Read Northwest Gbaya 1 Makabee 16 Bible Online

1 Makabee 16 - Northwest Gbaya bible

1 Makabee 16

¹Jean daŋa nɛ Gazara mɛ, ɓɛɛ ɓá o mɔ nɛ Kɛndébeé dee lɛŋ ha̧ dáà kɔ̧-a̧ Simɔn.

²Simɔn saa o kaya bem kɔ‘i yiitoo, Judas in Jean, ɓɛɛ tɔ̧ ha̧ wa: «Mi, o nya'm in o wi-nutua ko dáà kɔ‘m, ɛɛ a̧-a̧ tɛ bii o wi sɛn Israɛl, dika tɛ daŋa-ŋgaiwi k’ɛ́ɛ́ hɔ́ nɛ̀nɛ́ sɔsɔá‘i, ɛɛ kpasa Israɛl war ɔ dɔka mbɛt.

³Kinii, mi sɔka kɔ‘m kaɗi; nɛ k’ɛ́nɛ́, osoko ha̧ Yiwese wen n’ɛnɛ ɓɔna nɛ tɔr-tɛ káŋ. Ɛnɛ bá fara kɔ‘m in fara ko nya kɔ‘m. Ɛnɛ nɛ́ɛ́ de biro zu dukbíí k’ɛ́ɛ́, ɓɛɛ nɛ Yiwese a gbak ‘nɛ́.»

⁴Jean hoka o wibiro booro-ɓu-yiitoo in o wi-ɗaŋ-nyaŋa zu zikanu'i; wa yaka mɛ nɛ́ɛ́ tik Kɛndébeé, ɓɛɛ wa ɔ́ sɛn Mɔdin.

⁵Wa kura mɛ tutuyɛ sút, yak si bɔkɔnu mɛ, ha̧ wa zɔk wo: o gba zɔm gii wibiro, o wi-nɛ-biro nɛ naŋ, in o wi-daŋ-nyaŋa, a gbár tɛ́nɛ́ ti wa’ɛ; ŋma gbór-gbòr-yì kɛ̧ so nɛ mgbara wa.

⁶Jean in o bíí kɔ‘i yora naŋ biro ti wa. Ŋgimbi n'aa zɔka'e o bíí kɔ̧-a̧ yú nɛ kuu gbor-gbor-yi'i, a̧ kuu ti, ɓɛɛ nɛ o bíí kɔ̧-a̧ be zɔk hegɔ, wa kuu nɛ̀nɛ́ ɗoŋ a̧.

⁷A̧ kɛ̧ɛ̧ o wibiro kɔ̧-a̧, à nɛ́ o wi-nɛ-biro nɛ naŋ zik nɛ o wi-daŋ-nyaŋa, wen o wi-daŋ-nyaŋa ko o wisɛn ɔ́ so dɔka nyɛmna.

⁸A dee ha̧ wa mɛ dɔm mbia, ɓɛɛ wa gana Kɛndébeé in o wibiro kɔ‘i. O bíí nɛ dɔkaa baa da̧i̧ kum nɛ̀nɛ́ mbɔlɔlɔ, ɓɛɛ o wan nɛ ɓɔna yu mɔ si kɔ̧ ŋgara (Kedrɔn)

⁹Ŋgimbi'i, Judas nya Jean, baa da̧i̧ mbɛt. Ɓɛɛ Jean ndak wisɛn hegɔɔ hɔ sɛn Kedrɔn, nɛ Kɛndébeé baa mbo so woyo'i.

¹⁰O wi-yu-mɔ nɛ́ɛ́ hɔ kɔ̧ o taŋgaɗa-pɛm-mɔ nú saaye Azotos mɛ. Jean pii wee tɛ wa, ɓɛɛ o bíí kɔ-wa booro-yiitoo fe. Hegɔ, ɓɛɛ Jean si ɗoŋ si nu Judéé nɛ kpee-see.

¹¹Wa ee so Ptolemee, bem ko Abubas, nɛ gasawi-duk-zu-wibiro mɛ́ bɔkɔnu Jeriko. A̧ a̧-a̧ so nɛ bu-mbɔi in lɔr nyɛmna,

¹²wen a̧ duka so nɛ be-for gasa wan-ɗafi-sɔ̧.

