Read Northwest Gbaya 2 Makabee 13 Bible Online

2 Makabee 13 - Northwest Gbaya bible

2 Makabee 13

¹Pɛ kpɔk bona tɛ pɛ gɔmŋmaa nɛ ɓu-mɔɔrɔ, sa Judas in o bíí kɔ̧‘i zia'e Antiɔkus Eupatɔr yee nù Judéé, nɛ gba-zɔm dɔka wibiro.

²A̧ tɛa in Lisias, wi nɛ kasa a̧ nɛ bem, ɓɛɛ nɛ duk zu o mɔɔ-nù‘i; kóó o nde a̧ a̧-a̧ nɛ o wibiro kɔ‘i, o be-Grɛk, o wi nɛ nɛ́ naŋ booro-gɔmŋmaa nɛ booro ɓu-mɔɔrɔ, o wi-daŋ-nyaŋa booro mɔɔrɔ nɛ gɔmŋmaa taar, o fɔrɔ ɓu-yiitoo-zua-yiitoo, in o keekee-biro gɔmŋmaa taar, nɛ wa hɛra o zia gbapaa tɛ wa, nɛ mgbɔɔr nɛ mgbɔɔr.

³Menelas nɛ̀ɛ́ kpa wa, ɓɛɛ de gɔnta ɔr nɛ Antiɔkus, ha̧ nɛ nɔɔŋgiɗi ha̧ a̧, bó nɛ wen kpasa nu-wan na, ɓɛɛ nɛ́ wen siaɗoŋ tɛ tom-ɗafasɔ̧ woyo.

⁴Ɓɛɛ Gasa Wan ko o wannu ŋgaia so nyimsea ko Antiɔkus sitɛ yaa-ɗaŋ‘i. Ŋgimbi nɛ Lisias tɔ̧a̧ ha̧ wannu'e nɛ́ Menelas a̧ daka ɗaŋmɔ nɛ tika zu nu lɛŋ tɛnɛ, wannu ha̧nú wa'a mgbɔ a̧ si sɛn saayé Béréé, ɓɛɛ wa'a gbɛ a̧ hi̧i̧, nyɛm nɛ ɗoŋ dómɔ nɛ de hí̧í̧.

⁵Ŋma taŋgaɗa nɛ duna nɛ bùk, ɓɛɛ nɛ kusa-a nɛ́ mɛtrɛ ɓu-yiitoo-zua-mɔɔrɔ, a̧-a̧ so saayé‘i. Ŋma mɔ ŋduŋguluŋgu, nɛ zik ziki, a̧-a̧ nu-zɔ-a, nɛ de ha̧ bíí nɛ wa pi̧ kɔ̧-a̧ mɛ tir a ɗɔɔ bùk'i.

⁶Nɛ́ hí̧í̧ a̧‘i duka so mɛ somgbi o wi nɛ ɗaŋ mɔ kɔ̧ tua ko Sɔ̧, in o gasa wigbɛzu, wi ir nɛ wa pi̧ kɔ̧ taŋgaɗa, mɛ fe ɗɔɔ bùk'i.

⁷Nɛ́ hegɔ a̧ Menelas, yaa-ɗaŋ‘i, fee nɛnɛ. Kóó nù mbɛt bɛ̧ a̧.

⁸Ɓɛɛ mɔ‘i nyɛma sɛnɛ, wen n'aa dee so ɗaŋmɔ nɛ dɔkaa zu fara-ɗafisɔ̧, nɛ wee-aa in bùk-aa ya so wen Sɔ̧ ɓɛɛ. Nɛ́ ɗɔɔ buk a'a̧ kpaa fio sɛnɛ.

⁹Wannu Antiɔkus nɛɛ siti nɛ ɗaŋ taamɔ: a̧ kɔ̧ɔ̧ so mɛ de ŋga bɔnɛ in o Juif, gán gán wan nɛ wa zɔka so er dáà kɔ̧-a̧ nɛti.

¹⁰Judas zia wen'i, a̧ ha̧ nú ha̧ dukbíí mɛ ai nú ha̧ Gasa Wan, zɛ nɛ wese, wen ha̧ A̧ mɛ tɛ-mɛ gbak wa woyo, wen wannu kɔ̧ɔ̧ mɛ dor wa nɛ Heembea kɔ-wa, nɛ nù kɔ-wa, in nɛ sa̧-a̧ Tua ko Sɔ̧ kɔ-wa.

¹¹Ɓɛɛ ká A̧ e ha̧ dukbíí nɛ ku̧u̧ benaŋ ɔmaa'i mɛ tik er o ɗaŋ duk nɛ iŋ Sɔ̧ na'i na.

¹²Wa kɔfa Sɔ̧ Yaa-de-ko, nɛ kɔ̧a̧ in zima-yì, gbɛ nɛ zugur nù zɛ taar, wa ɔm na. Ɗoŋ nɛ wa dea lɛŋ kale mɔ‘i in o ŋmaa kaɗi, Judas ha̧nɔɔŋgiɗi ha̧ wa, ɓɛɛ tɔ̧‘e wa'a yá zu naŋ-wa katɛ wi.

