Read Northwest Gbaya 2 Makabee 3 Bible Online

2 Makabee 3 - Northwest Gbaya bible

2 Makabee 3

¹Ŋgimbi ko Onias gasa wan-ɗafi-sɔ̧, o wi saa ye Jerusalɛm a̧-a̧ so zaŋ ga̧a̧mɔ, ndak nɛ ɗoŋ o heembea nɛ yuwar-a, wen zu ha̧a̧-see ko Onias'i ha̧ Sɔ̧ in sɛna ɗaŋmɔ kɔ̧-a̧;

²o wannu nɛ zu mbɛt duka so mɛ tu̧ tɛ Sa̧a̧ Fara, ɗafi nɛ a̧ nɛ o zɔm ha̧a̧mɔ kɔ-wa.

³Nɛ́ hegɔ̧ a̧ Seleukus, wannu Azii, a duka so mɛ yɔɓi o tom-ɗafasɔ̧ lɛŋ nɛ mgbak mbɔi kɔ̧-a̧.

⁴Mɔ kpɔk, ŋma bíí nɛ‘i sa'e Simɔn, be-nutua ko Bilga nɛ duka so gasawi zu mbɔi kɔ̧ Tua ko Sɔ̧'ɛ, yee tɛ kpɛra ŋmaa in Onias gasa wan-ɗafi-sɔ̧ zu tom ndɛma zu-lumɔ.

⁵Hee mɔ'ɔ n'aa nyɛm so mɛ zii ŋmaa in Onias na ga, a̧ nɛ̀ɛ́ kpa Apollonius, bem ko Traseas, nɛ duk zu zikanu Koele-Syrii in Fenisii tɛ ŋgimbi'i.

⁶A̧ gbaa ndaa-mbɔi Jerusalɛm, tɔ̧ nɛnɛ‘e ye'i duna nɛ zɔm mbɔi, nɛ‘i iŋ ndàá na, in nɛ‘i nyɛm mɛ tɔr na. Mbɔi'i nyɛm yí mɔ nɛ‘i aka wen o ɗafasɔ̧ na mbɛt. Ɓɛɛ a̧ tɔ̧ woyo'e wi nyɛma mɛ kai mbɔi'i lɛŋ aa er-wannu.

⁷Tɛ kpaa ŋmaa kɔ-wa in wannu, Apollonius tɔ̧a̧ nyɛrɛ o mbɔi, nɛ‘i gbaa ndàá ha̧ a̧‘i. Wannu hoka Heliodɔr nɛ duk so nɛ kutiwi kɔ‘i, ɓɛɛ tom aa mɛ nɛɛ kai o mbɔi nɛ‘i tɔ̧a̧ nɛnɛ‘i.

⁸Ahai, Heliodɔr yee yuwar, hee a̧ nɛ so mɛ zɔk o gasa ye nɛ a̧-a̧ nù Koele-Syrii in nù Fenisii ga. Ɓɛɛ mgbak-a so nɛ wen dea mɔ nɛ wannu ha̧nú wen aa'i.

⁹Tɛ hɔa kɔ̧-a̧ Jerusalɛm, gasa wan-ɗafi-sɔ̧ in o wi-saaye kpɛka a̧ nɛ dea. A̧ tɔ̧ɔ̧ mɔɔ n'aa zia in mɔ nɛ ba a̧ tɛnɛ, ɓɛɛ a̧ ak wa kà o mɔ nɔ‘i lɛŋ nɛ boa nɛ kpasa mɔ.

¹⁰Gasa Wanɗafisɔ̧ tɔ̧a̧ ha̧ a̧ nde o mbɔi nɔ‘i nɛ́ ko o kogɛra in ko o be-oi.

¹¹O ŋma mɛ ka̧‘a̧ nɛ́ ko Hyrkan, bem ko Tobii, ŋma gasa ditabíí zu nù‘i. Hegɔ o mɔ nɔ‘i lɛŋ bo hee mɔ'ɔ nɛ Simɔn, yaa-ndela tɔ̧a̧ ga na. Wen mbɔi nɔ‘i lɛŋ nɛ́ dita kii-bumbɔi gɔmŋmaa naar in kii-lɔr gɔmŋmaa yiitoo.

¹²Wi nyɛm so mɛ kai mbɔi ko o bíí nɛ ee so ta nɛ Sa̧a̧-Fara'i, ká bó nɛ́ foa tu̧u̧-tɛ Tua ko Sɔ̧, nɛ‘i gasi dam zaŋnu lɛŋ‘i na.

¹³Nyɛm nɛ ɗoŋ ha̧a̧nú ko wannu, Heliodɔr kɔ̧a̧ so kana wi kpe mbɔi nɔ‘i e kɔ̧ kuɓa ko wannu.

