Read Northwest Gbaya 2 Makabee 10 Bible Online

2 Makabee 10 - Northwest Gbaya bible

2 Makabee 10

¹Tɛ ŋgai ko Gasa Wan, Makabee in o gbamayari kɔ‘i baa Tua ko sɔ̧ in yé nɛ oi-aa woyo.

²A̧ gbina o taŋge-ɗafisɔ̧, nɛ o gɔni-duk mboa so beegara'i a nù, in o ŋma-fara-ɗafi-geesɔ̧.

³Ɗoŋ nɛ wa ɗafa wartɛ Tua ko Sɔ̧ kaɗi, wa mboo mbɛ taŋge-ɗafisɔ̧ woyo, ɓɛɛ wa kɔn sawara ye nɛ́ mbe wee. Wa dee kuti ɗafasɔ̧ ɗoŋ pɛ yiitoo, wa dɔɔ fuu-nyama, a wee tɛ o lamba, ɓɛɛ wa kai o brɛd-ɗafisɔ̧ zu taŋge.

⁴Ɗoŋ nɛ wa dee o dómɔ nɔ‘i kaɗi, wa guu zaŋ-wa nu, kɔfi nɛ Gasa Wan Sɔ̧ ká A̧ tɛ̀ɛ́ e ha̧ pɛrti ɗaŋmɔ nɔ‘i mɛ tik zu wa woyo. Wa aia nú-wa’é ka'i nɛ dea ɗaŋmɔ woyo, A̧‘a usi nɛ be-bɔnɛ ha̧‘i nyɛm ɗoŋ-aa, ɓɛɛ nɛ ká A̧‘a̧ e wi er o gɔni-duk in o wi-ɗaŋ-nin-A̧ bɔna.

⁵Nɛ́ kale kpɔk zɛ nɛ o gɔni-duk ɗaŋa so nɛ wartɛ Tua ko Sɔ̧‘i a̧‘i ɗafa nɛ wartɛ-a woyo mbɛt. Duka nɛ tɛ ɓu-yiitoo-zua-mɔɔrɔ ɔɔ-zɛ ko Kisleu.

⁶Wa dee gbaŋa nɛ desee tɛ zɛ̧ mɔɔrɔ-ɗoŋ-taar, hee gbaŋa-tua-laa ga. Tɛ-wa mbaŋa ɗoŋ-aa'e wi dee so gbaŋa-tua-laa, ka'i ɔ so nɛnɛ nɛ mgbara kaya in kɔ̧ di̧i̧, hee o saɗi-zaŋbɛɛ ga.

⁷Nɛ́ hegɔ sa wa hɛr o ɓɔɔ-wa̧a̧, o gbáá-er-tɛ in o wa̧a̧-ndɛŋɛ, bíí nɛ gima nɛ hee-gɛ́r sitɛ Wi nɛ dea ha̧ ɗafa wartɛ Sa̧a̧-Fara kɔ̧-A̧ mɛ nɛ nɛ dea.

⁸Wa yɔra ŋma geŋga ha̧ o be-Juif lɛŋ‘e wi tɛ de kana nɛ gbaŋa'i tɛ o zɛ nɔ‘i dam doŋ pɛ lɛŋ; ɓɛɛ bíí lɛŋ kpɛk.

⁹Nɛ́ hegɔ a̧ Antiɔkus Epifan fea nɛnɛ.

¹⁰Kinii, ɛ́ɛ́ tɛ tɔ̧ nɛ wen nɛ zɔk Antiɔkus Eupatɔr, bem ko ɗaŋwi'i. Ɛ́ɛ́ tɛ we ɗoŋ o ŋga bɔnɛ oi-biro nɛ dɔ̧ gboŋga.

¹¹Ɗoŋ n'aa baa wan kaɗi, wannu Antiɔkus Eupatɔr ee ŋma bíí, nɛ‘i sa'e Lisias nɛ gasa wi-duk-zu o wibiro tɛ o zikanu Koele-Syrii in Fenisii.

¹²Wen Ptolemee, nɛ‘i sa'e Makrɔn, (nɛ́ wen nɛ tɔ̧ «dura-zu»), a̧ duka nɛ kuti bíí nɛ dea mɔ nɛ yuwar-a sitɛ o be-Juif, oi bɔnɛ nɛ wa usa so sɔɔgee ha̧ wa; a̧ wee so ɔɔ wan zu wa zaŋ ga̧a̧mɔ.

