Read Northwest Gbaya 1 Makabee 5 Bible Online

1 Makabee 5 - Northwest Gbaya bible

1 Makabee 5

¹Ŋgimbi nɛ o dukbíí mɛ zika fara'i zia'e taŋge-dafisɔ̧ in Sa̧a̧-Fara ɗafa nɛ mbea hee kuti-a ga wo,

²see-wa ɗaŋa batɛ, ɓɛɛ wa e nu-wa mɛ gbɛ o bezaŋ Jakɔb nɛ a̧-a̧ so mgbara wa lɛŋ yinɛ. Nɛ mɔ'ɔ nɛ wa yee tɛ gbɛ wa, kum nɛ wa yinɛ mgbara o bíí.

³Judas bii biro in o bezaŋ Ezau sɛn nu Iduméé in Akrabatɛn, wen nɛ́ wa kɛra so o be-Israɛl e se-a. A̧ tika wa, ndak wa yaknɛ, ɓɛɛ a̧ kai o mɔɔ-oi-wa.

⁴Tɛ-a mbaŋa ɗoŋ dàŋ ko o be-Baian mbɛt; wa yá so nɛ o pɛ́r in o tá-kɔ̧-naŋ ti dukbíí, gɔn nɛ o yuwar ti wa.

⁵A̧ kpee nu-wa ɓɔn e kɔ̧ o taŋgaɗa-pɛm-mɔ, tik wa nɛ biro, ɓɛɛ fɔm wa lɛŋ. A̧ pi̧i̧ wee tɛ o taŋgaɗa kɔ-wa gú nɛ o wi nɛ a̧-a̧ kɔ̧-a̧ lɛŋ.

⁶Hɔɗoŋ‘i̧i̧, a̧ yaka tɛ o bezaŋ Ammɔn; a̧ nɛ́ɛ́ kpa nɛ o gba gii ŋgaŋa wibiro in o zɔm giiwi, nɛ Timɔtéé dúk zu wa.

⁷A̧ baa biro in wa dam nù zɛkgbɛlɛk, gbɛ́ nɛ wa a nù mbɔlɔlɔ, ɓɛɛ a̧ kpá ŋgai zu wa.

⁸A̧ tika Yazɛr in o geɗɛk ye mɛ ka̧-a̧ nɛ biro, ɓɛɛ a̧ si ɗoŋ nu Judéé.

⁹O gɔni-duk nɛ a̧-a̧ sɛn nu Galaad lɛŋ mɔi̧a̧ e nú kpɔk mɛ bi o be-Israɛl nɛ a̧-a̧ zu nu kɔ-wa, in mɛ gbé wa yinɛ. Ɓɛɛ o be-Israɛl nɛ̀ɛ̀ hu̧si̧ tɛ kɔ̧ ŋgara Datema.

¹⁰Wa yɔra o wen nɔ‘i tom nɛ́nɛ́ ha̧ Judas in o nyawi: «O gɔni-duk nɛ zik yɛ mɔi̧a̧ mɛ tik yɛ in mɛ kum yɛ yinɛ.

¹¹Wa ɗafi nɛ mɔ wen tika ŋgara nd’ɛ́ɛ́ hu̧si̧ kɔ̧-a̧‘i nɛ biro. Nɛ́ Timɔtéé a̧ dúk zu o wibiro kɔ-wa.

¹²Ɛnɛ tɛ́ kinii, ɛnɛ gbó yɛ yinɛ er-wa ŋgaɓɔ, wen o bíí fea dɔ́k mgbara yɛ kaɗi.

¹³Wa gbɛ́ɛ o nya-yɛ mɛ́ nu ko Tobit yinɛ lɛŋ. Wa kaia o kóò kɔ-wa gú nɛ o bem kɔ-wa yaknɛ́ nɛ bara-biro. Wa kpéé nú o mbɔi kɔ-wa lɛŋ, ɓɛɛ o wiwii nɛ fea sɛn hi̧i̧ tɛ dee hee booro ga.»