¹⁴Wese n'aa hoka'i, a̧ yea kɔ̧ Tua ko Sɔ̧ mɛ tɔr o mbɔi nɔ‘i lɛŋ. Ɓɛɛ bó nɛ́ geɗɛk bele a̧ zara o bíí-saaye lɛŋ na.

¹⁵O wiɗafisɔ̧ nɛ oi laaɗafisɔ̧ kɔ-wa guu nù ti fara-ɗafisɔ̧, kɔfi nɛ́ mɔ si Yiwese, si Wi nɛ ha̧heembea zu mɔi̧a̧ mbɔi'i, wen ha̧ o mbɔi nɔ‘i mɛ ya nɛ damaa ŋgɛkɛt zɛm nɛ o wi nɛ ee wa hi̧i̧.

¹⁶Tɛ zɔka saŋa-yí gasa wan-ɗafi-sɔ̧, ɓɛɛ see-wi ŋmana, wen saŋayí-a̧ nɛ kpai̧a fɛŋ nɛnɛ usi so ‘e a̧ a̧-a̧ zaŋ gasa ditasee.

¹⁷Zɔm kii in gba gbana nɛ ba gasa wan-ɗafi-sɔ̧ dee ha̧ o bíí nɛ ya hi̧i̧ mɛ iŋ ŋga bele nɛ ba a̧ hɔ kɔ̧ ɗuka see-a.

¹⁸O bíí gboa nduɗɛɛ nɛ kɔ̧ tua nɛnɛ mɛ kɔfi Sɔ̧, wen ká mɔɔ-foe nɛ nasi Sa̧a̧-Fara'i tɛ̀ɛ́ tik zu a.

¹⁹O okóò nɛ hɛra nɛ o bufu ɗɔɔ ber duna yuwar. O be-zɔŋa, nɛ wa e war ha̧ wa mɛ gbo zan na, war nɛ yì, o ŋmaa si nutua, o ŋmaa nɛ nú-ŋgɛŋ, o ŋmaa woyo guɗi nɛ mɔ nɛ toro-tua.

²⁰Wa lɛŋ wa nyɛi̧ nɛ er si Yiwese ai nɛ nú, hiɗi nɛ́ mɔ.

²¹Nɛ́ gasa mɔɔ-ko, tɛ zɔka o gii-wi, nɛ nɔɔŋgiɗi kɔ-wa kaɗa, in nɛ gba̧a̧-tɛ mɔka lɛŋ, in gasa wan-ɗafi-sɔ̧ nɛ gba-kii baa'i.

²²Ŋgimbi nɛ wa ai nɛ nú ha̧ Gasa Wan, nɛ a̧-a̧ nɛ ŋgayamɔ lɛŋ, mɛ gu er zu o mbɔi nɔ‘i mɛ ya nɛ damaa ŋgɛkɛt ha̧ o wi nɛ ee wa'i,

²³kóó Heliodɔr, kana nɛ dea mɔ nɛ wannu tɔ̧a̧‘i.

²⁴Ŋgimbi nɛ Heliodɔr in o wi-pɛm-aa hɔa ka̧ kuɓa mbɔi kaɗi, Gasa Wan nɛ duk zu o sɔ̧ in zu o ŋgai lɛŋ, usa tɛ tɛ́ gasamɔ-yek-bíí. Ŋgai ko Sɔ̧ pi̧i̧ bele zaŋ o wi nɛ nyɔŋa so nin, ye nɛ fara'i lɛŋ, ɓɛɛ gbin gba̧a̧tɛ-wa in nɔɔŋgiɗi kɔ-wa.

²⁵Ŋma nyaŋa, nɛ‘i hɛra tɛ-a nɛ dea nyɛmna, usa tɛ ha̧ wa; wi-daŋ-nyaŋa'i nɛ́ ŋma ɗaŋ ŋga wi, nɛ a̧-a̧ nɛ mɔɔ-de-biro nɛ‘i dea nɛ lɔr; nyaŋa'i máá zeeŋ si tɛ Heliodɔr, ɓɛɛ ŋmár a̧ nɛ kpoto-ŋaŋ mɛ ti.

²⁶Tɛ kale kpɔk ŋgimbi'i, o daŋa-ŋgaiwi yiitoo usa tɛ ha̧ Heliodɔr: wa a̧-a̧ so nɛ zɔm ŋgai, dèé kɔ-wa nyɛmna mbɛt, wa pi̧ so nɛ o de ɗilɛɛ-laa; wa nɛ yor ka tɛ Heliodɔr, nɛ war wii-er in war gale kɔ̧-a̧, a nɛ samgbazi tɛ-a er-wii er-wii.

²⁷Beebee mɔ‘i, Heliodɔr hɔ̧fa yɔ nu, ɓɛɛ gba-tum kpe zu a̧. Wa baa a̧ e ŋgɔn mɔɔ-gɔ-wi.

