Read Northwest Gbaya 2 Makabee 6 Bible Online

2 Makabee 6 - Northwest Gbaya bible

2 Makabee 6

¹Ɗoŋ tikiɗi, wannu toma ŋma be-Athɛn, Gérɔntɛ, mɛ fo o Juif nɛ ŋgai mɛ siŋ o dómɔ ko o zɔmdáà kɔ-wa a nù, in mɛ e ndaka ɗoŋ Heembea ko Sɔ̧ duk,

²ha̧ mɛ ɗaŋ wartɛ Tua ko Sɔ̧ mɛ Jerusalɛm, e nɛ Tua'i ha̧ Zeus, geesɔ̧ ko o Grɛk nɛ duk zu kaya Olimpɛ, ɓɛɛ wa ea Tua ko Sɔ̧ mɛ zu kaya Garizim ha̧ Zeus Yaa-kpɛk-bíí, nyɛm nɛ ɗoŋ akamɔ ko o bíí nù‘i.

³Ɗaŋmɔ nɔ‘i, nɛ ŋgai ŋgai siti'i, duka nɛ ŋga bɔnɛ wen bíí lɛŋ, wa gana zu ŋgai ko bíí mbɛt

⁴Tua ko Sɔ̧ duna so nɛ o ndiŋmɔ in o mɔɔ-búu: o wi-iŋ-Sɔ̧-na yaa de nɛ saa in o okóò-de-mɔ-nɛ mbɔɗɔnù sɛn hi̧i̧, de nɛ dala in wa sɛn kɔ̧ sa̧-a̧ bɛr-kira, kai nɛ o mɔ nɛ heembea dór si kɔ̧ Tua ko Sɔ̧ mbɛt.

⁵Zu taŋge-ɗafisɔ̧ duna so nɛ o ndiŋ kpoo-sɔ̧ nɛ heembea dór.

⁶Wa dora kasa Wese-Ɔmtɛ in o gbaŋa ko o zɔmdáà k’ɛ́ɛ́, wa dora gee be tɔ̧a̧‘e wi nɛ Juif mbɛt.

⁷Dam ɗoŋ fiozɛ lɛŋ, wa duka de ma in yɛ́ nɛ ŋgai mɛ duk oi ɗafa-geesɔ̧, in mɛ nyɔŋ mɔ-aa, tɛ gbaŋa wese-koo-wannu. Ɓɛɛ ŋgimbi nɛ o gbaŋa ko geesɔ̧ Dionysios hɔ, doole ha̧ bíí lɛŋ mɛ kar zu nɛ wa̧a̧, mgbɔ nɛ giɔ̧-tɛ Dionysios'i yar nɛnɛ.

⁸Nyɛm nɛ ɗoŋ akamɔ ko o wi-saaye Ptolémais, ŋma heembea gboa ha̧‘i mɛ de o kale kpɔk mɔ nɔ‘i sitɛ o be-Juif nɛ a̧-a̧ ye ko o Grɛk zikanu'i, in ha̧ wa mɛ nyɔŋ mɔɔ-ɗafi o geesɔ̧ mbɛt.

⁹Wa ha̧nú mɛ gɔn ger o wi nɛ tɛ bɛ̧ kasa o dómɔ ko o Grɛk. Tɛ zɔka o mɔ nɔ‘i, wi nyɛma mɛ iŋ‘e ŋga bonɛ duk dɔ̧ɔ̧.

¹⁰Nɛ́ hegɔ a̧ wa toma nɛ o ŋma okóò yiitoo si fara-ɓawen, wen nɛ wa gɔna bɔr o bem kɔ-wa. Wa mgbɔa o koo nɔ‘i nɛ ŋgai zik nɛ ye, nɛ oi o bem kɔ-wa nú-ber-wa, sɛka wa sɔmgbi wa nɛ kɔ̧ gɛr-garo a nu.

¹¹O ŋma Juif kaia ŋmaa si kɔ̧ di̧i̧, ka̧ fara'i mɛ de kɔfasɔ̧ wese-ɔmtɛ nɛ hu̧saa; ŋma bíí gbaa ndaa-wa ha̧ Filip, ɓɛɛ wa dɔ wa lɛŋ gbuɗuk. Wen wa bɛ̧a so tɔ̧a̧ wen tɛ-wa, wen nɛ wa kɔ̧ mɛ ɗaŋ sa̧-a̧ wese-ɔmtɛ na.

