Read Northwest Gbaya 1 Makabee 7 Bible Online

1 Makabee 7 - Northwest Gbaya bible

1 Makabee 7

¹Nyɛm nɛ ti pɛ gɔmŋmaa nɛ pɛ ɓu-mɔɔrɔ-ɗoŋ-kpok, Demetrius bem ko Seleukus, yuu ye Rɔm e dúk, kai o be bíí tikiɗi yak nɛ̀nɛ́ si ŋma gasa ye ka̧ Gbatɔp mɛ, ɓɛɛ nɛ́ɛ́ ku̧ naŋ wan kɔ‘i sɛn hi̧i̧.

²Tɛ zɔka a̧ fara yeaa si kɔ̧ kira-wan ko o dáà kɔ̧-a̧, o wibiro tika tɛ Antiɔkus in Lisias mɛ mgbɔ nɛ́nɛ́ ha̧ a̧.

³A̧ zia nyɛrɛ-a, ɓɛɛ a̧ tɔ̧: «K’ɛ́nɛ́ de ha̧ yí‘m mɛ to ŋmaa in wa na.»

⁴Hegɔ o wibiro gbɛ́ɛ́ wa, ɓɛɛ Demetrius nɛ́ɛ́ dúk zu kiti-wan kɔ̧‘i.

⁵Nɛ mɔ'ɔ nɛ Alkim nɛ kɔ̧ɔ̧ so mɛ duk wan-ɗafi-sɔ̧ mgbɔɔ o ɗaŋ bíí nɛ iŋ Sɔ̧ na sɛn nu Israɛl lɛŋ nɛ́ɛ́ kpa nɛ a̧.

⁶Wa baa ɓaawen zu dukbíí tɔ̧ nɛ́nɛ́ ha̧ wannu'e: «Judas in o nya kɔ‘i gbɛ́ɛ́ o sɛm k’ɛ́nɛ́ lɛŋ, ɓɛɛ ndak ɛɛ pɛsi sót sót zu nu k’ɛ́ɛ́.

⁷Ɛnɛ tom ŋma mgbak bíí e nɛ ta k’ɛ́nɛ́ ha̧ a̧ nɛ́ɛ́ zɔk o mɔ nɛ Judas ɗaŋa sɛn mgbara ɛɛ in sɛn zu nu ko wannu'i. Ɓɛɛ nɛ a̧ a de bɔnɛ in wa, gú nɛ o bíí nɛ gbak wa lɛŋ mbɛt.

⁸Wannu hoka ŋma sɛm kɔ‘i, nin-a nɛ Bakidɛs, nɛ dúk nɛ gasawi in wi-zii nú wannu in nɛ kur nanayi Efrat zii nɛ a̧,

⁹Wannu toma a̧ in ɗaŋwi Alkim. A̧ ee tom ɗafasɔ̧ er Alkim, ɓɛɛ a̧ tɔ̧ ha̧ a̧ mɛ kifi er ɗaŋmɔ ha̧ o be-Israɛl.

¹⁰Wa nɛ́ɛ́ in o gba gii wibiro sɛn nu Judéé. Wa dee gɔnta tom nɛ o bíí, nɛ o de nú-wen ha̧ ga̧a̧mɔ si tɛ Judas in o nyawi.

¹¹O be-Juif kɔɓa'e wa kaia nɛ o gba gii wibiro tɛ nɛ̀nɛ́, ɓɛɛ wa zii nu-wen ko o wi nɔ‘i nɛ ɗoŋ zer-wa.

¹²O ŋma wi-yɔr-heembea mɔi̧a̧ o ŋmaa tɛ ko Alkim in Bakidɛs, wen kia yuwar mɔ nɛ nyɛma mɛ de.

¹³O Assidéɛn yaa nɛ o kuti bíí mgbara o be-Israɛl nɛ aka ga̧a̧mɔ.

