yá gɛ́ɗɛ́ gɛ́ɗɛ́ wen biro wo, kii baa wa, ɗɛɗɛ-wa gɔna; wa yee o wee nɛ kɔ̧ gbagari kɔ-wa nɛ̀nɛ́, ɓɛɛ wa yu mɔ yak.

²⁹Hegɔ, nɛ́ mɛ́ tutuyɛ a̧ Jonataŋ in o bíí kɔ‘i iŋa nɛ yakaa kɔ-wa ɓɛɛ; wen wa zɔk so nɛ wee fara nyɛkaa.

³⁰Jonataŋ ndaka ɗoŋ wa nɛ̀nɛ́, ɓɛɛ kpa wa na, wen wa kuu so kɔ-wa nanayi Eleutɛr kaɗi.

³¹Jonataŋ zika tɛ in o be-Arab nɛ‘i sa'e o be-Zapadéé. A̧ gana wa nɛ ŋgai, ɓɛɛ a̧ kai o mɔ kɔ-wa.

³²Ɗoŋ n'aa kura gbagari kaɗi, a̧ nɛ́ɛ́ hɔ Damas, ɓɛɛ a̧ yar ndɛ́n nɛ zikanu'i lɛŋ.

³³Simɔn mbɛt baa yuwar, ɓɛɛ nɛ́ hegɔɔ hɔ́ saaye Askalɔn in tɛ o ŋgara mɛ ka̧-a̧. A̧ zika tɛ-a in Joppé woyo, ɓɛɛ bá a.

³⁴A̧ kɔɓa mbɛt'e o wi-saaye kɔ̧ɔ̧ mɛ e ŋgara ha̧ o bíí ko Demetrius. Bɛɛ a̧ á o wibiro hi̧i̧ wen pɛma ye'i.

³⁵Ɗoŋ nɛ Jonataŋ pia kaɗi, a̧ mɔi̧a̧ o wi-ya-zu-dukbíí lɛŋ, ɓɛɛ wa e zu-a mɛ mbo o ŋgara sɛn nu-Judéé,

³⁶mɛ mbo o gɛ́r-garo Jerusalɛm si ŋgɔn in mɛ mbo ŋgɛŋ kɛ̧ nɛ mgbara ŋgara in oi ye wen mɛ e ŋgara'i ɛnɛ, wen ka o wi kɔ̧ ŋgara tɛ̀ɛ̀ hi̧fi̧ mɔ, kóó, tɛ̀ɛ̀ ɗɔ́r mɔ.

³⁷Wa mɔi̧a̧ ŋmaa mɛ ɗafi ye woyo, wen garo nɛ dúk so nɛ ka̧ zaŋ gbor gbor-yi si daŋa-wese'i gbina so a nu. Wa ɗafa nu-gara, nɛ‘i sa'e Kafenata woyo.

³⁸Simɔn mboo ye Adidan nɛ dúk si bɔkɔnu'i woyo. A̧ ŋgoo a̧, ɓɛɛ a̧ á o kpar-nu-a gu nɛ o mɔɔ-saŋa-a mbɛt.

³⁹Trifɔn kii so nɛ yuwar mɛ ɔ wan zu nu Azii, mɛ hɛr mɛtɛwol-wan, in mɛ ba wannu Antiɔkus.

⁴⁰Kii de so nɛ a̧, wen ká Jonataŋ tɛ̀ɛ̀ dor a̧, in ka a̧ tɛ̀ɛ̀ tik zu a nɛ biro. Hegɔ a̧ kia yuwar mɛ ba Jonataŋ in mɛ gbɛ a̧. A̧ kura ɓɛɛ nɛ́ hɔ Bɛtsan.

⁴¹Jonataŋ hoka o kpɔra wibiro booro ɓu-naar we nɛ ti a̧, ɓɛɛ a̧ nɛ́ɛ́ hɔ Bɛtsan.

⁴²Trifɔn zɔka'e Jonataŋ tɛa in o wibiro nɛ dɔkaa, ɓɛɛ we gee wee baa a̧ na.

