Read Northwest Gbaya 1 Makabee 13 Bible Online

1 Makabee 13 - Northwest Gbaya bible

1 Makabee 13

¹Simɔn zia'e Trifɔn mɔi̧a̧ gba dɔka wibiro mɛ nɛ si nu-Judéé, mɛ nɛ́ɛ́ yai nɛ a̧ yinɛ.

²Ŋgimbi n'aa zɔka'e kii in bele zar nɛ o dukbíí, a̧ daŋa si Jerusalɛm, mɔi̧ o bíí lɛŋ,

³ɓɛɛ tɔ̧ wen’ɛ ha̧ nɛ nɔɔŋgiɗi ha̧ wa: «Ɛ́nɛ́ iŋa mɔ nɛ mi, o zɔmwi kɔ‘m in o wi-nutua ko dáà kɔ‘m dea zu Heembea in Sa̧a̧-Fara; ɛnɛ iŋa o biro in o bɔnɛ nɛ hɔɔ zu yɛ mbɛt.

⁴Nɛ mɔ‘i a o zɔmwi kɔ‘m lɛŋ fee nɛ̀nɛ́ wen zu Israɛl, ɓɛɛ mi ɓɔn nɛ̀nɛ́ ɛn'am.

⁵Kóó ɗaŋsee a duk hee ge, taamɔ wen kpasa zu'm a nyɛi̧ nɛ‘m, wen duka-kpasa kɔ‘m de gan ko o zɔmwi kɔ‘m na.

⁶Mi tɛ bi nɛ biro zu dukbíí kɔ‘m, zu Sa̧a̧-Fara, in zu o koo in o bem k’ɛ́nɛ́'ɛ̧, wen sɛnmɔ mɔi̧a̧ o dukbíí nɛtɛ nɛtɛ a zu ŋmaa wen kumá ɛɛ.»

⁷Tɛ zia o wen nɔ‘i, see dukbíí kura,

⁸ɓɛɛ wa kifi nɛ hee-gɛr'e: «Mɛ́ nɛ́ gasawi k’ɛ́ɛ́, oi nu o zɔmwi kɔ-mɛ Judas in Jonataŋ.

⁹Mɛ dúk ti h’ɛ́ɛ́ tɛ biro, ɓɛɛ ɛɛ tɛ demɔ lɛŋ nɛ mɛ tɛ tɔ̧.»

¹⁰A̧ mɔi̧a̧ o wibiro lɛŋ. Tɛ-a gbɛŋa tɛ gbɛɛ gɛr o garo Jerusalɛm, ɓɛɛ a̧ a o ŋgara zik nɛ ye'i.

¹¹A̧ toma Jonataŋ bem ko Absalɔm in gba dɔka wibiro si Joppé. Jonataŋ‘i ndaka o wi saaye'i, ɓɛɛ de ye hi̧i̧.

¹²Trifɔn kura Ptolemais in gba dɔka wibiro ye nɛ nu-Judéé. A̧ baa Jonataŋ nɛ bara-biro yak nɛ̀nɛ́.

¹³Simɔn tɛ̀ɛ̀ de gbagari kɔ‘i sɛn Adida, nu bɔkɔnu.

¹⁴Ŋgimbi nɛ Trifɔn zia'e Simɔn baa fara oi zɔmwi kɔ̧‘i Jonataŋ, ɓɛɛ nɛ mɔ'ɔ n'aa ɗafi nɛ mɔ mɛ tik wi nɛ biro wo, a̧ toma o betom mɛ tɔ̧ ha̧ a̧:

¹⁵«Nɛ́ wen zu o mbɔi garama-wan, nɛ ɓɔna zu nya-mɛ Jonataŋ bem ko Absalɔm, nyɛm nɛ ɗoŋ gasa tom n'aa duk so zu-a, ɛɛ dor nɛ a̧ ɓɔn hɛ̧ɛ̧.

