Read Northwest Gbaya 1 Makabee 14 Bible Online

1 Makabee 14 - Northwest Gbaya bible

1 Makabee 14

¹Tɛ pɛ gɔmŋmaa nɛ pɛ ɓu-mɔɔrɔ-ɗoŋ-yiitoo-zua-yiitoo, wannu Demetrius mɔi̧a̧ o wibiro kɔ‘i, ɓɛɛ yak si nu-Medii, mɛ kii o wi nɛ tɛ gbak a̧ wen bii Tryfɔn.

²Ŋgimbi nɛ Arzasɛ, nɛ ɔɔ so nɛ wan zu nu-Pɛrsɛ in nu-Medii zia'e Demetrius yee nu kɔ‘i, a̧ toma ŋma gasawi-duk-zu-biro kɔ̧-a̧ mɛ nɛ́ɛ́ ba Demetrius'i nɛ kpasa.

³Wi’ɛi yaka nɛ́ɛ́ gan o wibiro ko Demetrius, bá a̧, ɓɛɛ mgbɔ a̧ nɛ́nɛ́ ha̧ Arzasɛ, ɓɛɛ Arzasɛ pi a̧ zɔɓɔ.

⁴Nù ga̧-a̧ ŋgimbi wan ko Simɔn, ɓɛɛ a̧ kii so nɛ de-dukaa ko dukbíí. Ŋgimbi kɔ̧-a̧‘i, o bíí kɔ̧-a̧ lɛŋ kpɛka wan kɔ̧-a in gasamɔ kɔ̧-a̧.

⁵A̧ baa Joppé, hur nɛ nin-a̧ siti. A̧ ee ye'i nɛ nu-horo wen baa kombon, hu̧i̧ nɛ yuwar si o seekisi.

⁶A̧ foo o gbisi nu kɔ̧-a̧ si ɗoŋ nɛ nyɛia̧a, ɓɛɛ a̧ kasi nu kɔ̧ nɛ nɔaa.

⁷A̧ mɔi̧a̧ o bara-biro piinɛ nɛ dɔkaa; a̧ baa Gazara, Bɛtsur, in ŋgara (Jerusalɛm), ɓɛɛ a̧ fo o ŋdiŋmɔ lɛŋ yinɛ zaŋ o ye nɔ‘i. Ŋma bíí kpɔk mɛ yor ti a̧ bó na.

⁸O nde wá so fɔ kɔ‘i nɛ kpee-see; nù dɛ́m nyɔnɔ nɛ dea, o te-bɔkɔnu mbɛt wai wai.

⁹O sɔkawi nɛ yá so beegara lɛn tɔ̧ so nɛ nyɛrɛ de-dukaa. O be-ŋgaiwi ɗafi so nɛ tɛ nɛ o gba de laa-gbaŋa in o laa-biro.

¹⁰Simɔn toma o zɔm nyɔŋmɔ si o gasa ye, ɓɛɛ a̧ súr o ye nɔ‘i nɛ o boi-biro mbɛt. Hegɔ mbɛt o bíí hura nin-a̧ nɛ̀nɛ́ hɔ gbisi nu mɛ.

¹¹A̧ baa ga̧a̧mɔ e zu nu, ɓɛɛ Israɛl kpá gasa desee.

¹²O nde lɛŋ dúk nu ɗɔɔ nyak-dɔ̧ɔ̧ in te-mbɔra kɔ‘i, ŋma bíí mɛ pi kii zaŋ-wa bo na.

¹³O wi-kii-wen lɛŋ kaɗa zu nu'i, ɓɛɛ o wannu mbɛt kum tɛ o ŋgimbi nɔ‘i.

¹⁴A̧ ha̧nɔɔŋgiɗi ha̧ o wan-mɔkasee, nɛ a̧-a̧ mgbara dukbíí kɔ̧-a̧; see-a gbɛŋa wen Heembea, ɓɛɛ a̧ kum o wi-gbɛ-heembea in o ɗaŋwi lɛŋ yinɛ.