¹⁴Wa ɓɔna tɛ tɔra o i̧i̧ kalata nɔ‘i, ɓɛɛ o ŋma betom woyo hɔ nɛ nu Galiléé mɛ, nɛ oi o a̧ka̧ laa, tɔ̧ nɛ o kpɔk nyɛrɛ nɔ‘i:

¹⁵«O wi Ptolemais, Tyr in Sidɔn, ká bá nɛ́ o gɔni-duk mɛ nu Galiléé lɛŋ mɔi̧a̧ ŋmaa, dúk zu nɛ ɛ́ɛ́ mɛ kum yɛ yinɛ.»

¹⁶Ŋgimbi nɛ Judas in dukbíí lɛŋ zia o wen nɔ‘i kaɗi, wa mɔi̧a̧ o bíí nɛ dɔkaa mɛ e zu mɔ nɛ wa tɛ de kpasi nɛ o nya-wa nɛ o gɔni-duk nukuri, in nɛ biro tika zu wa.

¹⁷Judas tɔ̧ɔ̧ ha̧ nya kɔ‘i Simɔn: «Mɛ hok o bíí a zu mɛ, á mɛ nɛ̀ɛ́ gbo o nya-yɛ nɛ a̧-a̧ sɛn Galiléé yinɛ. Ɛ́ɛ́ in Jonataŋ, ɛ́ɛ́ tɛ́ nɛ́ k’ɛ́ɛ́ sɛn nu Galaad.»

¹⁸A̧ ee Jozɛf bem ko Zakaríí, in Azarias gasawi ko dukbíí, in oi o wibiro ɓɔ́n sɛn nu Judéé‘i wen pɛma mɔ.

¹⁹A̧ tɔ̧ɔ̧ ha̧ wa: «Ɛnɛ o wan zu dukbíí, ɓɛɛ k’ɛ́nɛ́ ba ŋma biro sitɛ o gɔni-duk na, hɔ nɛ̀nɛ́ ŋgimbi pia k’ɛ́ɛ́.»

²⁰Wa ha̧bíí booro taar ha̧ Simɔn wen nɛa si Galiléé, in bíí booro mɔɔrɔ-ɗoŋ-taar ha̧ Judas wen nɛa si nu Galaad.

²¹Simɔn nɛ́ɛ́ sɛn Galiléé ɓɛɛ bi biro nɛ dɔkaa in o gɔni-duk, pɛsi nɛ wa sót sót.

²²A̧ ndaka wa nɛ́nɛ́ hegɔɔ hɔ́ nu ŋgara Ptolemais. A̧ gbɛɛ o gɔni-duk hee booro-taar ga, ɓɛɛ a̧ kai o mɔɔ-oi-wa.

²³A̧ mɔi̧a̧ o Juif mɛ Galiléé in o wan mɛ Arbatta, o kóò, o bem in o mbɔi kɔ-wa lɛŋ, ɓɛɛ a̧ kai wa sinɛ si Judéé zaŋ gasa desee.

²⁴Judas Makabee in nya-wi Jonataŋ kuu Jurdɛn, ɓɛɛ wa bá gbara nɛ́nɛ́ hegɔɔ tɛ zɛ taar.

²⁵Wa kpaa ŋmaa in o be-Nabata; o wi nɔ‘i kpɛka wa nɛ dea, ɓɛɛ ɓá o mɔ nɛ hɔɔ zu o nya-wa mɛ́ nú Galaad ha̧ wa; wa tɔ̧ɔ̧ ha̧ wa mbɛt’é:

²⁶o gɔni-duk kpee nú o ŋma Juif nɛ dɔkaa ɓɔn sɛn Bosora, Bosɔr, Alema, Kasfo, Makɛd in Karnain, nɛ yá lɛŋ nɛ o gasa ŋgara.

²⁷Wa kpee o ŋmaa ɓɔn e kɔ̧ oi o ye nu Galaad nɛ́nɛ́ mbɛt. O wisɛn kɔ-wa tɔ̧ɔ̧ mbɛt ndé: mɔɔsa̧, wi tɛ tik o ŋgara nɔ‘i nɛ biro, kum nɛ o wi nɛ ya sɛnɛ lɛŋ yinɛ tɛ kale kpɔk wese.

