Read Northwest Gbaya 2 Makabee 2 Bible Online

2 Makabee 2 - Northwest Gbaya bible

2 Makabee 2

¹Wa kpaa zaŋ o nyɛrɛ-nù nde: Jeremii witɔ̧wen oi nú-Sɔ̧ ha̧nú ha̧ o wi nɛ yak bara mɛ ba wee, hee mɔ'ɔ nɛ‘i baa tɔ̧ so ga.

²Ɗoŋ nɛ witɔ̧wen oi nú-Sɔ̧ ha̧Heembea ha̧ o wi nɛ wa kaia yaknɛ nɛ bara'i, a̧ tɔ̧ɔ̧ ha̧ wa mbɛt'e: ká tɛ-wa bi ɗoŋ geŋga ko Gasa Wan na, ɓɛɛ ká wa yɔ kaya tɛ taamɔ kɔ-wa, tɛ zɔka o giɔ̧tɛ-bíí nɛ‘i dee nɛ lɔr in bu-mbɔi, in nɛ‘i ɗafa tɛ-wa nɛ laa na.

³Mgbara o kale mbɔro nɔ‘i, a̧ tɔ̧a̧ ha̧ wa nde: ká wa e ha̧ ɗoŋ Heembea mɛ nyɛi̧ nɛ see-wa na.

⁴Zaŋ o nyɛrɛ nù nɔ‘i, wi kpaa mbɛt'e: tɛ ha̧a̧nú ko Sɔ̧, wi-tɔ̧-wen oi nú-Sɔ̧ baa tua-laa in kuɓa-nɔɔtɔk, nɛɛ duk zu kaya nɛ Mɔisɛ daŋa so duk sɛnɛ, zɔk nɛ nù nɛ Sɔ̧ ha̧so nɛ mɔɔ-oi'i,

⁵in mbɛt'e: tɛ hɔa zu kaya'i kaɗi, Jeremii kpaa tua nɛ duk hee gasa di̧i̧ ga, a̧ kaia tua-laa, kuɓa nɔɔtɔk in taŋge dɔ-nyama ha̧ Sɔ̧ a̧-a̧ kɔ̧ a̧, ɓɛɛ a̧ kpe nú-di̧i̧.

⁶O ŋma gbamayari ko Jeremii tɛa mɛ a mbul yuwar di̧i̧‘i, ɓɛɛ wa kpa oi yuwar'i na.

⁷Ŋgimbi nɛ Jeremii zia mɔ‘i, a̧ tɔ̧a̧ wen a zu wa'e: «fara’ɛ tɛ ɓɔn nɛ hu̧sa̧a̧ hɔ ŋgimbi nɛ Sɔ̧ tɛ mɔi̧ nɛ dukbii kɔ‘i lɛŋ, de nɛ ko ha̧ wa.

⁸Ŋgimbi'i, Gasa Wan tɛ usi o mɔɔ nɔ‘i lɛŋ, ɓɛɛ gasamɔ ko Gasa Wan tɛ usi tɛ kpɔk in turazan, hee mɔɔ n'a̧-a̧ usa so nɛnɛ tɛ ŋgimbi ko Mɔisɛ, in ŋgimbi nɛ Salomɔŋ kɔfa so nɛ Sɔ̧ mɛ zir de yoŋgo kɔ̧-A̧ zu Sa̧a̧ Fara ga.»

⁹Wa tɔ̧ so nɛ nyɛrɛ hee mɔ'ɔ nɛ Salomɔŋ, wan ɗuka-taamɔ, ɗafa so nɛ Sɔ̧ tɛ gbaŋa huia Tua ko Sɔ̧ in gbɛa zu tom-aa ga.

¹⁰Hee mɔ'ɔ nɛ Mɔisɛ kɔfa so nɛ Gasa Wan, ká wee zir nɛ yiwese dɔ nɛ mɔɔɗafisɔ̧ ɗilɔŋ'ɛ ga, nɛ́ hegɔ mbɛt a̧ Salomɔŋ kɔfa nɛ Sɔ̧, ɓɛɛ wee zir dɔ kpoo-sɔ̧ lɛŋ.