¹⁵A̧ tu̧u̧ tɛ Sa̧a̧-Fara woyo, ɓɛɛ a̧ pɛ o gba dɔka nyɛk-ɗafi-Sɔ̧ dun kɔ̧-a̧.

¹⁶Wa zia dika Rɔm hɔ́ nɛ̀nɛ́ Spartɛ-mɛ‘e Jonataŋ fea, ɓɛɛ wa kpa ɗaŋsee nyɛmna.

¹⁷Ɓɛɛ ŋgimbi nɛ wa zia'e nɛ Simɔn, nya kɔ̧-a̧, a kifa gasa wan-ɗafi-sɔ̧ oi a̧, in mbɛt, o geɗɛk ye in o gasa-a lɛŋ zii nɛ a̧ wo,

¹⁸wa yɔra yuwar sɛm in nɔɔtɔk, nɛ wa dee so nɛti in Judas, ká bá nɛ Jonataŋ, o zɔmwi kɔ̧-a̧‘e zu ndaɗa ndaɗa mɔ nɛ‘i dee nɛ ndɛrɛ tom nɛ́nɛ́ ha̧ a̧.

¹⁹Wa tɔra a̧ nɛ gbaayi o giiwi Jerusalɛm.

²⁰Kalata nɛ o be-Spartɛ toma'i, nɛ́ mɔ'ɔ: «Ɛɛ o gasawi in ye Spartɛ nɛ oi-aa lɛŋ, ɛɛ fana Simɔn gasa wan-ɗafi-sɔ̧, in o kutiwi, o wiɗafisɔ̧ gú nɛ o nya kɔ-wa be-Juif lɛŋ.

²¹O betom n’ɛnɛ toma pii tɛ dukbíí k’ɛ́ɛ́ tɔ̧ɔ̧ nyɛrɛ gasi in mbɔi k’ɛ́nɛ́ h’ɛ́ɛ́, ɓɛɛ hɔaa kɔ-wa'i ha̧desee h’ɛ́ɛ́ nyɛmna.

²²Ɛɛ yɔra o wen kɔ-wa mgbara ee-zu-mɔ ko dukbii k’ɛ́ɛ́. Numenius bem ko Antiɔkus, in Antipatɛr bem ko Jazɔn, nɛ yá nɛ o betom ko o Juif tɛ̀ɛ̀ tɛ yɛ mɛ de sɛm in yɛɛ woyo.

²³Dukbíí kpaa desee mɛ kpɛ́k wa dúk dúk, in mɛ yɔr o wen kɔ-wa e kɔ̧ kuɓa-nyɛrɛmɔ, wen hà tɛ o wi-Spartɛ-mɛ mbáŋ ɗoŋ-aa. Wi yɔra o wen nɔ‘i tom ha̧ Simɔn, gasa wan-ɗafi-sɔ̧ mbɛt.

²⁴Ɗoŋ mɔ‘i, Simɔn toma Numenius si Rɔm nɛ oi ŋma gasa ŋgee nɛ‘i dee nɛ lɔr, ditaa dee hee kilo gɔmŋmaa-mɔɔrɔ ga, mɛ kpe nɛ ndaa-nɔɔtɔk'i in Rɔm.

²⁵Dukbíí zia o mɔ nɛ yaka'i, ɓɛɛ tɔ̧: «Nɛ ge ɛɛ tɛ de zɔn nɛ Simɔn in o bem kɔ‘i ge?

²⁶wen, a̧ in o zɔmwi kɔ̧-a̧, o wi-nutua ko dáà kɔ̧-a̧ lɛŋ yora nɛ nɔaa ɗoŋ yɛ. A̧ ndaka o wisɛn ko Israɛl nɛ o boi biro, ɓɛɛ a̧ gbó dukbíí.» Wa yɔra mɔ‘i zu ndaɗa-ndaɗa mɔ nɛ‘i dee nɛ ndɛrɛ, ɓɛɛ wa kai mgboi tɛ o mbiŋ nɛ́nɛ́, nɛ zaŋ kaya Siɔn.

