Read Northwest Gbaya 1 Makabee 9 Bible Online

1 Makabee 9 - Northwest Gbaya bible

1 Makabee 9

¹Ŋgimbi nɛ Demetrius zia'e Nikanɔr in o wibiro kɔ‘i kuma yi biro wo, a̧ toma Bakidɛs in Alkim, nɛ oi o wibiro mɛ wii-er-a, si nu Judéé woyo.

²Wa baa yuwar si Galiléé, ɓɛɛ wa yor biro ká̧ ye Mesalɔt, zu zikanu Arbɛlɛs. Wa ɓara ye'i, ɓɛɛ wa gbɛ́ o bíí sɛnɛ nɛ dɔkaa.

³Wa dee gbagari sɛn nú Jerusalɛm, tɛ kuti fiozɛ tɛ pɛ gɔmŋmaa nɛ pɛ ɓu-mɔɔrɔ zua-yiitoo.

⁴Ɓɛɛ wa kai o wi-nɛ-biro-nɛ-naŋ booro-ɓu-yiitoo, in o wi-daŋ-nyaŋa booro yiitoo yak nɛ̀nɛ́ si Beɛrzɛt mɛ.

⁵Judas bó dee so war gbagari kɔ‘i sɛn Elasa, in o kpɔra wibiro booro-taar sɛn ɗoŋ.

⁶Tɛ zɔka gba dɔka wibiro ko o wisɛn, bele zara wa. O bíí nɛ dɔkaa yuu mɔ yak, ɓɛɛ oi-aa nɛ ɓɔna nɛ o bíí gɔmŋmaa-mɔɔrɔ-ɗoŋ-taar ɓɛɛ.

⁷Judas zɔka'e o wibiro kɔ‘i pɛsa, biro bó dúk dɔ̧ɔ̧ in wi'i. Gba̧a̧tɛ-a gbina, wen a̧ bó so nɛ ŋgimbi wen mɔi̧a̧ o bíí kɔ̧-a̧ woyo ɓɔ na.

⁸See-a ŋmana, ɓɛɛ a̧ tɔ̧ ha̧ o oi-aa nɛ ɓɔna: «Ɛnɛ kúr bee! Ɛɛ daŋ sitɛ o wisɛn k’ɛ́ɛ́, ɛɛ zɔk k’ɛ́ɛ́ nɛ tɛ̀ɛ̀ nyɛm mɛ bi ŋmaa in wa.»

⁹Wa gaia a̧, tɔ̧ nɛnɛ‘e: «Ŋma mɔ nd’ɛ́ɛ́ tɛ de kinii yak zu kpasa zu-yɛ bó na. Ɛɛ tɛ pii ɗoŋ in o nya-yɛ mɛ bi ŋmaa in wa woyo. K’ɛ́ɛ́, ɛɛ dɔ́k ɓɔna wa!»

¹⁰Judas kifa ha̧ wa: «Bíí beka tɔ̧‘e mi yuu nɛ mɔ ti wa na. Nɛ́ bo'o nɛ ŋgimbi k’ɛ́ɛ́ á hɔa, ɛ́ɛ́ nɔ̧ see-yɛ ɓɛɛ ɛɛ fe fio zu o nya-yɛ ŋgaɓo! k’ɛ́ɛ́ de ha̧ búù mɛ ba yɛ na.»

¹¹O wibiro ko o wisɛn gboo kɔ̧ gbagari yor ti wa. O wi-daŋ-nyaŋa kɔ-wa kɛ̧ɛ̧ tɛ fara yiitoo: o wi-pi̧-birndiŋ in o wi-pi̧-góó yaa ti ha̧ oi o wibiro, o ŋgaŋawi lɛŋ kpɔ kɔ‘i yá ti mɛ.

¹²Bakidɛs a̧-a̧ so nɛ wii-er-wa, o gii wibiro nɛ́ɛ́ nɛ mgbɔɔr nɛ mgbɔɔr nɛ ɗɔɔ ger mbia. O bii ko Judas dɔma mbia mbɛt,

¹³ɓɛɛ nu nak wen zu hiɗimɔ ko o wibiro. Biro dee dika tutuyɛ zɛ de nɛ̀nɛ́.

