Read Northwest Gbaya 2 Makabee 15 Bible Online

2 Makabee 15 - Northwest Gbaya bible

2 Makabee 15

¹Nikanɔr zia'e Judas in o bíí kɔ‘i a̧-a̧ sɛn nu Samarii, ɓɛɛ a̧ e zu-a mɛ tik wa nɛ biro gee tɛ wese-ɔmtɛ.

²O Juif, nɛ ndak so pata a̧ nɛ doole, tɔ̧ɔ̧ ha̧ a̧: «Ká mɛ de gasa saka-yí in zɔm ɗáŋ gbɛ nɛ wa na. Mɛ tu̧ be-tɛ wese nɛ Wi nɛ kɔr mɔ lɛŋ de nɛ sa̧-a̧ wese gan.»

³Ɓɛɛ yaa-ɗaŋ wigbɛzu'i ak mɔ kà ŋma wan nɛ boo yiwese nɛ tɔ̧ɔ̧‘e wi gasi nɛ wese ɔmtɛ

⁴O be-Juif kifa ha̧ a̧‘e: «Nɛ́ Gasa Wan nɛ duk kpasa nɛ ɔ wan yiwese, nɛ zu, a ha̧nú‘e wi zɔk mɔɔrɔ-ɗoŋ-yiitoo ɔɔ-zɛ nɛ sa̧-a̧.»

⁵Ɓɛɛ Nikanɔr kifi nú: «Mi nɛ zu'm mbɛt, mi nɛ wan mɛ zu nù hɛ̧ɛ̧, ɓɛɛ mi há̧á̧ nu'm'e wa kai o boi-biro mɛ de tom ha̧ wannu.» Bɛɛ a̧ kpa be-yuwar dea ɗaŋ tom-gbɛzu n'aa ee zu-a'i na.

⁶Nikanɔr duka tɛ kɔn nɛ ŋguɗi, ɓɛɛ tɔ̧‘e: wi tɛ kai o boi-biro oi Judas in o bii kɔ̧-a̧ de nɛ ŋma mɔ-sedaako gbina biro'i sɛn beegara-ye.

⁷Ee-ta ko Makabee nɛ Sɔ̧ kaɗi na, A̧ iŋa nɛ dea'e Gasa Wan tɛ tɛ̀ɛ́ gbak a̧.

⁸Nɛ́ hegɔ, sa a̧ ha̧ nɔɔŋgiɗi ha̧ o bíí kɔ̧-a̧‘e: ká kíí gboo biro nɛ o wi-nɛ-iŋ-Sɔ̧-na ba tɛnɛ‘i de wa na; te-wa a mbaŋ ɗoŋ gbakamɔ nɛ tɛa so ha̧ wa nɛ yiwese nɛti, ɓɛɛ wa'a iŋ nɛ dea'e: kinii Wan nɛ a̧-a̧ nɛ ŋgaiamɔ lɛŋ tɛ gbaka̧ wa mɛ gbin biro woyo.

⁹A̧ tɔra mɔ nɛ yɔra zaŋ heembea in zaŋ kalata ko o witɔ̧wen oi nú-Sɔ̧, ha̧ nɛ nɔɔŋgiɗi ha̧ wa; ɓɛɛ a̧ mbaŋ tɛ-wa zu o biro nɛ wa gbina so nɛti, ha̧ nɛ nyɔŋa-nin ha̧ wa.

¹⁰Ɗoŋ n'aa ha̧mbe ŋgai ha̧ wa kaɗi, ha̧ wen kɔ̧-a̧‘i mɛ diti gan, a̧ usa ha̧ wa'e: o wi-iŋ-Sɔ̧-na yor ɗoŋ wen kɔ-wa na, wa kasi kanamɔ kɔ-wa na mbɛt.