¹⁴Wa taa'e: «Nɛ ŋma wiɗafisɔ̧, mɛ zuduk ko Aarɔn, a tɛ̀ɛ̀ in o wibiro. A̧ beka de ŋma gɔɔmɔ in yɛ na.»

¹⁵Alkim tɔ̧ɔ̧ o de nyɔɔ nu-wen-ha̧-ga̧a̧mɔ si tɛ wa, ɓɛɛ a̧ kan mɔ ti wa, tɔ̧ nɛ̀nɛ́‘e: «Ɛɛ beka kii mɛ de ŋma be ɗaŋmɔ in'nɛ́, kà bó nɛ nɛ o sɛm k’ɛ́nɛ́, na.»

¹⁶Wa kɔ̧ɔ̧ ɗɔɔ nu-a, ɓɛɛ zua'i a̧ tɛ̀ɛ̀ kai o bíí ɓu-mɔɔrɔ-ɗoŋ-kpɔk mgbara wa gbɛ́ kale kpɔk wese, hee mɔ'ɔ nɛ yɔra zaŋ kalata ga:

¹⁷«Wɔr in tɔktɛ o sa̧-a̧ bíí k’ɛ́nɛ́ gbisa nɛ ka̧ Jerusalɛm nɛ́nɛ́, ɓɛɛ ŋma bíí mɛ gun wa bo na».

¹⁸Nɛ mɔ'ɔ nɛ kii in bele hɛra zaŋ o bíí lɛŋ. Wa yaa tɔ̧ nɛ̀nɛ́‘e: «Ŋma kpasawen, kà bó nɛ deemɔ nɛ yuwar-a bó tɛ o wi nɔ'ɔ na, wen wa gbina nɔɔtɔk in kanamɔ nɛ wa kana.»

¹⁹Bakidɛs kura Jerusalɛm, ɓɛɛ nɛ́ɛ́ de gbagari sɛn Bɛtzɛt. A̧ toma kai o wi nɛ yee so ɗoŋ a̧ nɛ dɔkaa in o ŋma gee-bíí mbɛt, ɓɛɛ a̧ gɔn ger-wa gbɛ́ lɛŋ, kai o wɔr-wa a kɔ̧ gasa wawuru.

²⁰Bakidɛs ee Alkim nɛ gasawi zu zikanu'i, e o ŋma wibiro wen gbaka a̧, ɓɛɛ a̧ si kɔ̧-a̧ ɗoŋ si ka̧ tɛ wannu.

²¹Alkim na̧sa̧ mɔ ha̧ wa mɛ e a̧ nɛ gasa wan-ɗafi-sɔ̧,

²²Ɓɛɛ o wi nɛ dak wen pi mgbara dukbíí lɛŋ mɔi̧ ŋmaa pii tɛ-a̧. Wa ɔɔ wan zu zikanu nu Judéé lɛŋ, ɓɛɛ wa de o ɗaŋmɔ nɛ dɔkaa sɛn nu ko Israɛl.

²³Judas zɔka'e o ɗaŋmɔ nɛ Alkim in o sɛm kɔ‘i de si tɛ o be-Israɛl gana ko o gɔni-duk

²⁴ɓɛɛ a̧ yár zik nɛ o nu-Judéé nɛ́nɛ́ lɛŋ. A̧ kifa er ɗaŋmɔ ha̧ o wi-e-ɗɔra, ɓɛɛ a̧ dor wa tɛ yara nu'i mbɛt.

²⁵Ŋgimbi nɛ Alkim zɔka'e ŋgai ko Judas in o nyawi dɔ́k dɔ̀k siti, in n'aa nyɛm mɛ yor ti wa ɓɔna, a̧ sia ɗoŋ tɛ wannu, ɓɛɛ nɛ́ɛ́ tɔ̧́ o zɔm ɗaŋmɔ a zu wa.

