Read Northwest Gbaya 1 Makabee 6 Bible Online

1 Makabee 6 - Northwest Gbaya bible

1 Makabee 6

¹Wannu Antiɔkus yara nɛ o zikanu mɛ zu kaya, ɓɛɛ a̧ zii nyɛrɛ ŋma gasa ye nɛ a̧-a̧ sɛn nu Pɛrsɛ‘e Elimais; nin-ye'i hura nyɛmna, wen zu o mbɔi, o bu-mbɔi in o lɔr kɔ̧-a̧;

²tua-ko-sɔ̧ saaye'i duka nɛ tua-sede: o mɔá kɔ̧-a̧, nɛ o mɔɔ-pɛm-tɛ ko wibiro nɛ‘i de nɛ lɔr, o laa-boi-gu-zu-tɛ ko wibiro, in o boi-biro, oi Alɛkzandrɛ, wannu Masedoan, bem ko Filip, kuti wi nɛ ɔɔ so wan zu o Grɛk.

³Wannu Antiɔkus nɛa ɓɛɛ a̧ kii mɛ ba ye'i, wen kaia mɔɔ-a. Ɓɛɛ a̧ kpá yuwar-a na, wen wen-aa aa so zer o wi saaye'i,

⁴ɓɛɛ wa yá so zɛ́k zɛ́k wen bii a̧. A̧ yuu mɔ siɗoŋ pata naŋ-a, ɓɛɛ a̧ e fara'i dúk, zu gasa ɗaŋsee, mɛ si ɗoŋ Babilɔŋ.

⁵Ka̧ a̧ ɓɔna sɛn nu Pɛrsɛ, wa nɛ́ɛ́ tɔ̧ ha̧ a̧‘e: biro baa o wibiro nɛ nɛa so sɛn nu Judéé.

⁶Lysias nɛ nɛ́ɛ́ sɛn hi̧i̧, in o ŋgaŋa wibiro kɔ‘i, yuu mɔ ti o be-Juif. O be-Juif nɔ‘i sura tɛ nɛ o boi-biro, o mɔɔnyɔŋ in o ŋma mɔ nɛtɛ nɛtɛ, nɛ wa tutura, oi o wibiro nɛ wa pɛsa sót sót.

⁷Wa gbina Ɗaŋ-Ndiŋmɔ, nɛ Antiɔkus mboo so e zu taŋge-ɗafisɔ̧ sɛn Jerusalɛm'i, ɓɛɛ wa mbo o kusa garo zik nɛ Sa̧a̧-Fara kɔ-wa, hee kuti-a ga. Kale kpɔk mɔ‘i dee in Bɛtsur, ŋma ye mgbara o ŋgara ko wannu mbɛt.

⁸Tɛ zia o nyɛrɛ nɔ‘i, kii baa wannu ɓɛɛ gba̧a̧tɛ-a gbin, ɓɛɛ a̧ hɔ̧fi mbuak tik gɔn gado kɔ̧-a̧. Taamɔ ɗaŋsee pi̧i̧ zɛ́ɛ́ tɛ a, wen o mɔ yak hee o wan n'aa kɔ̧ɔ̧ so ga na.

⁹A̧ duka sɛn tɛ mɔ‘i nɛ dɔka zɛ, ɗaŋsee dáŋ nɛ a̧ siti. Ŋgimbi n'aa taa'e wi hɛɗa feaa kaɗi

¹⁰a̧ saa o sɛm kɔ̧-a̧ lɛŋ, ɓɛɛ a̧ tɔ̧ ha̧ wa: «Yá bó yi'm ɓɔ na, in taamɔ mbɛt gana zu'm.

