Read Northwest Gbaya 1 Makabee 4 Bible Online

1 Makabee 4 - Northwest Gbaya bible

1 Makabee 4

¹Gɔrgias mgbɔɔ o wi nɛ biro nɛ náŋ booro mɔɔrɔ, in o ŋgaŋa wi-daŋ-nyaŋa booro, ɓɛɛ wa yak nɛ zɛ,

²mɛ gɔm gbaŋanyaŋa yé nɛ gbagari ko o be-Juif, in mɛ gbaŋi wa. Nɛ́ o wi kɔ̧ ŋgara Jerusalɛm a̧ dúk so ti ha̧ wa.

³Judas zia wen-aa, ɓɛɛ kai o ŋgaŋa-wi kɔ‘i yak nɛ̀nɛ́ mɛ bi nɛ ŋmaa in o wibiro ko wannu, nɛ a̧-a̧ so sɛn saaye Emmaus,

⁴ŋgimbi'i ká o wibiro ko Gɔrgias pɛsa so kɔ‘i kpɔk kpɔk nyɛi nɛ gbagari.

⁵Gɔrgias hɔɔ kɔ̧ gbagari ko Judas mɛ́ zaŋ-zɛ, ɓɛɛ kpa ŋma bíí na. Nɛ́ mɔ'ɔ n'aa yee tɛ kia o Juif nɛ mgbara o kaya nɛ́nɛ́, wen a̧ tɔ̧ kɔ̧-a̧‘e: «Wa yú nɛ ɛ́ɛ́.»

⁶Judas hɔɔ bɔkɔnu mɛ tutuyɛ sút, in o wiwii booro taar. Mɔ kpɔk, o wi nɔ‘i bó so nɛ o boi-biro, ka bó nɛ gbapaa, hee mɔ'ɔ nɛ wa kɔ̧ɔ̧ so ga na.

⁷Sɛn ti wa, wa zoka gbagari ko o gɔni-duk nɛ nɔ̧ɔ̧ mitak yor nɛ́nɛ̀ ŋgeraa; o wi-daŋ-nyaŋa-biro nɛ zika a̧ pɛ́m nɛ mɔ; wa lɛŋ kana nɛ o wi-iŋ yuwar-biro ʼɛ̧́!

⁸Judas tɔ̧ɔ̧ ha̧ o bíí kɔ‘i: «K’ɛ́nɛ́ de kii gba dɔka wi nɔ'ɔ na, ɓɛɛ ka̧ bele zar'nɛ́ tɛ tika'nɛ kɔ-wa na.

⁹Tɛ-‘nɛ́ a mbaŋ ɗoŋ kpasaa nɛ zɔmdáà kpasa nɛ̀nɛ́ ɗɔɔ gbɛ̧ gbatɔp, ŋgimbi nɛ Faraɔn kaia so nɛ o wibiro kɔ‘i ndak nɛ pata wa’ɛ.

¹⁰Ɓɛɛ kinii, ɛɛ hiɗi mɔ si Yiwese. Kà A̧ nɛ zɔka ɛɛ nɛ kó, tɛ-A̧ tɛ mbaŋ ɗoŋ nɔ̧ɔ̧tɔk n'Aa dee so in o zɔmdáà k’ɛ́ɛ́, ɓɛɛ A̧ mbɔla o wibiro nɔ'ɔ yinɛ ti-yɛ sɔsɔɔ.

¹¹Hegɔ, o dukbíí lɛŋ tɛ iŋ‘e ŋma bíí a̧-a̧ sɛnɛ nɛ gɔn zu Israɛl kpasi nɛ a̧.

¹²O gɔni-duk baa yí nɛ ŋgɔn, ɓɛɛ zɔk'e o Juif a gbo biro pii tɛ wi'i,

¹³ɓɛɛ wa pɛ ŋmaa gbonɛ́ kɔ̧ gbagari mɛ bi biro. O bíí ko Judas dɔma mbia,

¹⁴ɓɛɛ wa kú̧ naŋ biro. Wa mbɔla o gɔni-duk, ɓɛɛ o gɔni-duk nɔ'ɔ yu mɔ si bɔkɔnu.

¹⁵Wa gɔna o wan nɛ ɓɔna ɗoŋ lɛŋ gbɛ́ nɛ gbapaa. O be-Juif ndaka ɗoŋ wa hɔ Gazara, in sɛn tɛ o bɔkɔnu Iduméé, Azotos in Jamnia. Tɛ de kana hee o bíí booro taar ga a fea.