²⁶Nɛ mɔ'ɔ nɛ wannu toma Nikanɔr, ŋma mgbak kpasa wi-duk-zu-wibiro kɔ‘i, nɛ kɔ̧́ so wen ko o be-Israɛl na, in nɛ sɛ́n nɛ wa pi er tɛ wee mɛ nɛ́ɛ́ kum o bíí lɛŋ.

²⁷Nikanɔr hɔɔ Jerusalɛm nɛ zɔm gii wibiro, ɓɛɛ de gɔnta tɔ̧́ nɛ de nu-wen’ɛ si tɛ Judas in o nyawi:

²⁸«ká ŋma biro ye mgbara'm in ‘nɛ́ na. Mi tɛ nɛ́ in o wi-pɛm'am tikiɗi, mɛ tɔ̧ nyɛrɛ in ‘nɛ́, zaŋ ga̧a̧mɔ.»

²⁹A̧ hɔɔ tɛ ko Judas, ɓɛɛ wa fan ŋmaa, hee o de sɛm ga. Mɔ kpɔk, o wisɛn yá so kɔ‘i gɛ́ɗɛ́ gɛ́ɗɛ́ mɛ ba Judas yaknɛ́.

³⁰Judas kɔɓa'e Nikanɔr baa nɛ ɗaŋ taamɔ tɛ́ nɛ̀nɛ́ tɛ wi; kii dee a̧, ɓɛɛ a̧ bɛ̧́ kpaa ŋmaa mɛ tɔ̧ nyɛrɛ in Nikanɔr woyo.

³¹Ŋgmbi nɛ Nikanɔr zɔka'e ndaa gɔnta kɔ‘i gboo zan, a̧ wee ti Judas nɛ́nɛ́ si ka saaye Kafarsalama mɛ, mɛ́ bi ŋmaa in a̧.

³²O bíí ko Nikanor tira a nu hee bíí gɔmŋmaa-mɔɔrɔ ga, ɓɛɛ o oi-aa yu mɔ si saaye ko David.

³³Ɗoŋ mɔ‘i, Nikanɔr daŋa si zu kaya Siɔn, ɓɛɛ o wiɗafisɔ̧ in o kutiwi ko dukbíí pɛ ŋmaa gbonɛ́ nɛ kɔ̧ Sa̧a̧-Fara mɛ, mɛ fan a̧ zaŋ ga̧a̧mɔ, in mɛ nɛ usi kpoo-sɔ̧, nɛ wa ha̧ wen zu wannu'i ha̧ a̧.

³⁴Ɓɛɛ a̧ tɛ̀ɛ̀ zɛkɛɗi kɔ̧-a̧ nɛ wa, mam nɛ wa, tɔ̧ nɛ ɗaŋ-nú ha̧ wa.

³⁵A̧ kanamɔ zaŋ nyimsea tɔ̧ nɛ̀nɛ́‘e: «K’ɛ̀nɛ̀ nɛ́ kaia Judas in o wibiro kɔ‘i ha̧‘m kinii na, nɛ mɔ'ɔ n'am pia ɗoŋ ŋgimbi nɛ mɔ lɛŋ tɛ ga̧, mi tɛ pi nɛ wee tɛ Tua’ɛ ɓɛɛ» Ɓɛɛ a̧ yak nɛ nyimsea.

³⁶O wiɗafisɔ̧ sia, yor nú taŋge-ɗafisɔ̧, in nú Tua ko Sɔ̧, ɓɛɛ zu nú tɛ kɔ̧à tɔ̧ nɛ̀nɛ́‘e:

³⁷«Wan Sɔ̧, nɛ́ Ɛ́nɛ́ a hoka Tua’ɛ ha̧‘i mɛ sa nin-‘Nɛ́ ha̧ a̧, in ha̧ a̧ mɛ duk nɛ́ Tua-kɔfi'Nɛ́ in fara ai nú h’Ɛ́nɛ́ sɛnɛ.