¹⁶Kinii, mɛ tom sede hee gba dita kii bu-mbɔi gɔmŋmaa ga, in o bem kɔ̧-a̧ yiitoo nɛ bara-biro tɛ́nɛ́, wen ká a̧ tɛ̀ɛ̀ yu mɔ yak, ŋgimbi nd’ɛ́ɛ́ tɛ gbo nɛ a̧. Kà ɛɛ a kpaa kaɗi, ɓɛɛ ɛɛ gboo a̧.»

¹⁷Zua'i nɛ Simɔn iŋa kana nɛ dea'e nɛ́ wen-ndela'i, a̧ toma baa sede in kaia o bem nɔ‘i, wen ká tɛ̀ɛ̀ dak nyimsea ko dukbíí pi zu a,

¹⁸ká o bíí tɛ̀ɛ̀ tɔ̧‘e: ' Jonataŋ fea wen n'am tom mbɔi in o bem nɔ‘i na.’

¹⁹A̧ toma o bem nɔ‘i in o gba dita kií bu-mbɔi gɔmŋmaa. Ɓɛɛ Trifɔn ɔra nɛ a̧, ɓɛɛ gbo Jonataŋ na.

²⁰Ɗoŋ mɔ‘i, Trifɔn kura yak mɛ tik zikanu, in mɛ ɗaŋ o mɔɔ-zu-a. A̧ gɔŋa nɛ yuwar Adora; Simɔn in o wibiro kɔ‘i bó gɔ́n so nɛ nu-wa, fara lɛŋ nɛ wa kɔ̧ɔ̧ mɛ nɛ́.

²¹O wi kɔ̧ ŋgara Jerusalɛm mbɛt toma o betom si tɛ Trifɔn, kɔfi nɛ a̧ ha̧ a mɛ tɛ nɛ hayaa nɛ war gbara mɛ kpa ŋmaa in wa, in mɛ kai o nyɔŋmɔ tɛ́nɛ́ ha̧ wa.

²²Trifɔn ɗafa o gii nyaŋa-biro kɔ‘i lɛŋ wen yakaa. Nɛ mɔ nɛ gba kórò-ɓɔrɔ hɔɔ mɛ zaŋ-zɛ‘i, ɓɛɛ a̧ kpa yakaa na. A̧ kura ɓɛɛ yak si nu Galaad.

²³A̧ gbɛ́ɛ́ Jonataŋ bem ko Absalɔm sɛn ka̧ Baskama, ɓɛɛ wa gun a̧ hi̧i̧.

²⁴Ɓɛɛ Trifɔn si kɔ‘i ɗoŋ nu kɔ‘i.

²⁵Simɔn toma kai o gba̧a̧tɛ-nya kɔ‘i Jonataŋ, ɓɛɛ nɛ́ɛ́ gun wa kɔ̧ pɛsi sɛn Mɔdin, ye ko o zómdáà kɔ̧-a̧.

²⁶Nu Israɛl lɛŋ hi̧a̧ a̧ nyɛmna, ɓɛɛ zim a̧ hegɔɔ zɛ dɔk.

²⁷Simɔn mboo pɛsi kɔ dáà in o zɔmwi kɔ‘i nɛ kusaa gan, kà‘i dúk nɛ nyɛia̧ zɔk nɛ̀nɛ́. A̧ mboo ka̧ pɛsi nɛ ti in nɛ ɗoŋ mbɛt nɛ de yɔka-ta

²⁸Ɓɛɛ a̧ mbo o ta mɔɔrɔ-ɗoŋ-yiitoo nɛ kusa hee mbiŋ ga, zɔk nɛ ŋmaa, zu o pɛsi nɔ‘i ha̧ dɛ́, náá in o zɔmwi kɔ̧-a̧ naar'i, ka tɛ-wi mbaŋ ɗoŋ wa ɓɔnsɛnɛ.

²⁹A̧ mboo o ŋma kusa mbiŋ nɛ gasa zik nɛ o kuti-aa, ɓɛɛ a̧ gai o boi-biro zaŋ o mbiŋ nɔ‘i. A̧ dee giɔ̧ o kombom-biro ka tɛ o boi-biro nɔ‘i mbɛt, wen ha̧ o wi nɛ tɛ yar nɛ zu gbatɔp lɛŋ mɛ zɔk.