²⁸Wen'i nu'i, Judas in o wibiro baa gbara si Bosora mɛ. A̧ baa ye'i, gbɛ́ o wiwii sɛnɛ yinɛ lɛŋ nɛ gbapaa, tuturi o mbɔi-oi-wa lɛŋ, ɓɛɛ pi wee tɛ ye.

²⁹Wa sia ɗoŋ, nɛ zɛ, nɛ zɛ, hɔ ká̧ ŋgara (Datema) mɛ.

³⁰Mɛ tutuyɛ sút, ha̧ wa bá yi-wa nɛ ŋgɔn wo, ɓɛɛ wa zɔk nɛ o gii-wibiro, nɛ‘i nyɛm mɛ tɔr na, fara ɗafi o mɔɔ-daŋ-tua in o taŋgaɗa wen baa ye. Soɓɛɛ ká biro tika wa kaɗi.

³¹Ŋgimbi nɛ Judas zɔka’é biro baa, in nɛ hiɗimɔ saaye dáŋ dàŋ ŋgúr ŋgúr si yiwese, nyɛm nɛ ɗoŋ o gɛr mbia in o gaiamɔ wo,

³²a̧ tɔ̧ɔ̧ ha̧ o wibiro kɔ̧-a̧: «Sɔsɔɔ, ɛnɛ bi biro zu nya-yɛ ŋgaɓo.»

³³A̧ kɛ̧ɛ̧ o wibiro kɔ̧-a̧ tɛ́ dukaa taar, ɓɛɛ wa tik o wisɛn nɛ kɔrzu-wa. Wa dɔma o mbia, ɓɛɛ wa tui gima-biro pi nu.

³⁴Ŋgimbi nɛ o wibiro ko Timɔtéé iŋa nɛ ti o wibiro ko Makabee, wa lɛŋ pɛsa tirip. A̧ deemɔ bá nu-wa wese'i, ɓɛɛ a̧ gbɛ́ o bíí yi biro hee booro mɔɔrɔ-ɗoŋ-taar ga.

³⁵A̧ zika tɛ-a si saaye Alema, tik a̧ nɛ biro, bá a̧, gbɛ́ o wiwii lɛŋ yinɛ, tuturi o mbɔi kɔ-wa, ɓɛɛ pi wee tɛ ye.

³⁶A̧ kura sɛn híí, ɓɛɛ nɛ́ɛ́ bá Kasfo, Makɛd, Bosor, in o ŋma gasa ye nu Galaad.

³⁷Ɗoŋ o mɔ'ɔ nɔ‘i, Timɔtéé mɔi̧a̧ o mbe wibiro woyo, ɓɛɛ nɛ́ɛ́ bá fara tan nɛ Rafɔn, kur gbɔr-gbɔr yi mɛ́.

³⁸Judas toma o bíí-kpe-ti-naŋ gbagari, ɓɛɛ wa tɔ̧ wen’ɛ ha̧ a̧: «O gɔni-duk nɛ zika ɛ́ɛ́ lɛŋ mɔi̧a̧ ŋmaa yá ɗoŋ Timɔtéé, kifi nɛ o zɔm gii wibiro;

³⁹Wa hoka o be-Arab á zu wa mbɛt, dɔ́k nɛ wa siti, ɓɛɛ wa lɛŋ ɔ́ nɛ kur yì yá nɛ gɛ́ɗɛ́ gɛ́ɗɛ́ wen tika mɛ nɛ biro.» Judas wee ti wa, in o wibiro kɔ‘i,

⁴⁰ɓɛɛ hɔ dɔ̧ɔ̧ ká̧ zaŋ yì. Nɛ mɔ'ɔ nɛ Timɔtéé tɔ̧ɔ̧ ha̧ o wi-ya-zu o wibiro kɔ‘i: «Kà a̧ kú yì ti h’ɛ́ɛ́ láŋ, ɛɛ beka nyɛm gee nyɛmaa mɛ yor ti a̧ ɓɔ na, wen a̧ tɛ́ bá búk er-yɛ.