⁴³A̧ kpɛka a̧ ndɛndɛndɛ, usi a̧ ha̧ o sɛm kɔ‘i lɛŋ, ha̧ o zɔm mɔ sɔɔgee ha̧ a̧, ɓɛɛ há̧ nú ha̧ o sɛm in o wibiro kɔ‘i mɛ mbo zu ha̧ Jonataŋ hee wi ga.

⁴⁴A̧ tɔ̧ ha̧ Jonataŋ: «Ŋma biro nɛ ɓili yɛ bó na, ɓɛɛ sá mɛ de bɔɔ ha̧ o wi nɔ'ɔ mɛ mbɔi lɛŋ wen ge? Mɛ fó wa sinɛ ɗoŋ tɛ kɔ-wa ɓɛɛ.

⁴⁵Mɛ hók nɛ o ŋma wi nɛ tɛ e mɛ, ɓee mɛ tɛ́, ɛ́ɛ́ yak Ptolemais. Mi tɛ ha̧ ye'i, in o oi dɔka ŋgara lɛŋ ha̧ mɛ; o oi wibiro in o wi-duk-zu-tom mbɛt, ɓɛɛ mi sia kɔ‘m, wen nɛ́ wen mɔ‘i a̧‘m tɛa nɛ̀nɛ́ hɛ̧ɛ̧.

⁴⁶Jonataŋ bɛ̧́ nu-a na, ɓɛɛ de hee mɔ'ɔ n'aa tɔ̧ɔ̧ ga. A̧ foo o wibiro kɔ̧-a̧ sinɛ ɗoŋ, yak si nu-Judéé.

⁴⁷A̧ ɓɔna in o bíí booro-taar; a̧ kɛ̧ɛ booro-yiitoo tóm si Galiléé. Ɛ̧ɛ̧ nɔ'ɔ booro’ɛ yak kɔ‘i in a̧.

⁴⁸Hegɔ ŋgimbi nɛ Jonataŋ yee Ptolemais kaɗi, o wi-saaye kpee o nu-ye lɛŋ, ɗɛ́k a̧ sót, ɓɛɛ gbɛ́ o wi nɛ yee mɔ in a̧ nɛ gbapaa lɛŋ.

⁴⁹Trifɔn toma o wibiro in o wi-daŋ-nyaŋa-biro si Galiléé in si «Gasa Bɔkɔnu» mɛ nɛ́ɛ́ kum o bíí ko Jonataŋ lɛŋ.

⁵⁰O wi nɔ‘i zia'e wa baa Jonataŋ, ɓɛɛ wa gbɛ́ a̧ in o wi nɛ nɛ́ɛ́ in a̧ mbɛt; Wa ha̧nɔɔŋgiɗi ha̧ o ŋmaa, ɓɛɛ wa nɛ́k ye ŋmaa sír sír yá nɛ̀nɛ́ gɛ́ɗɛ́ gɛ́ɗɛ́ wen biro;

⁵¹ŋgimbi nɛ o wi-ndak-wa zɔka'e wa de nɛ biro wen yaa kpasa wo, wa sii ɗoŋ.

⁵²Wa sii lɛŋ zóóŋ hɔ sɛn nu-Judéé. Wa hi̧a̧ Jonataŋ in o wi nɛ ee so a̧ nɛ́nɛ́, ɓɛɛ gasa kii ba wa. O be-Israɛl lɛŋ zima fio.

⁵³O zuduk mɛ ka̧ tɛ-wa lɛŋ kii so mɛ kum nɛ wa. Tɔ̧ɔ̧mɔ kɔ-wa'e: «o be-Israɛl bó nɛ ŋma wan, kà bó nɛ ŋma mɔɔ-e-nɛ-ta ɓɔ na. Ɛɛ dik a zu-wa kinii ŋgaɓo, hegɔ tɛ o bíí tɛ́ bi ɗoŋ wa.»