¹¹Mi tɔ̧ si tɛ‘m nde: ɛ̧ɛ̧ nɛ ge zɔm ɗaŋsee ge a̧‘m dúk sɛnɛ'ɛ ge? Nɛ́ ge ŋgamɔ ge a̧ nukur'am hegɔ'ɛ ge? Zɔ́k! ŋgimbi wan kɔ‘m, mi duka so tɛ desee, ɓɛɛ o bíí lɛŋ kɔ̧ɔ̧ so'm mbɛt,

¹²ɓɛɛ kinii tɛ‘m mbaŋa ɗoŋ o ɗaŋmɔ n'am dee sɛn Jerusalɛm. Mi tutura so o mɔ, nɛ‘i dee so nɛ lɔr in bu-mbɔi sɛn saaye'i lɛŋ, ɓɛɛ mi tom nɛ́ɛ́ kum o wi nu-Judéé sɔɔgee.

¹³Mi iŋa'e nɛ wen zu o mɔ nɔ‘i á ɗaŋmɔ tik nɛ̀nɛ́ zu'm, ɓɛɛ zɔk n'am fe sɛn gɔni nu wen zu taamɔ'ɛ.»

¹⁴A̧ toma sa Filip, ŋma de sɛm kɔ̧-a̧, ɓɛɛ e a̧ nɛ wan zu nu kɔ̧-a̧ nɛ oi-aa lɛŋ.

¹⁵Wannu baa mɛtɛwol, in laa-wan, in wele-tumbal kɔ‘i ha̧ a̧, ɓɛɛ e bem kɔ̧-a̧ Antiɔkus er-a̧ wen usa ɗoŋ mɔ in usa yuwar-wan ha̧ a̧.

¹⁶Wannu Antiɔkus fee sɛn fara'i tɛ pɛ gɔmŋmaa nɛ ɓu-náár-zua-mɔɔrɔ-ɗoŋ-náár.

¹⁷Ŋgimbi nɛ Lisias zia wen fio ko wannu, a̧ dee wan ha̧ bem kɔ̧-a̧ Antiɔkus, n'aa daia so dika nɛ bem, ɓɛɛ ka a̧ sa a̧‘e Eupatɔr'i.

¹⁸O wi-pɛm-ŋgara dora o be-Israɛl e ɓɔn ka̧ Sa̧a̧-Fara, kii nɛ yuwar dee ɗaŋmɔ in wa, in mbɛt há̧ nɛ ŋgai ha̧ o gɔni-duk.

¹⁹Judas nɛ ee so kana see mɛ kum wa lɛŋ‘i, mɔi̧a̧ dukbíí lɛŋ mɛ tir a zu wa.

²⁰Nyɛm nɛ pɛ gɔmŋmaa nɛ ɓu-mɔárɔ, wa lɛŋ mɔi̧a̧ ŋmaa, ɓɛɛ yor biro zɛ́k zɛ́k zik nɛ ŋgara. Wa dee gasa mɔɔ-pi mboɗa-boi in o taŋgaɗa-biro zik nɛ ŋgara.

²¹Ɓɛɛ o ŋma wi nɛ wa kɛra'i gɔma gbo yak; o ŋma ɗaŋ-be-Israɛl aa zu wa,

²²ɓɛɛ wa nɛ́ɛ́ hɔ tɛ wannu Antiɔkus Eupatɔr, ɓɛɛ tɔ̧ ha̧ a̧: «Ɛ́nɛ́ tɛ zɛm mɔ hɔ ge ŋgimbi ge, sɛ́k’ɛ́nɛ́ kpasa ɛɛ, in yee ɗoŋ o nya-yɛ mbɛt ge?

²³K’ɛ́ɛ́, ɛɛ kpɛka mɛ de tom ha̧ dáà k’ɛ́nɛ́, mɛ demɔ nyɛm ɗoŋ o ha̧a̧nú kɔ̧-a̧, in mɛ kasi o gɛŋa kɔ̧-a̧.

²⁴Wen zu mɔ‘i, o be-nu k’ɛ́ɛ́ tika ŋgara nɛ biro, ɓɛɛ wa baa ɛɛ hee o gɔni-wi ga; zua-a'i woyo, o wi nɛ wa baa mgbara ɛɛ lɛŋ, wa gbɛɛ wa, ɓɛɛ wa pɛ o mbɔi k’ɛ́ɛ́ yaknɛ́ mbɛt.