¹²Hegɔ, mi mbaŋ tɛ o wi nɛ tɛ kpa kalata’ɛ lɛŋ ndé: ká o bonɛ nɔ'ɔ gbin gba̧a̧tɛ-wa na; nɛ́ wa'a ta ndé: bó nɛ o bɔnɛ nɔ‘i tɛa wen tikaa k’ɛ́ɛ́ na, ɓɛɛ nɛ́ wen ha̧ dukbíí k’ɛ́ɛ́ mɛ kpai dukaa ɛ̧.

¹³Sɔ̧ usi ŋga kɔ̧ɔ̧mɔ kɔ‘i sitɛ o ɗaŋwi, tɛ dee bɔnɛ in wa nɛ hayaa, bá nɛ ea wa nɛ yɔli ɗoŋ-aa nyɛi̧.

¹⁴Wen mɛ usi bɔnɛ ha̧ o ŋma zuduk, Gasa Wan e kana ha̧ wa mɛ de ɗaŋmɔ gan zu-wa sɛ ɓɛɛ bó nɛ hegɔ a'A̧ taa nɛ mɔ mɛ de in yɛɛ na.

¹⁵A̧ zɛm ha̧ o ɗaŋmɔ k’ɛ́ɛ́ mɛ dɔk za̧i̧ kaɗi, sɛka a̧ dee bɔnɛ in yɛɛ na.

¹⁶Hegɔ A̧ kaɗi dea ko h’ɛ́ɛ́ na. Zu bɔnɛ n'Aa de in dukbíí kɔ̧-A̧ usi nɛ de yuwar h’ɛɛ‘i, A̧ siŋ aa pi̧ nù na.

¹⁷Mɔ n'am kɔ̧a̧ so mɛ mbaŋ tɛ-‘nɛ́ zu-a'i nɛ́ mɔ‘i; kinii, ɛɛ tɔ̧ k’ɛ́ɛ́ siti.

¹⁸Eleazar duka nɛ ŋma gasawi-usi-heembea; nɛ́ ŋma de tu̧u̧-tɛ-bíí, nɛ pɛ-a ɔ dɔka. Wa ɓaa nú-a nɛ ŋgai ha̧ a̧ mɛ nyɔŋ kpoo-ŋgɔya.

¹⁹A̧ kpɛka'e gana so a̧‘i fe zaŋ tu̧u̧-tɛ-mɔ, bá nɛ́ duka-kpasa zaŋ foe, ɓɛɛ a̧ nɛ́ nɛ ta-tɛ-a zééŋ si fara nɛ wa tɛ gbɛ a̧ sɛnɛ‘i.

²⁰A̧ pɛa mɔ nɛ duka kɔ̧ nú-a'i a nù, hee mɔ'ɔ nɛ o wi nɛ a̧-a̧ nɛ nɔɔŋgiɗi wen fɔ̧i̧a mɔ nɛ heembea dor de ga, bá nɛ nyɔŋaa wen ha̧ wa mɛ duk kpasa.

²¹O wi, nɛ ya so zu nyɔŋmɔ-ɗafi-geesɔ̧, nɛ Heembea dor nyɔŋgaa'i, saa Eleazar si mgbɔ́ɔ́r, wen nɛ wa iŋa so a̧ dika ɓeemɛ. Wa ee yuwar ha̧ a̧, a̧ tɔ̧ ha̧‘i ba kpoo nɛ Heembea dor na, in n'aa gia nɛ er-a, tɛnɛ ha̧‘i ɓɛɛ a̧ dee hee a̧ nyɔŋ nɛ kpoo-ɗafi-geesɔ̧, nɛ wannu ha̧nú wen aa'i, ga ɓɛɛ.

²²Kà a̧ de hegɔ, gba̧‘a̧ dee-sɛm kɔ-wa ɓeemɛ‘i tɛ gbak a̧, ɓɛɛ a̧ gboo yí fio.