²⁷Yɔramɔ‘i nɛ́ mɔ'ɔ: «Tɛ ɓu-zua-mɔɔrɔ-ɗoŋ-taar ɔɔ-zɛ ko fiozɛ «Elul», tɛ pɛ gɔmŋmaa nɛ pɛ ɓu-mɔɔrɔ-ɗoŋ-yiitoo-zua-yiitoo, nɛ dúk nɛ́ taar pɛ-wan ko Simɔn, gasa tu̧u̧-tɛ wan-ɗafi-sɔ̧,

²⁸O wiɗafisɔ̧, o dukbíí, o wi-duk-zu-dukbíí, in o kutiwi mɔi̧a̧ ŋmaa kɔ̧́ beegara-tua ko Sɔ̧. Zúwen-aa nɛ wa tɔ̧ɔ̧ h’ɛ́ɛ́, nɛ́ mɔ'ɔ:

²⁹«Simɔn bem ko Matatias, bezaŋ o bem ko Yoarib, in o nya kɔ‘i lɛŋ baa tɛ, e yi fio, tɛ o gba-dɔka biro nɛ dea zu zikanu'i, wen ha̧ Sa̧a̧-Fara kɔ-wa in Heembea mɛ yor ŋgɔn, ɓɛɛ hegɔ wa de ha̧ nin dukbíí kɔ-wa mɛ hur batɛ.

³⁰Jonataŋ mɔi̧a̧ dukbíí kɔ‘i, kifi gasa wan-ɗafi-sɔ̧ kɔ-wa; hɔɗoŋ-aa, ɓɛɛ a̧ si ɗoŋ kpá o zɔmɗáà kɔ̧-a̧.

³¹O wisɛn ko o Juif kɔ̧ɔ̧ so mɛ tik zu nù kɔ-wa mɛ ɗaŋ a̧, in mɛ ba Sa̧a̧-Fara kɔ-wa.

³²Nɛ́ mɔ'ɔ nɛ Simɔn kura, ɓɛɛ bi biro zu dukbíí kɔ‘i. A̧ daŋa o mbɔi kɔ̧-a̧ nɛ dɔkaa hi̧fi̧ nɛ o boi-biro, kɛ̧ ha̧ o wibiro zu nu kɔ̧-a̧ in ha̧sede-tom kɔ-wa ha̧ wa.

³³A̧ sura o ye nu-Judéé, in ye-Bɛtsur si gbisi-nu mɛ, nɛ duka so nɛ gbagari ko o wisɛn nɛ wa de o boi-biro kɔ-wa sɛnɛ; a̧ aa o wibiro ko o Juif saaye'i wen pɛma mɔ.

³⁴A̧ ŋgoo saaye Joppé ká̧ zaŋ gbatɔp mɛ, in Gazara si gbisi Azotos: nɛ́ o wisɛn a ɔɔ so sɛnɛ nɛti. A̧ aa o Juif saaye nɔ‘i, ɓɛɛ a̧ mɔi̧ o mɔ nɛ nyɛma so wen wa a hi̧i̧.

³⁵Dukbíí zɔka yɔra ɗoŋ wen ko Simɔn, in gasi n'aa kɔ̧ɔ̧ so mɛ e dukbíí kɔ̧-a̧ sɛnɛ. Hegɔ, wa ee a̧ nɛ gasawi kɔ-wa, in nɛ gasa wan-ɗafi-sɔ̧, wen zu o mɔ lɛŋ n'aa dea sitɛ wa: deemɔ nɛ yuwar-a in yɔra ɗoŋ nú n'aa usa si tɛ dukbíí kɔ̧-a̧, in, wen, nɛ tɛ mɔ lɛŋ a̧ kia mɛ bá nɛ nin-dukbíí kɔ̧-a̧ e ŋgɔn.

³⁶Tɛ ŋgimbi ko Simɔn, a̧ kimia hegɔɔ, ɓɛɛ a̧ ndak o gɔni-duk yinɛ zu nù, gú nɛ o wan nɛ a̧-a̧ so ye ko David sɛn Jerusalɛm, fara nɛ wa mboo so ŋgara sɛnɛ. Wa gbó so nɛ kɔ̧ ŋgara'i de nɛ ndiŋmɔ a ka̧ Sa̧a̧-Fara, ɗaŋ nɛ war tɛ-a.

