Read Northwest Gbaya 1 Makabee 3 Bible Online

1 Makabee 3 - Northwest Gbaya bible

1 Makabee 3

¹Judas, nɛ‘i sa'e Makabee, baa wan oi dáà kɔ̧‘i Mattatias.

²O nya-a in o bíí ko dáà kɔ̧-a̧ lɛŋ tɔia nɛ a̧ e ŋgɔn, ɓɛɛ wa de biro zu Israɛl nɛ hayatɛ.

³A̧ dea ha nin dukbíí kɔ̧-a̧ mɛ hur siti. A̧ pi̧i̧ laabiro hee ŋma zɔm kusa wi ga, A̧ hɛra tɛ-a nɛ o boi-biro, ku̧ naŋ o biro, yor nu-gbagari ko o bíí kɔ̧-a̧ nɛ gbapaa.

⁴Tɛ biro, a̧ duk hee dila ga, hee ŋgai-dila nɛ mgbimgbi zu saɗi ga.

⁵A̧ ndak o wi-bɛ̧-Heembea n'aa kpaa lɛŋ, ɓɛɛ a̧ kai o wi nukuri dukbíí kɔ̧-a̧ a yi wee.

⁶Gba̧a̧tɛ o wi-bɛ̧-Heembea gbina wen zu kii n'aa pi̧ so tɛ wa; Bele zara o wideɗaŋmɔ lɛŋ, ɓɛɛ tom-kpasa dukbíí hɔ́ gba̧a̧.

⁷Nú dukaa ko o wannu nɛ dɔkaa paŋa wen zu a. O tom n'aa dea pi̧i̧ tortɛ tɛ Jakɔb, ɓɛɛ wi tɛ zɔn nin-a kpoo nɛ kpoo.

⁸A̧ yara nɛ ɗoŋ ye ko Juda nɛ́nɛ́, kum nɛ o ɗaŋwi yinɛ, ɓɛɛ a̧ wɛr nyimsea ko Sɔ̧ nyɛi nɛ Israɛl

⁹Nin-a̧ hura hɔ nduti nu mɛ, ɓɛɛ a̧ mɔi̧ o wi nɛ yɔɔ so lɛŋ.

¹⁰Apollonius mɔi̧a̧ o gɔni-duk in gba gii-wibiro mɛ nu Samarii mɛ bi nɛ Israɛl.

¹¹Nyɛrɛ-a aa zer Judas, a̧ gboo we ti a̧ nɛ́nɛ́, bí ŋmaa in a ɓɛɛ gbɛ́ a̧. O bíí mgbara wa nɛ dɔkaa baa da̧i̧ fe nɛ́nɛ́, ɓɛɛ o wan nɛ ɓɔna kpasa yú mɔ yak

¹²O be-Juif kaia o mɔɔ-ɔi-wa. Judas baa gbapaa ko Apollonius, de nɛ biro nɛ́nɛ́ wese lɛŋ.

¹³Serɔn, gasawi-duk-zu o gii-wibiro nu Syrii zia'e Judas mɔi̧a̧ gba gii-wibiro in gii-wi-yor-ɗoŋ-Heembea a ɗoŋ wó, ɓɛɛ a̧ tɔ̧:

¹⁴«Mi tɛ de ha̧ nin-am mɛ hur, ɓɛɛ mi tɛ de ha̧‘i mɛ gas'am zu nu’ɛ. Mi tɛ bi ŋmaa in Judas in o bíí kɔ‘i, nɛ ee ha̧a̧nú ko wannu tɛ gee mɔ‘i.»

¹⁵Nɛ́ mɔ n'aa kura, ɓɛɛ a̧ kai gba-gii o ɗaŋwi yak nɛ́nɛ́ mɛ kifi er-biro in o be-Israɛl

¹⁶A̧ nɛ́ɛ́ hɔ ka̧ kaya Bɛt-Hɔrɔŋ, ɓɛɛ Judas kai be bíí kɔ‘i tikiɗi kpá nɛ a̧.

¹⁷Tɛ zɔka o wibiro nɛ dáŋ tɛnɛ zununu pii tɛ-wa, o bíí ko Judas tɔ̧ ha̧ a̧: «Nɛ́ hee ge ɛɛ tɛ de nɛ biro in o zɔm gii-wi nɔ'ɔ nd’ɛ́ɛ́ dɔ́k nɛ̀nɛ́ na’ɛ ge? Ɛɛ mbɔia gan ŋgai, ɛɛ nyɔŋ mɔ na mbɛt.»

