Read Northwest Gbaya 2 Makabee 11 Bible Online

2 Makabee 11 - Northwest Gbaya bible

2 Makabee 11

¹Lisias, nam ko wannu, nɛ baa so a̧ gasi nɛnɛ, in nɛ a̧-a̧ so zu wan, kpaa ɗaŋsee batɛ mbɛt zu mɔ nɛ yaka'i.

²Ɗoŋ tikiɗi, a̧ mɔi̧a̧ o wibiro, hee booro-ɓu-mɔɔrɔ-ɗɔŋ-taar ga, in o wi-daŋ-nyaŋa kɔ̧-a̧ lɛŋ, ɓɛɛ wa baa naŋ nɔ biro sitɛ o be-Juif. A̧ kɔ̧ɔ̧ so ha̧ ye Jerusalɛm mɛ kifi nɛ ye-ɔɔ ko o be-Grɛk.

³Taamɔ kɔ̧-a̧ nɛ́ mɛ gbo garama zu Tua ko Sɔ̧ mɛ Jerusalɛm, hee mɔ'ɔ nɛ‘i de zu tua ko o geesɔ̧ ko o gɔni-duk ga, in mɛ e tom ko gasa wan-ɗafi-sɔ̧ dam ɗoŋ pɛ lɛŋ er wi nɛ tɛ hi̧fi̧ hi̧fi̧,

⁴ŋma wen kɔ̧-a̧ nɛ ŋgai ko Sɔ̧ bo na; a̧ e ta nɛ zɔm gíí wibiro kɔ̧-a̧, o gba dɔka wi-daŋ nyaŋa kɔ̧-a̧, in o fɔrɔ kɔ̧-a̧ ɓu-mɔɔrɔ-ɗoŋ-taar.

⁵Hɔɔ kɔ̧-a̧ nu Judéé, a̧ nɛɛ si ka̧ Bɛtsur, ŋma ŋgárá nɛ nyɛia̧ nɛ Jerusalɛm hee kilomɛtrɛ ɓu-taar ga, ɓɛɛ a̧ tik ye'i.

⁶Ŋgimbi nɛ Makabee in o bíí kɔ‘i zia'e Lisias tik nɛ́ o ŋgárá nɛ biro wo, wa aia nú ha̧ Gasa Wan, nɛ gɔfamɔ in kɔ̧a̧, nɛ tigɛr kpɔk in gííwi, ha̧ Sɔ̧ mɛ tom ŋma betom kɔ̧‘i tɛnɛ mɛ kpasi Israɛl.

⁷Makabee, nɛ zu, kaia o boi-biro duk ti, ɓɛɛ a̧ ha̧ nɔɔŋgiɗi ha̧ o oi-aa mɛ we ti ŋgaŋgamɔ hee a̧ ga, wen bíí biro zu o nya-wa. Wa dika lɛŋ yak nɛ nɔɔ-see.

⁸Ɗoŋ-wa tɛ nyɛi̧ nɛ Jerusalɛm hɔ na, ɓɛɛ wa zɔk ŋma wi-daŋ-nyaŋa nɛ pi̧i̧ nɛ bu-laa, nɛ ŋgan mɔ nɛ boi-biro nɛ‘i de lɔ̧r, nɛ duk ti ha̧ wa

⁹Wa lɛŋ yee tɛ dee osoko ha̧ Sɔ̧ Yaa-de-ko, ɓɛɛ ká wa duna nɛ nɔɔŋgiɗi; ɓɛɛ wa ya dɔ̧ɔ̧ mɛ tok o bíí sár, gu nɛ o ŋga bokonam, kóó o ŋgɛŋ-boi mbɛt.

¹⁰Wa baa naŋ biro, ɓɛɛ wa yak in wi-ye-ɗoŋ-wa nɛ tɛɛ nɛ yiwese, wen Gasa Wan dee ko ha̧ wa'i.

¹¹Wa ndɔra a zu o wisɛn hee o dila ga,, wa gbɛ o wibiro booro-ɓu-zua-kpɔk, in o wi-daŋ-ŋyaŋa booro nɛ gɔmŋmaa-mɔɔrɔ-ɗoŋ-kpɔk, ɓɛɛ wa e yi naŋ o gíí wibiro ko o wisɛn lɛŋ.

