Read Northwest Gbaya 2 Makabee 1 Bible Online

2 Makabee 1 - Northwest Gbaya bible

2 Makabee 1

¹Ɛɛ fana o nya-yɛ, o Juif mɛ nu Egyptɛ. Nɛ́ ɛ́ɛ́ o nya'nɛ́ mɛ Jerusalɛm in mɛ nu Judéé a̧ fan ‘nɛ́ɛ́. Ga̧a̧mɔ in de dukaa h’ɛ́nɛ́!

²Sɔ̧ a dé demɔ in ‘nɛ́ɛ́, ɓɛɛ tɛ-A̧ a mbaŋ ɗoŋ nɔɔtɔk kɔ̧-A̧ in o kpasa widetom kɔ̧-A̧ Abraham, Izaak in Jakɔb.

³A̧‘a dé h’ɛ́nɛ́ mɛ gasi A̧ in mɛ de o mɔ n'A̧a kɔ̧ɔ̧ lɛŋ, nɛ ta-tɛ‘nɛ́, in nɛ see kpɔk.

⁴A̧‘a hú̧í̧ see'nɛ́ ha̧ Heembea in o geŋga kɔ̧-A̧, ɓɛɛ A̧‘a e ga̧a̧mɔ zu nù.

⁵A̧‘a zíí aia-nú k’ɛ́nɛ́, A̧‘a ɗáfí mgbara tɛ-A̧ in ‘nɛ́ɛ́, ɓɛɛ ká A̧ siŋ ‘nɛ́ pi̧ nù ŋgimbi bɔnɛ na.

⁶Ɓɛɛ nɛ k’ɛ́ɛ́, sɛn hɛ̧ɛ̧, ɛɛ kɔfi nɛ Sɔ̧ wen ɛ́nɛ́.

⁷Ŋgimbi wan ko Demetrius, tɛ pɛ gɔmŋmaa nɛ pɛ ɓu-mɔɔrɔ-ɗoŋ-kpɔk-zua-mɔɔrɔ-ɗoŋ- naar, ɛ́ɛ́ o be-Juif, ɛ́ɛ́ yɔra so mɔ h’ɛ́nɛ́‘e: «Zaŋ ditasee in ŋgamɔ nɛ tika so zu yɛ ti o pɛ nɔ‘i, dika ŋgimbi nɛ Jazɔn in o bíí kɔ‘i ɗaia nɛ er tɛ sa̧-a̧ nu in tɛ nu-wan,

⁸wa nɛa hegɔɔ hɔ tɛ pi̧i̧ wee tɛ kpar nú gasa Tua ko Sɔ̧, fók nɛ tɔktɛ o wi nɛ wen bo zu wa na a nu. Hegɔ, ɛ́ɛ́ kɔfa Gasa Wan, ɓɛɛ A̧ kpɛk; ɛ́ɛ́ ɗafa Sɔ̧, ɓɛɛ ɛ́ɛ́ a zɛzɛ; ɛ́ɛ́ aa wee tɛ o lamba, ɓɛɛ ɛ́ɛ́ kai o brɛd a zu taŋge-ɗafisɔ̧.»

⁹Ɓɛɛ kinii, ɛ́ɛ́ yɔr mɔ h’ɛ́nɛ́ wen dea gbaŋá o Tua-laa, tɛ fiozɛ Kisleu'i,

¹⁰mɛ pɛ gɔmŋmaa nɛ pɛ ɓu-mɔɔrɔ-ɗoŋ-taar-zua-mɔɔrɔ-ɗoŋ-taar. O Juif mɛ Jerusalɛm in o wan mɛ nù Judéé, o wi-ya-ti ha̧ wa, in Judas, wa fana Aristobul, witɔ̧mbɔrɔ ko wannu Ptolemee in bezaŋ o wiɗafisɔ̧ nɛ‘i tɛna nɔ̧́ a zu wa, wa fana o Juif mɛ nù Egyptɛ mbɛt: desee in hayatɛ ha̧ wa lɛŋ!

¹¹Ɛ́ɛ́ dee gasa osoko nyɛmna ha̧ Sɔ̧ wen n'A̧a̧ kpasa yɛ yí o ŋga hɔ́ɔ́kɔ́-mɔ, ɓɛɛ ká A̧ gbak yɛ gan nɛ́ wannu.

¹²Wen, nɛ́ A̧ nɛ zu-A a̧ ndaka o wi nɛ kaia boi gbó nɛ biro sitɛ sa̧-a̧ Yé.

