Read Northwest Gbaya 2 Makabee 8 Bible Online

2 Makabee 8 - Northwest Gbaya bible

2 Makabee 8

¹Judas Makabee in o gbamayari kɔ‘i yara ɗoŋ o ye nɛnɛ nɛ hu̧saa. Wa saa o nya-wa be-zuduk kɔ-wa mɛ ndak ɗoŋ wa, ɓɛɛ wa dak o wi nɛ bɔna ndaka pata Heembea ko o Juif lɛŋ pii tɛ wa. Wa mɔi̧a̧ o bíí, hee booro mɔɔrɔ-ɗoŋ-kpɔk ga.

²Wa kɔfa Gasa Wan ha̧ A̧ mɛ zɔk mɔ pii tɛ dukbíí kɔ̧-A̧, nɛ o bíí lɛŋ de nɛ bɔnɛ‘i, ha̧ A̧ mɛ de ko ha̧ Tua kɔ̧-A̧, nɛ o ɗaŋwi aa ndiŋ sɛnɛ‘i,

³ha̧ A̧ mɛ de ko ha̧ gasa yé nɛ wa yaia kpaŋgála-kpaŋgálá kifi gee bɛɛ-oi'i, ha̧ A̧ mɛ zii tiger tɔk nɛ hiɗi mɔ si tɛ A̧‘i,

⁴ha̧ tɛ-A̧ mɛ mbaŋ ɗoŋ o obem, nɛ wa dea ɗaŋ gbɛ nɛnɛ sɔɔgee'i, in ha̧ A̧ mɛ tom nyimsea kɔ̧-A̧ si zu o bíí nɛ ɗaŋa nin-A̧‘i, wen usaa'e A̧ sɛna ɗaŋmɔ.

⁵Ɗoŋ nɛ Judas Makabee mɔi̧a̧ o wibiro kaɗi, o wi-iŋ-Sɔ̧-na nyɛm so mɛ kpa ŋgai zu a ɓɔna, wen nyimsea ko Gasa Wan zu dukbíí kɔ‘i kpaia nɛ deako

⁶A̧ tika zu o gasa yé in o geɗɛk-a nɛ biro, dɔ nɛ wa. A̧ baa o de fara-yor-biro, ɓɛɛ a̧ e yì naŋ o wisɛn nɛ dɔkaa.

⁷Tɛ o biro nɔ‘i, a̧ hók nɛ zaŋ-zɛ batɛ wen tum, ɓɛɛ nyɛrɛ kpɔraa kɔ̧-a̧ hú̧r dam fara lɛŋ.

⁸Filip zɔka'e Judas ŋgai ŋgai siti, gbin nɛ o biro ɗoŋ-ŋmaa ɗoŋ-ŋmaa, ɓɛɛ a̧ yɔr mɔ ha̧ Ptolemee, gasawi duk zu o wibiro zu zikanù Koele-Syrii in Fenisii, ha̧ a̧ mɛ tɛ̀ɛ́ ɗafi ɗoŋ o mɔ ko wannu.

⁹Ahai, Ptolemee hoka Nikanɔr bem ko Patroklɛ, ŋma kpɔk mgbara o kuti sɛm ko wannu, ɓɛɛ tom a̧ in o gii-wibiro hee boorro ɓu-yiitoo ga, nɛ tɛa nɛ tɛ́ zuduk nɛtɛ nɛtɛ, wen kuma kpár o be-Juif lɛŋ yinɛ. A̧ toma Gorgias gasa widuk zu o wibiro, nɛ duk nɛ sɔka wan-gbin-biro mɛ nɛ in a̧.

¹⁰Nyamandoe garama ko o be-Rom tɛ dita kii bu-mbɔi booro-yiitoo ɓɔna so zu wannu Antiɔkus. Nikanór taa mɛ gbo nyamandoe'i tɛ ɗɔra o be-Juif nɛ‘i tɛ kai tɛ biro nɛ bara

¹¹Ahai, a̧ pi̧i̧ tom sitɛ o gasa yé nu gbatɔp lɛŋ mɛ tɛ̀ɛ́ hi̧fi̧ o bara Juif. A̧ ha̧nú mɛ ha̧ bara ɓu-mɔɔrɔ-ɗoŋ-naar ha̧ wa zu wen dita kii bu-mbɔi kpɔk. A̧ de so taamɔ sitɛ kifa-er ko Wan nɛ a̧-a̧ nɛ ŋgayamɔ lɛŋ, nɛ duk dɔ̧ɔ̧ mɛ tik zu a̧‘i, na.

¹²Nyɛrɛ tɛa ko Nikanɔr aa zɛ́r-Judas, ɓɛɛ a̧ tɔ̧ ha̧ o bíí kɔ̧-a̧'é wibiro ko wisɛn hɛɗa hɔaa dɔ̧ɔ̧ kaɗi.