¹¹Judas ha̧mɔɔ-gbak-gbina ɓiro ha̧ o bíí kɔ̧-a̧ kpɔk kpɔk, bó nɛ o sɛ́ɛ̀ in o ŋgeé ɓɛɛ na, batɛ, nɛ́ o de wen n'a̧-a̧ tɔ̧ɔ̧ ha̧ nɛ nɔɔŋgiɗi ha̧ wa. Sɔŋkur-aa, a̧ wee ɗɔŋ ŋma hɔɔzu nɛ‘i nyɛma mɛ kasi ha̧ wa; nɛ́ ŋma hɔɔzu nɛ pí̧í̧ tɔrtɛ tɛ-wa lɛŋ.

¹²Hɔɔzu kɔ̧-a̧‘i nɛ́ mɔ'ɔ: «Onias gasa wan-ɗafi-sɔ̧ nɛti ɓeemɛ, nɛ duka nɛ de bíí, nɛ ŋmaŋ tɛ na, ga̧-a̧wi nɛ tɔ̧ wen nɛ yuwar-a, ɓɛɛ nɛ ha̧tɛ, dika nɛ bem, mɛ de nɛ demɔ lɛŋ, nyɛia̧ er kɔfi nɛ Sɔ̧ wen dukbíí Juif lɛŋ.

¹³Hɔɗoŋ-aa, Judas zɔka ŋma tu̧u̧tɛ bíí, nɛ mbui zu mbɛt. Nɛ́ ŋma zɔm mgbɛkɛkɛ bíí nɛ nyɛma yi wan, ɓɛɛ nɛ gasi kɔ̧-a̧ gɔn nɛ ɗɛɗɛ-bíí.

¹⁴Onias baa wen, ɓɛɛ tɔ̧: «Wi’ɛi nɛ́ Jeremii, witɔ̧wen oi nú-Sɔ̧, nɛ kɔ̧ɔ̧ o nya kɔ̧-a̧, ɓɛɛ nɛ kɔfi Sɔ̧ wen dukbii in wen Sa̧a̧-Yé nyɛmna.»

¹⁵Jeremii nyɛia̧ er mɛ wiiko ha̧ nɛ gbapaa nɛ‘i dee nɛ lɔr ha̧ Judas, ɓɛɛ tɔ̧ ha̧ a̧:

¹⁶«mɛ bá sa̧-a̧ gbapaa’ɛ, nɛ́ Sɔ̧ ha̧ ha̧ mɛ; a̧ tɛ gbak mɛ wen ɗɛnaa nɛ o wisɛn.»

¹⁷O nyɔɔ̧-wen ko Judas ga̧-a̧ see o wibiro kɔ̧-a̧, ha̧ nɛ nɔɔŋgiɗi ha̧ wa, ɓɛɛ de ha̧ o be- ŋgaiwi mɛ de nɛ mɔɔ-wiwii. Hegɔ, wa baa keta'e ká‘i de gbagari na, wi yak biro nɛ hayatɛ ɓɛɛ wi nɛ̀ɛ́ bi ŋmaa nɛ ŋgaitɛ-wi lɛŋ. Wen ɗaŋmɔ nasi nɛ yé Jerusalɛm, yuwar-ɗafasɔ̧, in Tua ko Sɔ̧ tɛnɛ‘i.

¹⁸Kíí kɔ-wa be so wen o kóò, o bem, o nya-wa in o nàm kɔ-wa gan na, kuti kíí kɔ-wa gan batɛ nɛ́ wen Sa̧-a̧ Tua ko Sɔ̧.

¹⁹Dita-see ko o wi nɛ wa ee so ɓɔn saaye Jerusalɛm bo nɛ geɗɛk mɔ na, wen ɗɛɗɛ-wa gɔn so gɔn zu biro nɛ gɛk tɛnɛ nɛ gee pɛtɛŋ-fara'i.