²⁵Bó nɛ ɛɛ ɛnɛ-yɛ a er-wa baa ɓɛɛ na, mɔ‘i dama kana zu o zikanu k’ɛ́nɛ́ lɛŋ.

²⁶Zɔk kinii wa nɛka nu ŋgara Jerusalɛm mɛ ba nɛ ŋgai, ɓɛɛ wa súr Sa̧a̧-Fara in Bɛtsur ŋgeraa.

²⁷K’ɛnɛ gɔ́n ti wa nɛ hayaa na, wa tɛ de o pɛrti mɔ nɔ‘i siti woyo gan kuti-a, ɓɛɛ ɛ́nɛ́ beka nyɛm gee nyɛmaa mɛ dor wa ɓo na.

²⁸Ŋgimbi nɛ wannu zia wen'i, see-a ɗaŋa ɓɛɛ a̧ mɔi̧ o sɛm kɔ̧-a̧ lɛŋ, o wi-duk-zu o wibiro kɔ̧-a̧ lɛŋ, in o gasawi ko o wi-daŋ-nyaŋa-biro.

²⁹O gɔni wibiro tɛ̀ɛ̀ nɛ o gɔni nu, in nɛ o seekisi ɗɔɔ gbatɔp a zu wa mɛ mbɛt.

³⁰O wibiro kɔ̧-a̧ duka nɛ o wi-nɛ́-biro-nɛ-naŋ booro gɔmŋmaa, o wi-daŋ-nyaŋa booro-bu-yiitoo, in o fɔrɔ-de-biro ɓu-taar zua-yiitoo.

³¹Wa gboo nɛ war Iduméé, ɓɛɛ wa tik Bɛtsur, bí nɛ o taŋgaɗa-biro zɛ ɗɔk. O wi nɛ wa kɛra'i ɗɔia o woi-garo gbó nɛ̀nɛ́, dɔ́ o mɔɔ-de-biro nɔ‘i a nu lɛŋ, ɓɛɛ yor nɛ wiwii bi nɛ biro mbɛt.

³²Nɛ mɔ'ɔ nɛ Judas ee ŋgara dúk, ɓɛɛ yak nɛ́ɛ́ ba fara sɛn Bɛtzakaria, nú gbagari ko wannu mɛ.

³³Mɛ tutuyɛ sút, wannu kura ɓɛɛ tom o wibiro kɔ‘i gbút war kpɔk, si yuwar Bɛtzakaria. O wibiro yora nɛ naŋ biro, ɓɛɛ o mbia dóm.

³⁴Wa vata ŋma dɔ̧ɔ̧ nɛ yi-wayate e ti o fɔrɔ, ha̧ zu-wa mɛ kur wen biro.

³⁵Wa a o saɗi nɔ‘i nɛ mgbara o duk-biro nɛ́nɛ́. Wa aa o wibiro booro nɛ pi̧i̧ laa-boi, gú nɛ laasɔ̧i̧-ndɛrɛ nɛ ka tɛ fɔrɔ kpɔk kpɔk, ɓɛɛ o ŋgaŋa wi-daŋ-nyaŋa gɔmŋmaa mɔɔrɔ yá nɛ ɗoŋ fɔrɔ kpɔk kpɔk mbɛt.

³⁶O wi nɔ‘i yá yaa ti ha̧ saɗi'i. Fara n'aa nɛ́ lɛŋ, wa a̧-a̧ in a̧; wa e a̧ ndɛ́ŋkɛ́lɛ́ŋ na.

³⁷Wa saŋa so taŋgaɗa-pɛm-mɔ, nɛ‘i de nɛ te, kɔ́k e zu saɗi kpɔk kpɔk nɛ́nɛ́ nɛ nyak-ndárá, hee ŋma tua-ŋgui ga. O wibiro a̧-a̧ so kɔ́ o táŋgaɗa nɔ‘i taar taar, ɓɛɛ wa yá zu saɗi'i in baka-nyaŋa kɔ-wa, bi nɛ biro.

