Read Northwest Gbaya 2 Makabee 9 Bible Online

2 Makabee 9 - Northwest Gbaya bible

2 Makabee 9

¹Ŋgimbi'i, wannu Antiɔkus pia ɗoŋ zíŋ-zíŋ nɛ nu Pɛrsɛ mɛ.

²Wen a̧ yea so gasa ye Pɛrsɛpolis, a̧ kíí yuwar ɓará mɔɔ kɔ̧ Tua ko sɔ̧ in baa ye'i, ɓɛɛ o wi-saaye dik in a̧ gɛrɛm, wa kaia boi-biro, e yì naŋ-a, ɓɛɛ a̧ yu mɔ sinɛ nɛ foe.

³Hee mɔɔ n'aa a̧-a̧ so ka ye Ekbatanɛ ga, nyɛrɛ mɔ nɛ kpaa Nikanɔr in o wibiro ko Timɔtéé‘i a̧-a̧ zer-aa.

⁴Dawa dee a̧, ɓɛɛ a̧ ta mɛ nɛ̀ɛ́ kifi er dara ko o wi nɛ ee yì naŋ-a'i ha̧ o be-Juif. A̧ ha̧nu'e naŋ-wi-ba-keekee-nyaŋa kɔ̧-a̧ a wíi, ká a̧ yor na, ha̧‘i hɔ̧ nɛ hayaa; ɓɛɛ ká kifi-er ko Sɔ̧ duka ɗoŋ-aa kaɗi. Zaŋ sú̧ú̧-tɛ kɔ̧-a̧, a̧ tɔ̧a̧: «Hɔaa kɔ‘m Jerusalɛm, bɛɛ mi tɛ de ha̧ a̧ mɛ kifi kɔ̧-fio wen siŋa wɔr o Juif lɛŋ a sɛnɛ.»

⁵Ɓɛɛ Gasa Wan Sɔ̧ ko Israɛl nɛ zɔk mɔ lɛŋ, tuia ŋma hu̧sa ŋga zɛɛ, nɛ nyina-a bó na pi̧ tɛ a̧. Nú-a tɛ zɔm so tɛ wen'i na, ká ŋga ɓáɓá-zaŋ nɛ nyina-a bo na, in ŋga nyima zaŋ baa a̧.

⁶Mɔ‘i nyɛma sɛnɛ, wen n'aa dee so ŋga bɔnɛ, nɛ‘i nyɛm mɛ tɔ̧ na in o bíí, ha̧ nɛ ŋga nyima-zaŋ ha̧ wa mbɛt.

⁷Kóó hegɔ‘i, a̧ kán be nú gɔɔtɛ kɔ̧-a̧ na. Zaŋ gasa zu kɔ̧-a̧‘i, nyimsea kɔ̧-a̧ zu o be-Juif tɛ̀ɛ́ dár dár siti woyo, ɓɛɛ a̧ duk ndɛ́ wi-ba-keekee naŋ-a a wíi. Ahai, a̧ hɔ̧fa̧ nɛ zu keekee nɛ mayi nyɛmna yo nu gbɔs, ɓɛɛ o gba̧a̧tɛ-a lɛŋ gbin ɗɛsɛ-ɗɛsɛ.

⁸Wi’ɛi nɛ ŋmaŋa so tɛ: ɓán ná‘e ndé wi gana bíí lɛŋ, pɛŋa-yì nyɛma mɛ zíí nú-wi, in wi nyɛma mɛ we dita kaya nɛ kilo wo'i, ɔ so nɛ nù tɔrɓɔndoŋ. Kinii wa gɔ nɛ a̧ nɛ mɔɔ-gɔ-wizɛɛ. Tɛ mɔ‘i, o bíí lɛŋ zɔka ŋgayamɔ ko Sɔ̧.

⁹O dɔk ku̧u̧naŋ fokaa gbonɛ nɛ kɔ̧ yí ɗaŋwi'i. Dika nɛ kpasa, o murtɛ-a a̧ka ɗɛsɛ-ɗɛsɛ yí ŋga bɔnɛ. Ɗɛɗɛ o gii wibiro lɛŋ ɗaŋa tɛ zia pɛr mbɔra tɛ-a'i.