³⁷A̧ aa o wibiro ko o Juif kɔ̧ ŋgara'i súr nɛ a̧ nɛ nɔaa siti woyo, wen pɛma zikanù in saaye, ɓɛɛ a̧ mbó gɛr garo Jerusalɛm si ŋgɔn woyo.

³⁸Wen zu o mɔ nɔ‘i lɛŋ, wannu Demetrius ee a̧ nɛ gasa wan-ɗafi-sɔ̧.

³⁹A̧ ee a̧ mgbara o sɛm ko wannu, ɓɛɛ ha̧ o zɔm gasi ha̧ a̧ zɔn nɛ a̧.

⁴⁰A̧ zia so'e o be-Rɔm bá o Juif hee o sɛm, o wi-nɔ-tɔk in ŋmaa, in o nyawi ga, in wa kpɛka so o betom ko Simɔn mbɛt dúk dúk.

⁴¹In mbɛt'e, o Juif in o wiɗafisɔ̧ zɔka'e ɔ dee ha̧‘i mɛ e Simɔn nɛ gasawi in gasa wan-ɗafi-sɔ̧ wen ɓɔnsɛnɛ, hɔ ŋgimbi nɛ ŋma mbe kpasa witɔ̧wen oi nu Sɔ̧ tɛ hɔ nɛ̀nɛ́.

⁴²A̧ tɛ ɔ wan zu o wibiro kɔ-wa; nɛ́ a̧ a tɛ pɛm Sa̧a̧-Fara, a̧ tɛ hok o wi-ya-zu-tom, o wi-duk-zu-zikanu, in o wi-duk-zu o boi-biro, gú nɛ o ŋgara.

⁴³Simɔn tɛ̀ɛ̀ ɔ wan zu Sa̧a̧-Fara, ɓɛɛ o bíí lɛŋ tɛ tu̧ nɛ tɛ-a. Wi tɛ yɔr kalata ko gɔmna zu nu'i lɛŋ nɛ nin-a, ɓɛɛ a̧ tɛ pi̧ nɛ o gbɛ̧́ laa-wan, ɓám nɛ wele-lɔr yi-see laa kɔ̧-a̧.

⁴⁴Ŋma bíí mgbara dukbíí, kóó mgbara o wiɗafisɔ̧ beka bɛ̧́ ŋma be nú heembea'i tikiɗi na; ŋma bíí nɛ tɛ ár ndaa wen kɔ̧-a̧ bo na; ŋma mɔi̧a̧ nɛ tɛ de nɛ hu̧sa̧a̧, n'aa há̧ yuwar-a na bó na; ŋma bíí nyɛm mɛ pi gbɛ̧-laa-wan, kóó mɛ ɓam wele-lɔr sɛn tɛ na mbɛt.

⁴⁵Wi nɛ tɛ bɛ̧ o gɛŋa nɔ'ɔ, kóó nɛ tɛ gbin ŋma kpɔk, tɛ zɔk bɔnɛ.

⁴⁶Dukbíí lɛŋ kpɛka'e Simɔn a kasi o heembea kɔ‘i, de nɛ tom.

⁴⁷Simɔn mbɛt kpɛka, a̧ kɔ̧ɔ̧ ɗɔɔ duka gasa wan-ɗafi-sɔ̧, wi-duk-zu o wibiro, in gasawi ko o Juif, ká bá nɛ ko o wiɗafisɔ̧, in ɔɔ wan zu bíí in mɔ lɛŋ.

⁴⁸Wa ha̧nú ha̧‘i mɛ sɛk yɔramɔ‘i zaŋ ndaɗa-ndaɗa-mɔ nɛ‘i dee nɛ ndɛrɛ, mɛ ga̧i̧ wa nɛ nu-zala Tua ko Sɔ̧, fara nɛ bíí lɛŋ nyɛma mɛ zɔk,

⁴⁹in ha̧‘i mɛ a o ŋma yɔramɔ nɔ‘i kɔ̧ kuɓa-wan wen Simɔn in o bem kɔ‘i.»