¹³Wɔ-gasi duna see-a, ɓɛɛ a̧ kii yuwar mɛ ɔ wan zu nu'i lɛŋ. Nɛ mɔ'ɔ n'aa taa mɔ, ɓɛɛ a̧ e zu-a mɛ de gɔnta gbɛ́ nɛ Simɔn in o bem kɔ‘i.

¹⁴Ŋgimbi'i, Simɔn, nɛ tóm-wan gbɛ́ŋ so nɛ yisee’ɛ, yee tɛ ndɛnaa nɛ ɗoŋ o ye nu koa̧‘i kpɔk kpɔk nɛ̀nɛ́. A̧ zira si Jeriko in o bem kɔ̧-a̧, Matatias in Judas, tɛ pɛ gɔmŋmaa nɛ pɛ ɓu-mɔɔrɔ-ɗoŋ-yiitoo-zua-mɔɔrɔ-ɗoŋ-yiitoo, tɛ ɓu-zua-kpɔk fiozɛ, nɛ‘i sa'e «Shebat».

¹⁵Ptolemee bem ko Abubas dee gɔnta kpɛ́k nɛ wa sɛn kɔ̧ ŋma geɗɛk ŋgara, n'aa mboa, ɓɛɛ nɛ‘i sa'e Dok. A̧ gii zɔm nyɔŋmɔ ha̧ wa; mɔ kpɔk, a̧ hu̧sa̧ so o bíí nɛti nɛ kɔ̧ ŋgara nɛ́nɛ́.

¹⁶Ŋgimbi nɛ dɔ̧ɔ̧ ku̧u̧ naŋ gbɛ́ɛ́ Simɔn in o bem kɔ‘i kaɗi, Ptolemee kura in o bíí kɔ‘i, kai o boi-biro kɔ‘i, gɔ́m nɛ hayaa tik tɛ Simɔn kɔ̧ bɛrtua-dina, ɓɛɛ gbɛ́ Simɔn in o bem kɔ̧-a̧ yiitoo, ká bá nɛ o ŋma widetom kɔ̧-a̧.

¹⁷Nɛ hegɔ á Ptolemee dee nɛ zɔm mɔɔ-búù kifi nɛ er demɔ nɛ ɗaŋmɔ.

¹⁸Ptolemee yɔra mɔ n'aa dee'i tóm nɛ́nɛ́ ha̧ wannu, ak nɛ a̧‘e a̧ a tom o wibiro tɛ́nɛ́ mɛ gbak wi, wèn kà‘i bá nɛ zikanu in gasa ye ko o Juif ha̧ wannu.

¹⁹A̧ toma o ŋma bíí si Gazara mɛ gbɛ́ Jean; ɓɛɛ a̧ yɔr kalata ha̧ o wi-duk-zu o wibiro'e wa'a tɛ̀ɛ̀ zɔk wi ha̧‘i mɛ kɛ̧ bu-mbɔi, lɔr in o ŋma ha̧a̧mɔ ha̧ wa.

²⁰A̧ toma o ŋma bíí mɛ ba Jerusalɛm in kaya Sa̧a̧-Fara.

²¹Mɔ kpɔk, ŋma bíí yaka so Gazara nɛti, nɛ́ɛ́ tɔ̧ wen fio ko dáà in nya ko Jean ha̧ a̧ kaɗi. Wi’ɛi tɔ̧ɔ̧ ha̧ a̧ woyo: «Ptolemee toma ŋma bíí mɛ tɛ̀ɛ̀ gbɛ́ mɛ mbɛt.»

²²Tɛ zia wen'i, Jean sakala lɛŋ. A̧ dɛka o wi nɛ tɛa so mɛ gbɛ́ a̧‘i, ɓɛɛ a̧ gbɛ́ wa, wen a̧ zia so nɛti'e wa kii so nɛ yuwar mɛ gbɛ́ a̧.

²³O oi nyɛrɛ tom ko Jean, o biro kɔ̧-a̧, o ŋgaŋa-mɔ n'aa dea, o garo n'aa mboa, in o mɔ n'aa dea lɛŋ,

²⁴mɔ nɔ‘i lɛŋ yɔra zaŋ kalata nyɛrɛ-tom ko o wan-ɗafi-sɔ̧, dika wese n'aa kifa nɛ gasa wan-ɗafi-sɔ̧ oi dáà kɔ‘i.