¹⁰Wi nɛ tɔ̧ so ‘e wi nyɛma mɛ ndɔ o sɔra mɛ yiwese nɛ er-wi, kinii ŋma bíí nyɛm mɛ ɗɔl si katɛ a wen tuia a ɓɔna, wen zu wu̧rɛ̧ɛ̧ pɛr-tɛ-a.

¹¹Ɓɛɛ nɛ zu gba̧a̧tɛ-a̧ nɛ gbina lɛŋ, in tɛ o bɔnɛ nɛ yee tɛ a̧ fada̧i̧‘i, a'a̧ ea nɛ gasa ŋmaŋa-tɛ kɔ̧-a̧ duk: nyasi ko Sɔ̧, nɛ za̧i̧ so nyimmɔ kɔ̧-a̧‘i, dee ha̧ a̧ mɛ ta mɔ zu mgbak dukaa kɔ̧-a̧.

¹²Hee mɔ'ɔ nɛ pɛr-tɛ-a gana so zu-a nɛ tɛ-a ga, a̧ tɔ̧̧: «Nyɛma sɛnɛ ha̧‘i mɛ ɔ nu ha̧ Sɔ̧, ɓɛɛ ká gee bíí nɛ tɛ fe fee ba zu we nɛ Sɔ̧ na!»

¹³Ɓɛɛ ŋdiŋ bíí‘i ye tɛ kɔfa Sɔ̧ nɛ nyɛm so kɔ‘i mɛ de ko ha̧ a̧ ɓɔna'i.

¹⁴A̧ ha̧nú mɛ e Jerusalɛm nɛ yɔli: nɛ́ ye n'aa naka tɛ-a sinɛ mɛ yai gu nu ha̧ mɛ kifi kɔ̧-fio ko o be-Juif lɛŋ.

¹⁵Nɛti, a̧ tɔ̧ so'e o be-Juif bó nɛ bíí ha̧‘i mɛ gun na. Ɔ dee mɛ pi̧ wa pi̧i̧ taŋ in o bem ha̧ o ŋga-nɔi̧ in o bokonám mɛ nyɔŋ. Kinii, a̧ ha̧nú ha̧ o Juif mɛ nyɛm ŋmaa in o be-Athɛnɛ, ya nɛ ɗɔɔ kpɔk geŋga.

¹⁶A̧ ha̧nú mɛ ɗafi Tua ko Sɔ̧, n'aa zu̧a so mɔɔ kɔ̧-a̧ lɛŋ'ɛ, nɛ o gba ɗe ha̧a̧mɔ, mɛ kai o nyɛk-ɗafisɔ̧ n'aa pɛa so’ɛ sinɛ ɗɔŋ, a nɛ mbea zu-a nɛ dɔkaa gan, in mɛ yɔɓi o tom-ɗafasɔ̧ nɛ o wár-mbɔi kɔ̧-a̧.

¹⁷A̧ tɛ̀ɛ̀ ha̧ nú mbɛt mɛ ndak pata yuwar-kɔ̧fa̧sɔ̧ ko o Juif, in mɛ yar nɛ ɗoŋ o zikanu nɛ bíí a̧-a̧ sɛnɛ lɛŋ, hú̧r nɛ o ŋgayamɔ ko Sɔ̧.

¹⁸O bɔnɛ kɔ̧-a̧‘i gɔn na, wen nɛ kita ko Sɔ̧ nɛ duk nɛ wara tika so zu a̧. Ɓɛɛ, hee mɔ'ɔ nɛ ŋma mɔá-e-nɛ-ta bó ɓɔna ga, a̧ yɔra kalata’ɛ nɛ duk hee aia-nú ga’ɛ ha̧ o be-Juif: wen-aa nɛ́ mɔ'ɔ!

¹⁹«Wannu Antiɔkus nɛ duk nɛ gasawi ko o wibiro mbɛt fana o Juif nɛ duk nɛ de bíí nù kɔ‘i lɛŋ. Desee, hayatɛ in de-dukaa h’ɛ́nɛ́.