¹⁸Judas kifa nú: «Há̧ wɔ́kɔ́rɔ́ bíí mɛ gan dɔka bíí nɛ ŋgai'i, dúk nɛ ŋma gee yɛ́ɓɛ́lɛ́k mɔ, ɓɛɛ ŋma mɔ dor Yiwese tɛ kpasa bíí nɛ ɗoŋ o bíí tikiɗi, kóó nɛ ɗoŋ gba dɔka bíí bó na

¹⁹Wen ŋgai-gbin-biro tɛ́ nɛ tɛ gba-gii wibiro na, ɓɛɛ tɛ́ tɛaa nɛ Yiwese ɛ̧.

²⁰O wi nɔ'ɔ dúk nɛ tɛ gbó nɛ biro tɛ́nɛ́ pii tɛ-yɛ nɛ oi gɔɔtɛ in ɗaŋmɔ kɔ-wa, wen mɛ kum yɛ in o kóò, gú nɛ o bem k’ɛ́ɛ́ lɛŋ, in mɛ kai o mɔɔ-oi-yɛ.

²¹Nɛ k’ɛ́ɛ́, ɛɛ de nɛ biro zu yɛ in zu Heembea k’ɛ́ɛ́,

²²Ɓɛɛ nɛ́ Á̧ a tɛ mbɔli wa ti yɛ yinɛ. Nɛ k’ɛ́nɛ́, k’ɛ́nɛ́ yú kii wa na.»

²³Doŋ nɛ Judas kaɗa wen'i kaɗi, a̧ gbaŋga o wisɛn nɛ biro. Serɔn in o wibiro kɔ‘i tira a nu ti a̧.

²⁴Wa ndaka o wisɛn nɛ zaŋ kaya Bɛt-Hɔrɔŋ zir nɛ̀nɛ́ hɔ bɔkɔnu mɛ. O wiwii fee hee gɔmŋmaa mɔɔrɔ zaŋ-a taar ga, ɓɛɛ o oi-aa yu mɔ yak si nu ko o Filistin.

²⁵Judas in o nya kɔ‘i ku̧u̧ naŋ pi̧i̧ kii tɛ o bíí, pi nɛ bele zaŋ o zuduk nɛ ɔ so ká̧ tɛ-wa

²⁶Nin-a̧ hura nɛ́nɛ́ a zer wannu. O zuduk lɛŋ mbɛt tɔ̧ so nyɛrɛ o biro ko Judas.

²⁷Ŋgimbi nɛ Antiɔkus zia o nyɛrɛ nɔ‘i, ŋga nyimsea baa a̧, ɓɛɛ a̧ pi tom sá nɛ o dukbiro zu nu-wan kɔ̧-a̧ lɛŋ: duka nɛ o ŋgaŋa wibiro ɛ̧.

²⁸A̧ huia kúɓa-sede kɔ̧-a̧, kɛ̧ sede-zɛ wen pɛ kpɔk ha̧ o wibiro kɔ̧-a̧ lɛŋ, ɓɛɛ mbaŋ tɛ-wa wen yaa gɛ́ɗɛ́-gɛ́ɗɛ́ zɛm nɛ mɔ lɛŋ nɛ tɛ hɔ.

²⁹A̧ tɛ̀ɛ̀ zɔk mbɛt'e sede bó kɔ̧ kúɓa ɓona; mbɔi-garama mɛ zikanu'i ye dɔk ɓɔna mbɛt wen zu kpɛri in o ŋma ɗaŋmɔ. Nɛ a̧ nɛ tɛ-a a̧ daka so wa pi nu tɛ dora o heembea nɛ yaa so nɛti ɓeemɛ.

³⁰Kuti-a so, a̧ duka kɛ̧ nɛ mbɔi ha̧ o bíí pa̧a̧ pa̧a̧ gan zu ko o wi nɛ ɔɔ so wan nɛti ha̧ a̧, ɓɛɛ kinii a̧ dúk nɛ gɔna-ɗɛɗɛ wen ka̧ tɛ̀ɛ̀ nyɛm yi mɔɔ-dee na.

³¹Kii baa a̧ zu mɔ‘i, ɓɛɛ see-a usi'e a̧ a yak si nu Pɛrsɛ mɛ ndɛm sede-garama zu o zikanu, in mɛ pii nɛ dɔka sede.