¹¹Mɔisɛ ba tɔ̧ so'e: «Nɛ́ wen nɛ‘i nyɔŋ mɔɔɗafisɔ̧ wen kpaa ea-ɗaŋmɔ‘i na, sa a bii wee.»

¹²Nɛ́ kale kpɔk mɔ a̧ yaka mbɛt, ŋgimbi nɛ Salomɔŋ dea nɛ gbaŋa huia Tua ko Sɔ̧ tɛ zɛ mɔɔrɔ-ɗoŋ-taar’ɛ.

¹³Ɛɛ kpaa o mɔ nɔ‘i nɛ yaka zaŋ o nyɛrɛ-nù in o nyɛrɛ-mbaŋ-tɛ-wi ko Nehemii. Wa tɔ̧ mbɛt'e: Nehemii dea tua-a-kalata, ɓɛɛ mɔi̧ o kalata nɛ tɔ̧ nyɛrɛ ko o wannu in o witɔ̧wen oi nú-Sɔ̧, o kalata ko David in o kalata nɛ o wannu yɔra zu yuwar- ɗafasɔ̧‘i a kɔ̧ tua'i.

¹⁴Nɛ́ hegɔ mbɛt a̧ Judas mɔi̧a̧ nɛ o kalata nɛ pɛsa wen zu biro nɛ tika so zu yɛ: wa a̧-a̧ kɔ̧ er-yɛ.

¹⁵K’Ɛ́nɛ́ nɛ́ boa nɛ haazi-a, ɛnɛ tóm o bíí tɛnɛ mɛ kai sinɛ ɗoŋ h’ɛ́nɛ́.

¹⁶Nɛ́ wen n’ɛɛ́ ya dɔ̧ɔ̧ mɛ de gbaŋa Sa̧a̧ war-tɛ Tua ko Sɔ̧, s’ɛ́ɛ́ yɔr wen-aa h’ɛ́nɛ́. Ɔ dee h’ɛnɛ mɛ de gbaŋa-a̧ tɛ o zɛ nɔ‘i mbɛt.

¹⁷Sɔ̧ kpasa dukbíí kɔ‘i lɛŋ kaɗi, ɓɛɛ ha̧mɔɔ-oi ha̧ wa lɛŋ: nù, wan, tom-ɗafasɔ̧, in ɗafa war-tɛ nɛ sa̧-a̧,

¹⁸hee mɔ'ɔ n'A̧a̧ ha̧so nɛ nú zaŋ Heembea ga, Ɛɛ e ta-yɛ‘e: dekpaa A̧ dea ko h’ɛ́ɛ́, ɓɛɛ A̧ mɔi̧a̧ ɛ́ɛ́, nɛ o zikanu mɛ ɗɔɔ yiwese lɛŋ si Sa̧a̧-Fara. Wen A̧ ɓara yɛ yí o gasa ŋgaŋamɔ, ɓɛɛ A̧ sa̧-a̧ war-tɛ Tua kɔ̧-A̧ mbɛt.

¹⁹Judas Makabee in o nyawi dea o mɔ nɛ dɔkaa: wa sa̧-a̧ war-tɛ gasa Tua-ko-Sɔ̧, wa toka de yoŋgɔ zu taŋge-ɗafisɔ̧,

²⁰Wa bia wannu Antiɔkus-Epifan in bem kɔ̧-A̧ Eupatɔr.

²¹O ŋgai mɛ yiwese usa tɛ, ye nɛ ɗoŋ o wi nɛ bia biro zu Heembea ko o Juif nɛ ŋgai-tɛ lɛŋ in nɔɔŋgiɗi'i. Hegɔ, kóó zu dɔkaa kɔ-wa na'i, wa baa nù‘i lɛŋ woyo, ɓɛɛ wa ndak o wisɛn.

²²Wa baa Tua ko Sɔ̧, nɛ nin-a hura dam zaŋnu lɛŋ‘i, wa gbo Jerusalɛm tɛ bara, ɓɛɛ wa fo o heembea nɛ tɛ̀ɛ́ bi so lɛŋ a ŋgɔn. Wa dea o mɔ nɔ‘i lɛŋ wen zu kɔ̧ɔ̧mɔ in gasa demɔ ko Gasa Wan.