¹³Wen, ŋgimbi nɛ gasawi kɔ-wa nɛa nɛ nu Pɛrsɛ in o wibiro kɔ‘i, nɛ‘i ta so'e wi nyɛm mɛ gan wa tɛ biro na, wa lɛŋ wa kuma sɛn kɔ̧ tua ko geesɔ̧ Nanaia, wen zu gɔna kɔ̧-zaŋ ko o wiɗafi-geesɔ̧‘i.

¹⁴Wen, tɛ ɔramɔ‘e wi kɔ̧ɔ̧ mɛ ba geesɔ̧ Nanaia'i nɛ kóò, Antiɔkus nɛa in o sɛm kɔ‘i sɛn híí. Taamɔ kɔ̧-a̧ so nɛ́ wen tutura o zɔm mbɔi er-a nɛ́ mbɔi-ba-ŋmaa.

¹⁵O wiɗafi-geesɔ̧ Nanaia kaia o mbɔi nɔ‘i a ti bíí, ɓɛɛ wannu in o ŋma sɛm kɔ‘i yé so si kɔ̧́ tua ko geesɔ̧‘i. Hegɔ, tɛ yee-tua ko Antiɔkus hegɔ, o wiɗafi-geesɔ̧‘i kpee nútua.

¹⁶Wa wɛ̧na ŋma be tóró nɛ hu̧sa̧a̧ sɛn kɔ̧ sóró, ɓɛɛ wa gbisi ta yo nɛ wannu hi̧i̧ gbɛ. Wa ɓira zu o wi nɔ‘i in o gbaagurtɛ-wa pi̧ ha̧ o wan nɛ ɓɔna zan.

¹⁷Tɛ mɔ lɛŋ, osoko ha̧ Sɔ̧ k’ɛ́ɛ́ nɛ gbɛa o wi nɛ dea so mɔɔ-ari'i.

¹⁸Ɛɛ tɛ de gbaŋa sa̧-a̧ war-tɛ-Tua ko Sɔ̧, tɛ ɓu-yiitoo-zua-mɔɔrɔ zɛ ko Kisleu, hegɔ ɛ́ɛ́ zɔka'e ɔ dee mɛ mbaŋ tɛ-‘nɛ́ h’ɛ́nɛ́ mɛ de gbaŋa'i mbɛt, hee mɔ'ɔ nɛ‘i dea nɛ gbaŋa Tua-laa in gbaŋa-wee, wee nɛ gboo so ŋgimbi nɛ Nehemii ɗafa nɛ Sɔ̧, ɗɔŋ mboa Tua ko Sɔ̧, in taŋge-ɗafisɔ̧ mbɛt nɛ mbea’ɛ ga.

¹⁹Wen, ŋgimbi nɛ wa kaia so nɛ o zɔmdáà k’ɛ́ɛ́ si nù Pɛrsɛ, o mgbak kpasa wiɗafisɔ̧ tɛ ŋgimbi'i baa wee'i zu fara-ɗafisɔ̧ yinɛ nɛɛ hu̧si̧ kɔ̧ ŋma kɔ̧, nɛ hɔɔ ŋmaa in kora wawuru ga, ɓɛɛ wa kpe zu-wa ndiɛ-ndiɛ, wen ká bíí tɛ̀ɛ́ iŋ fara-a.

²⁰Pɛ nɛ dɔkaa ɗoŋ mɔ‘i, nyɛm nɛ ɗoŋ kɔ̧ɔ̧mɔ ko Sɔ̧, Nehemii nɛ wannu Pɛrsɛ toma sinɛ sa o bezaŋ o wiɗafisɔ̧ nɔ‘i mɛ nɛɛ kii wee nɛ o zɔmdáà kɔ-wa hu̧sa̧ so'i. Ɓɛɛ nɛ wa mɛ tɔ̧‘e bó nɛ́ wee a̧‘i kpaa na, nɛ ŋma ndota-yì ɛ̧ wo, a̧ ha̧nú wa'a ɗú ŋma be yi'i tɛnɛ.

²¹Ŋgimbi nɛ‘i ɗafa mɔ lɛŋ wen ɗafa Sɔ̧ kaɗi, Nehemii ha̧nú ha̧ o wiɗafisɔ̧ mɛ gbai yì‘i a zu gua in ha̧a̧mɔ nɛ‘i aa zu a'i.

²²Wa dea hegɔ, ɓɛɛ ŋgimbi nɛ wese nɛ duule kpea so ku̧u̧naŋ nyɛkaa, gasa wee baa gɛlɛm yɛk nɛ o bíí lɛŋ.