³²A̧ baa Lizias, ŋma tu̧u̧-tɛ bíí nutua-wan'i, e zu o mɔɔwan kɔ̧-a̧, ku̧u̧ naŋ-a nɛ́ nanayi Efrat hɔ nɛ̀nɛ́ tɛ o gbisi nu Egyptɛ-mɛ,

³³bɛɛ wannu e bem kɔ‘i Antiɔkus gɛɗaɛk-a in a̧, ha̧ a̧ mɛ usi ɗoŋ mɔ ha̧ a̧, hɔ ŋgimbi n'aa tɛ pii nɛ ɗoŋ.

³⁴A̧ kɛ̧ɛ̧ reeta wibiro in o fɔrɔ-biro kɔ̧-a̧ ha̧ Lizias, ɓɛɛ a dak zer Lizias ha̧ a̧ mɛ kasi o ee-zu-wen kɔ̧-a̧ lɛŋ nɛ nɔaa. War ko o wi nu-Judee in Jerusalɛm,

³⁵A̧ tɛ̀ɛ̀ tom o wibiro a zu wa, mɛ ziɓi nɛ ŋgai ko o be-Israɛl in ko oi bɛ-Jerusalɛm, wen bia nin-wa fara'i yinɛ.

³⁶A̧ tɛ̀ɛ̀ kɛ̧ nu'i sɛ́kɛ́ɗɛ́ sɛ́kɛ́ɗɛ́ nɛ o gɔni-duk, n'aa tɛ a oi-wa.

³⁷Wannu kaia ɓii reeta wibiro nɛ ɓɔna gbo nɛ Antiɔk, gasa ye nu kɔ̧-a̧, tɛ pɛ gɔmŋmaa nɛ ɓu-naar-zua-mɔɔrɔ-ɗoŋ-yiitoo. A̧ kúú nanayi Efrat, ɓɛɛ a̧ ɓír yak nɛ zikanu mɛ ŋgɔn.

³⁸Mgbara osɛm ko wannu, Lysias hoka Ptolemee, bem ko Dorimɛn, Nikanɔr in Gorgias, nɛ yá nɛ o ŋgaŋawi lɛŋ.

³⁹A̧ toma wa in o wibiro nɛ nɛ́ nɛ náŋ booro ɓu-náár, in o wi-daŋ-nyaŋa booro mɔɔrɔ-ɗoŋ-yiitoo, mɛ tik nɛ nu ko Juda, ɗaŋ nɛ mɔɔ nu'i lɛŋ yinɛ, nyɛm nɛ ɗoŋ ha̧a̧nu ko wannu.

⁴⁰Wa yaka in o wibiro kɔ-wa lɛŋ hɔ́ bɔkɔnu ká̧ Emmaus, ɓɛɛ wa de gbagari kɔ-wa hi̧i̧.

⁴¹Nyɛrɛ-a áá zer o widefili zikanu'i; wa pɛɛ o lɔr in o bu-mbɔi nɛ dɔkaa, in o poka nɛ́ nɛ̀nɛ́ si kɔ̧ gbagari wen hifa o be-Israɛl nɛ bara. O ŋma be nu-Syrii in nu Filistii tɛ̀ɛ̀ á zu-wa.

⁴²Judas in o nyawi zɔka'e o ŋgaŋamɔ dɔ́k dɔ̀k siti, in'e o zuduk wibiro de nɛ gbagari nɛ nú-wan kɔ‘i. Nyɛrɛ ha̧a̧nu ko wannu nɛ tɔ̧ɔ̧ mɛ kum dukbíí Juif lɛŋ gbuɗuk'i aa zer-wa mbɛt.

⁴³Wa tɔ̧ɔ̧ sitɛ o ŋmaa: «Ɛɛ tɔi dukbíí k’ɛ́ɛ́ nɛ tika'i e ŋgɔn, ɓɛɛ ɛɛ bi biro zu-a in zu Sa̧a̧ Fara k’ɛ́ɛ́.»

⁴⁴Wa pi̧i̧ tom mɔi̧ dukbíí mɛ ɗafi mɔ wen biro, mɛ kɔfi Sɔ̧ in mɛ ai nú ha̧ A̧ wen deako in kɔ̧ɔ̧mɔ kɔ̧-A̧.