¹³Hegɔ, o wi-kíí in o wi nɛ e ta nɛ deemɔ nɛ yuwar-a ko Sɔ̧ na, yuu mɔ yak si ŋma fara.

¹⁴O oi-bíí ɗɔra be-oi-mɔ kɔ‘i nɛ ɓɔna lɛŋ, ɓɛɛ wa kɔfi Gasa Wan mɛ gbo wa er ɗaŋ Nikanɔr, nɛ ɗɔra so wa nɛti ha̧ biro mɛ ku̧‘i.

¹⁵Wa kɔf'A̧a̧ bó nɛ́ wen zu wa nɛ tɛ-wa na, ɓɛɛ wen zu tɔk n'Aa nɔa so in o zɔmdáà kɔ-wa, in wen nɛ‘i saa nin-A nɛ ɔ gasaa in nɛ ɔ sa̧-a̧ a zu wa.

¹⁶Judas Makabee mɔi̧a̧ o bíí kɔ‘i booro mɔɔrɔ-ɗoŋ-kpɔk, ɓɛɛ a̧ ha̧ nɔɔŋgiɗi ha̧ wa, ká wa tɛ̀ɛ́ yu mɔ ti o wisɛn, in ká wa tɛ̀ɛ́ zɔk mɔ sitɛ o zɔm dɔka wi-iŋ-Sɔ̧-na, nɛ ba biro pii tɛ wa sɔɔgee'i, ɓɛɛ ha̧ wa mɛ de nɛ biro nɛ nɔɔ-see.

¹⁷Yí-wa a bɔn nɛ tɛ ɗaŋmɔ, nɛ wa dea sitɛ Sa̧a̧-Fara, mɔɔ-foe nɛ wa dea pi̧ tɛ Jerusalɛm in dora o dómɔ ko o zɔmdáà kɔ-wa.

¹⁸A̧ tɔ̧̧ woyo: «O wi nɔ‘i tɛ nɛ o boi-biro in ŋgai tɛ-wa. Nɛ́ k’ɛ́ɛ́, ɛ́ɛ́ e tɛ-yɛ nɛ Sɔ̧, Wan nɛ a̧-a̧ nɛ ŋgayamɔ lɛŋ. A̧ nyɛma mɛ kum bíí nɛ ba biro piitɛ yɛ lɛŋ, in zaŋnu nɛ oi-aa mbɛt, tɛ gee mi̧a zu-A.»

¹⁹A̧ tɔra o wár yee ɗoŋ o zɔmdáà kɔ-wa, nɛ Gasa Wan yea, ha̧ wa; ŋgimbi ko Senakerib A̧ gbɛa o bíí booro-gɔmŋmaa nɛ ɓu-mɔɔrɔ-ɗoŋ-taar-zua-mɔɔrɔ

²⁰A̧ wee ɗoŋ o ŋma biro nɛ‘i bia so in o be-Galat, sɛn zikanù Babilɔŋ: o Juif lɛŋ yaa nɛ ɓooro-mɔɔrɔ-ɗoŋ-taar, in o be-Masedoan booro-naar; ɓɛɛ ŋgimbi nɛ mɔ gana zu o be-Masedoan nɛ tɛa mɛ gba wa, o Juif booro-mɔɔrɔ-ɗoŋ-taar'i kuma o wisɛn booro gɔmŋmaa nɛ ɓu-yiitoo, wen zu gbakamɔ nɛ tɛa ha̧ wa nɛ Yiwese. Ɓɛɛ wa pɛ mɔɔ-oi-biro nɛ dɔkaa.

²¹O wen nɔ‘i ha̧nɔɔŋgiɗi ha̧ o wibiro kɔ̧-a̧. Wa yaa gɛɗɛ-gɛɗɛ mɛ fe wen Heembea in wen nù ko o zɔmdáà kɔ-wa. A̧ kɛ̧a so o wibiro kɔ̧-a̧ tɛ zuduka-a taar.

²²A̧ aa o nya-a̧ Simɔn, Jozɛf in Jonataŋ zu wa kpɔk kpɔk, ɓɛɛ a̧ kɛ̧ wibiro booro-kpɔk nɛ gɔmŋmaa mɔɔrɔ ha̧ o nde lɛŋ.

²³A̧ ha̧nú Eleazar á tɔ́r sa̧-a̧ kalata. Ɗoŋ n'aa hoka nú-wen-biro'i'e «Gbakamɔ ko Sɔ̧» kaɗi, a̧ duka ti ha̧ kuti zuduk wibiro, ɓɛɛ a̧ tik Nikanɔr.

