Read Northwest Gbaya 2 Makabee 12 Bible Online

2 Makabee 12 - Northwest Gbaya bible

2 Makabee 12

¹Ɗoŋ nɛ wa zia ŋmaa kadi'i Lisias sia ɗoŋ tɛ wannu, ɓɛɛ o Juif si kɔ‘i ɗoŋ tɛ o tom-fɔ.

²Mɔ kpɔk, mgbara o gasa wanbiro zikanu'i, nɛ́ Timɔthéé, Apollonius bem ko Généus, Hieronymɛ in Demɔfon, ká bá nɛ Nikanɔr gasawi ko o be-Siiprɛ nɛ bi so biro wen sede, kana nɛ wa ɓɛɛ a̧ e gee be eaa ha̧ o Juif mɛ ɔm tɛ zaŋ ga̧a̧mɔ na.

³O wi-saaye Jope dea ŋma gasa ɗaŋmɔ, nɛ‘i nyɛm mɛ tɔ̧ na: wa saa o Juif nɛ ya mgbara wa, in o koo gu nɛ o bem kɔ-wa mɛ ye kɔ̧ o kombon, nɛ wa ɗafa nɛ er-wa, wen dee be-yara ɗɔɔ gbatɔp, mɛ usi hee ŋma sɛnmɔ bo mgbara wa ɓɔ na ga.

⁴Nyɛm nɛ ɗoŋ ee-zu-mɔ ko o wi-saaye, o be-Juif kpɛka mɔ‘i, wen mɛ usi'e wi kɔ̧ɔ̧ nɛ ga̧a̧mɔ, in ŋma mɔ nɛ‘i de kii-a bo na. Ŋgimbi nɛ wa hɔa bikilik see-yì kaɗi, wa gbaia wa lɛŋ a ɗɔɔ yì: wa hee bíí gɔmŋmaa yiitoo ga.

⁵Tɛ zia nyɛrɛ ŋgaŋamɔ nɛ wa dea in o bíí zuduk kɔ̧-a̧‘i, Judas tɔ̧̧ wen-aa ha̧ o bíí kɔ‘i.

⁶Ɓɛɛ, ɗoŋ n'aa kɔfa Sɔ̧ Yaa-gɔn-kita nɛ wara'i kaɗi, a̧ nɛɛ tik zu o wi nɛ gbɛa o nya-a'i. A̧ pi̧i̧ wee nú-mbaŋ-kombon nɛ zaŋzɛ, dɔ o kombon lɛŋ, ɓɛɛ a̧ gbɛ o wi nɛ nɛa hu̧si tɛ hi̧i̧.

⁷Hɔɗoŋ-aa, a̧ sia wen núgaro-ye duk nɛ kpea. Taamɔ kɔ̧-a̧ ɓɔna kana zu pia ɗoŋ nɛ hayaa mɛ kum o be-Jope lɛŋ.

⁸A̧ zia'e o wi-saaye Jamnia kɔ̧a̧ so mɛ de o kpɔk mɔ nɔ‘i in o be-Juif nɛ ɔ ye in wa.

⁹A̧ tika Jamnia nɛ zaŋzɛ mbɛt, ɓɛɛ a̧ dɔ nú-mbaŋ nɛ oi kombon lɛŋ. O wi-Jerusalɛm nɛ ya so nɛ nyɛia̧a hee kilomɛtrɛ ɓu-mɔɔro ga zɔk nɛ pa̧i̧-wee'i.

¹⁰Judas in o wibiro kɔ‘i kura yak mɛ tik Timɔthéé. Nɛ wa nyɛia̧ benaŋ hee kilomɛtrɛ yiitoo ga, o be-Arab hee bíí booro mɔɔrɔ ga, in wi-daŋ-nyaŋa gɔmŋmaa-mɔɔrɔ-ɗoŋ- kpɔk dika a zu wa.

¹¹Biro baa dik, ɓɛɛ o bíí ko Judas gbin biro wen zu gbakamɔ ko Sɔ̧, ɓɛɛ o be-Arab nɔ‘i ak Judas mɛ nyɛi̧ er-a mɛ wiiko ha̧ wa; wa ha̧nú mbɛt mɛ ha̧ o mɔdai ha̧ a̧, in mɛ gbak a̧ tɛ mɔ nɛtɛ nɛtɛ.