¹³O sɛm ko wannu nɛɛ a ɗɔɔ a̧ ha̧ Eupatɔr; ŋgimbi lɛŋ wi sa so a̧‘e «wi-e-ɗɔ́rá». Wa sɛn so nɛ a̧ mbɛt, wen n'aa siŋ seekisi Chyprɛ, nɛ Filometɔr ee so a̧ zu-a'i e duk, ɓɛɛ ká a̧ si ɗoŋ ndaɗi nɛ Antiɔkus Epifan. Hee mɔ'ɔ n'aa tu̧ tɛ tom-gasi kɔ̧-a̧ na ga, ɓɛɛ a̧ nɔɔ nyina gbɛ nɛ tɛ-a.

¹⁴Gorgias kifa nɛ gasa wanbiro tɛ zikanu'i, ɓɛɛ a̧ mɔi̧ o gɔni widebiro wen sede Ŋgimbi n'aa kpa yuwar lɛŋ, a̧ tik o be-Juif nɛ biro.

¹⁵Tɛ kale kpɔk ŋgimbi'i, o be-Iduméé nɛ a̧-a̧ nɛ o ŋgárá tɛ de fara yaa so ŋgíí nɛ o be-Juif mbɛt. Wa kpɛk nɛ o bíí nɛ wa ndak nɛ Jerusalɛm, ɓɛɛ wa kii mɛ tui biro pi nu.

¹⁶Makabee in o wibiro kɔ‘i aia nú sɛn beegara ak nɛ Sɔ̧‘e A̧‘a̧ ye ɗɔŋ wa, ɓɛɛ wa nɛ mɛ tik o ŋgárá ko o be-Iduméé nɛ biro.

¹⁷Ɗoŋ bíí ŋga biro, wa ndaka o wi nɛ ya zu garo bi nɛ biro'i, ɓɛɛ wa ba o ŋgárá nɔ‘i, Wa gɔna gɛr o wi nɛ tik kɔ̧ er-wa lɛŋ, ɓɛɛ wa gbɛ bíí gan gan booro-ɓu-yiitoo.

¹⁸O bíí gan booro-mɔɔrɔ-ɗoŋ-naar hu̧sa kɔ̧ o nɔɔ taŋgaɗa yiitoo nɛ oi o mɔɔ-de-biro lɛŋ wen dɔka zɛ.

¹⁹Makabee ee Simɔn, Jozɛf in Zachéé, in o wibiro kɔ‘i nɛ dɔkaa, nyɛma wen kɛra o wi nɔ‘i, ɓɛɛ a̧ yak, kɔ̧-a̧, si fara nɛ biro ba dik sɛnɛ.

²⁰O wibiro ko Simɔn, nɛ wɔ-sede gana zu wa’ɛ, kpɛka ha̧ ŋma o wi nɛ wa pɛm'i mɛ ye wa nɛ ti-fui; wen zu kɔya-sede booro-ɓu-mɔɔrɔ-ɗoŋ-yiitoo, ɓɛɛ wa ee war ha̧ o ŋma mgbara wa mɛ yu mɔ yak.

²¹Ŋgimbi nɛ wa ɓaa nɛ mɔ nɛ yaka ha̧ Makabee, a̧ mɔi̧a̧ o wi-ya-zu o wibiro kɔ̧-a̧ lɛŋ, ɓɛɛ a̧ de wen in o wi nɛ ɗɔra o nya-wa wen sede, ká e nɛ o wisɛn mɛ yu mɔ yak.

²²A̧ ha̧nú mɛ gbɛ o wi-e-ɗɔra nɔ‘i, ɓɛɛ wa ɓár o taŋgaɗa nɔ‘i yiitoo'i, ɓɔn nu-wi'i.

²³A gbin nɛ biro fara n'aa nɛ in o wibiro kɔ̧-a̧ lɛŋ, ɓɛɛ kɔ̧ o ŋgárá nɔ‘i yiitoo'i, a̧ gbɛɛ bíí gan gan booro-ɓu-yiitoo.

²⁴Timɔthéé, nɛ o Juif baa gan so nɛti tɛ biro, nɛɛ mɔi̧ o gɔni wibiro nɛ dɔkaa; a̧ mɔi̧a̧ o zɔm dɔka nyaŋa-biro nɛ tɛɛ nɛ nu Azii mbɛt, a̧ pii ɗoŋ nu Judéé, ɓɛɛ a̧ ta mɔ wen ɓara nu'i nɛ ŋgai.

²⁵Ŋgimbi n'aa hɛɗa dɔ̧ɔ̧ kaɗi, Makabee in o bíí kɔ‘i ɗuu fuunu a zu, már laa-zim-mɔ, ɓɛɛ wa ye tɛ aia nú ha̧ Sɔ̧.

