Read Northwest Gbaya 1 Makabee 15 Bible Online

1 Makabee 15 - Northwest Gbaya bible

1 Makabee 15

¹Antiɔkus, bem ko wannu Demetrius, toma kalata dika nɛ o seekisi ɗɔɔ gbatɔp mɛ ha̧ Simɔn, wan-ɗafi-sɔ̧ in gasawi-duk-zu o Juif, in ha̧ dukbíí lɛŋ mbɛt.

²Mɔ nɛ wa yɔra nɛ́ mɔ'ɔ: «Nɛ́ mi, wannu Antiɔkus, a fan Simɔn, gasa wan-ɗafi-sɔ̧, in gasawi-duk-zu o Juif, ká bá nɛ dukbíí nɛ oi-aa lɛŋ mbɛt.

³O ɗaŋwi-ŋgazu báá nù ko o dáà k’ɛ́ɛ́, ɓɛɛ mi kɔ̧ɔ̧ mɛ ba nu'i mɛ ɗafi e oi-aa hee kuti-a nɛti ga. Hegɔ mi pɛɛ o gba dɔka wibiro, ɓɛɛ mi ɗafi o kombon-biro nɛ dɔkaa,

⁴wen báá biro ye nɛ nu kɔ-wa, mɛ ndak o wi nɛ ɗaŋa nu k’ɛ́ɛ́, ɓɛɛ ká ɗáŋ nɛ o ye nu-wan kɔ‘m nɛ dɔkaa'i.

⁵Kinii, o garama nɛ o kuti wannu zira lɛŋ, mi yora zu-a mbɛt. Mi kɔ̧ɔ̧ ɗɔɔ o oi dɔka demɔ nɛ wa ha̧so ha̧ mɛ‘i mbɛt.

⁶Mi ee yuwar ha̧ mɛ́ mɛ de sede nɛ nin-mɛ, wen nyɔŋa mɔ zu zikanu kɔ-mɛ.

⁷Jerusalɛm in Sa̧a̧-Fara gboo ɗɔɔ bara; o boi-biro nɛ mɛ dea lɛŋ in o ŋgara nɛ mɛ́ mboa, ɓɛɛ nɛ mɛ ɔ́ sɛ́nɛ́‘i tɛ ɓɔn nɛ kɔ-mɛ.

⁸Dika kinii yak nɛ́nɛ́ sɔ̧́í̧, o nyamandoe ko wannu nɛ ɓɔna zu mɛ, kinii in nɛ ɗoŋ mbɛt, wi ee ha̧ mɛ.

⁹Ŋgimbi nd’ɛ̀ɛ̀ be tɛ̀ɛ̀ ba nu-wan k’ɛ́ɛ́ kaɗi, ɛɛ tɛ́ ha̧ o zɔm gasi ha̧ mɛ, há̧ dukbii kɔ-mɛ, in ha̧ Sa̧a̧-Fara; hegɔ nin-nɛ́ tɛ hu̧r batɛ dam zaŋnu lɛŋ.

¹⁰Tɛ pɛ gɔmŋmaa nɛ pɛ ɓu-mɔɔrɔ-ɗoŋ-yiitoo-zua-náár, Antiɔkus yaka si nu ko o dáà kɔ‘i, ɓɛɛ o wibiro lɛŋ pɛɛ ŋmaa rútúk si ɗoŋ-a. Hegɔ, nɛ o bíí tikiɗi a ɓɔna in Trifɔn ɓɛɛ.

¹¹Antiɔkus ndaka a̧ nɛ́nɛ́, ɓɛɛ Trifɔn yu mɔ si saaye Dora, nú gbatɔp mɛ,

¹²wen a̧ zɔka'e o ɗaŋmɔ dɔk dɔ̀k zu a siti, o wibiro kɔ̧-a̧ siŋa a̧ e dúk mbɛt.

¹³Antiɔkus pɛɛ o wibiro booro-gɔmŋmaa nɛ booro ɓu-yiitoo, in o wi-daŋ-nyaŋa booro-mɔɔrɔ-ɗoŋ-taar nɛ́ɛ́ bá nɛ fara nú saaye Dora mɛ.

¹⁴A̧ kɛra ye tɛ́nɛ́ nɛ́ zan, ɓɛɛ ká o kombon-biro a gɛk kɔ‘i tɛnɛ nɛ ti a̧‘i. Hegɔ, o yuwar yeaa saaye kóó gboaa kpee lɛŋ, nɛ zu nu in zu tɔp mbɛt.