¹²Judas zɔka'e wa nyɛma mɛ gbak wi tɛ o mɔ nɛ dɔkaa, ɓɛɛ a̧ kpɛk mɛ kpa ga̧a̧mɔ in wa. Wa ha̧er ha̧ o ŋmaa kaɗi, ɓɛɛ o Arab sia ɗoŋ kɔ̧ tua-laa kɔ-wa.

¹³Judas tika ŋma nɔɔ-ŋgárá nɛ o ndota garo zika kpa, in nɛ o gɔni duk nɛtɛ nɛtɛ ɔ sɛnɛ: nin ye'i nɛ́ Kaspin.

¹⁴O wi kɔ̧ ŋgárá e so ta nɛ ndota garo in dɔka nyɔŋmɔ kɔ-wa. Wa yaa da̧ nɛ o bíí ko Judas nɛ ɗaŋ dara. Wa ɗaŋa nin-Sɔ̧ mbɛt, tɔ̧ nɛ ndiŋ wen nɛ‘i nyɛm mɛ tɔ̧ na.

¹⁵Judas in o bíí kɔ‘i aia nú ha̧ Gasa Wan ko mɔ lɛŋ, nɛ gbina so o garo ye-Jeriko a nu ŋgimbi ko Josué, ŋma boi-biro kóó mɔɔ-ndur garo a nu bo na: Judas in o bíí kɔ‘i dik a zu o garo nɔ‘i zaŋ ŋga nyimsɛ.

¹⁶Wa baa ye'i tɛ ŋgai ko Sɔ̧; wa gbɛ bíí nɛ dɔkaa nyɛmna, nyɛmna, ɓɛɛ ŋma tɔp nɛ duka ka̧ mɔ hi̧i̧, nɛ pɛsa hee mɛtrɛ gɔmŋmaa-naar ga, kpe lɛŋ nɛ tɔk.

¹⁷Doŋ nɛ wa kura Kaspin, yak benaŋ nyɛi̧ hee kilomɛtrɛ gɔmŋmaa nɛ ɓu-naar ga, wa hɔɔ ŋgárá Karax, tɛ ko o be-Juif nɛ‘i sa'e Tobiɛn.

¹⁸Nɛ ko Timɔthéé, wa kpa so a̧ hi̧i̧ na, wen a̧ de ŋma mɔ hi̧i̧ na yak nɛnɛ; ɓɛɛ a̧ aa so ŋma ŋgaŋa duk-biro sɛn ŋma fara.

¹⁹Dosithéé in Sosipatɛr, o gasa wanbiro ko Makabee, nɛa sɛn fara'i ɓɛɛ wa kum o bíí nɛ Timɔthéé aa so kɔ̧ ŋgara hee bíí booro ɓu ga'i.

²⁰Nɛ ko Makabee, ɗoŋ n'aa aa o wibiro kɔ̧-a̧ nɛ dukaa kaɗi, a̧ hoka o wi nɛ tɛ ya zu-wa, ɓɛɛ a̧ gbo biro sitɛ Timɔthéé, nɛ aa so nɛ o wi-nɛ-biro-nɛ-naŋ booro gɔmŋmaa nɛ booro-ɓu-yiitoo in o wi-daŋ-nyaŋa booro-yiitoo nɛ gɔmŋmaa-mɔɔrɔ.

²¹Ŋgimbi nɛ Timɔthéé zia'e Judas a tɛ‘i wo, a foo o okóò, o bem in o oi-tui yaknɛ si ŋma fara, nɛ‘i sa'e Karniɔn: nɛ́ ŋma ŋgárá nɛ biro nyɛm mɛ ba na. Neaa si hi̧i̧ duk yɛkɛɗɛ na, wen o yuwar-a lɛŋ ya ɓɔtɔ-ɓɔtɔ nyɛmna.

²²O wibiro ko Judas hɔɔ ti; ŋgimbi nɛ o wisɛn zɔka wa, kii dee wa; Sɔ̧ nɛ zɔk mɔ lɛŋ usa ŋma mɔ nɛ dee ha̧ bele mɛ zar wa, ɓɛɛ wa yu mɔ, ma nɛ yì dam fara lɛŋ, aa nɛ da̧i̧ tɛ o ŋmaa, tɔk nɛ o ŋmaa nɛ ɓɛ̧i̧a̧-nú gbapaa mbɛt.