¹⁴Judas kɔɓa'e Bakidɛs in o dikin mgbak wibiro a̧-a̧ nɛ war wii-er. O wi-nɔ-see ko Juda mboɗa ŋmaa zik nɛ a̧,

¹⁵wa nasa o wi mɛ wii-er Bakidɛs ŋgɔɗɔrr, ndak nɛ wa hegɔɔ hɔ́ nɛ̀nɛ́ zu kaya Azara mɛ.

¹⁶Ŋgimbi nɛ o wibiro mɛ gale zɔka'e o wan mɛ wiiko yuu mɔ yak kaɗi, wa aa pata Judas in o bíí kɔ‘i, bí nɛ wa nɛ ɗoŋ tɛ́nɛ́.

¹⁷Biro baa dik, ɓɛɛ o wɔr gbísí gbisi ŋma̧kparaa nɛ mgbɔɔr nɛ mgbɔɔr mbɛt.

¹⁸Judas mbɛt fea, ɓɛɛ o oi-aa yu mɔ yak.

¹⁹Jonataŋ in Simɔn baa wɔr nya kɔ‘i Judas, ɓɛɛ wa nɛ́ɛ́ gun a̧ sɛn kɔ̧ pɛsi ko o dáà kɔ-wa sɛn Mɔdin.

²⁰O be-Israɛl lɛŋ hi̧a̧ a̧; wa zima a̧, wa aia nu-wa zɛ nɛ dɔka, tɔ̧ nɛnɛ‘e:

²¹«Dee hee ge sá ŋgaŋa wi-kpasi-Israɛl tɛ̀ɛ̀ fe’ɛ ge?»

²²O oi tom ko Judas, o biro n'aa bia, o ŋga mɔ n'aa dea in o dɔka mɔɔ-hur-nin-a, wi yɔr lɛŋ na, wen yaka zale.

²³Doŋ fio ko Judas, o wi-iŋ-Sɔ̧-na gboo dam zu zikanu Israɛl lɛŋ, ɓɛɛ o wideɗaŋmɔ bá zu nɛ ŋgɔn woyo.

²⁴Hee mɔ'ɔ nɛ gasa kaɓa tika so nu ŋgimbi'i mbɛt ga, o be-nu nɛ oi-aa lɛŋ sii ɗoŋ si tɛ wa.

²⁵Bakidɛs hoka o ɗaŋwi á nɛ zu zikanu nɛ́nɛ́.

²⁶O wi nɔ‘i kia o sɛm ko Judas, ɓɛɛ wa ɓá ndaa-wa. Hɔɗoŋ-aa, wa kaia wa nɛ́nɛ́ ha̧ Bakidɛs mɛ de bɔnɛ in wa in mɛ zɛkɛɗi wa.

²⁷Ŋgimbi'i duka nɛ ŋma ŋgimbi dikiɗa bíí kɔ̧ bɔnɛ sɛn Israɛl; dika nɛ o witɔ̧wen oi nu Sɔ̧ kaɗa so kɔ‘i nɛ̀nɛ́ lɛŋ, wi tɛ zɔk pɛrti mɔ‘i na.

²⁸Hegɔ, o sɛm ko Judas lɛŋ mɔi̧a̧ ŋmaa, ɓɛɛ tɔ̧ ha̧ Jonataŋ:

²⁹«Dika ɗoŋ fio ko nya-mɛ Judas mɛ‘i, ŋma bíí, hee a̧ ga, mɛ bà zu dúk nɛ wisɛn, mɛ bi Bakidɛs, in mɛ nasi o wi-kur zu dukbíí k’ɛ́ɛ́ bó na.

³⁰Nɛ hegɔ s’ɛ́ɛ́ hok mɛ sɔsɔɔ‘i nɛ gasawi k’ɛ́ɛ́ in wi-duk-ti h’ɛ́ɛ́ e oi a̧, wen ɗafa yuwar biro k’ɛ́ɛ́.»