⁴¹Ɓɛɛ kà a̧ nɛ́ dee kii mɛ yor ɓɔn nɛ kur yì wo, ɛɛ tɛ ku yì, ɓɛɛ ɛɛ gana a̧.»

⁴²Ŋgimbi nɛ wa hɔɔ nu-yi kaɗi, Judas aa o wi-ya-zú o wibiro, nɛ ká̧ zaŋ-yi nɛ́nɛ́, ɓɛɛ tɔ̧ wen’ɛ ha̧ wa: «K’ɛ́nɛ́ e ŋma bíí kpɔk mɛ ɔ hɛ́ɛ́ na, bíí lɛŋ a yak nɛ biro.»

⁴³A̧ kuu yi nɛ zu-a ti sitɛ o wisɛn, ɓɛɛ dukbíí lɛŋ gbár ɗoŋ a̧. A̧ mbɔla o gɔni-duk ti a̧ yinɛ lɛŋ; wa siŋa o boi-biro kɔ-wa a nu, ɓɛɛ wa yu mɔ si kɔ̧ tua ko sɔ̧ kɔ-wa mɛ saaye Karnain mɛ.

⁴⁴O bíí ko Judas baa ye nɛti, ɓɛɛ wa dó tua ko sɔ̧ in o bíí nɛ mɔi̧a̧ sɛnɛ lɛŋ. Karnain tika de geemɔ, ɓɛɛ dika ɗoŋ‘aa'i ŋma bíí nyɛm mɛ yor ti Judas ɓɔ na.

⁴⁵Judas'i mɔi̧a̧ o be-Israɛl mɛ nu Galaad lɛŋ, o geɗɛk-a hɔ́ nɛ̀nɛ́ tɛ o gasa-a, o kóò, o bem, in o tui kɔ-wa lɛŋ: duka nɛ zɔm giiwi nɛ yak si nu Judéé.

⁴⁶Wa hɔɔ Efrɔn, ŋma gasa ŋgara nɛ a̧-a̧ so yuwar; wi nyɛm so mɛ gba ye'i nɛ mgbɔ̀ɔ́r na, kòò nɛ gale, kóó nɛ wiiko na, kana nɛ ɓiraa nɛ hi̧i̧ zɔ̧i̧i̧.

⁴⁷O wi-saaye bɛ̧ɛ̧ ee yuwar ha̧ wa, ɓɛɛ kin o kamta ŋgasi nɛ o nugaro-ye.

⁴⁸Judas toma tom-ga̧a̧mɔ ha̧ wa: «Ɛnɛ e h’ɛ́ɛ́ ɓir nɛ nù k’ɛ́nɛ́ si tɛ k’ɛ́ɛ́ ɓɛɛ, ŋma bíí beka de ɗaŋmɔ in ‘nɛ́ɛ́ na. Ɛɛ tɛ ɓir k’ɛ́ɛ́ ɓir ɓɛɛ.» Wa bɛ̧ɛ̧ huia o nugaro ha̧ a̧.

⁴⁹Judas ha̧nú ha̧ o wibiro kɔ‘i’é kóó o nde lɛŋ a yor nɛ biro fara n'a̧-a̧ dúk sɛnɛ.

⁵⁰O wibiro lɛŋ baa fara yá nɛ̀nɛ́ gɛ́ɗɛ́ gɛ́ɗɛ́. Ɓɛɛ Judas tik ye wese'i nɛ biro zɛ de nɛ̀nɛ́, mɔ sa̧ nɛ̀nɛ́ mbɛt, ɓɛɛ ye tik er-wa.

⁵¹Wa gbɛ́ɛ́ o wiwii lɛŋ nɛ gbapaa, yai ye gu nɛ nu gbukut, tuturi o mbɔi saaye'i ɓɛɛ ɓir yak, i̧si̧ nɛ o wɔr be-ye.

⁵²Wa kuu Jurdɛn si gasa bɔkɔnu sɛn ti Bɛtsan.

