Read Northwest Gbaya 2 Makabee 7 Bible Online

2 Makabee 7 - Northwest Gbaya bible

2 Makabee 7

¹Ŋma wese woyo, wa kaia o ŋma nyawi mɔɔrɔ-ɗoŋ-yiitoo in naa kɔ-wa tɛnɛ, ɓɛɛ wannu gusa wa nɛ nyasi in ɗaɗi-ndai de ma in wa nɛ ŋgai ha̧ wa mɛ nyɔŋ kpoo-ŋgɔya, nɛ Heembea dor.

²Ŋma kpɔk mgbara wa baa wen oi nú oi-aa, ɓɛɛ tɔ̧: «Me kɔ̧ɔ̧ mɛ iŋ nɛ́ ge tɛ ye ge? mɛ kɔ̧ɔ̧ nɛ ge in yɛ ge? Ɛɛ ya dɔ̧ɔ̧ mɛ fe, bá nɛ gbina Heembea ko o zɔmdáà k’ɛ́ɛ́.»

³See-wannu tu̧a batɛ, ɓɛɛ a̧ ha̧ nú wa'a e o be-tawaa-han-mɔ in o kpana tɛ wee.

⁴Ɗoŋ nɛ o nyɛk nɔ‘i baa wee kpɔroro kaɗi, a̧ ha̧nú wa'a ɓír leɓe-wi nɛ tɔ̧a̧ wen oi nú o dɔkaa'i, wa'a ɓá ndara-zú-a, ɓɛɛ wa ɓír o er-a in naŋ-a, nɛ gba̧a̧yí o nya-a in naa kɔ̧-a̧.

⁵Ɗoŋ nɛ wa deemɔ nɔ‘i kaɗi, ɓɛɛ ká a̧ biti ɔma, wannu tɔ̧a̧ wa'a ba a̧ si mgbak ka̧ wee, a wa'a hán a̧. Hee mɔ'ɔ nɛ ziwee ɓoɓi nɛnɛ nɛ kɔ̧ be-tawaa-han-mɔ‘i ga, o oi-aa in naa kɔ-wa aa wen ha̧ o ŋmaa mɛ fe tɛ nɔɔŋgiɗi. Wa tɔ̧̧:

⁶«Gasa Wan Sɔ̧ a zɔk'i, ɓɛɛ nɛ mbetɛ A̧ tɛ de ko h’ɛ́ɛ́, hee mɔ'ɔ nɛ Mɔise tɔ̧a̧ nɛnɛ nɛ sa̧-a̧ zaŋ kalata-gima kɔ‘i, yí bíí lɛŋ, ga: ' A̧ tɛ de ko ha̧ o widetom kɔ̧-A̧’ »

⁷Ŋgimbi nɛ kuti bíí fea kaɗi, wa mgbɔɔ yiitoo-aa si fara-bɔnɛ. Wa ɓáá ndara-zú-a yinɛ nɛ oi mui̧-a lɛŋ, ɓɛɛ wa aka a̧: «Mɛ tɛ nyɔn kɔ-mɛ nɛ kpoo-ŋgɔya nàá, kóó kpoo-tɛ-mɛ a zɔk nɛ bɔnɛ ɓir nɛnɛ sɛkɛɗɛ-sɛkɛɗɛ nde?»

⁸Ɓɛɛ a̧ kifi nɛ nú ko o zɔmdáà kɔ̧-a̧: «Weaa!». Nɛ́ hegɔ, sa wa usi o kale kpɔk bɔnɛ ko kuti wi'i ha̧ a̧ mbɛt.

⁹Ŋgimbi nɛ ɔmi kɔ̧-a̧ tɛ̀ɛ́ yak nɛnɛ, a̧ tɔ̧̧: «Ɗaŋ-mɛ, wigbɛzu, mɛ fo nɛ duka-kpasa tɛ-yɛ yinɛ kinii, ɓɛɛ Wan-zu-nu lɛŋ tɛ kpasi yɛ wen duka-kpasa kpoo nɛ kpoo, wen n’ɛɛ́ fe wen zu o heembea kɔ̧-A̧.»

¹⁰Hɔɗoŋ-aa, wa usa bɔnɛ ha̧ taar-a. Ŋgimbi nɛ wa aka a̧, a̧ daka leɓe-a gbonɛ, ɓɛɛ a̧ nyɛi̧ o er-a nɛ kpeesee.