²³Judas ndaka wa nɛ ŋgai-tɛ lɛŋ; a̧ gɔna o wigbɛzu nɔ‘i nɛ gbapaa, kum nɛ wa gan gan booro ɓu-taar.

²⁴Timɔthéé nɛ zu mbɛt tika kɔ̧ er o wibiro ko Dosithéé in Sosipatɛr; a̧ kɔfa wa mɛ e ha̧ a̧ mɛ yak zóóŋ: a̧ dee gɔnta tɔ̧ nɛnɛ ha̧ wa nde o nam in o nya ko bíí nɛ dɔkaa mgbara wa a̧-a̧ kɔ̧ er-wi; kà wa usi bɔnɛ ha̧ wi, o bíí kɔ‘i nyɛma mɛ gbɛ o wi nɔ‘i.

²⁵Hegɔ, ɗoŋ nɛ Timɔthéé bura wen nɛ dɔkaa, kán nɛ mɔ‘e wi tɛ fo o bíí kɔ-wa sinɛ ɗoŋ zóóŋ wo, wa siŋa a̧ pi̧ nù, wen kà o nya-wa kpasí.

²⁶Judas nɛɛ ba Karniɔn in tua ko geesɔ̧ Atargatis, ɓɛɛ a̧ gɔn gɛr bíí booro ɓu-yiitoo- zua-mɔɔrɔ sɛn hi̧i̧.

²⁷Ɗoŋ nɛ Judas ee yì naŋ o wisɛn nɔ‘i, ká a̧ gbɛ nɛ wa kaɗi, a̧ kaia o wibiro kɔ̧-a̧ nɛ tik nɛ́ Efrɔn, ŋma nɔɔ-ŋgárá nɛ Lysanias ɔ sɛnɛ. O ŋgaŋga be-ŋgaiwi nɛka zik nɛ garo yé‘i, de nɛ biro nɛ ŋgai-tɛ lɛŋ. O mɔɔ-pi̧ mbɔɗa-boi in o kiitɛ mbɔɗa-boi-aa a̧-a̧ so nɛ dɔkaa kɔ̧ ŋgárá‘i mbɛt.

²⁸O Juif kɔfa Gasa Wan nɛ gbin ŋgai ko o wisɛn gbin nɛ ŋgai-tɛ, wa baa yé, kum nɛ o bíí, hee booro ɓu-yiitoo-zua-mɔɔrɔ ga mgbara o wi nɛ a̧-a̧ so kɔ̧ ŋgárá‘i.

²⁹Kuraa hi̧i̧ wa yaka si Sytopolis: nyɛia̧a̧ nɛ Jerusalɛm tɛ de hee kilomɛtrɛ gɔmŋmaa ga

³⁰O be-Juif nɛ ɔ Sytopolis tɔ̧ɔ̧ nyɛrɛ de-dukaa ko o wi-saaye'i in kɔ̧ɔ̧mɔ nɛ wa dee pii tɛ wi, ŋgimbi bɔnɛ.

³¹Judas in o bíí kɔ‘i dee osoko ha̧ o wi Sytopolis, ɓɛɛ a̧ tɔ̧ ha̧ wa mɛ ya nɛ dea siti in o be-zuduk kɔ‘i. Wa sia Jerusalɛm, zɛ tikiɗi nɛti ha̧ gbaŋa Pentekot.

³²Ɗoŋ gbaŋa'i, wa baa zu-wa duk nɛ Gɔrgias, gasa wanbiro zu zikanu Iduméé.

³³Gɔrgias gboo biro nɛ o wi-nɛ-biro nɛ naŋ booro-taar, in o wi-daŋ-nyaŋa gɔmŋmaa naar

³⁴Biro baa, ɓɛɛ o ŋma be-Juif fe.

³⁵Dosithéé, ŋma kpɔra wi-daŋ-nyaŋa-biro mgbara o wibiro ko Tobiɛn, kpaa so ŋgai zu Gorgias kaɗi; a̧ tika tɛ laa-daŋ-nyaŋa kɔ̧-a̧, ɓɛɛ dak a̧ pii tɛ, wen n'aa kɔ̧ɔ̧ so mɛ ba ɗaŋwi'i nɛ kpasa. Ŋma wi-daŋ-nyaŋa, be-nù Tras, buia sitɛ Dosithéé nɛɛ hɔ koŋgoɓa-a̧, ɓɛɛ Gɔrgias yu mɔ si Marissa.