³⁸Wannu nɛka oi o wi-daŋ-nyaŋa nɛ ka tɛ o wibiro nɛ mgbɔ̀ɔ́r nɛ mgbɔ̀ɔ́r wen sɛsa o wisɛn in baa biro zu o wibiro kɔ‘i.

³⁹Ŋgimbi nɛ naŋ-wese aa tɛ o ŋgee nɛ‘i dee nɛ lɔr in ndɛrɛ, sa̧a̧mɔ-a aa zaŋ kaya lɛŋ tók nɛ̀nɛ́ kɛɗu kɛɗu hee o leɓewee-kan ga.

⁴⁰O ŋma wibiro ko wannu pɛɛ ŋmaa si zu kaya, ɓɛɛ o ŋma yak kɔ‘i nɛ naŋ-kaya. Wa nɛ́k nɛ sambaa nɛ́ nɛ nɔ, ŋma kii bo na.

⁴¹O bíí lɛŋ yaa ɗekeyeke tɛ zia giti o wibiro nɛ nɔi, o giti naŋ-wa in giti o boi-biro kɔ-wa nɛ to ŋmaa kpai-aa kpai-aa. Duka so kana nɛ́ gba gii ŋgaŋa wibiro ɓɔnti’ɛ̧.

⁴²Kóó zu i̧i̧ mbɛt, Judas nɛ́ɛ́ siti in o wibiro kɔ‘i mɛ ku̧ biro. O wibiro ko wannu gomŋmaa-mɔɔrɔ-doŋ-kpɔk kuma.

⁴³Eleazar, nɛ‘i sa'e Awaran, zɔka ŋma kpɔk mgbara o saɗi nɔ‘i, nɛ‘i saŋa tɛ-a nɛ boi-biro ko wannu, in nɛ kusa gan zu o oi-aa lɛŋ. A̧ taa kɔ-a̧‘e wannu a̧-a̧ zu i̧i̧

⁴⁴ɓɛ a̧ ha̧ tɛ-a mɛ kpasi dukbíí kɔ̧-a̧ in mɛ de ha̧ nin-a̧ mɛ hur ɓɔnsɛnɛ.

⁴⁵A̧ nyɔŋa nin-a̧, gɔm zu̧ mgbara o wibiro, ndɔ́r si tɛ saɗi'i, gbɛ́ nɛ o bíí nɛ mgbɔ̀ɔ́r nɛ mgbɔ̀ɔ́r nɛ́nɛ́ mbɔlɔlɔ, nyɛmna, ɓɛɛ o wisɛn wɛ́r ndayoo e wár ha̧ a̧.

⁴⁶A̧ ye ɗɔɔ fɔrɔ‘i ɓɛɛ tok a̧ tɛ golo-zaŋ gbɛ́. A̧ hɔ̧fa̧ tik zu Eleazar, ɓɛɛ mbɔl'a gbɛ́ ɓɔn hi̧i̧.

⁴⁷O be-Juif zɔka ŋgaŋaa in kpɔraa ko o wibiro ko wannu nyɛmna, ɓɛɛ wa dak zu-wa.

⁴⁸O wibiro ko wannu daŋá nɛ́nɛ́ si Jerusalɛm we nɛ ti o be-Juif. Wannu baa zu dúk nɛ nu-Judéé in kaya Siɔn.

⁴⁹A̧ nɔɔ tɔk in o wi-saaye Bɛtsur, ɓɛɛ wa gbo ye e duk ha̧ a̧, wen wa bo so nɛ kpasa nyɔŋmɔ wen bii biro siti na; duka so nɛ gasa pɛ-ɔm-tɛ ko o Juif, nɛ‘i de tom fɔ sɛnɛ na.

⁵⁰Wannu baa Bɛtsur, ɓɛɛ e o wibiro-pɛm-mɔ sɛn hi̧i̧.