³⁰Nɛ́ hegɔ a̧ o pɛsi n'aa mboo so sɛn Mɔdin'i yá nɛ̀nɛ́ hɔ sɔsɔɔ‘i.

³¹Ŋgimbi'i, Tryfɔn dee gɔnta ɔ́r nɛ Antiɔkus ɗaŋa-wan, ɓɛɛ gbɛ́ a̧.

³²A̧ ɔɔ wan oi a̧, hɛ́r mɛteɛwol ko wannu Azii, ɓɛɛ dak o ŋga ɗaŋmɔ pi zu nu.

³³Simɔn mboo o ŋgara nu-Judéé woyo, mbó o kusa taŋgaɗa-pɛm-mɔ zik nɛ wa, in o ŋga garo nɛ oi o kparnu-a̧ in o mɔɔ-saŋ nu-a̧. A̧ gbisa o nyɔŋmɔ á nɛ kɔ̧ o ŋgara nɔ‘i.

³⁴Nɛ mɔ'ɔ nɛ Simɔn toma si tɛ wannu Demetrius kɔfi nɛ a̧ wen mɛ zir o garama zu nu-Judéé yinɛ, wen Tryfɔn ɗaŋa so mɔ lɛŋ.

³⁵Wannu Demetrius ha̧kifanu nyɛm nɛ ɗoŋ o wen nɔ‘i, ɓɛɛ yɔr kalata’ɛ tóm ha̧ a̧:

³⁶«Nɛ́ mi, wannu Demetrius a fan Simɔn, gasa wan-ɗafi-sɔ̧ in sɛm ko o wannu, gú nɛ o wi-duk-ti in dukbii Juif lɛŋ.

³⁷«Ɛɛ kpaa mɔɔ-gu-zu nɛ‘i dee nɛ lɔr, in sore n’ɛnɛ toma h’ɛɛ‘i. Ɛɛ kpɛka mɛ kpa kpasa ga̧a̧mɔ mgbara yɛ in'nɛ́ɛ́, in h’ɛ́ɛ́ mɛ tɔ̧ ha̧ o wi-duk-zu-tom mɛ zir garama h’ɛ́nɛ́ mbɛt

³⁸O mɔ nd’ɛ́ɛ́ ee so zu-a mɛ de h’ɛ́nɛ́ lɛŋ kpai na, ɓɛɛ o ŋgara n’ɛnɛ mboo nɛ́ k’ɛ́nɛ́.

³⁹O yɔɔkaya in o ɗaŋmɔ n’ɛnɛ dea hɔ kinii lɛŋ, ɛ́ɛ́ ee h’ɛ́nɛ́, in o zu-mɔ ko wannu nɛ ɓɔna er'nɛ‘i mbɛt. Ká‘i nɛ baa so ŋma garama nɛtɛ sɛn Jerusalem ndé, ká‘i bá ɓɔna.

⁴⁰O ŋma mgbara ‘nɛ́ nɛ zɔka'e wi nyɛma mɛ ye zaŋ o wibiro-pɛm-ye wo, wa'a há̧ nin-wa, ɓɛɛ ga̧a̧mɔ a dúk mgbara yɛ.»

⁴¹Kpaŋá-bara koo gɔni-duk yuu zu Israɛl nyɛm nɛ pɛ gɔmŋmaa nɛ pɛ ɓu-mɔárɔ ɗoŋ yiitoo.

⁴²Ɓɛɛ dukbíí ye tɛ yɔra o zɛ́-mɔ nɛ wa de lɛŋ, in o nɔɔtɔk, ŋgimbi «kuti pɛ-wan ko Simɔn, gasa wan-ɗafi-sɔ̧, wi-duk-ti ko o wibiro, in wan ko o Juif.»