³⁶Ɗoŋ biro nyɛia̧, ɓɛɛ tɛ o bíí ko Ezdrias mbɔi lɛŋ. Judas kɔfa Gasa Wan ha̧ A̧ mɛ duk ti ha̧ wa, in mɛ gbak wa tɛ biro'i.

³⁷A̧ tuia hiɗimɔ-biro pi̧ nù, bí nɛ o gima-gasi-Sɔ̧ mbɛt, nɛ nú ko o zɔmdáà kɔ̧-a̧, ɓɛɛ tika zu o bíí ko Gɔrgias pɛsi nɛ wa sot-sot.

³⁸Judas mɔi̧a̧ o duk wibiro kɔ‘i, ɓɛɛ mgbɔ wa si saayé Odollam. Tɛ mɔɔrɔ-ɗoŋ-yiitoo ɔɔ-zɛ zaŋ Alat, wa ɗafa war-tɛ-wa, nyɛm nɛ ɗoŋ dómɔ kɔ-wa; wa dee kɔfasɔ̧ wese-ɔmtɛ sɛn hi̧i̧.

³⁹Mɔ sa̧-a̧, ɓɛɛ o bíí ko Judas nɛɛ kai wɔr o wi nɛ fea mɛ nɛɛ gun kpɔk in o nam kɔ-wa, sɛn kɔ̧ pɛsi ko o zɔmdáà kɔ-wa, wen ŋgimbi guna wa nyɛma so kaɗi.

⁴⁰Wa kpaa o nyina-pɛm-tɛ, nɛ tɛ nɛ tɛ́ o geesɔ̧ saaye Jamnia, ɗɔɔ laa ko o fio nɔ‘i kpɔk kpɔk; nɛ́ mɔ nɛ Heembea dora so ha̧ o Juif: hegɔ bíí lɛŋ iŋa nɛ sa̧-a̧‘e tugun-fio ko o wi nɔ‘i nɛ́ mɔ‘i.

⁴¹Wa lɛŋ zɔna deemɔ ko Gasa Wan, tana Wigɔnkita, nɛ sár ndɛ́ mɔ lɛŋ‘i.

⁴²Wa kɔfa Sɔ̧, ai nɛ nú ha̧ A̧ mɛ bi ɗaŋmɔ nɛ wa dea lɛŋ. Ɓɛɛ Judas, ŋgaŋga wiwii'i, ha̧ nɔɔŋgiɗi ha̧ o wibiro kɔ‘i lɛŋ mɛ dor tɛ tɛ́ ɗaŋmɔ, wen yí o nde lɛŋ zɔka mɔɔ-oi ɗaŋmɔ nɛ kpaa o ŋma-wa'i.

⁴³Judas ndɛma sede er o wibiro kɔ‘i kpɔk kpɔk, ɓɛɛ a̧ tom kɔya bu-mbɔi booro yiitoo si Jerusalɛm ha̧ wa mɛ ɗafi Sɔ̧ oi ɗaŋmɔ. Wi nyɛma mɛ zɔn a̧ wen demɔ n'a̧-a̧ dea'i, nɛ usi a̧ taa'e o fio tɛ kur ŋgɔn nɛ kpasa woyo.

⁴⁴Wen, kà a̧‘a̧ e so ta'e o wibiro nɛ fea'i beka kpasi tɛ fio ŋma wese na wo, ɓɛɛ kɔfasɔ̧ kɔ̧-a̧ wen zu o fio'i tɛ̀ɛ́ duk nɛ tum-tom in tom-boko.

⁴⁵Judas taa so'e ŋma demɔɔ-oi zɛm nɛ o wi nɛ fe zaŋ kɔ̧ɔ̧ɗɔɔwen: mɔ‘i nɛ́ gba de sa̧-a̧ taamɔ. Nɛ́ hegɔ sa a̧-a̧ tɔ̧‘e wa ɗafi Sɔ̧ wen o wi nɛ fea, ha̧ Sɔ̧ mɛ e ɗaŋmɔ kɔ-wa ha̧ wa.