¹²Dɔkaa mgbara yuu mɔ yak nɛ da̧i̧ in nɛ gee-er. Lisias, nɛ zu mbɛt, goma yak nɛ foe.

¹³Lisias, nɛ bo nɛ wiboko na, taa mɔ zu biro nɛ gana a̧‘i, ɓɛɛ a̧ iŋa'e ŋma bíí nɛ nyɛma mɛ gan o be-hébreu bó na, wen nɛ Sɔ̧ nɛ a̧-a̧ nɛ ŋgayamɔ lɛŋ yor ɗoŋ wa tɛ biro.

¹⁴Nɛ hegɔ sa a̧ tom o ŋma bíí mɛ e zu-a wen zia ŋmaa in wa wen kpaa ga̧a̧mɔ nɛ wara, ɓɛɛ a̧ ha̧ nú mbɛt'e wi tɛ dak wannu nɛ ŋgai mɛ kifi sɛm kɔ-wa.

¹⁵O mɔ nɛ Lisias tɔ̧ɔ̧ lɛŋ, Makabee kpɛka, wen ŋma mɔ nɛ gbɛŋ so yi-see-a yak zu de-dukaa ko dukbíí bó na; ɓɛɛ mɔ lɛŋ nɛ Makabee yɔra zu o be-Juif tom ha̧ Lisias, wannu kpɛka mbɛt.

¹⁶Kalata nɛ Lisias yɔra tom ha̧ o be-Juif, gba̧a̧ nɛ́ mɔ'ɔ: «Lisias fana dukbíí-Juif nɛ oi-aa lɛŋ.

¹⁷Jean in Absalɔm, n’ɛnɛ toma tɛnɛ‘i, ha̧kalata, nɛ yɔra nɛ ɗoŋ'ɛ, ha̧‘m, ɓɛɛ wa aka'm mɛ ha̧ kifanú wen mɔ nɛ wa ee zua'i ha̧ wa.

¹⁸O war mɔ nɛ zíí nɛ wannu, mi wee ɗoŋ-aa ha̧ a̧, ɓɛɛ wan nɛ zíí nɛ‘m mi kpɛka.

¹⁹K’ɛnɛ nɛ ɓɔna dukaa nɛ dea siti in wannu, ɓɛɛ ɗoŋ'ɛ mi mbɛt mi tɛ ha̧ ŋgai-tɛ‘m lɛŋ h’ɛnɛ mɛ ya nɛ dea.

²⁰Nɛ ko kɛ̧a mgbara-a, mi ha̧nú ha̧ o betom k’ɛ́nɛ́ in o bíí kɔ‘m mɛ e zua in ‘nɛ́ɛ́.

²¹Ɛnɛ yá nɛ dea. Wi yɔra kalata’ɛ tɛ ɓu-yiitoo-zua-naar ɔɔ-zɛ ko fiozɛ Dioskor ti pɛ gɔmŋmaa nɛ ɓu-naar-zua-mɔɔrɔ-ɗoŋ-taar. »

²²Gba̧a̧ wen nɛ yɔra zaŋ kalata ko wannu, nɛ́ mɔ'ɔ: «Wannu Antiɔkus fana nyawi Lisias

²³Dáà k’ɛ́ɛ́ sia sitɛ Sɔ̧, ɓɛɛ ɛ́ɛ́ kɔ̧a̧ ha̧ o ŋgaŋgamɔ mɛ yu zu o wi nu-wan k’ɛ́ɛ́ lɛŋ, ha̧ wa mɛ de o tom kɔ-wa nɛ kpee-see.

²⁴Ɛɛ zia'e o be-Juif bɛ̧a ndaka ɗoŋ o dómɔ ko o Grɛk, hee mɔ'ɔ nɛ dáà k’ɛ́ɛ́ kɔ̧a̧ so ga, in wa kɔ̧a̧ nɛ war dómɔ kɔ-wa gan, wa ak nɛ yuwar wen kasa o heembea kɔ-wa mbɛt

²⁵Hee mɔ'ɔ n’ɛɛ́ kɔ̧a̧ o sakalamɔ a̧ nyɛi nɛ dukbíí ga, ɛɛ há̧ nú ha̧‘i mɛ ha̧ Tua ko Sɔ̧ sinɛ ɗoŋ ha̧ wa, in ha̧ wa mɛ nyɛm mɛ de nɛ dómɔ ko o zɔmdáà kɔ-wa.

