Read Northwest Gbaya 2 Makabee 5 Bible Online

2 Makabee 5 - Northwest Gbaya bible

2 Makabee 5

¹Nyɛm nɛ ŋgimbi'i, Antiɔkus ku̧u̧ naŋ ɗafa mɔ wen bia Egyptɛ woyo.

²Tɛ kale kpɔk ŋgimbi'i mbɛt, dee hee tɛ zɛ ɓu-naar ga, nɛ o ŋma mɔ nɛtɛ nɛtɛ usa nɛ tɛ dam saaye Jerusalɛm lɛŋ. Sɛn zu wa nɛ ŋgɔn, o bíí zɔka o wi-daŋ-nyaŋa nɛ pi̧i̧ gasa laa, nɛ‘i toka nú-a nɛ lɔr, nɛ ŋgan nɛ nyaŋa, in o gba-gii wibiro nɛ nɛka samgba nɛ oi boi-biro yar nɛnɛ,

³o wi-ŋgan-nyaŋa nɛ nɛka yor nɛ naŋ biro, o gboa-biro sitɛ o ŋmaa dam fara lɛŋ, o ŋgee nɛ nak, o gba sɛ́ɛ̀, o gbapaa nɛ‘i daka, o goo nɛ‘i pi̧, o boi-biro nɛ‘i dee nɛ lɔr nɛ zár, in o yí-laa-biro nɛtɛ nɛtɛ.

⁴Hegɔ, bíí lɛŋ kɔfa Sɔ̧ ha̧ o mɔ nɛ wa zɔka'i mɛ ba nɛ de sɔnti tɛnɛ.

⁵Nyɛrɛ-ndela hu̧ra dam nù‘e Antiɔkus fea wo. Nɛ́ mɔ'ɔ nɛ Jazɔn mɔi̧a̧ bíí hee booro ga ɓɛɛ nɛ̀ɛ́ gbaŋgi Jerusalɛm nɛ biro. Wa gana o wi-pɛm garo-yé nɛ biro, wa hur yé liŋgɔm ɓɛɛ Menelas yu mɔ nɛ̀ɛ́ hu̧si kɔ̧ ŋgara, ka̧ Tua ko Sɔ̧.

⁶Jazɔn yea tɛ kuma o be-nù kɔ‘i nɛ saka-yí. A̧ ta so kɔ̧-a̧‘e gana zu o be-nù kɔ‘i nɛ ŋgai nɛ́ ŋma gasa tikaa kɔ‘i na. A̧ taso kɔ̧-a̧‘e nɛ́ o wisɛn a̧‘i gbɛ, nɛ́ bó nɛ o be-nù kɔ‘i na.

⁷Zua'i mbɛt, a̧ kpa yuwar ɓára wan'i na. Tom kɔ̧-a̧ lɛŋ dee geemɔ pi̧ nɛ foe tɛ-a, ɓɛɛ a̧ si ɗoŋ nɛ doole mɛ hu̧si tɛ-a woyo sɛn zu zikanu Ammanitidɛ.

⁸Dea mɔɔ-gbɛ-zu kɔ̧-a̧‘i hɔɔ nduti: wa kpe a̧ kɔ̧ zɔɓɔ tɛ ko Aretas, ŋma ŋga wannu ko Arab. A̧ gboa ye'i yu nɛ mɔ nɛ ɗoŋ ye nɛnɛ. Bíí lɛŋ ndak so nɛ a̧, sɛn nɛ a̧, hee wi nɛ gbina o heembea ga. Wa bɛ̧ɛ̧ a̧ e tɛ geemɔ, wen n'aa usa bonɛ ha̧ nù in o be-nù kɔ̧-a̧. A̧ yuu mɔ nɛnɛ tik Egyptɛ-mɛ.