¹⁶Ɗoŋ nɛ Judas pia in o wibiro kɔ‘i tɛ ndaka wa'i kaɗi, a̧ tɔ̧ɔ̧ ha̧ dukbíí:

¹⁷«K’ɛ́nɛ́ de wɔ o mɔɔ-oi gan zu'nɛ́ na, wen ŋma mbe biro pɛm nɛ ɛ́ɛ́ woyo»

¹⁸Gɔrgias a̧-a̧ in o bíí kɔ‘i zaŋ kaya, ɗɔ̧́ɔ̧́ ka tɛ-yɛ hɛ̧ɛ̧. Kinii, ɛnɛ yor nɛ nɔa ti o wisɛn k’ɛ́ɛ́, ɓɛɛ ɛnɛ nasi wa nɛ kpasaa. Hegɔ nɛ ɗoŋ, ɛnɛ nyɛma mɛ tuturi o mɔɔ-oi-wa nɛ yɔli.»

¹⁹Nú-Judas tɛ zɔm tɛ wen'i na, ɓɛɛ wi zɔ́k nɛ o wibiro fara guɗa mɔ nɛ zu kaya mɛ tɛ́nɛ́.

²⁰O wibiro nɔ‘i zɔka'e o bíí kɔ‘i ee naŋ tɛ yi, in gbagari mbɛt bíí nɛ wee nɛ́nɛ́. Sedaako mɔ nɛ yaka nɛ́ ziwee nɛ ɓɔna fara daŋaa ndɔŋgɔŋgɔ‘i.

²¹Tɛ zɔka mɔ‘i, bele zara wa. Tɛ zɔka o wibiro ko Judas fara yaa gɛ́ɗɛ́ gɛ́ɗɛ́ wen biro sɛn kɔ̧ bɔkɔnu mbɛt,

²²wa yuu mɔ lɛŋ yak si nu ko o Filistin.

²³Nɛ́ mɔ'ɔ nɛ Judas pia ɗoŋ woyo mɛ pɛ o mɔɔ kɔ̧ gbagari. Wa tutura o kɔya-sede lɔr in bu-mbɔi nɛ dɔkaa yak nɛ̀nɛ́, o tu̧ zɔ̧-laa in o gbɛ̧a, ká bá nɛ o ŋma zɔm dɔka mbɔi nɛtɛ nɛtɛ.

²⁴Tɛ siaa, o be-Juif gasa Yiwese, de nɛ osoko tɔ̧ nɛnɛ‘e: «A̧ ɔ́ dɛ̀é, ɓɛɛ kɔ̧ɔ̧mɔ kɔ̧-A̧ dúk ɓɔnsɛnɛ.»

²⁵Wese'i duka nɛ gasa wese gbin biro sɛn Israɛl.

²⁶O gɔni-duk gɔma so yak nɛ́ɛ̀ ɓa mɔ nɛ yaka lɛŋ ha̧ Lisias.

²⁷O wen nɔ‘i gɔna ɗɛɗɛ-a, ɓɛɛ gba̧a̧tɛ-a gbin, wen bó so nɛ o mɔ n'a̧-a̧ kɔ̧ɔ̧ so a̧ kpa Israɛl'i na; mɔ‘i nyɛm ɗoŋ ha̧a̧nu ko wannu na mbɛt.

²⁸Pɛ kpɔk ɗoŋ-aa'i, Lisias mɔi̧a̧ o kpasa ŋgaŋa wibiro booro ɓu-mɔɔrɔ-ɗoŋ-kpɔk, in o wi-daŋ nyaŋa-biro booro mɔɔrɔ, mɛ bi nɛ ŋmaa in o be-Juif.

²⁹Wa nɛ́ɛ́ hɔ Iduméé, ɓɛɛ wa de gbagari sɛn Bɛtsur. Judas kaia o bíí booro-ɓu we nɛ ti wa.

³⁰Ŋgimbi n'aa zɔka nɛ o ŋgaŋa wibiro nɔ‘i, a̧ kɔfa Sɔ̧, hee mɔ'ɔ ga: «Osoko h’Ɛ́nɛ́, Wankpasi-Israɛl. Ɛ́nɛ́ n’Ɛnɛ yora so ɗoŋ David widetom k’Ɛ́nɛ́ ká gán nɛ ŋga wibiro nɛ ŋgai, in ká a̧ há̧ nɛ gbagari ko o be-Filistin ha̧ Jonataŋ bem ko Saul in ha̧ wi-tui boi-biro kɔ‘i’ɛ,

³¹Ɛnɛ e gii wibiro nɔ'ɔ er dukbíí k’Ɛ́nɛ́ Israɛl, wen ha̧ gba dɔka o wibiro in o wi-daŋ nyaŋa-biro kɔ-wa mɛ e foe yi-wa.