¹¹A̧ nyɔŋa nin-a̧ tɔ̧ nɛ wen’ɛ ha̧ wa: «nɛ́ Gasa Wan mɛ yiwese a̧ ha̧o er-nɔ'ɔ ha̧‘m. Wen zu o heembea kɔ̧-A̧, mi kpɛka ha̧wa mbɛt (mi e wa tɛ geemɔ) Mi iŋa nɛ dea'e: A̧ tɛ ha̧ wa pii-nɛ-ɗoŋ ha̧‘m.»

¹²Wannu nɛ kiitɛ, in o wi-ya-katɛ-a lɛŋ yaa ɓekeyeke sɛn ti nɔɔŋgiɗi ko be-ŋgaiwi'i, nɛ e kɔ‘i o bɔnɛ tɛ geemɔ‘i.

¹³Ɗoŋ nɛ i̧i̧ fea kaɗi, wa usa o kpɔk ŋga bɔnɛ nɔ‘i ha̧ naar-a.

¹⁴Ŋgimbi nɛ ɔmi heɗa mɛ gbo tɛɛ kaɗi, a̧ tɔ̧̧: «Gana so a̧‘i fe er o bíí zɛm nɛ mɔ ha̧ Sɔ̧ mɛ kpasi wi tɛ fio, nyɛm nɛ ɗoŋ ha̧a̧nú kɔ̧-A̧. Ɓɛɛ kɔ-mɛ, ŋma yuwar kuraŋgɔn ɗoŋ tɛ fio wen mbe duka-kpasa ho ha̧ mɛ na.»

¹⁵Hɔɗoŋ‘i̧i̧, wa mgbɔa mɔɔrɔ-a tɛnɛ, ɓɛɛ wa de a̧ nɛ bɔnɛ.

¹⁶A̧ mbaɗa wannu féé, ɓɛɛ a̧ tɔ̧: «Mɛ, nɛ mɛ tɛ fe fee'i, mɛ a̧-a̧ nɛ ŋgai zu o bíí, ɓɛɛ mɛ demɔ nɛ mɛ kɔ̧ɔ̧ lɛŋ, ɓɛɛ ká mɛ ta'e Sɔ̧ siŋa nɛ zuduk k’ɛ́ɛ́ pi̧ nù na.

¹⁷Mɛ ga̧ kɔ-mɛ tɛ-mɛ, ɓɛɛ mɛ tɛ zɔk gasa ŋgayamɔ kɔ̧-A̧, hee mɔ'ɔ n'Aa tɛ sakali nɛ mɛ in o bezaŋ-mɛ ga.»

¹⁸Hɔɗoŋ ɛ̧ɛ̧ wi’ɛ́ɛ́, wa mgbɔ mɔɔrɔ-ɗoŋ-kpɔk-a tɛnɛ. Ŋgimbi feaa, a̧ tɔ̧̧: «Ká mɛ ɔr tɛ-mɛ gee na. Nɛ́ wen zu ɛ́ɛ́ nɛ tɛ-yɛ ɛɛ zɔk nɛ o bɔnɛ nɔ'ɔ, wen n’ɛɛ́ dea ɗaŋmɔ si tɛ Sɔ̧ k’ɛ́ɛ́. Nɛ́ hegɔ sa o ŋga bɔnɛ nɔ'ɔ tik nɛ zu yɛ.

¹⁹Nɛ́ kɔ-mɛ, nɛ mɛ baa biro duk nɛ Sɔ̧'ɛ, ká mɛ ta'e mɛ tɛ ɓɔn nɛ yɔli na.»

²⁰Naa ko o bem nɔ‘i duka nɛ gasa mɔɔ-yéŋgi, ɓɛɛ nyɛma so ha̧ tɛ-wi mɛ mbaŋ ɗoŋ aa. A̧ zɔka o bem kɔ̧-a̧ mɔɔrɔ-ɗoŋ-yiitoo fara feaa lɛŋ tɛ kpɔk wese, nɛ kpeesee, wen n'aa e so ta nɛ Gasa Wan.