⁵³Judas yara mɔi̧ nɛ o wan nɛ daka zu ɓɔn ɗoŋ, há̧ nɛ nɔɔŋgiɗi ha̧ o bíí nɛ yuwar hɔ nɛ̀nɛ́ nu Judéé.

⁵⁴Wa daŋa kaya Siɔn zaŋ nyɛŋɛ in desee, ɓɛɛ wa dɔ́ kpoo-sɔ̧, wen nɛ wa lɛŋ pia ɗɔɔ ga̧a̧mɔ, ŋma bíí kpɔk mgbara wa yɔ na.

⁵⁵Ŋgimbi nɛ Judas in Jonataŋ a̧-a̧ so kɔ‘i nɛ̀nɛ́ nu Galaad, ɓɛɛ nɛ nya kɔ̧-a̧ Simɔn aa so kɔ‘i nɛti Ptolemais sɛn Galiléé,

⁵⁶Jozɛf bem ko Zakarii in Azarias, o gasawi-ya-zu o wibiro, zia nyɛrɛ ŋgai kɔ-wa, in nyɛrɛ o biro nɛ wa bia lɛŋ,

⁵⁷ɓɛɛ wa tɔ̧ ha̧ o ŋmaa: «Ɛɛ mbɛt, ɛɛ de ha̧ nin-yɛ mɛ hu̧r, ɓɛɛ ɛɛ nɛ̀ɛ́ tik o gɔni-duk nɛ zika yɛ lɛŋ nɛ biro».

⁵⁸Wa ha̧nú ha̧ o wibiro kɔ-wa, ɓɛɛ wa nɛ̀ɛ́ bi Jamnia.

⁵⁹Gɔrgias gboo saaye in o bíí kɔ‘i mɛ ku̧ naŋ biro.

⁶⁰Wa ee yi naŋ Jozɛf in Azarias, ɓɛɛ wa ndak wa hegɔɔ pi gbisi Judéé mɛ. Wese'i, o be-Israɛl fee hee booro yiitoo ga.

⁶¹Duka nɛ ŋma zɔm tikaa ko o dukbíí; mɔ nɔ‘i dea lɛŋ wen nɛ wa zii so nú Judas in o nyawi na. Wa tá so kɔ-wa’é ŋgai kɔ‘i nyɛma mɛ hur nin-wi mbɛt.

⁶²Mɔ kpɔk, wa bó so mgbara o kpara-bíí nɛ tɛ̀ɛ̀ kpasi Israɛl na.

⁶³Ŋgaŋawi Judas in o nyawi kpaa zɔnamɔ yí Israɛl lɛŋ, in ti o dukbíí lɛŋ nɛ zia nyɛrɛ kɔ-wa mbɛt.

⁶⁴O bíí pɛɛ ŋmaa si tɛ wa mɛ nɛ́ɛ́ zɔn wa.

⁶⁵Judas yaka in o nya kɔ‘i si ká̧zan mɛ ɗɔɔ mɛ nɛ́ɛ́ bi o bezaŋ Ezau. A̧ baa Hebrɔn in ye mɛ ká̧-a̧ lɛŋ, gbin o ŋgara kɔ̧-a̧ a nu, ɓɛɛ a̧ dɔ o taŋgaɗa zu garo lɛŋ.

⁶⁶Nɛ mɔ'ɔ n'aa baa yuwar si nu ko o be-Filistii, ɓɛɛ a̧ ɓir nɛ Marisa.

⁶⁷Wese'i, o wiɗafisɔ̧ nɛ nyɔŋa so nin nɛ̀ nɛ̀nɛ́ kpɛ́kɛ́ kpɛ́kɛ́ mɛ usi ngai kɔ‘i tɛ biro'i, fee lɛŋ.

⁶⁸Judas baa yuwar si Azotos, ŋma be gasa ye nu Filistii; a̧ too o taŋge-ɗafisɔ̧ kɔ-wa a nu, dɔ́ o te nɛ wa sɛka so de nɛ o geesɔ̧ kɔ-wa'i lɛŋ, kai o mɔɔ-saaye nɔ‘i ɓɛɛ pii ɗoŋ nu Judéé.