²⁶Ɔ dee ha̧ mɛ mɛ tom ŋma bíí sitɛ wa mɛ ba ɛr-ŋmaa in wa, ha̧ wa mɛ iŋ de taamɔ k’ɛ́ɛ́ in wa: hegɔ wa tɛ kpa nɔɔŋgiɗi wen dea o mɔ kɔ-wa nɛ kpee-see.»

²⁷Kinii, ɛnɛ zíí gba̧a̧ kalata nɛ wannu toma so ha̧ dukbíí-Juif: «Wannu Antiɔkus fana o wi-ya-ti in o oi dɔka be-Juif lɛŋ.

²⁸«K’ɛnɛ ya nɛ hayatɛ, mɔ n’ɛɛ́ kɔ̧a̧ a̧‘i. Nɛ k’ɛ́ɛ́, tɛ-ɛɛ ɔ haya.

²⁹Menelas tɔ̧a̧ h’ɛɛ‘e ɛnɛ kɔ̧a̧ mɛ si tɛ k’ɛ́nɛ́ mɛ de mbí-mbí tom k’ɛ́nɛ́.

³⁰Hegɔ, bíí lɛŋ nɛ tɛ si tɛ kɔ‘i nɛti ha̧ ɓu-taar ɔɔ-zɛ ko kii-zɛ Ksantik tɛ ya nɛ yɔli.

³¹O Juif nyɛma nyɔŋa war ŋyɔŋmɔ kɔ‘i, ndak nɛ ɗoŋ heembea kɔ‘i, hee so nɛti ga; ɓɛɛ kóó o nde nɛ tɛ de yɔɔkayamɔ wen n'aa iŋ na, wi beka de a̧ nɛ bɔnɛ na.

³²Mi toma Menelas h’ɛ́nɛ́ mɛ ga̧ see'nɛ́.

³³Ɛnɛ yá nɛ dea. Wi yɔra kalata’ɛ tɛ ɓu-zua-mɔɔrɔ ɔɔ-zɛ ko kiizɛ Ksantik, ti pɛ gɔmŋmaa nɛ ɓu-naar-zua-mɔɔrɔ-ɗoŋ-taar.

³⁴O be-Rɔm mbɛt toma kalata ha̧ o be-Juif, gba̧‘a̧ nɛ́ mɔ'ɔ: «Quintus Memmius, Titus, Manilius in Manius Sɛrgius, o mgbak betom ko o be-Rɔm fana dukbíí Juif lɛŋ.

³⁵O mɔ nɛ Lisias nam ko wannu ha̧h’ɛ́nɛ́‘i, ɛ́ɛ́ kpɛka mbɛt.

³⁶Nɛ́ ko o mɔ n'aa tɔ̧a̧‘e wi tɛ e ea ha̧ wannu wó‘i, k’ɛ́nɛ́ nɛ́ taa mɔ zu a kaɗi, n’ɛ́nɛ́ tom ŋma bíí nɛ hayaa tɛnɛ h’ɛ́ɛ́ mɛ nɛɛ we ɗoŋ-aa ha̧ wannu, kà de ká a̧ kpɛka, wen ɛ́ɛ́ nɛ́ Antiɔk.

³⁷Ɛnɛ tom o bíí h’ɛ́ɛ́ nɛ hayaa, wen h’ɛ́ɛ́ mɛ iŋ o taamɔ k’ɛ́nɛ́.

³⁸Ɛnɛ yá nɛ dea. Wi yɔra kalata’ɛ tɛ ɓu-zua-mɔɔrɔ ɔɔ-zɛ ko kii-zɛ Ksantik, ti pɛ gɔmŋmaa nɛ ɓu-naar-zua-mɔɔrɔ-ɗoŋ-taar.»