⁹A̧ kura híí mɛ nɛ si Lacedemɔn, nu ko o Grɛk, gbakná a̧ kpaa fara-hu̧si tɛ-a, wen nɛ tugun-wa kpɔk; ɓɛɛ á̧ n'aa ndaka so o bíí nɛ dɔkaa yinɛ zu nù kɔ-wa’ɛ a̧ fea gɔni nù mbɛt.

¹⁰A̧ n'a̧-a̧ aa so wɔr o bíí ŋgoɗoso nɛnɛ nɛ mbɔɗɔnu’ɛ, wa gun a̧ kɔ̧ pɛsi ko o dáà kɔ̧-a̧ na mbɛt. Ŋma bíí hi̧i̧ a̧ na, ŋma bíí tu̧ tɛ fio kɔ̧-a̧ na.

¹¹Ŋgimbi nɛ nyɛrɛ o mɔ nɔ‘i aa zer wannu Antiɔkus, a̧ taa'e nù Judéé lɛŋ baa nɛ zu nɛ ŋgɔn kaɗi. A̧ kura Egyptɛ de nɛ da̧ piinɛ, hee ŋma ŋga bokonam ga, ɓɛɛ a̧ ba ye Jerusalɛm'i nɛ ŋgai.

¹²A̧ ha̧nú ha̧ o wibiro kɔ̧-a̧ mɛ gbɛ bíí lɛŋ, nɛ wa tɛ kpa yuwar kɔ-wa, hee geemɔ ga, in mɛ gɔn ger o wan nɛ tɛ hu̧si nɛ kɔ̧ tua kɔ‘i lɛŋ.

¹³Wa kuma o be-ŋgaiwi in o sɔkawi, wa gbɛ o okóò in o obem, ɓɛɛ wa gɔn ger o be-zɔŋa in o zɔɗi-bem.

¹⁴Tɛ o zɛ taar'i, o be-Jerusalɛm booro ɓu-mɔɔrɔ-ɗoŋ-taar yɔa: wa gbɛa booro ɓu-naar ɓɛɛ wa ɗɔr oi-aa nɛ bara.

¹⁵I̧i nyɛm tɛ Antiɔkus na. Hegɔ a̧ nyɔŋa nin, yé nɛ kɔ̧ Tua ko Sɔ̧ nɛ ɔ sa̧-a̧ gan oi dɔkaa zu nù lɛŋ‘i. Nɛ́ Menelas nɛ kifa wi-a-ɗɔɔ-heembea in nù ko wi'i a̧ mgbɔ a̧ nɛ nɛnɛ.

¹⁶A̧ kaia o sa̧-a̧ nyɛk-ɗafisɔ̧ nɛ ndiŋ er-a, ɓɛɛ o ɗaŋ er-a pɛ o ha̧a̧mɔ nɛ o oi wannu aa'i: wa aa so'i, wen ha̧ nù mɛ ɓɔ siti’ɛ, in mɛ tu̧ nɛ tɛ Tua ko Sɔ̧‘i, gasi nɛ a̧ siti'i.

¹⁷Gɔɔtɛ gana zu Antiɔkus, ɓɛɛ a̧ zɔk'e nɛ́ wen zu ɗaŋmɔ ko o wi-saaye a̧ see Gasa Wan tu̧ nɛnɛ tɛ be ŋgimbi tikiɗi'i na, in'e nɛ́ wen zu mɔ‘i sa dúk hee Gasa Wan Sɔ̧ ee Sa̧a̧-Fara wɔkɔrɔ ga'i na mbɛt.

¹⁸Kà o wi-Jerusalɛm a̧ ye so tɛ ɗaŋmɔ nɛ dɔkaa na, Antiɔkus tɛ̀ɛ́ ba nyasi tɛ hɔaa kɔ̧-a̧ mbɛt, ɓɛɛ a̧ ea nyɔŋa-nin kɔ̧-a̧ duk, hee Heliodɔr nɛ Seleukus toma so wen zɔka mɔ wen kuɓa-mbɔi kɔ̧ Sa̧a̧-Fara’ɛ ga.