⁴³Ŋgimbi'i, Simɔn baa zu dúk nɛ Gazara, ɓɛ a̧ nɛ́k o wibiro zik ɗoŋ ye'i lɛŋ. A̧ mboo ŋma taŋgaɗa nɛ a̧-a̧ nɛ naŋ, nɛ ɓɔn kpɔk fara na, ɓɛɛ ir a̧ e nugaro-ye, a̧ nasi ŋma taŋgaɗa ye'i, ɓɛɛ bá a̧.

⁴⁴O bíí kpiɗa nɛ kɔ̧ taŋgaɗa'i á si beegara, ɓɛɛ o wi-saaye lɛŋ sakali

⁴⁵O wi-saaye'i in o koo gú nɛ o bem kɔ-wa lɛŋ daŋa zu garo, a̧k nɛ o laa kɔ‘i, ai nɛ nú ha̧ Simɔn mɛ kpa ga̧a̧mɔ in wa.

⁴⁶Wa tɔ̧ɔ̧: «K’ɛ́nɛ́ zɔ́k nɛ o ɗaŋmɔ k’ɛ́ɛ́ de nɛ mɔ pii tɛ-yɛ na. Ɛnɛ dé nɛ kó h’ɛ́ɛ́ ɓɛɛ.»

⁴⁷Simɔn ɗafa mgbara tɛ in wa, ɓɛɛ bi wa na. Mɔ kpɔk, a̧ ndaka wa yinɛ saaye, sá̧ war tɛ tua nɛ o geesɔ̧ a̧-a̧ so kɔ̧-a̧ lɛŋ, ɓɛɛ a̧ ye saaye ɗɔɔ o gima-zɔn-Sɔ̧ in wan mɛ tok de yoŋgo.

⁴⁸A̧ foo ndiŋ lɛŋ yinɛ sɛn Gazara, ɓɛɛ a̧ á nɛ o wi-kasi-Heembea sɛnɛ. A̧ ŋgoo ye'i nɛ nɔ̧a̧-a̧, ɓɛɛ a̧ mbo tua-ɔɔ-sɛnɛ kɔ̧-a̧.

⁴⁹O wi kɔ̧ ŋgara Jerusalɛm, nɛ kpá so yuwar gboaa in yara nu, wen hifa mɔ kóó ɗɔraa na’ɛ, zɔka bɔnɛ-wɔ nyɛmna, ɓɛ kaɓa kum o ŋma bíí nɛ dɔkaa.

⁵⁰Wa hiɗa mɔ si tɛ Simɔn ha̧ a̧ mɛ kpa ga̧a̧mɔ in wa, ɓɛɛ a̧ kpɛk. A̧ ndaka wa yinɛ fara'i, ɓɛɛ a̧ sá̧ war-tɛ ŋgara oi o ndiŋmɔ.

⁵¹O Juif yee saaye'i tɛ ɓu-yiitoo-zua-taar ɔɔ-zɛ ko yiitoo fiozɛ, tɛ pɛ gɔmŋmaa nɛ pɛ ɓu-mɔɔrɔ-doŋ-yiitoo-zua-kpɔk, nɛ zɔm o gaiamɔ, o ŋdɛŋgɛ sɛn er, o koloŋ, o kuŋge, o yaa-koŋgoŋ, in o gima-zɔn-Sɔ̧, wen nɛ wa gbɛɛ ŋma gasa wisɛn ko o be-Israɛl yinɛ.

⁵²Simɔn hee mbea ha̧‘i mɛ de gbaŋa, dam ɗoŋ pɛ lɛŋ nyɛm nɛ zɛ‘i, nɛ desee. A̧ ŋgoo kaya nɛ dúk nú ŋgara mɛ́ nɛ nɔ̧a̧-a̧, ɓɛɛ a̧ ɔ́ sɛn hi̧i̧ in o bíí kɔ̧-a̧.

⁵³Simɔn zɔka'e bem kɔ‘i Jean nɛ́ kpasa wiwii. A̧ ee a̧ nɛ gasawi zu o wibiro lɛŋ, ɓɛɛ Jean de ye sɛn Gazara.