³¹Dika ŋgimbi'i, Jonataŋ baa wan ɓɔn nu hi̧i̧, oi nya kɔ‘i Judas.

³²Bakidɛs zia wen-aa, ɓɛɛ kii mɛ gbɛ́ Jonataŋ.

³³Jonataŋ in nya kɔ‘i Simɔn, in o wi nɛ nɛ́ in a̧ lɛŋ zia wen'i mbɛt. Wa yuu mɔ si gbara Tekoe mɛ, ɓɛɛ wa nɛ́ɛ́ de gbagari sɛn ka̧ gɔna-yì Asfar.

³⁴Bakidɛs zia nyɛrɛ-a wese-ɔmtɛ, ɓɛɛ a̧ ku̧ Jurdɛn in o wibiro kɔ̧-a̧ lɛŋ.

³⁵Jonataŋ toma nya kɔ‘i, nɛ dúk zu o wibiro'i, mɛ ak o sɛm kɔ‘i be-Nabata wen aa o gba gíí tui kɔ‘i sɛn tɛ kɔ-wa.

³⁶Nɛ mɔ'ɔ nɛ o be-Jambri, wan mɛ Madaba, baa biro kpá nɛ wa, bá Jean gú nɛ o mɔ kɔ̧-a̧ lɛŋ, ɓɛɛ yak nɛ oi tui

³⁷Ɗoŋ mɔ‘i, Jonataŋ in nya kɔ‘i Simɔn zia'e o be-Jambri de nɛ gasa gbaŋa-ba-kóò. Wa mgbɔ koo'i tɛnɛ tululu nɛ Nabata mɛ. Duka so nɛ bokobem ko ŋma gasawi nù Kanaan.

³⁸Tɛ-wa mbaŋa ɗoŋ ŋgaŋa fio ko nya kɔ-wa Jean, ɓɛɛ wa dáŋ nɛ́ɛ́ hu̧si̧ kɔ̧ ŋma di̧i̧ zaŋ kaya mɛ.

³⁹Tɛ baa yí-wa nɛ ŋgɔn, wa zɔka o zɔm giiwi nɛ wor mɔ tɛ́ nɛ̀nɛ́: wibakóò, o sɛm kɔ̧-a̧ in o nya-a̧ duka ti, in o wi-mbɛr-biɔ̧ in o wi-bii-gima; wa tɛ nɛ o zɔm boi-biro in o tui.

⁴⁰O be-Juif gboo nɛ kɔ̧ di̧i̧, tik wa nɛ biro, ɓɛɛ gbɛ́ wa. Wa fee nɛ dɔkaa, ɓɛɛ o oi-aa yu mɔ yak si kɔ̧ kaya. O Juif kaia o mɔɔ-oi-wa lɛŋ yak nɛ̀nɛ́.

⁴¹Hegɔ gbaŋa-ba-koo kpaia nɛ kɔ̧ɔ̧-fio ɓɛɛ o tigɛr-gima kpai nɛ o gɔfamɔ.

⁴²Nɛ́ hegɔ a̧ wa kifa nɛ er fio ko nya-wa, ɓɛɛ wa si ɗoŋ yi fúk, ka̧ zaŋ nananyi Jurdɛn.

⁴³Bakidɛs zia nyɛrɛ mɔ‘i, ɓɛɛ a̧ pɛ gii wibiro, wese-ɔmtɛ, yak nɛ̀nɛ́ si nu Jurdɛn.

⁴⁴Jonataŋ tɔ̧ɔ̧ ha̧ o bíí kɔ‘i: «Ɛnɛ kúr bée! ɛɛ bí biro wen yaa kpasa ŋgaɓɔ. Sɔsɔɔ‘i bó hee mɛ mboyɛ́ɛ́ kóó mɛ tiyɛ́ɛ́ ga na.

⁴⁵Zɔk biro dúk nu-zɔ̧ɔ̧-yɛ dɔ̧ɔ̧; yi-Jurdɛn nɛ mgbɔɔr, fúk in kásà nɛ mgbɔɔr; ŋma fara yu mɔ nɛ kɔr-zu bo na.