¹⁵Numenius in o gbamayari kɔ‘i tɛ̀ɛ̀ nɛ Rɔm nɛ o kalata ha̧ o wannu in o zikanu. Gba̧a̧ wen-aa nɛ́ mɔ'ɔ:

¹⁶«Nɛ́ mi Lusius, gasawi-duk-zu-kita ko o be-Rɔm a fan wannu Ptolemee.

¹⁷O betom ko o Juif nɛ Simɔn gasa wan-ɗafi-sɔ̧ in dukbíí Juif toma tɛnɛ‘i hɔɔ tɛ yɛ, hee o sɛm in o wi-ye-ɗoŋ-yɛ mɛ ɗafi war sɛm in nɔɔtɔk mgbara yɛ woyo hee wan mɛ ti ga.

¹⁸Waa baa ŋma ŋgee nɛ‘i dee nɛ lɔr tɛ́ nɛ́nɛ́, dita-a hee kilo gɔmŋmaa-mɔɔrɔ ga.

¹⁹Nɛ mɔ‘i ɛ́ɛ́ zɔka'e ɔ dee mɛ yɔr mɔ ha̧ o wannu in zikanu'e ká ŋma bíí kíí nu-wa na, in ka'i ye ɗoŋ o bíí nɛ bá biro si tɛ wa na.

²⁰Ɛ́ɛ́ kpɛka ŋgee'i er-wa mbɛt.

²¹Hegɔ, kà o ŋma ɗaŋ-kpar nɛ yuu so nu kɔ‘i nɛ́ si tɛ‘nɛ́ nde, ɛnɛ é wa er Simɔn, gasa wan-ɗafi-sɔ̧, ha̧ a̧ mɛ usi bɔnɛ ha̧ wa nyɛm nɛ ɗoŋ heembea kɔ-wa.»

²²Wa toma kale kpɔk kalata'i ha̧ wannu Demetrius, ha̧ Atale, ha̧ Ariaratɛ in ha̧ Arzasɛ.

²³Wa toma mbɛt si o zikanu lɛŋ, si Samsamɛ, ha̧ o be-Partɛ, si Delɔs, si Mindɔs, si Sisionɛ, si Karii, si Samɔs, si Pamfilii, si Lysii, si Halikarnas, si Rodɛs, si Faselis, si Kos, si Sidéé, si Aradɔs, si Gortinɛ, si Knidɛ, si Chyprɛ, in si Syrɛn.

²⁴Wa yɔra gba̧a̧ o kalata nɔ‘i mbɛt ha̧ Simɔn, gasa wan-ɗafi-sɔ̧.

²⁵Wannu Antiɔkus dee so gbagari sɛn nú-saaye Dora, tom nɛ o wibiro kindɔŋ kindɔŋ a yu ye, mbo nɛ o taŋgaɗa-biro mbɛt. A̧ kpee Trifɔn, ɓɛɛ bíí nyɛ́m so mɛ ye saaye kà bó nɛ gbo aa na.

²⁶Simɔn toma o kpɔra wibiro booro-yiitoo mɛ gbak a̧, ká bá nɛ o bu-mbɔi, lɔr in o gba dɔka boi-biro.

²⁷Mɔ kpɔk, wannu kpɛk wa na. Zua'i mbɛt, o mɔ n'aa ee so zu-a nɛti in Simɔn lɛŋ, a̧ tɛ̀ɛ̀ siŋ a dúk, ɓɛɛ a̧ kpai er-deemɔ kɔ̧-a̧ si tɛ Simɔn.

²⁸A̧ toma Atenobius, ŋma sɛm kɔ̧-a̧, mɛ tɔ̧ ha̧ Simɔŋ‘e: «Ɛ́nɛ́ baa Joppé, Gazara in ŋgara Jerusalɛm, nɛ yá nɛ́ o gasa ye nu-wan kɔ‘m.

²⁹Ɛ́nɛ́ kpaia o zikanu kɔ-wa nɛ bɛ̀ɛ́-oi. Ɛ́nɛ́ dee o zɔm ɗaŋmɔ zu nù, ɓɛɛ ɛ́nɛ́ kai o ye nu wan kɔ‘m nɛ dɔkaa mbɛt.