²³Jazɔn, be-Sirɛn, wi-ɓa-nyɛrɛmɔ'ɛ, yɔra o mɔ nɔ‘i lɛŋ vɛr-vɛr tɛ duk-kalata mɔɔrɔ, ɓɛɛ ɛ́ɛ́ tɛ we mboɗa wa tɛ duka-a kpɔk.

²⁴Kà‘i zɔk zɔm dɔka gun yɔramɔ-aa, in bɔnɛ nɛ o wi nɛ kɔ̧ɔ̧ mɛ ye zaŋ o nyɛrɛ nɔ‘i woyo kpaa, wen nɛ o mɔɔ-tɔ̧ɔ̧-wen zu-a ɔ dɔkaa,

²⁵mɔ‘i dee h’ɛ́ɛ́ mɛ ɗafi ɗoŋ mɔ nɛ yɔkaa wen o wi nɛ kɔ̧ɔ̧ kɔ‘i mɛ tɔr nɛ geé tɔraa ɓɛɛ Ɛ́ɛ́ ɗafa mɔ mɛ duk yɛkɓɛlɛk wen o wi nɛ kɔ̧ɔ̧ mɛ kasi o mɔ nɔ‘i kɔ̧ mbozu, wen ha̧ a̧ mɛ gbak kóó o nde lɛŋ nɛ kɔ̧a̧ mɛ tɔr o kalata nɔ‘i.

²⁶Nɛ k’ɛ́ɛ́, n’ɛɛ́ ha̧tɛ-yɛ wen yɔra o mɔ nɔ‘i nɛ dɔ̧-gboŋga’ɛ, bó nɛ̀'é duka nɛ yɛkɛɗɛ-mɔ na, duka kana nɛ tom gbo gbɛŋmɔ, in tom ha̧ nyaŋá-yá.

²⁷Mɔ‘i hɔɔ ŋmaa in tom ko wi-duk-zu-nyɔŋmɔ-gbaŋga, nɛ kii ha̧ o nde lɛŋ mɛ kpa desee’ɛ. Kalea mbɛt, hee mɔ'ɔ n’ɛɛ́ ha̧tɛ-yɛ wen gbaka o gii-bíí ga, ɛ́ɛ́ tɛ tui kana dita ŋga tom'i.

²⁸Ɛɛ tɛ e yuwar ha̧ wi-yɔr-kalata'i mɛ kɛ̧ mgbara o mɔ nɔ‘i lɛŋ kpɔk kpɔk nɛ dea, kà de k’ɛ́ɛ́ kɛ̧a mgbara wan n’ɛɛ́ tɛ tɔ̧ nɛ dɔ-gboŋga'i nɛ sa̧-a̧.

²⁹Hee mɔ'ɔ nɛ tom-tua nɛ oi-aa zɔk nɛ gasawi-mbo-tua, ɓɛɛ ká wi nɛ ba tom dikira-a dika tɛ ɓɔndɔ hɔ tɛ sɔ̧a̧ ɗaŋ lɛŋ taa kɔ‘i nɛ mɔ zu yuwar gɔna dap-aa ga, nɛ kale kpɔk mɔ mbɛt wen ɛ́ɛ́.

³⁰Yea ɗɔkɔri zu wen'i, kɛ̧a-mgbara-a, in gboo mgbak yí-wen-aa, nɛ́ tom ko wi nɛ yɔra nyɛrɛ‘i.

³¹Mɔ kpɔk, kia mgbak yí-mɔ, in ea ɓaa ɗoŋ o mɔ tɛr-tɛr duk, nɛ́ tom ko wi nɛ yɔra ɗoŋ mɔ ko kuti wi-yɔr-kalata.

³²Ɛɛ kú̧ naŋ nyɛrɛ k’ɛ́ɛ́, k’ɛ́ɛ́ a mbe mɔ zu wan nɛ yɔra nɛti kaɗi na. Wen, de so ha̧‘i mɛ tɔ̧ zu-wen nɛ duraa, ɓɛɛ wi tɛ̀ɛ̀ tɔ̧ gbak yi-wen nɛ dɔ̧a, na.