⁴⁶Ɓɛɛ kinii, ɛnɛ hiɗi mɔ si Yiwese wen h’ɛ́nɛ́ mɛ kpasi er o wisɛn k’ɛ́nɛ́.»

⁴⁷Biro baa dik, ɓɛɛ Jonataŋ hu̧i̧ er nɛ ŋgɔn mɛ gɔm Bakidɛs. Bakidɛs aia tik nɛ kɔrzu ɓɛɛ wɛ́r ɗɔɔ gbapaa.

⁴⁸Jonataŋ in o bíí kɔ‘i kpiɗa aa ɗɔɔ Jurdɛn, ɓɛɛ zui yi dáŋ kur; o wisɛn kú Jurdɛn si ɗoŋ wa na

⁴⁹Wese'i, o wi-ya-kpɔk in Bakidɛs fee hee booro ga.

⁵⁰Bakidɛs sia ɗoŋ si Jerusalɛm. A̧ dee o ŋgara sɛn nu-Judéé: nɛ́ Jeriko, Emmaus, Bɛt-Hɔrɔŋ, Betɛl, Tamnata, Faratɔn in Tefɔn, n'aa mboo o kusa garo zik nɛ̀nɛ, nɛ oi o kparnu-a in o boi-saŋ nu-a̧ lɛŋ.

⁵¹Ɓɛɛ a̧ a o wibiro pɛ́m nɛ wa kpɔk kpɔk wen dee ŋmaa in Israɛl.

⁵²A sura ye Bɛtsur, Gazara in ŋgara (Jerusalɛm) nɛ nɔ̧a̧-a̧. A̧ aa o wibiro in o dam-mɔɔnyɔŋ sɛn saaye nɔ‘i.

⁵³A̧ kaia o bem ko o gasawi zu nu'i nɛ bara-biro, ɓɛɛ a̧ kpe wa kɔ̧ zɔɓɔ mɛ ŋgara Jerusalɛm.

⁵⁴Tɛ pɛ gɔmŋmaa nɛ ɓu-mɔɔrɔ nɛ pɛ taar, tɛ yiitoo fiozɛ, Alkimɛ ha̧nú mɛ gbin a nu garo mɛ kɔ̧ Sa̧a̧-Fara nɛ o witɔ̧wen oi nu-Sɔ̧ mboo so. Ɓɛɛ o bíí ku̧ naŋ gbina a.

⁵⁵Tɛ ŋgimbi'i, Alkimɛ tika zɛ́ɛ́, ɓɛɛ o tom yɔ́r. Nu-a̧ kpea ɓɛɛ dor ɓɔn ká a̧ tɛ̀ɛ̀ tɔ̧ ŋma be wen, in ha̧sɔŋkur nú-wen zu tua kɔ̧-a. A̧

⁵⁶Alkimɛ fee ŋgimbi'i zaŋ o ŋga bɔnɛ.

⁵⁷Ŋgimbi nɛ Bakidɛs zɔka'e Alkimɛ fea, a̧ sii ɗoŋ si ka̧ tɛ wannu, ɓɛɛ nu-Judéé ɔm benaŋ tɛ pɛ yiitoo.

⁵⁸O ɗaŋwi lɛŋ baa keta, wa tɔ̧ɔ̧: «Zɔ́k! Jonataŋ in o bíí kɔ‘i yá tɛ ga̧a̧mɔ, ŋma be kii de wa ɓɔna. Kinii ɛɛ tɛ sa Bakidɛs tɛ́nɛ́, ɓɛɛ a̧ kaia wa lɛŋ tɛ kale kpɔk zɛ

⁵⁹Wa nɛ́ɛ́ bá keta-a in a̧.

⁶⁰Bakidɛs pɛɛ gba gii wibiro yak nɛ̀nɛ́. A̧ yɔra mɔ nɛ hu̧sa̧a̧ tom ha̧ o sɛm kɔ̧-a̧ mɛ Judéé lɛŋ, ha̧ wa mɛ ba Jonataŋ in o ŋgaiwi kɔ‘i. Mɔ kpɔk, ndaa gɔnta kɔ-wa'i gboo zan ɓɛɛ ŋma mɔ hɔ gba̧a̧ na.