¹³A̧ baa keta in o kutiwi, ɓɛɛ a̧ ee zu-a mɛ demɔ nɔ‘i lɛŋ ɗɔɔ ŋgai ko Gasa Wan, in mɛ yak tí, ká o wibiro ko wannu tɛ̀ɛ́ tik Judéé, in ká wa tɛ̀ɛ́ ba yé Jerusalɛm.

¹⁴Judas ee biro'i er Wan nɛ dea yiwese in nù, ɓɛɛ a̧ ha̧nɔɔŋgiɗi ha̧ o bíí kɔ̧-a̧ mɛ de biro zu o heembea kɔ-wa, zu Tua ko Sɔ̧, zu Yé kɔ-wa, zu nù kɔ-wa in o ŋgeŋga-a lɛŋ, nɛ see kpɔk, ɓɛɛ a̧ de gbagari kɔ̧-a̧ sɛn ka̧ Mɔdin.

¹⁵Nú-wen biro'i n'aa ha̧ha̧ o wibiro kɔ̧-a̧, nɛ́ Sɔ̧ tɛ gbin biro. A̧ hoka o nɔɔ-see be-ŋgaiwi tik nɛ tua-laa ko wannu, nɛ zaŋzɛ. A̧ gbɛɛ o bíí kɔ̧ gbagari'i, hee booro yiitoo ga; o bíí kɔ̧-a̧ gbɛɛ gasa fɔrɔ-duk-ti, in wi-duk-zu-a mbɛt.

¹⁶Wa pi̧i̧ gasa kíí in bele tɛ o wi-kɔ̧-gbagari'i lɛŋ, ɓɛɛ wa si nɛ nyɛŋɛ gbina biro'i.

¹⁷Mɔ ku̧u̧ naŋ sa̧-a̧, ká mɔ lɛŋ kaɗa kaɗi, wen zu gbaka Judas nɛ Gasa Wan gbaka.

¹⁸Wannu Antiɔkus wea nɔɔŋgiɗi ko o o be-Juif kadi, nɛ́ mɔ'ɔ n'a̧-a̧ kia yuwar mɛ de gɔnta tik nɛ zu wa.

¹⁹A̧ gboo biro si Bɛtsur, ŋma nɔɔ ŋgárá ko o Juif; wa ndak'aa sinɛ ɗoŋ, kpa ŋgai zu a̧, ɓɛɛ wa gan a̧.

²⁰Ha̧ o wi nɛ ɓɔna kɔ̧ ŋgárá‘i, Judas toma o mɔ nɛ wa a̧-a̧ nɛ hazi-aa.

²¹Mɔ kpɔk, Rhodokus, ŋma mgbara o wibiro ko o be-Juif, gbaa so ndaa o gɔnta nɔ‘i ha̧ o wisɛn. Wa kia a̧, kpa a̧, ɓɛɛ wa gbɛ a̧.

²²Wannu kia yuwar ɗafa ŋmaa in o be-Juif Bɛtsur woyo. A̧ nyɛia̧ er ha̧ wa, kpɛk wa, ɓɛɛ a̧ si ɗoŋ.

²³A̧ tika Judas in o bíí kɔ‘i nɛ biro, ɓɛɛ wa gan a̧. Tɛ zia'e, Filip n'aa ee so sɛn Antiɔk zu mɔɔwan lɛŋ de nɛ be-ŋgazu wo, a̧ sakala bɔ́rɔ́m. A̧ ku̧u̧ naŋ ɗafa ŋmaa in o Juif, de nɛ mɔ nɛ wa kɔ̧a̧. A̧ kanamɔ mɛ kasi o mɔ lɛŋ nɛ wa yora zu-a, a̧ ɗafi mgbara tɛ-a in wa, ɓɛɛ a̧ ɗafi sɔ̧ mbɛt. A̧ tu̧u̧ tɛ Tua ko Sɔ̧, ɓɛɛ a̧ ha̧ o mɔ nɛ ta-tɛ wen Sa̧a̧-Fara.

²⁴A̧ kpɛka Makabee nɛ dea, ɓɛɛ a̧ e Hegemɔnidɛ nɛ wanbiro, dika Ptolemais hɔ nɛnɛ zikanu Guɛrra.

²⁵A̧ nɛa sɛn Ptolemais, ɓɛɛ o wi-saaye kpɛk so kɔ‘i ɗafa-mgbara-ŋmaa'i na. Wa ku̧i̧a mɔ zu a̧, ɓɛɛ wa kíí so mɛ yai ee-zu-mɔ‘i a nu.

²⁶Nɛ́ mɔ'ɔ nɛ Lisias daŋa duk zu kusa fara, ɓɛɛ tɔ̧ wen n'aa nyɛma so zu hɛra nú‘i. A̧ dee ha̧ o be-Ptolemais mɛ kpɛk mɔ‘i, a̧ ga̧ see-wa, a̧ kpai taamɔ kɔ-wa, ɓɛɛ a̧ yak si Antiɔk. Nɛ́ hegɔ a̧ o biro ko wannu Antiɔkus yaka nɛnɛ, in daka zú kɔ̧-a̧ tɛ biro.