²⁴Wan nɛ a̧-a̧ nɛ ŋgayamɔ lɛŋ duka kpɔk in wa tɛ biro, ɓɛɛ wa gbɛa wisɛn gan gan booro-mɔɔrɔ-ɗoŋ-naar, wa a dai tɛ o dɔka wibiro ko Nikanɔr, gɔm nɛ wa, ɓɛɛ wa pɛsi oi-aa sót-sɔ́t.

²⁵Wa kaia sede er o wi nɛ tɛa so wen hifa wa nɛ bara'i. Wa ndaka ɗoŋ o wisɛn nɛ nyɛia̧a, ɓɛɛ wa pii ɗoŋ pata naŋ-wa, wen ŋgimbi bo so ɓɔna.

²⁶Duka so nɛ zɛ ɗafamɔ wen wese-ɔmtɛ: hegɔ, wa nyɛm so mɛ ndak ɗoŋ wa nɛ nyɛia̧a na

²⁷Ɗoŋ nɛ wa kaia o boi-biro in o mɔɔ-oi o wisɛn kaɗi, wa mɔi̧a̧ wen kɔfasɔ̧ wese-ɔmtɛ. Wa dea zɔm osoko ha̧ Gasa Wan, gasi nɛ A̧ wen n'Aa usa nú kuti deako kɔ̧-A̧ ha̧ wa wese'i.

²⁸Ɗoŋ wese-ɔmtɛ, wa kɛ̧a o ŋma mɔɔ-oi-biro ha̧ o wi nɛ bɔnɛ baa so tɛ-wa, o kogɛra in o be-oi, ɓɛɛ wa kɛ̧ oi-aa mgbara wa in o bem.

²⁹Hɔɗoŋ-aa, wa mɔi̧a ŋmaa, kɔfi nɛ Gasa Wan Yaadeko nɛ tigɛr kpɔk, wen ha̧ A̧ mɛ ɗafi mgbara tɛ-A war kpɔk in o widetom kɔ̧-A̧.

³⁰Ɗoŋ‘i̧i̧, wa baa zu-wa duk nɛ o wibiro ko Timɔtéé in Bakidɛs. Wa gbɛa wa gan gan booro-ɓu-yiitoo, ɓɛɛ wa ɓár o gba kusa ŋgárá. Wa kɛ̧a gba dɔka mɔɔ-oi-biro ko o wi nɔ‘i woyo tɛ fara yiitoo: kpɔk wen wa nɛ tɛ-wa, ɓi-aa wen o wi nɛ biro baa, o be-oi in o kogɛra gu nɛ o sɔkawi.

³¹Wa ndɛma o boi-biro ko o wisɛn nɛ wara mɔi̧ a de fara, ɓɛɛ wa kai o oi-mɔ si Jerusalɛm

³²Wa gbɛa gasawi ko o wi-pɛm Timɔtéé, wen nɛ́ ŋma wi-ɗaŋ nɛ usa so ŋga bɔnɛ nyɛmna ha̧ o Juif.

³³Ŋgimbi nɛ wa de nɛ gbaŋa gbina-biro sɛn Jerusalém, wa ɗɔɔ o wi nɛ pia so wee tɛ kparnú Tua ko Sɔ̧. O wi nɔ‘i hu̧sa so kpɔk in Kallistɛn sɛn kɔ̧ ŋma be-geɗɛk tua; hegɔ ɓɛɛ wa kpa mgbak mɔ-oi ɗaŋmɔ kɔ-wa.

³⁴Nikanɔr yaa-ɗaŋ‘i, saa so o wi-de-fili booro tɛnɛ wen hi̧fa o bara Juif.

³⁵Gasa Wan pi̧i̧ foe tɛ a sɛn tɛ gbaka o wi nɔ‘i, n'aa zɔk so hee sɔŋkur bíí ga'i. Nikanɔr kpɔ̧i̧a laa-wan kɔ̧-a̧ yinɛ, ɓɛɛ a̧ ma yì nɛ kpɛɛfɔ nɛnɛ, ɛnɛ-a̧, hee ŋma wi-yu-bara ga. Bíí lɛŋ siŋa a̧ pi̧ nu; de sɔnti baa a̧ hɔ Antiɔk mɛ, ká o wibiro kɔ̧-a̧ kuma so lɛŋ kaɗi.

³⁶A̧, n'a̧-a̧ ha̧so nú ha̧ o be-Rɔm nde wi tɛ ɗɔr nɛ o be-Jerusalɛm, gbo nɛ nyamandoe kɔ-wa wo'i, yee tɛ tɔ̧a̧a̧ nɛ heegɛr'e Sɔ̧ ye nɛ ɗoŋ o be-Juif, ŋma wi-gan-wa bó na, wen nɛ wa ndak nɛ ɗoŋ o heembea n'Aa ha̧so ha̧ wa.