⁶¹Jonataŋ in o ŋgaiwi kɔ̧-i tɛ̀ɛ̀ kai nɛ o ŋma wi-e-zu wen gbɛ fio'i hee ɓu-mɔɔrɔ ga gbɛ́.

⁶²Ɓɛɛ Jonataŋ, Simɔn in o ŋgaiwi kɔ‘i dak zu si Bɛtbasi sɛn gbara mɛ. Wa mboo o mɔá saaye'i nɛ gbina so lɛŋ e ŋgɔn woyo, ɓɛɛ wa sur a̧ ŋgo reeŋ.

⁶³Bakidɛs zia nyɛrɛ-a, mɔi̧ o wibiro kɔ‘i lɛŋ, ɓɛɛ pi tom ha̧ o ŋgaiwi kɔ‘i mɛ Judéé mbɛt

⁶⁴A̧ nɛ́ɛ́ de gbagari sɛn ti Bɛtbasi, a̧ mboo o boi-biro a hi̧i̧, ɓɛɛ a̧ bi a̧ hegɔɔ zɛ dɔ́k.

⁶⁵Jonataŋ ee nya kɔ‘i Simɔn ɓɔn saaye'i, ɓɛɛ mgbɔ nɛ́ o wibiro tikiɗi yar nɛ̀nɛ́ nɛ zu nu.

⁶⁶A̧ tika Odemera in o nyawi ká bá nɛ o bezaŋ Farizɔn, sɛn kɔ̧ gbagari kɔ-wa, ɓɛɛ a̧ gan wa. O wisɛ́n nɔ‘i ku̧u̧ naŋ biro mbɛt, ɓɛɛ wa ye mgbara o wibiro.

⁶⁷Simɔn in o bíí kɔ‘i gboo ɓɛɛ wa nɛ́ɛ́ dɔ́ o mɔɔ-de-biro a nu.

⁶⁸Wa bii ŋmaa in Bakidɛs ɓɛɛ wa gan a̧. Gba̧a̧tɛ-a gbina wen o mɔ lɛŋ n'a̧-a̧ ɗafa so wen biro'i tika mbulɛ̀ɛ̀.

⁶⁹Ŋga nyimsea baa a̧ zu o ɗaŋwi, nɛ saa so a̧ tɛ́nɛ́ zu zikanu'i. A̧ gbɛɛ o ŋma nɛ dɔkaa, ɓɛɛ a̧ de taamɔ mɛ si.

⁷⁰Ŋgimbi nɛ Jonataŋ zia nyɛrɛ‘i, a̧ toma o betom si tɛ Bakidɛs, wen kpaa ga̧a̧mɔ mgbara ŋmaa, in wen kia yuwar gboo o bara-biro sinɛ ɗoŋ ha̧ a̧.

⁷¹A̧ kpɛka, ɓɛɛ a̧ demɔ nyɛm ɗoŋ akamɔ ko Jonataŋ. A̧ kanamɔ mbɛt'e tɛ duka kpasa kɔ‘i zaŋnu’ɛ, wi beka kii mɛ de ɗaŋmɔ si tɛ a ɓɔna.

⁷²Bakidɛs gboo o bíí ko Jonataŋ, n'aa kaia so nɛ bara-biro sɛn nu Judéé nɛti, ɓɛɛ a̧ si ɗoŋ nu kɔ̧-a̧; a̧ pii ɗoŋ nu ko o Juif ɓona.

⁷³Gbapaa ɔma be tɛ sɛn Israɛl, ɓɛɛ Jonataŋ nɛ́ɛ́ de ye sɛn Makmas mɛ. A̧ ɔɔ wan zu dukbíí kɔ̧-a̧ sɛn hi̧i̧, ɓɛɛ a̧ kaɗi o kpara ɗaŋwi yinɛ mgbara o be-Israɛl.