²³Ɓɛɛ kɔ̧-a̧, a̧ hoka mɛ de nɛ tu̧u̧-tɛ-mɔ, nyɛm nɛ ɗoŋ pɛ kɔ̧-a̧ in gasi nɛ sɔki kɔ̧-a̧ ha̧ha̧ a̧, nyɛm ɗoŋ tu̧u̧-tɛ-mbui nɛ hɔɔ zu a̧ tɛ tom, nyɛm ɗoŋ dukaa kɔ̧-a̧ nɛ yuwar-a dika mɛ bem, gan batɛ nyɛm ɗoŋ o sa̧-a̧ heembea nɛ Sɔ̧ ɗafa. Hegɔ a̧ kifa ɓɔn nu-a'i’é: gana so wa'a tom wi si ye ko o fio war kpɔk.

²⁴Ɓɛɛ a̧ tɔ̧ woyo: «Tɛ pɛ k’ɛ́ɛ́ kinii, gɔnta ba nɛ yɛ na. Kà bó hegɔ, o be-ŋgaiwi nɛ dɔkaa tɛ tɔ̧‘e: Eleazar nɛ kpaa so pɛ ɓu-mɔɔrɔ-ɗoŋ-naar kaɗi tɛ̀ɛ̀ ndak nɛ ɗoŋ yuwar dukaa ko o gɔni-duk,

²⁵ɓɛɛ wa yɔɔ kaya mbɛt in am wen zu gɔnta kɔ‘m nɛ beka gbaka'm tɛ be oi ŋgimbi duka-kpasa nɛ ɓɔna ha̧‘m tikiɗi na. Nɛ́ ziimɔ in mɔɔ-buu a̧‘m tɛ dak pi̧ zu sɔki kɔ‘m ɓɛɛ

²⁶Ɓɛɛ, kà‘m yu ɗɔɔ bɔnɛ ko o bíí kinii, kóó mi fe, kóó mi duk kpasa mbɛt, mi beka nyu̧n er Wan nɛ a̧-a̧ nɛ ŋgayamɔ lɛŋ na.

²⁷Hegɔ, ka'm fe tɛ nɔɔŋgiɗi kinii, mi tɛ usi'e sɔki kɔ‘m baa nɛ‘m.

²⁸Mi tɛ e sedaako kpasa tu̧u̧tɛ-fio ha̧ o be-ŋgaiwi, sedaako feaa nɛ ta-tɛ in nɛ dea wen zu o tu̧u̧tɛ in sa̧-a̧ heembea.» Ɗoŋ n'aa tɔ̧a̧ wen'i kaɗi, a̧ nɛa zééŋ si yi fio.

²⁹O wi nɛ mgbɔ a̧ nɛnɛ‘i kpaia kuti de dukaaa kɔ-wa in a̧‘i nɛ ɗaŋa, wen tɛ taamɔ kɔ-wa, o wen n'aa tɔ̧a̧‘i lɛŋ nɛ́ wen-bɔkɔ.

³⁰Ŋgimbi n'aa hɛɗa fio ɗɔɔ nyasi kaɗi, a̧ pɛɛ see-aa tɔ̧ nɛnɛ‘e: «Gasa Wan, nɛ iŋa o mɔ nɛ ɔ sa̧-a̧ lɛŋ, iŋa nɛ dea'e mi nyɛma so mɛ gɔm yi fio. Kinii, A̧ zɔk o ŋga bɔnɛ-nyasi n'am kpɛka kpootɛ‘m a duk sɛnɛ‘i. Ɓɛɛ A̧ iŋa'e mi kpa nɛ desee kɔ̧ see-am zu o bɔnɛ nɔ‘i, wen zu kii A̧ n'am yu.»

³¹Nɛ́ hegɔ a̧ wi’ɛi fee nɛnɛ, e nɛ sedaako kpasa nɔɔŋgiɗi in de-dukaa, nɛ‘i tɛ zɔk ɗɔŋ-aa, bó nɛ ha̧ o be-ŋgaiwi ɓɛɛ na, ha̧ o dɔka bíí lɛŋ mbɛt.