³⁰Kinii, ɛ́nɛ́ ha̧ o ye n’ɛnɛ baa so lɛŋ pii-nɛ-ɗoŋ h’ɛ́ɛ́, in o garama n’ɛnɛ ndɛma nɛ tɛ o ye nɛ bó nu-Judéé na.

³¹Kà nɛ bóó hegɔ na, ɛnɛ ha̧ gba dita kií bu-mbɔi gɔmŋmaa-mɔɔrɔ oi-aa, ɛnɛ ha̧ mbea woyo, kií bu-mbɔi gɔmŋmaa-mɔɔrɔ, wen zu o mɔ n’ɛnɛ ɗaŋa, in mɛ si nɛ mbɔi-yɛ. Kà bó hegɔ na, ɛɛ tɛ tik ‘nɛ́ nɛ biro.

³²Ŋgimbi nɛ Atenobius, sɛm ko wannu, hɔɔ sɛn Jerusalɛm, a̧ zɔka gasi nɛ Simɔn dúk zu-a, taŋge nɛ o nyɛk bu-mbɔi in lɔr yá zu-a, in o zɔm gba demɔ nɛ zika a̧. O mɔ nɔ‘i yeka a̧ nyɛmna, ɓɛɛ a̧ tɔ̧ tom ko wannu ha̧ Simɔn.

³³Simɔn kifa ha̧ a̧: «Nɛ́ o mɔɔ-oi o dáà k’ɛ́ɛ́, nɛ o wisɛn kaia so tɛ ŋma ŋgimbi yá nɛ̀nɛ́ zu-a nɛ yɔli, ɛ́ɛ́ dee biro kai nɛ̀nɛ́ pii-nɛ-ɗoŋ. Nɛ bó nɛ mɔɔ-gɔni-nu, kóó mɔ ko ŋma gɔni-bíí na.

³⁴Ɛ́ɛ́ kpaa k’ɛ́ɛ́ nɛ be yuwar ndɛ́m nɛ o mɔɔ-oi o dáà k’ɛ́ɛ́ pii-nɛ-ɗoŋ.

³⁵Nɛ ko Joppé in Gazara nɛ mɛ ak'i, o ye nɔ‘i dee so ɗaŋmɔ si tɛ dukbíí k’ɛ́ɛ́ in nu k’ɛ́ɛ́ nyɛmna. Ɛɛ tɛ ha̧ nɛ gba dita kií bu-mbɔi gɔmŋmaa wen zu wa ɓɛɛ.» Atenobius kifi nu-wen ɓukui na.

³⁶A̧ sia ɗoŋ nɛ nyimsea si tɛ wannu, ɓɛɛ a̧ we ɗoŋ o wen ko Simɔn lɛŋ ha̧ a̧, in nyɛrɛ zɔm gasi kɔ̧-a̧, n'aa zɔka lɛŋ mbɛt; ɓɛɛ ŋga nyimsea bá wannu.

³⁷Trifɔn yee ŋma kombon, ɓɛɛ yu mɔ si Ortosia.

³⁸Wannu ee Kɛndébeé nɛ gasawi ko o wibiro zu zikanu mɛ́ ka̧ zaŋ gbatɔp, ɓɛɛ a̧ á o gii wi-nɛ-biro-nɛ-naŋ in o wi-daŋ-nyaŋa-biro er-a.

³⁹A̧ ha̧nú ha̧ Kɛndébeé mɛ de gbagari mgbak nú-Judéé, mɛ mbo Kedrɔn woyo, mɛ sur o nugaro-ye in mɛ bi dukbíí. Ɓɛɛ wannu ye kɔ‘i tɛ ndaka ɗoŋ Trifɔn.

⁴⁰Kɛndébeé nɛ́ɛ́ Jamnia, kíí wen ɗùlùgbùk in dukbíí Juif, bá nɛ biro ye nu-Judéé, pɛ́ nɛ o bara-biro piinɛ, gbɛ́ nɛ o ŋma mbɛt.

⁴¹A̧ mboo Kedrɔn woyo, ɓɛɛ a̧ a o wibiro saaye'i, o wi-daŋ-nyaŋa, in o wi-nɛ́-nɛ-naŋ, wen gboa mɛ pɛm in mɛ kpe nɛ o yuwar nu-Judéé, nyɛm nɛ ɗoŋ mɔ nɛ wannu tɔ̧ɔ̧ so ha̧ a̧.