¹⁹Ɓɛɛ bó nɛ Gasa Wan hoka nɛ dukbíí wen zu Sa̧a̧-Fara na, nɛ́ Sa̧a̧-Fara a'A̧ hoka wen dukbíí ɛ̧.

²⁰Nɛ́ mɔ‘i sa Sa̧a̧-Fara nɛ baa zɔk so kpɔk bɔnɛ in dukbíí‘i kpa kale kpɔk demɔ nɛ Sɔ̧ ha̧ha̧ dukbíí mbɛt. Ŋgimbi nyimsea ko Wan nɛ a̧-a̧ nɛ ŋgayamɔ lɛŋ, A̧ siŋa Fara'i e wokɔrɔ. Ɓɛɛ ɗoŋ nɛ Gasa Wan ɗafa mgbara tɛ in dukbíí kɔ‘i kaɗi, A̧ baa Fara'i e si ɗoŋ zaŋ gasamɔ kɔ̧-A̧ woyo.

²¹Antiɔkus kaia dita kii bu-mbɔi gɔmŋma-ɓu-zua-mɔɔrɔ-ɗoŋ-taar sɛn kɔ̧ Tua ko Sɔ̧, ɓɛɛ a̧ si ɗoŋ si Antiɔk nɛ hayaa. Tɛ gasa-zu in duka-tɛ kɔ̧-a̧‘i, a̧ ta so ‘e ŋma mɔɔ-gan-wi bó na: wi nyɛma mɛ de ha̧ kombon mɛ yar nɛ zu nu, kóó ha̧ bíí mɛ nɛ nɔ nɛ naŋ zu gbatɔp.

²²Ɓɛɛ a̧ e o gasawi oi-aa mɛ usi bɔnɛ ha̧ duk k’ɛ́ɛ́. Sɛn Jerusalɛm, nɛ́ Filip Frizii nɛ ɗaŋ kɔ̧-a̧ gana ko wi nɛ ea a zu tom'i.

²³Sɛn zu kaya Garizim nɛ́ Andronik. Menelas nɛ ɗaŋa ɗaŋ in dukbíí kɔ‘i gan o i̧i̧-wi-nɔ‘i a̧-a̧ mgbara wa mbɛt. Sɛnmɔ sitɛ o be-Juif gana so zu wannu Antiɔkus,

²⁴Bɛɛ a̧ tom wi-duk-zu o wibiro nù Myzii, Apollonius, in o wibiro boorɔ ɓu-yiitoo zua-yiitoo si Jerusalɛm, ha̧ wa mɛ gɔn ger o nɔɔ-tɛ bíí lɛŋ, ɓɛɛ wa ɗɔra o okóò in o obem nɛ́ bara.

²⁵Hegɔ, ŋgimbi nɛ Apollonius hɔa Jerusalɛm, a̧ usa tɛ-a, hee ŋma wi-kii-ga̧a̧mɔ ga, pɛm nɛ sa̧-a̧ wese-ɔmtɛ ko o Juif. Ɓɛɛ, hee mɔ'ɔ nɛ o Juif ɔm so nɛ tɛ wese'i ga, a̧ ha̧nú ha̧ o wibiro kɔ̧-a̧ mɛ gbo, gbár nɛ saaye nɛ o boi-biro.

²⁶A̧ kuma o wi nɛ gboa lɛŋ mɛ zɔk saa ko o wibiro nɔ‘i, hɔ-ɗoŋ-aa ɓɛɛ a̧ pɛ o wibiro kɔ̧-a̧ dun saaye, gbɛ nɛ o bíí nɛ dɔkaa mbɛt.

²⁷Judas nɛ‘i sa'e Makabee yuu mɔ si ŋga gbárá in o bíí, hee ɓu ga. Wa yaa in o gbamayari kɔ̧-a̧ zu kaya hi̧i̧, hee o saɗi ga, nyɔŋ nɛ wa̧a̧-kpoo ɓɛɛ, wen ká ndiŋ tɛ̀ɛ́ a tɛ-wa.