³²Ɛnɛ pí bele zaŋ-wa. Ɛnɛ gɔ́n ndaa duka-tɛ kɔ-wa nɛ ŋgai kɔ-wa'i, ɓɛɛ nɛ tikaa kɔ-wa a gbin gba̧a̧tɛ-wa

³³Ɛnɛ pɔí wa a nu lɛŋ nɛ gbapaa ko o wi-kɔ̧‘Nɛ́, ɓɛɛ nɛ o wi nɛ iŋa nin-‘Nɛ́ lɛŋ a bii o gima zɔ́n nɛ Ɛ́nɛ́.»

³⁴Biro ku̧a, ɓɛɛ tɛ na̧sa̧ o ŋmaa kɔ-wa ŋgɔɗɔrr'i, o wibiro ko Lisias fee hee booro mɔɔrɔ ga.

³⁵Tɛ zɔka tikaa ko o wibiro kɔ̧-a̧ in kpɔra ko o wibiro ko Judas nɛ ya gɛ́ɗɛ́ gɛ́ɗɛ́ nɛ nɔɔŋgiɗi wen feaa koo duka kpasa, Lisias sii ɗoŋ Antiɔk, nɛ́ɛ́ kai o gɔni-duk a zu mɛ dɔk nɛ ŋgai kɔ‘i wen piaa mɛ tik nɛ nu Judéé.

³⁶Ɗoŋ mɔ‘i, Judas in o nyawi tɔ̧ɔ̧: «O wisɛn k’ɛ́ɛ́ kuma lɛŋ, ɛɛ daŋ, ɛɛ ɗafi war-tɛ Tua ko Sɔ̧, ɛɛ kifia nɛ tua ko kpasa sɔ̧ woyo.»

³⁷Gii wibiro mɔi̧a̧ ŋmaa, ɓɛɛ daŋ si zu kaya Siɔn.

³⁸Wa kpaa'e Sa̧a̧-Fara kifa bɛ̀ɛ́-oi. Taŋge-ɗafisɔ̧ ɗaŋa lɛŋ, wee dɔɔ o kpar-nu-Tua lɛŋ, o be-te hɔɔ kpɛ beegara-a lɛŋ, hee ŋma ti-kombo kóó zu-kaya ga; kɔ̧ o gɔna-ɓɛr-aa a̧ŋa̧ ɗaŋ lɛŋ.

³⁹Wa a̧ka̧ o laa kɔ-wa yinɛ, ɗú bùk a zu-wa, ɓɛɛ wa ye tɛ zɔm zimamɔ.

⁴⁰Wa hɔ̧fa̧ tik nu, bá sɔnti-wa hikiɗi nu, ɓɛɛ tɛ zia gɛr mbia wa ŋmaa nu-wa lɛŋ tɛ hiɗi mɔ si Yiwese.

⁴¹Judas ha̧nú ha̧ o ŋma wibiro kɔ‘i mɛ bi o wi nɛ ɓɔna kɔ̧ ŋgara, hɔ nɛ̀nɛ́ ŋgimbi nɛ‘i tɛ kaɗi nɛ sa̧-a̧ war tɛ-Tua ko Sɔ̧,

⁴²ɓɛɛ a̧ hok o sa̧-a̧ wiɗafisɔ̧ nɛ ɗɛɗɛ-wa gɔn wen heembea,

⁴³wa sa̧-a̧ war tɛ-Tua ko Sɔ̧, in pɛ́ɛ́ o ta taŋge-ɗafi-geesɔ̧ a táŋ tɛ ndiŋ fara.

⁴⁴Wa taa mɔ nɛ wa tɛ de nɛ taŋge-dɔ-kpoosɔ̧, nɛ‘i dee so ndiŋ a sɛnɛ‘i,

⁴⁵ɓɛɛ ŋma de taamɔ hɔ́ zu-wa ndé wi tɛ gbin a̧ a nu, ka a̧ tɛ̀ɛ̀ pi foe tɛ-wa, wen nɛ́ o wi-iŋ-Sɔ̧-na a̧ aa so ndiŋ tɛ a; hegɔ wa gbina a̧,

⁴⁶ɓɛɛ wa pɛ o ta-a gbisi zu ŋma de fara, zu kaya, nɛ‘i dee Tua ko Sɔ̧ sɛnɛ, zɛm nɛ tɛaa ko ŋma witɔ̧wen oi nu Sɔ̧, nɛ tɛ́ tɔ̧ wen zu a.