²⁰Bíí lɛŋ ya so tɛ zɛma mɔ nɛ tɛ hɔ. O wisɛn mɔi̧a̧ kɔ‘i ŋmaa lɛŋ, ɓɛɛ wa ya zɛ́k-zɛ́k zɛm nɛ biro. Wa aa o fɔrɔ sɛn de fara, ɓɛɛ wa nɛk o nyaŋa nɛ mgbɔɔr nɛ mgbɔɔr.

²¹Makabee mbaɗa gba gíí-wibiro nɛ ya ti a fee, o yaayí boi-biro kɔ-wa nɛtɛ nɛtɛ‘i, in o fɔrɔ nɛ pɛ da̧. A̧ nyɛia̧ er-a sí Yiwese, ɓɛɛ a̧ kɔfi Gasa Wan, Wi-de-mɔɔ-gɔn-ɗɛɗɛ, wen a̧ iŋa'e bo nɛ tɛ o boi-biro a Sɔ̧ e nɛnɛ ha̧‘i mɛ gbin biro na, ɓɛɛ nɛ́ nɛ ɗoŋ ee-zu-mɔ kɔ̧-A̧ wen o bíí nɛ nyɛma yi-A.

²²Judas kɔfa Sɔ̧ hee mɔ'ɔ ga: «Gasa Wan, ŋgimbi nɛ Ezekias ɔɔ so nɛ wannu Judéé, Ɛnɛ toma so betom k’ɛ́nɛ́ nɛnɛ, ɓɛɛ a̧ kum bíí booro-gɔmŋmaa nɛ bíí booro ɓu-mɔɔrɔ-ɗoŋ-taar-zua-mɔɔrɔ, mgbara o wibiro ko Sɛnakɛrib.

²³Kinii mbɛt, Gasa Wan mɛ Yiwese, Ɛnɛ tóm ŋma de betom k’Ɛ́nɛ́ tɛnɛ ti yɛ, ha̧ a̧ pi̧ bele in gba-kíí poo o wi nɔ'ɔ.

²⁴Ken-er-‘Nɛ́ a tik zu o wi nɛ tɛ̀ɛ́ tɔ̧ ndiŋ wen h’Ɛ́nɛ́, ká bá nɛ biro kpa nɛ sa̧-a̧ dukbíí k’Ɛ́nɛ́‘i.» Nɛ́ hegɔ a̧ Judas kaɗa kɔfasɔ̧ kɔ̧-a̧.

²⁵Nikanɔr in o bíí kɔ‘i dɔma nɛ o mbia gai nɛ gima-biro nɛnɛ.

²⁶Judas in o bíí kɔ‘i bo gɔm nɛ er kɔfi nɛ Sɔ̧, tik o wisɛn.

²⁷Tɛ kɔfa Sɔ̧ nɛ kɔ̧ see, de nɛ biro nɛ er, wa tira o bíí a nu gan gan booro-ɓu-taar-zua mɔɔrɔ, ɓɛɛ wa hɔ zaŋgule wen zu gasamɔ nɛ Sɔ̧ dee zu wa'i.

²⁸Biro kaɗa, hee mɔ'ɔ nɛ wa pɛsi nɛ desee ga, wa kpa yí wɔr Nikanɔr mbɔɗɔnu, nɛ oi o boi-biro kɔ̧-a̧ tɛ-a.

²⁹Ɗɔɔ yili in o hiɗimɔ ŋgúr-ŋgúr, wa dee osoko ha̧ Gasa Wan, nɛ mgbak nú ko o zɔmdáà kɔ-wa.

³⁰Judas nɛ duka so ti bi nɛ biro wen zu o be-nù kɔ‘i, nɛ ŋgaitɛ lɛŋ in nɛ nɔɔ-see, ɓɛɛ nɛ ɓɔna nɛ de taamɔ zu dukbíí kɔ‘i dika nɛ ŋgaiwi, ha̧nú wa'a bír gɔɔzu Nikanɔr in ɓáá-a̧ nɛ oi-aa lɛŋ, a wa kai si Jerusalɛm.

