Read Northwest Gbaya 1 Makabee 8 Bible Online

1 Makabee 8 - Northwest Gbaya bible

1 Makabee 8

¹Hura-nin ko o be-Rɔm aa zer Judas: wa nɛ o hayatɛ widebiro, o widedemɔ in o wi nɛ yá ɗoŋ wa; wa usi nɛ kpasa kɔ̧ɔ̧mɔ sitɛ o wi nɛ ndaɗi in wa, ɓɛɛ wa kana nɛ o hayatɛ widebiro ɓɔnti ɛ̧.

²Wa ɓaa nyɛrɛ o biro in o yaká-yimɔ, nɛ wa dee so tɛ ko o be-Galat mɛ, ha̧ Judas, hee mɔ'ɔ nɛ wa gana so o be-Galat tɛ biro, ɓɛɛ ka wa gɔn nɛ garama a zu wa ga.

³Mɔ nɛ wa dee so sɛn zikanu Ezpania, ɓár o kɔ̧ bu-mbɔi in kɔ̧ lɔr zu nu'i, wa wee ɗoŋ-a ha̧ a mbɛt,

⁴in hee mɔ'ɔ nɛ gɔna-kɔ̧-ta in nɔɔŋgiɗi dea nɛ̀nɛ́ ha̧ wa mɛ ba nɛ nu'i mbɛt ga, wen fara'i ɔ́ so nyɛia̧ nɛ nu kɔ-wa batɛ. Duka nɛ kale kpɔk mɔ wen o wannu nɛ tɛa so nɛ gbisi-nu mɛ, wen tika wa nɛ biro; o be-Rɔm nɔ‘i mbɔla wa, ɓɛɛ ɗáŋ o mɔ kɔ-wa nɛ dɔkaa: o oi-aa nɛ ɓɔna gbó so kɔ‘i nɛ garama ha̧ wa dam ɗoŋ pɛ lɛŋ.

⁵Sɔŋkur-aa wa gana so Filip, Pɛrséé wannu ko o be-Kitim, in o wi nɛ baa so zu dúk nɛ wa lɛŋ, ɓɛɛ wa kpa ŋgai zu wa.

⁶Antiɔkus Gasaa, wannu Azii pɛɛ so o fɔrɔ-biro gɔmŋmaa nɛ ɓu-yiitoo, o nyaŋa, o keekee-nyaŋa in o gba gii wibiro mɛ bi nɛ wa, ɓɛɛ wa gbin ŋgai kɔ̧-a̧.

⁷Wa baa a̧ nɛ kpasa, ɓɛɛ wa gɔn zɔm garama, n'aa tɛ yoɓi tɛ ŋgimbi-a, a zu-a in zu o wi nɛ tɛ ɔ wan oi-a̧; a̧ tɛ ha̧ o bara-mbɔi-garama ha̧ a̧ mbɛt.

⁸Wa ɓara nu India, nu Mɛdii, nu Lydii in o ŋma de zikanu kɔ̧-a̧ er-Antiɔkus bá ha̧ wannu Eumɛnɛ.

⁹O be-Grɛk e zu-a mɛ nɛ́ɛ́ kum o be-Rɔm.

¹⁰O be-Rɔm zia wen-aa, ɓɛɛ tom ŋma gasa wi-duk-zu-wibiro kpɔk si zu wa. A̧ gana wa, ɓɛɛ o be-Grɛk kúm nɛ dɔkaa. O be-Rɔm kaia o kóo in o bem ko o wi nɔ‘i nɛ bara yaknɛ́. Wa ɗaŋa o mbɔi kɔ-wa, bá nu kɔ-wa, yai o ŋgara kɔ-wa lɛŋ, ɓɛɛ kai wa nɛ bara hɔ́ nɛ̀nɛ́ sɔsɔɔ‘i.

¹¹O be-Rɔm ɗaŋa o ŋma nú-wan in o see-kisi nɛ yora so ti wa, ɓɛɛ ká de wa nɛ bara’ɛ.

¹²Ɓɛɛ wa kaɗi dee sɛm sitɛ o wi-yor-ɗoŋ-wa in o wi nɛ ee ta nɛ wa na. Wa gana o wannu mɛ ka̧ tɛ-wa in o wan mɛ nyɛia̧ mbɛt nɛ ŋgai; hegɔ o wi nɛ zii nin-wa lɛŋ de nɛ kii.

¹³O bíí nɛ wa ta wa nyɛma mɛ ɔ wan, in nɛ‘i nyɛma mɛ gbak wa, wa tɛ́ ɔ wan, ɓɛɛ wa gboo o wan nɛ wa kɔ̧ na. Ŋgai kɔ o be-Rɔm yaka zale kaɗi.

¹⁴Zua'i mbɛt, kóó kpɔk mgbara wa hɛr mɛtɛwol ko wannu, kà bó nɛ pi̧i̧ gasa laa-wan mɛ gasi nɛ zu na.

¹⁵Wa hoka o gasa wi-duk-ti gɔmŋmaa-taar nɛ ɓu-yiitoo, nɛ mɔi̧ wese lɛŋ ba nɛ keta, ɗafi nɛ mɔ ha̧ dukaa ko dukbíí mɛ nɛ nɛ wara.