⁴⁵Jerusalɛm dúk so wekeke hee ŋga-gbárà ga; ŋma bem kɔ̧-a̧ yé saaye kà bó nɛ gboaa na; Sa̧a̧-Fara kifa mɔɔ-sɔ̧-náŋ; o gɔni-duk baa Ŋgara, o wi-iŋ-Sɔ̧-na dee ye sɛnɛ. O hiɗimɔ-torte bó nu ko Jakɔb ɓo na; ger mɔɔ-dɔm in koloŋ kpee lɛŋ.

⁴⁶Wa lɛŋ mɔi̧a̧ ŋmaa, ɓɛɛ nɛ́ si Masfa, ká̧ Jerusalɛm, wen nɛti ɓeemɛ, Israɛl a̧-a̧ so nɛ ŋma fara-kɔfi-Sɔ̧ sɛn hi̧i̧.

⁴⁷Wese'i, wa zima yi, á laa-bufu tɛ-wa, ɗú bùk á zu-wa, ɓɛɛ wa a̧k o laa kɔ-wa á nu.

⁴⁸Wa bura kalata Heembea mɛ kii gba̧a̧ mɔ, nɛ o wi-iŋ-Sɔ̧-na, kɔfi er o geesɔ̧ kɔ‘i'i.

⁴⁹Wa kaia o laaɗafisɔ̧, o zu-nyɔnɔ in o mbɔi-sadaka tɛnɛ. Wa foo o wi nɛ ha̧tɛ ha̧ Sɔ̧, nɛ kaɗa so ɔ zɛ ha̧a̧nu kɔ-wa, gbonɛ́ si mgbara bíí.

⁵⁰Wa hiɗa mɔ si yiwese nɛ heeger tɔ̧́ nɛ́nɛ‘e: «Nɛ́ ge a'i tɛ de nɛ o wi nɔ'ɔ ge? wi tɛ kai wa si dee?

⁵¹Ndiŋ naŋ o bíí i̧sa Sa̧a̧-Fara k’Ɛ́nɛ́ ɗaŋ nɛ wartɛ-a. O wiɗafi'Nɛ́ a̧-a̧ tɛ zima fio in ziimɔ

⁵²Ɛnɛ zɔk, o dukbíí ee nú kpɔk wen mɛ kum yɛ yinɛ. K’Ɛ́nɛ́, Ɛ́nɛ́ iŋa o mɔ nɛ wa e zu-a mɛ de in yɛɛ‘i

⁵³K’Ɛnɛ tɛ́ mɛ ye ɗoŋ yɛ na, nɛ hee ge ɛɛ tɛ yor nɛ̀nɛ́ ti-wa ge nde?»

⁵⁴Nɛ́ mɔ'ɔ nɛ wa dɔma mbia, ɓɛɛ wa a nú-wa tɛ hiɗi mɔ ŋgúr ŋgúr.

⁵⁵Ɗoŋ-aa'i, Judas hoka o gasawi á zu o zuduk nɛ́nɛ́, o widukzu wibiro booro, gɔmŋmaa, ɓu-mɔɔrɔ, in mɛ bíí ɓu.

⁵⁶Hee mɔ'ɔ nɛ Heembea tɔ̧ ga, a̧ foo o wi nɛ ɓɔna so tɛ baa tua kɔ‘i e ŋgɔn, o wi nɛ hár nɛ kóo, o wan nɛ guna te-nyak-dɔ̧ɔ̧ kɔ‘i nɛ mbea, in o wan nɛ a̧-a̧ nɛ kíi lɛŋ sinɛ ɗoŋ tɛ kɔ-wa.

⁵⁷O wibiro nɔ‘i yee yuwar, ɓɛɛ nɛ́a de gbagari sɛn ka̧ Emmaus, nɛ ɗɔɔ.

⁵⁸Judas tɔ̧ɔ̧ ha̧ wa: «Ɛnɛ ɗafi o boi-biro á nɛ̀nɛ́, ɛnɛ yór nɛ wiwii ɓɔnti, ɛnɛ yá gɛ́ɗɛ́ gɛ́ɗɛ́ mɛ bi ŋmaa, mɛ sa̧a̧mɔ, in o dukbíí nɛ mɔi̧a̧ mɛ kum yɛ in mɛ yai Sa̧a̧-Fara k’ɛɛ‘i.

⁵⁹Wén, gana so ɛɛ fe yi biro bá nɛ zɔka o bɔnɛ fara tikaa zu dukbíí in zu Sa̧a̧-Fara k’ɛ́ɛ́.

⁶⁰Mɔ lɛŋ nɛ Yiwese koa̧ a hɔ́!