²⁸Hegɔ wi’ɛ́ɛ́, nɛ kaia so o wi-pɛm-aa in o zɔm wibiro ye nɛ fara kuɓa-mbɔi’ɛ, kifa geemɔ, ɓɛɛ o wi nɛ iŋa gasi ko Sɔ̧ baa a̧ yaknɛ ɓɛlɛm, ŋma ŋgai bo tɛ a̧ ɓɔna. Nɛ́ hegɔ a̧ Sɔ̧ usa ŋgai kɔ̧-A̧ ha̧ o bíí lɛŋ.

²⁹Tɛ ŋgai ko Sɔ̧, Heliodɔr nyafa mbɔɗɔnù, ŋma wen gbo kɔ̧ nu-a bo na, ŋma mɔ-e-nɛ-ta in mɔ-gbak-aa bó na mbɛt.

³⁰Ɓɛɛ nɛ kóó o dɔka bíí, wa gasi kɔ-wa nɛ́ Gasa Wan nɛ dea gasa mɔɔkifi hu̧r nɛ nin Sa̧a̧-Fara kɔ̧-A̧. Ɓɛɛ Tua ko Sɔ̧‘i nɛ duna so nɛ mɔɔ-kíí in mɔɔ-gɔn-ɗɛɗɛ'ɛ kpai dun nɛ desee in nyɛŋgɛ, wen zu gbakamɔ ko Gasa Wan nɛ a̧-a̧ nɛ ŋgayamɔ lɛŋ.

³¹O ŋma gbamayari ko Heliodɔr nɛa ahai mɛ ak Onias a̧‘a̧ kɔfi Wan-mɛ-ŋgɔn mɛ kpasi wi nɛ bíí nɛ mbɔɗɔnu, ɓɛɛ nɛ hɛɗa fio kaɗi'i.

³²Tɛ kíí ká wannu tɛ̀ɛ́ ta'e o Juif tuia nɛ pɛr ha̧ Heliodɔr mɛ gbɛ a̧, gasa wan-ɗafi-sɔ̧ kpɛka, ɓɛɛ ɗafi Sɔ̧ wen ha̧ wi’ɛi mɛ kpasi.

³³Ŋgimbi nɛ gasa wan-ɗafi-sɔ̧ wor nɛ Sɔ̧ wen kpaa ea-ɗaŋmɔ‘i, o kpɔk kale be-ŋgaiwi nɔ‘i usa tɛ ha̧ Heliodɔr woyo, nɛ kpok laa tɛ-wa. Wa yora mgbak ka tɛ a, ɓɛɛ wa tɔ̧ ha̧ a̧: «Mɛ dé gasa osoko ha̧ Onias, gasa wan-ɗafi-sɔ̧, wen nɛ́ wen zu a̧ a̧ Gasa Wan e nɛ mɛ ɓɔn kpasa.

³⁴Ɓɛɛ kɔ-mɛ nɛ Yiwese aa nyasi tɛ-mɛ'ɛ, mɛ nɛ̀ɛ́ tɔ̧ nyɛrɛ zɔm ŋgai ko Sɔ̧ ha̧ bíí lɛŋ.» Ɗoŋ wen'i, ɓɛɛ wa yo ɓɛlɛm.

³⁵Heliodɔr ɗafa Gasa Wan, de nɛ gasa osoko ha̧ A̧ wen n'A̧a̧ kpasa a̧ tɛ fio. A̧ wara Onias nɛ dea, ɓɛɛ a̧ si ɗoŋ in o wibiro kɔ̧-a̧ si tɛ wannu

³⁶A̧ dea sedaako ti bíí lɛŋ wen o gasamɔ, n'aa zɔka nɛ gba̧a̧yí-a'i, nɛ Sɔ̧ nɛ ɔ gasa nyɛmna, dea in a̧.

³⁷Wannu aka a̧ nɛ́ ge bíí ge a'i nyɛma mɛ tom si Jerusalɛm woyo ge nde, ɓɛɛ Heliodɔr kifa nú:

³⁸«Kà mɛ nɛ boa nɛ ŋma wisɛn, kóó ŋma wi-a-ɗɔɔ-mɛ zu nù-wan kɔ-mɛ, mɛ tom a̧ si hi̧i̧. A̧ tɛ pii kpa mɛ nɛ o ndɔla nyasi, kà a̧ nɛ kpasa, wen ŋma ŋgai ko Gasa Wan Sɔ̧ zika fara'i nɛ mbetɛ,

³⁹wen Wi nɛ a̧-a̧ nɛ fara-duk kɔ‘i yiwese mɛ‘i pɛm fara'i pɛm, gu nɛ er zu a. A̧ gusi gusi o wi nɛ tɛ hi̧i̧ nɛ o ɗaŋ taamɔ, ɓɛɛ A̧ gbɛ wa.»

⁴⁰Nɛ́ hegɔ a̧ o mɔ yaka nɛnɛ zu Heliodɔr, ɓɛɛ kuɓa-mbɔi bɔn nɛnɛ nɛ oi-aa ŋgɛkɛt.