²⁶Wa gbɛɛ zugur-wa nu ti naŋ taŋge-ɗafisɔ̧, ɓɛɛ wa kɔfi Sɔ̧ ha̧ A̧ mɛ yor ɗoŋ wa, ha̧ a̧ mɛ duk wisɛn ko o wi-sɛn-wa, in o wi-tɔn gɛr-wi nɛ tɔn ger-wa, nyɛm nɛ ɗoŋ hee mɔ'ɔ nɛ yɔra nɛ sa̧-a̧ zaŋ Heembea ga.

²⁷Ɗoŋ nɛ wa kaɗa kɔ̧fa̧sɔ̧‘i kaɗi, wa kaia o boi-biro, ɓɛɛ wa gbo saaye yak ɗoŋ-wa nyɛi̧ tikiɗi. Wa hɛɗa in o wisɛn kaɗi, ɓɛɛ wa yora gari.

²⁸Ŋgimbi daŋa sɛkɛ-sɛkɛ wese, wa ku̧u̧ naŋ gboa biro si tɛ o ŋmaa. O ɓíí bíí ba nɛ nɔɔŋgiɗi kɔ‘i in ee-ta nɛ Gasa Wan gan, e ti, bi nɛ biro'i, ɓɛɛ o ɓii-aa tɛɛ ba kɔ‘i nɛ mɔɔ-dawa kɔ‘i e ti.

²⁹Ŋgimbi nɛ biro baa dik, o wisɛn zɔka o zer-zer tɛ-bíí mɔɔrɔ, fara tɛa nɛ yiwese zu o nyaŋa nɛ‘i dee káná nú-wa nɛ lɔr, ɓɛɛ wa nɛɛ duk ti ha̧ o Juif.

³⁰Wa ba Makabee e see-aa kɔ-wa, pɛm nɛ a̧ nɛ o boi-biro kɔ-wa, ɓɛɛ wa yor zu-a ká ŋma mɔ tɛ̀ɛ́ ndɔ a̧. Ɓɛɛ nɛ war ko o wisɛn, wa gbisa o góó in pi̧i̧koro si zu wa: mɔ nɔ‘i zara yi-wa, zika zu-wa yelem, ɓɛɛ wa pɛsi sót-sót.

³¹Wa gɔna gɛr o wibiro booro-ɓu-yiitoo nɛ gɔmŋmaa-mɔɔrɔ. In o wi-ɗaŋ-nyaŋa gɔmŋmaa-mɔɔrɔ-ɗɔŋ-kpɔk.

³²Timɔthéé, nɛ zu, yuu mɔ nɛ́ hu̧si sɛn Gazara, ŋma nɔɔ-ŋgárá nɛ zíí so nɛ Kereas, gasawi-duk-zu biro.

³³Makabee in o bíí kɔ‘i kɛra ŋgárá‘i tɛ zɛ naar, nɛ hayatɛ tore-tore.

³⁴O wi kɔ̧ ŋgárá, nɛ ee so ta nɛ nɔaa ko ŋgárá kɔ-wa'i, yee tɛ tɔ̧a̧ ɗaŋ wen ha̧ Sɔ̧, da̧ nɛ ɗaŋ dara.

³⁵Tɛ mɔɔrɔ ɔɔ-zɛ, nɛ gɔna-ŋdaazan, o dara nɔ‘i baa tɛ o wibiro ko Makabee ɓu-yiitoo ɓɛɛ wa nyɔŋa nin ko wiwii kpiɗi nɛ zu garo; ŋga nyimsea-dawa dee wa, ɓɛɛ wa kum o wi nɛ tika kɔ̧ er-wa lɛŋ.

³⁶O ŋma daŋa nɛ mgbɔɔr mbɛt si zu o wi nɛ wa kɛra'i, ɓɛɛ wa dɔ o taŋgaɗa, wa yee gasa wee dɔ nɛ o wi-tɔ̧ ɗaŋ wen ha̧ Sɔ̧ nɛ kpasa'i. O ŋma woyo gbina o núgaro hu̧i̧ nɛ yuwar ha̧ oi wibiro, ba nɛ ye.

³⁷Wa gɔna gɛr Timɔthéé, nɛ hu̧sa so kɔ̧ ŋma gɔna-yi nɛ kora kaɗi, wa gɔna gɛr nya kɔ̧-a̧ Kereas in Apollofan mbɛt.

³⁸Dɔŋ mɔ‘i, O be-Juif bia gima zɔn nɛ Gasa Wan, de nɛ osoko ha̧ A̧, wen n'Aa dee gasa demɔ in o be-Israɛl, tɛ dea ha̧ wa mɛ gbin biro.