²³Ŋgimbi nɛ o ha̧a̧mɔ bíí so nɛ wee, o wiɗafisɔ̧ in o wi nɛ yaa hi̧i̧ lɛŋ yea tɛ kɔfa Sɔ̧. Jonataŋ in o wiɗafisɔ̧ a̧ ku̧u̧ naŋ-aa, ɓɛɛ Nehemii in o dɔka bíí baa ɗei-aa.

²⁴Gba̧a̧ kɔfasɔ̧‘i nɛ́ mɔ'ɔ: «Gasa Wan, Gasa Wan Sɔ̧, Wan nɛ dee o mɔ lɛŋ, Wan nɛ o bíí de nɛ kíí-A, Wan-ŋgai, Widemɔ nɛ yuwar-a, Yaa-de-ko, kpɔk Wan, kpɔk De-wi,

²⁵kpɔk Wi-ha̧-mɔ, kpɔk Wi-dee-mɔ nɛ yuwar-a, Wan nɛ a̧-a̧ nɛ ŋgayamɔ lɛŋ, Wan nɛ duk ɓɔnsɛnɛ; Ɛ́nɛ́ n’Ɛnɛ gboo Israɛl ɗɔɔ ɗaŋmɔ lɛŋ, n’Ɛnɛ hoka o dáà k’ɛ́ɛ́ e nɛ k’Ɛ́nɛ́, ɓɛɛ k’Ɛ́nɛ́ sa̧ war-tɛ-wa’ɛ,

²⁶Ɛnɛ kpɛ́k ha̧a̧mɔ'ɛ, n’ɛɛ́ ha̧ wen zu dukbíí k’Ɛ́nɛ́ Israɛl lɛŋ; Ɛnɛ kásí war mɔ k’Ɛ́nɛ́, ɓɛɛ ɛnɛ sá̧ war-tɛ-wa.

²⁷Ɛnɛ mɔ́í̧ o bíí k’ɛ́ɛ́ nɛ pɛsa. Ɛnɛ gbó o wan nɛ ɓɔna tɛ bara sɛn gɔni nù mɛ. Ɛnɛ dé ko ha̧ o wan nɛ wa ee tɛ geemɔ, hee mɔɔ-nyɛ̧r ga’ɛ, wen ha̧ o gɔni-duk mɛ iŋ nde Ɛ́nɛ́ nɛ́ Sɔ̧ k’ɛ́ɛ́.

²⁸Ɛnɛ dé bɔnɛ nɛ o wi nɛ nukuri yɛ, da̧ nɛ ɛ́ɛ́ nɛ nyaware.

²⁹Ɛnɛ bá dukbíí k’Ɛ́nɛ́ e sa̧a̧ Fara k’Ɛ́nɛ́, hee mɔ'ɔ nɛ Mɔisɛ baa tɔ̧ ga.»

³⁰O wiɗafisɔ̧ bia kɔ‘i nɛ gima-zɔn-Sɔ̧.

³¹Ŋgimbi nɛ o mɔɔɗafisɔ̧ bia wee lɛŋ kaɗi, Nehemii ha̧nú wa'a gbai oi yì a zu o gasa ta.

³²Wa deemɔ‘i, ɓɛɛ ŋma leɓe-wee nyɛka, mɔ kpɔk sa̧a̧mɔ mɛ zu fara-ɗafisɔ̧ kpee zu i̧i̧ yinɛ.

³³Ŋgimbi nɛ nyɛrɛ mɔ‘i pɛsa, wa nɛɛ tɔ̧ ha̧ wannu Pɛrsɛ mbɛt'e fara nɛ o wiɗafisɔ̧ nɛ‘i kaia so yaknɛ nɛ bara hu̧si wee sɛnɛ‘i, ŋma yì gbo gboo; Nehemii in o gbamayari kɔ‘i dɔɔ nɛ o mɔɔɗafisɔ̧ nɔ‘i sa̧ nɛ war-tɛ-wa nɛ yì‘i.

³⁴Ɗoŋ nɛ wannu nɛɛ zɔka mɔ‘i nɛ́ kpasamɔ, a̧ tɔ̧a̧ wa'a ɓór fara'i, ɓɛɛ a̧ de fara'i nɛ sa̧a̧-fara.

³⁵Wannu duka mɛ tutur zɔm mboi sɛn fara'i, ɓɛɛ a̧ ha̧ŋma ha̧ o wi n'a̧-a̧ kɔ̧a̧.

³⁶Nehemii in o bíí kɔ‘i saa nin yì‘i'e «Nɛftar», wen nɛ tɔ̧‘e «sa̧-a̧ war-tɛ», ɓɛɛ o dɔka bíí sa kɔ‘i nɛ «Naft».