²¹A̧ duka ha̧ nɛ nɔɔŋgiɗi ha̧ wa lɛŋ kpɔk kpɔk, nɛ nú ko o zɔmdáà kɔ-wa. Koo'i nɛ duna nɛ kpasa kɔ̧ɔ̧mɔ ko naawanbem, ɓɛɛ nɛ nɔɔŋgiɗi hee wiwii ga'i, tɔ̧a̧:

²²«Mi iŋ hee mɔ'ɔ n’ɛnɛ ku̧u̧ nɛ naŋ dea-tɛ sɛn kɔ̧ zaŋ-am ga na. Bó nɛ mi a̧ ha̧ɔmi duka-kpasa h’ɛ́nɛ́ na. Bó nɛ mi a̧ mboɗa boi tɛ-‘nɛ́ na mbɛt.

²³Gasa Wan, Wi-de-mɔɔ-zaŋnu lɛŋ, nɛ dea bíí dika ŋgimbi tɔk-zaŋ in nɛ mɔ lɛŋ gbo nɛ tɛ-a'i, tɛ ha̧ ɔmi in duka-kpasa h’ɛ́nɛ́ woyo zaŋ deako kɔ‘i, wen n’ɛnɛ e tɛ-‘nɛ́ nɛ ta-tɛ tɛ geemɔ kinii, wen n’ɛnɛ kɔ̧a̧ o heembea kɔ̧-A̧.»

²⁴Antiɔkus taa'e a̧ da̧-a̧ nɛ dara mam nɛ wi. Sɔŋkur bem ɓɔna so nɛ kpasa, ɓɛɛ bó nɛ́ wannu tɔ̧ɔ̧ so nɛ ge wen mɛ ɔr a ɓɛɛ na, a̧ kanamɔ ha̧ a̧ mbɛt-e: wi tɛ ha̧ zɔm mbɔi ha̧ a̧, ɓɛɛ a̧ kpaa de-dukaa, kà a̧ nɛ siŋa yuwar dukaa ko o zɔmdáà kɔ̧-a̧ pi̧ nù. Wi tɛ tɛ e a̧ nɛ sɛm kɔ‘i, ɓɛɛ wi baa a̧ e zu gasa tom mbɛt.

²⁵Hee mɔ'ɔ nɛ bem’ɛi mgbu kɔ‘i wen kɔ̧-a̧ na ga, wannu saa naa kɔ̧-a̧ pii ti, ɓɛɛ tɔ̧ ha̧ a̧ mɛ tɔ̧ mbɔrɔ ha̧ be-ŋgaiwi'i, ha̧ a̧ mɛ kpasi tɛ-a.

²⁶Ɗoŋ nɛ wannu tɔ̧ɔ̧ mbɔrɔ ha̧ a̧ ɗoŋ-aa nyɛi̧, a̧ kpɛka mɛ tɔ̧ wen in bem kɔ̧-a̧.

²⁷A̧ gira tɛ-a̧ sitɛ bem’ɛi, a̧ ea yaa-ɗaŋ wannu'i tɛ mgbeke, ɓɛɛ a̧ tɔ̧ ha̧ bem kɔ̧-a̧ nɛ mgbak nú kɔ-wa'e: «Bem kɔ‘m, mɛ de ko ha̧‘m n'am tuia mɛ kɔ̧ zaŋ-am tɛ fiozɛ mɔɔrɔ-ɗoŋ-naar, mi ha̧ bere ha̧ mɛ tɛ pɛ taar, ɓɛɛ ká‘m dai mɛ, kasi nɛ mɛ tɛnɛ hɔ tɛ pɛ kɔ-mɛ kinii. Mi hakala mɛ tɛ mɔ lɛŋ.

²⁸Mi kɔfa mɛ, bem kɔ‘m, mɛ zɔ́k yiwese in nù, mɛ mbaɗi mɔ lɛŋ nɛ a̧-a̧ sɛn tɛ wa, mɛ iŋ‘e nɛ́ geemɔ a Sɔ̧ baa de nɛ wa, ɓɛɛ nɛ́ hegɔ mbɛt a'A̧ dea nɛ o bíí.

²⁹Ká mɛ yú wi-gbɛ-bíí'ɛ na. Ɓɛɛ mɛ úsí‘e mɛ nɛ́ kpasa nya o zɔmwi kɔ̧-mɛ, a mɛ kpɛk fio, ha̧‘m mɛ kpa mɛ, kpɔk in wa, ŋgimbi deako ko Sɔ̧.»