³¹A̧ hɔ hi̧i̧, ɓɛɛ a̧ saa o wi-saaye, a̧ nɛk o wiɗafisɔ̧ ti taŋge-ɗafisɔ̧, a̧ tom sa o wi kɔ̧ ŋgárá.

³²A̧ usa gɔɔzu Nikanɔr, ɗaŋ geé-tum-bíí‘i, in er nɛ yaa-ɗaŋ‘i kɔna so nɛ ŋguɗi, nyɛi̧ nɛnɛ sitɛ Sa̧-a̧ Tua ko Wan nɛ a̧-a̧ nɛ ŋgaiamɔ lɛŋ.

³³A̧ ɓira leɓe-Nikanɔr, ɗaŋ bíí‘i, sɛkɛɗɛ-sɛkɛɗɛ, ɓɛɛ a̧ tɔ̧‘e wa'a a taŋ ha̧ o nɔi̧. A̧ gai̧a ɓáá-Nikanɔr nɛ duk nɛ mɔɔ-oi-dawa kɔ̧-a̧ sɛn nú Tua ko Gasa Wan.

³⁴Wa lɛŋ, wa gaia osoko si Yiwese ha̧ Gasa Wan nɛ a̧-a̧ nɛ gasamɔ lɛŋ, tɔ̧ nɛnɛ‘e: «De zɔnamɔ ha̧ Wi nɛ yora zu Sa̧a̧-Fara kɔ‘i, ŋma ndiŋmɔ ndɔ na'i.»

³⁵Judas gai̧a gɔɔzu-Nikanɔr tɛ ŋgɛŋ-ŋgárá, ha̧ o bíí mɛ zɔk nɛ sa̧-a̧ hee mɔ nɛ Gasa Wan ye nɛ ɗoŋ bíí kɔ‘i ga.

³⁶Wa kpɛka lɛŋ‘e ka'i de zɛŋ mɛ er wese'i wɔkɔrɔ na. Wi tɛ de gbaŋa-a dam ɗoŋ pɛ lɛŋ tɛ ɓu-zua-taar ɔɔzɛ ko ɓu-zua-yiitoo fiozɛ, nɛ‘i sa nɛ nú Arameɛn'e Adar, zɛ kpɔk nɛti ha̧ wese nɛ‘i sa'e: wese ko Mardochée.

³⁷Mɔ nɛ yaka zu Nikanɔr nɛ́ mɔ‘i. Hee mɔ'ɔ nɛ Jerusalɛm ɓɔna er o be-Juif dika ŋgimbi'i ga, mi mbɛt, mi tɛ kaɗi yɔramɔ kɔ‘m sɛn hɛ̧ɛ̧.

³⁸Kà mɔ n'am yora'i nɛ ɔ déé, in kà a̧ nɛ hɔɔ gba̧a̧, mɔ n'am kɔ̧a̧ so nɛ́ mɔ‘i. Ɓɛɛ kà gbaa-mɔ kɔ̧-a̧ nɛ boa batɛ na, in kà a̧ nɛ duka hega taŋ hi̧i̧, war kɔ‘m n'am nyɛma so mɛ de gan í̧í̧ na.

³⁹Nɔɔ mbiɗa-dɔ̧ɔ̧ ɛnɛ, kóó nɔɔ gee yì ɛnɛ, de na, ɓɛɛ nɛ́ dɔ̧ɔ̧ nɛ zaŋa ŋmaa in yì a duk nɛ gba demɔɔ-nɔɔ nɛ pi̧ tortɛ tɛ wi. Hegɔ mbɛt, nɛ́ yuwar aa o nyɛrɛmɔ nɛ dea a̧ de ha̧ wa mɛ ɔ nyɔɔ̧ kɔ̧ zer o wi nɛ tɔr wa. Ɓɛɛ wen kɔ‘m kaɗa hɛ̧ɛ̧.