³⁸«Ɛnɛ kifi er biro ha̧ wi’ɛ in o wibiro kɔ‘i, ɓɛɛ nɛ wa a tir a nu ɗɔɔ gbapaa. Tɛ-‘Nɛ́ a mbaŋ nin-‘Nɛ́ nɛ wa ɗaŋa so, ɓɛɛ k’Ɛ́nɛ́ de kó ha̧ wa ɓo na.»

³⁹Nikanɔr gboo Jerusalɛm yak, ɓɛɛ nɛ̀ɛ́ de gbagari sɛn Bɛt-Hɔrɔŋ. O wibiro mɛ nu Syrii tɛ kpa a̧ hi̧i̧

⁴⁰Judas dee gbagari sɛn Adasa in o bíí booro-taar, ɓɛɛ a̧ kɔfi Sɔ̧ hee mɔ'ɔ ga:

⁴¹«Gasa Wan, ŋgimbi nɛ o betom ko wannu ɗaŋá nɛ nin-‘Nɛ́ kaɗi, betom k’Ɛ́nɛ́ gboo, ɓɛɛ gbɛ́ bíí booro-gɔmŋmaa nɛ booro-ɓu-mɔɔrɔ-ɗoŋ-taar-zua-mɔɔrɔ mgbara wa.

⁴²«Ɛnɛ mbɔli o wibiro nɔ'ɔ ti yɛ yinɛ sɔsɔɔ hegɔ mbɛt, wen ha̧ o bíí mɛ iŋ nde Nikanɔr tɔ̧ɔ̧ ɗaŋ wen zu Sa̧a̧-Fara k’Ɛ́nɛ́. Ɛnɛ dé kita in a̧, nyɛm nɛ ɗoŋ ɗáŋ kɔ̧-a̧.»

⁴³O wibiro nɔ‘i ku̧u̧ naŋ bii ŋmaa tɛ wese ɓu-zua-taar zɛ «Adar». Wa hɔna o bíí ko Nikanɔr. Nɛ́ a̧ nɛ tɛ-a á fee feaa ti tɛ biro'i.

⁴⁴Ŋgimbi nɛ o wibiro ko Nikanɔr zɔka'e a̧ hɔ̧fa̧ tik nu kaɗi, wa siŋa o boi-biro a nu, ɓɛɛ wa yu mɔ yak

⁴⁵O be-Juif ndaka ɗoŋ wa hegɔɔ zɛ de nɛ̀nɛ́, dika Adasa mɛ hɔ́ nɛ̀nɛ́ ká̧ Gazara, dɔ́m nɛ o mgbɛmgbɛ, gai nɛ mɔ ɗɔŋ wa.

⁴⁶O bíí gboo nɛ tɛ o be-geɗɛk ye nu Judéé mɛ ka̧-a̧ lɛŋ, mɛ sɛsi wa, in mɛ kɛr wa. Wa lɛŋ tira a nu ɗɔɔ gbapaa, kóó ŋma kpɔk kpasi na.

⁴⁷Wa kaia o mbɔi in o ŋma mɔɔ-oi-wa. Wa ɓira zu Nikanɔr, in er-a mɛ wiiko, n'aa nyɛia̧ so de nɛ ŋgazu'i. Wa pɛɛ o mɔ nɔ‘i yaknɛ, ɓɛɛ wa nɛ̀ɛ̀ a ti o bíí Jerusalɛm.

⁴⁸Tortɛ baa dukbíí, ɓɛɛ wa de gbaŋa wese'i hee nɛ ŋma gasa wese nyɛŋɛ ga.

⁴⁹Wa hee mbeá mɛ de gbaŋa zɛ‘i tɛ ɓu-zua-taar ɔɔ-zɛ «Adar» dam ɗoŋ pɛ lɛŋ.

⁵⁰Hegɔ, ɓɛɛ nu Judéé ɔm benaŋ tikiɗi.