³⁰Nú-a̧ tɛ zɔm tɛ wen'i na, ɓɛɛ bem’ɛi tɔ̧: «Ɛ́nɛ́ pɛm nɛ́ ge? Mi mbo zu'm ha̧ o ha̧a̧nú ko wannu na, mi mbo zu'm ha̧ o ha̧a̧nú zaŋ Heembea, nɛ Mɔisɛ ha̧so ha̧ o zɔmdáà k’ɛ́ɛ́ ɛ̧.

³¹Ɓɛɛ kɔ-mɛ, nɛ mɛ ndo o ari nɛ dɔkaa pi zu o be-hébreu’ɛ, er-Sɔ̧ tɛ ba mɛ.

³²Wen k’ɛ́ɛ́, k’ɛ́ɛ́ nɛ́ zɔka bɔnɛ kinii, nɛ́ wen zu o ɗaŋmɔ n’ɛɛ́ dea.

³³Gasa Wan k’ɛ́ɛ́ nɛ duk kpasa kpaa be ɗaŋsee zu yɛ tɛ be ŋgimbi tikiɗi, mɛ de h’ɛ́ɛ́ mɛ kpai dukaa, in mɛ usi nɛ ɗoŋ mɔ h’ɛ́ɛ́. Ɓɛɛ A̧ tɛ ɗafi mgbara tɛ-A in yɛɛ o widetom kɔ̧-A̧ woyo.

³⁴Nɛ́ kɔ-mɛ, yaa-ɗaŋ nɛ mɛ ɗaŋ gan o dɔka bíí lɛŋ'ɛ, ká mɛ ŋmaŋ tɛ-mɛ sɔɔgee, mɛ ɔr nɛ tɛ-mɛ nɛ o ee-ta ndela, hu̧i̧ nɛ er-mɛ sitɛ o widetom ko Sɔ̧ na.

³⁵Wen mɛ tɛ gbo ɗɔɔ kita ko Sɔ̧, Wan nɛ a̧-a̧ nɛ ŋgaiamɔ lɛŋ, nɛ zɔk mɔ lɛŋ‘i hɔ̧ɔ̧ na.

³⁶O zɔmwi k’ɛ́ɛ́ zɔka be-bɔnɛ ɓálóm wen duka kpasa nɛ beka kaɗi na. Wa fea wen zu nɔɔtɔk mgbara wa in Sɔ̧. Ɓɛɛ kɔ-mɛ, ŋgimbi kita ko Sɔ̧, mɛ tɛ tui bɔnɛ oi ŋmaŋa-tɛ kɔ-mɛ nyɛm ɗoŋ-aa

³⁷Kɔ‘m, mi ha̧ tɛ‘m in duka-kpasa kɔ‘m, hee o zɔmwi kɔ‘m ga, wen zu o heembea ko o zɔmdáà kɔ‘m. Mi kɔfi Sɔ̧ A̧‘a dé ko ha̧ dukbíí k’ɛ́ɛ́ nɛ hayaa, ɓɛɛ A̧a úsí bɔnɛ in oŋgaŋamɔ ha̧ mɛ, ha̧ mɛ mɛ gbár nɛ nú-mɛ‘e kpɔk Sɔ̧ nɛ́ A̧.

³⁸Mi kɔfi Sɔ̧ mbɛt ha̧ nyimsea ko Wan nɛ a̧-a̧ nɛ ŋgayamɔ lɛŋ nɛ tika zu dukbíí k’ɛ́ɛ́ nɛ wara'i mɛ ɓɔn zu'm in zu o zɔmwi kɔ‘m ɓɛɛ.»

³⁹See-wannu ɗaŋa batɛ, ɓɛɛ a̧ de kakayí in sɔŋkur bem'i gano oi-aa lɛŋ, wen nɛ ɗaŋ nú kɔ̧-a̧ gana ŋgai.

⁴⁰Nɛ́ hegɔ a̧ be-ŋgaiwi'i ɓɔna nɛnɛ nɛ sa̧-a̧ in zaŋ kpasa ee-ta nɛ Gasa Wan, fe nɛnɛ.

⁴¹Sɔŋkur-aa, naa fea ɗoŋ o bem kɔ‘i.

⁴²O nyɛrɛ kɔ‘m zu nyɔŋmɔ-ɗafi-geesɔ̧ in ŋga bɔnɛ-a'i nyɛma hegɔ.