⁴⁷Nyɛm nɛ ɗoŋ Heembea, wa kaia o ta nɛ‘i sɛk na mbó nɛ ŋma mbɛ taŋge hee kuti-a ga.

⁴⁸Wa ɗafa Sa̧a̧-Fara in kɔ̧-Tua ko Sɔ̧ woyo, ɓɛɛ wa sa̧ war tɛ o beegara-a lɛŋ.

⁴⁹Wa dee o mbe nyɛ́k-dafi-Sɔ̧ woyo. Wa kai o dek-e-wee, tasi-dɔ-fuunyama, in taŋge-e-brɛd si kɔ̧ Tua ko Sɔ̧.

⁵⁰Wa dɔɔ fuunyama zu taŋge'i, ɓɛɛ wa e wee tɛ o lamba mɛ zu o dek-e-wee'i, nyɛ́k nɛ̀nɛ́ kɔ̧ Tua ko Sɔ̧.

⁵¹Wa aa o brɛd zu taŋge'i, gai̧ o laa-babir, ɓɛɛ wa kaɗi oi tom lɛŋ.

⁵²Tɛ ɓu-yiitoo-zua-mɔɔrɔ ɔɔ-zɛ ko mɔɔrɔ-ɗoŋ-naar fiozɛ nɛ‘i sa'e Kisleu, tɛ pɛ gɔmŋmaa nɛ ɓu-naar zua mɔɔrɔ-zaŋa-taar, wa kura mɛ tutuyɛ sut,

⁵³ɓɛɛ wa ɗafi Sɔ̧ zu mbe taŋge-dɔ-kpoosɔ̧, nɛ wa mboo'i nyɛm nɛ ɗoŋ Heembea.

⁵⁴Wa dee gbaŋa mbe taŋge-ɗafi-sɔ̧‘i nɛ o gima, koloŋ, kuŋge in sɔkɔ, kale kpɔk ŋgimbi in zɛ nɛ o wi-iŋ-Sɔ̧-na aa so nɛ ndiŋ tɛ a'i.

⁵⁵Dukbíí Israɛl lɛŋ hɔ̧fa̧, bá sɔnti hikiɗi nu mɛ gasi nɛ Sɔ̧, ɓɛɛ wa hɔ zaŋgule si Yiwese nɛ gbaka wa mɛ gbin biro'i.

⁵⁶Wa dee gbaŋa mbe taŋge-ɗafisɔ̧‘i tɛ ze mɔɔrɔ-ɗoŋ-taar, ɓɛɛ wa dó o kpoosɔ̧ nɛ nyɛŋɛ, ha̧ nɛ o mɔ ha̧ Sɔ̧ wen zɔna A̧, in kpaa ga̧a̧mɔ.

⁵⁷Wa dee o mbiŋ nɛ lɔr, ɓɛɛ wa gɔn dap ɗafi nɛ nú zala, ɓɛɛ wa ɗafi o fara-yee-Tua in o gɔn-bɛ́r-tua lɛŋ; wa aa o kpar-nu-a si nɛ ɗoŋ.

⁵⁸Dukbíí lɛŋ kpaa gasa desee, ɓɛɛ tɛ-wa bi ɗoŋ foe nɛ o wi-iŋ-Sɔ̧-na pi̧i̧ so tɛ wa'i.

⁵⁹Judas in o nyawi, ká bá nɛ o gii be-Israɛl lɛŋ, ee nú mɛ e o zɛ-gbaŋa taŋge-dafisɔ̧‘i tɛ zɛ mɔɔrɔ-ɗoŋ-taar, kale kpɔk ŋgimbi, dam ɗoŋ pɛ lɛŋ, de nɛ nyɛŋɛ, yɔ nɛ yɛ; Gbaŋa'i tɛ ku̧ tɛ ɓu-yiitoo-zua-mɔɔrɔ ɔɔ-zɛ ko fiozɛ Kislɛu;

⁶⁰Tɛ ŋgimbi'i, wa mboo o kusa garɔ in o ŋga taŋaɗa-pɛm-mɔ zik nɛ kaya Siɔn, wen ká o wi-iŋ-Sɔ̧-na tɛ̀ɛ̀ a ŋdiŋ tɛ o fara nɔ‘i woyo.

⁶¹Judas aa o wibiro-pɛm'a. A̧ sura Bɛtsur ŋgó reeŋ, ha̧ o bíí kpa ŋma ŋgara nɛ duk ti nu Iduméé.