¹⁶Dam ɗoŋ pɛ lɛŋ, wa hok nɛ bíí kpɔk mɛ ɔ wan zu wa in zú nu kɔ-wa nɛ oi-aa, ɓɛɛ o bíí lɛŋ mboo nɛ zu ha̧ a̧, ɛ́nɛ́-a; ŋma be wɔmɔ kà bó nɛ aa-see-mɔ mgbara wa bó na.

¹⁷Judas hoka Eupolɛm, bem ko Jean, be-nutua ko Akkɔs, in Jazɔn bem ko Eleazar, ɓɛɛ a̧ tom wa si Rɔm mɛ nɛ́ɛ́ ba sɛm in mɛ nɔ tɔk in o be-Rɔm.

¹⁸Mɛ fo kpaŋa ko o Grɛk zu o be-Israɛl yinɛ mbɛt, wen wa zɔka'e o be-Grɛk ee so o be Israɛl tɛ bara.

¹⁹Wa kura yak si Rɔm; duka nɛ́ nyɛia̧ yuwar nyɛmna; wa yee kɔ̧ tua ko o wi-duk-ti, ɓɛɛ wa tɔ̧:

²⁰«Judas Makabee in o nya kɔ‘i, gú nɛ dukbíí Juif nɛ oi-aa lɛŋ, toma ɛ́ɛ́ tɛ́nɛ́ mɛ nɔ tɔk in mɛ kpa ga̧a̧mɔ e mgbara yɛ, in h’ɛ́ɛ́ mɛ ye poo o bíí k’ɛ́nɛ́ in o sɛm k’ɛ́nɛ́.»

²¹Mɔ‘i dee tɛ o be-Rɔm.

²²Nu-wen kalata nɛ wa yɔra zu o kpak-faɗak-mɔ, nɛ‘i de nɛ ndɛrɛ, ɓɛɛ ká wa tom yaknɛ́ si Jerusalɛm, kà tɛ o Juif mbáŋ nɛ ɗoŋ sɛm in nɔɔtɔk'i nɛ́ mɔ'ɔ:

²³«Mɔ a bá nɛ o be-Rɔm in o be-Juif mɛ zu nu in mɛ zu gbatɔp ɓɔnsɛnɛ. Gbapaa in wisɛn a nyɛi̧ nɛ wa.

²⁴Sɛn zu nu ko o be-Rɔm lɛŋ, kà biro nɛ kpa wa, kóó kpaa nɛ ŋma dukbíí nɛ wa nɔɔ tɔk in ŋmaa,

²⁵dukbíí Juif tɛ ye ɗoŋ wa nɛ see kpɔk, nyɛm nɛ ɗoŋ mɔ nɛ de tɛ ŋgimbi'i.

²⁶Nyɛm nɛ ɗoŋ ee-nu ko o be-Rɔm, o be-Juif beka ha̧, kóó alkamaari, kóó boi-biro, kóó mbɔi, kóó o kombon-biro ha̧ o wi sɛn Rɔm, kóó sɔɔgee kà bó nɛ gbakaa nɛ wa na mbɛt Wa tɛ kasi ee-nú kɔ-wa'i nɛ nɔaa; ŋma be taamɔ wen kpaa mɔɔ-oi-aa beka bo na.

²⁷Kalea mbɛt, kà ŋma biro a ku̧u̧ zu dukbíí Juif ti, o be-Rɔm tɛ bi biro'i in wa nɛ see kpɔk, nyɛm nɛ ɗoŋ mɔ nɛ tɛ de tɛ ŋgimbi'i.

²⁸Nyɛm nɛ ɗoŋ ee-nú ko o be-Rɔm, wa beka há̧, kóó alkamaari, kóó boi-biro, kóó mbɔi, kóó kombon-biro, gbak nɛ o wi sɛn Rɔm na. Wa tɛ yor nɛ ɗoŋ kanamɔ kɔ-wa nɛ see kpɔk ɓɛɛ.

²⁹Zu-wen nɛ o be-Rɔm ee nɔ́ nɛ tɔk in dukbíí Juif nɛ́ mɔ‘i.

³⁰Ŋma ŋgimbi nɛ ɗoŋ, kà ŋma bíí nɛ kɔ̧ɔ̧ mɛ fo ŋma heembea yinɛ, kóó mɛ e ŋma mbea zu a nde, wa a̧ de hee mɔ'ɔ nɛ wa kɔ̧ɔ̧ ga; mɔ kpɔk, wa a yor nɛ ɗoŋ mɔ nɛ‘i foo yinɛ, kóó nɛ‘i ee zu-a nɛ mbea'i.

³¹Nɛ war ko o ɗaŋmɔ nɛ wannu Demetrius nukura nɛ o be-Juif'i, ɛɛ yɔra mɔ'ɛ ha̧ a̧: «Wen ge sá mɛ pí bɔnɛ zu o be-Juif nɛ yá nɛ́ o sɛm k’ɛ́ɛ́ in o wi nd’ɛ́ɛ́ nɔɔ tɔk in ŋmaa’ɛ ge?

³²Kà wa nɛ́ ku̧i̧a mɔ zu-mɛ woyo, ɛɛ tɛ ye ɗoŋ wa, ɓɛɛ ɛ́ɛ́ bii ŋmaa in mɛ́ɛ́, nɛ zu nu in zu gbatɔp mbɛt.»