⁵¹A̧ kpee Sa̧a̧-Fara nɛ dɔka zɛ, ɓɛɛ a̧ nɛ́k o taŋgaɗa-biro in o gasa mɔɔ-de-biro, o boi-pi-wee in o kamta, in o geɗɛk mɔɔ-pi góo in kii-ta.

⁵²O be-Juif nɛ yaa kɔ̧ ŋgara nɛka o boi-biro mbɛt sɛn ti ko o wisɛn, ɓɛɛ wa bi ŋmaa hegɔɔ zɛ dɔ́k.

⁵³Mɔ kpɔk, wa bó so nɛ o kpasa mɔɔ-nyɔŋ sɛn kɔ̧ o dam na, wen nɛ duka so mɔɔrɔ-ɗoŋ-yiitoo pɛ, in mbɛt o be-Israɛl nɛ‘i kaia so mgbara o gɔni-duk piinɛ pii Judéé nyɔŋa so nyɔŋmɔ kaɗi yinɛ mbɛt.

⁵⁴Nɛ́ o bíí tikiɗi á ɓɔna so kɔ̧ Sa̧a̧-Fara ɓɛɛ, wen kaɓa gana so zu-wa. O oi bíí pɛsa yak, o nde lɛŋ bá nɛ yuwar kɔ‘i.

⁵⁵Filip, nɛ wannu Antiɔkus ee geɗɛk bem kɔ‘i Antiɔkus er-a, ká a̧ ɓɔna nɛ gbaayí ha̧ a̧ mɛ usi tom-wan ha̧ a̧‘i,

⁵⁶Filip'i pɛɛ o wibiro nɛ yaka so in wannu piinɛ nɛ nu Pɛrsɛ in Mɛdii, ɓɛɛ a̧ kii mɛ duk zu o mɔɔwan zu zikanu'i wo.

⁵⁷Tɛ wen'i, Lisias deemɔ nɛ hayaa mɛ yak. A̧ tɔ̧ɔ̧ ha̧ wannu, ha̧ o widukzu o wibiro in o oi bíí: «Wese lɛŋ, ŋgai tɛ-yɛ kaɗi kaɗi siti. Oi nyɔŋmɔ dɔ́k h’ɛ́ɛ́ ɓɔ na; fara nd’ɛ́ɛ́ kɛra'i ɔ ŋgaya nyɛmna. Zua'i woyo, o tom-wan lɛŋ zɛm nɛ ɛ́ɛ́.

⁵⁸Ɛɛ zii ŋmaa in o wi nɔ'ɔ, ɛɛ kpá ga̧a̧mɔ mgbara yɛ in dukbíí kɔ-wa mbɛt.

⁵⁹Ɛɛ e ha̧ wa ndak ɗoŋ kuti yuwar dómɔ kɔ-wa, hee kuti-a ga. Wen nɛ dodom nɛ o yuwar dómɔ kɔ-wa nd’ɛ́ɛ́ dora á see-wa ɗaŋa nɛ̀nɛ́, nɛ wa de nɛ o mɔ nɔ'ɔ lɛŋ'ɛ.»

⁶⁰Wen'i dee tɛ wannu in o gasawi. Wa toma o de nuwen-ha̧-ga̧a̧mɔ sitɛ o Juif, ɓɛɛ wa kpɛk.

⁶¹Wannu in o gasawi kanamɔ mɛ yor ɗoŋ ha̧a̧nu'i, ɓɛɛ o be-Juif gbó kɔ̧ ŋgara.

⁶²Wannu daŋa zu kaya Siɔn, ɓɛɛ zɔk'e fara'i sura ŋgo-ŋgeraa; a̧ gbina ha̧a̧nu, ɓɛɛ a̧ fo o bíí mɛ to garo lɛŋ gbin a nu.

⁶³Hɔɗɔŋ-aa, a̧ kura nɛ hayaa si ɗoŋ Antiɔk. A̧ nɛ́ɛ́ kpa Filip tɛ wan saaye'i, a̧ bí ŋmaa in a̧, ɓɛɛ ɓár ye'i er-a yinɛ nɛ ŋgai.