²⁰K’ɛnɛ nɛ yaa nɛ hayatɛ in o bem k’ɛ́nɛ́, in kà o mɔ k’ɛ́nɛ́ lɛŋ a nɛɛ nɛ dea, hee mɔ'ɔ n’ɛnɛ kɔ̧a̧ ga, mi de nɛ gasa osoko ha̧ Sɔ̧ wen mɔ‘i.

²¹Nɛ́ kɔ‘m, mi a̧-a̧ gɔn dere-zɛɛ, karkor ŋgai bo tɛ‘m na, ɓɛɛ taamɔ kɔ‘m sitɛ‘nɛ́ nɛ́ kɔ̧ɔ̧mɔ. Ɗoŋ n'am pia nɛnɛ nɛ nù Pɛrsɛ, mi ziɓa wen zu ŋga zɛɛ nɛ baa'm, ɓɛɛ mi zɔka'e ɔ dée ha̧‘m ta mɔ zu yaa ko o bíí lɛŋ nɛ yɔli.

²²Gba̧a̧tɛ‘m gbin wen zu dukaa kɔ‘m'i na, wen mi e ta nɛ kpasaa'e mi tɛ gbo ɗɔɔ ɓɔsi'i

²³Ɓɛɛ mi ta nɛ mɔ nɛ dáà kɔ‘m dee so hók nɛ ŋma bíí e oi-aa, ŋgimbi n'aa yaka nɛ biro si o gɔni-nù nɛ nyɛia̧a’ɛ,

²⁴wen a̧ kɔ̧ɔ̧ so ndé kà ŋma sakalamɔ nɛ hɔa, kóó kà ŋma ɗaŋ nyɛrɛ nɛ hɔa, ká o bíí nù kɔ̧-a̧ sakali na, ɔ so dee ha̧ wa mɛ iŋ yí wi n'aa ee wan er-a̧.

²⁵Mi ta mbɛt'e o wannu in o zikanù ka tɛ-yɛ lɛŋ ya gɛɗɛ-gɛɗɛ zɛm nɛ ŋma de ŋgimbi wen zɔka mɔ nɛ tɛ hɔ zu yɛ. Kalea a'i sa'm ba bem kɔ‘m Antiɔkus e zu wan oi-aam. Dɔ̧ɔ̧dɔ̧ɔ̧, ŋgimbi n'am daŋa nɛnɛ si o zikanù ka̧-zan mɛ ŋgɔn, mi usa a̧ ha̧ o dɔkaa mgbara ‘nɛ́, h’ɛ́nɛ́ mɛ zɔk a̧ nɛ de yí. Mi yɔra kalata ha̧ a̧ wen mɔ‘i: gba̧a̧ wen-aa nɛ́ mɔ'ɔ!

²⁶«Mi kɔfi ‘nɛ́, ak nɛ ɛnɛ́‘e: tɛ nɛ́ a̧ mbaŋ ɗoŋ o demɔ n’ɛnɛ kpaa so er-am, kóó wen ɛ́nɛ́ lɛŋ, kóó ha̧ bíí kpɔk kpɔk; ɓɛɛ o ndé lɛŋ a kasi kpɔk kɔ̧ɔ̧mɔ n’ɛnɛ a̧-a̧ nɛnɛ pii tɛ‘m'i sitɛ bem kɔ‘m mbɛt.

²⁷Mi iŋa nɛ dea'e a̧ tɛ demɔ nɛ kɔ̧ɔ̧mɔ in munyal si tɛ ‘nɛ́; a̧ tɛ ndak ɗoŋ taamɔ kɔ‘m lɛŋ nɛ wara, ɓɛɛ a̧ tɛ zíí ŋmaa in ‘nɛ́ɛ́.»

²⁸Nɛ́ hegɔ a̧ yaa-gbɛ-zu in yaa-ɗaŋ-nin-Sɔ̧‘i zɔka ŋgaŋa bɔnɛ, hee wan n'aa usa so ha̧ o ŋma bíí mbɛt ga'i, ɓɛɛ a̧ fea ɗaŋ fio sɛn gɔni nù, mgbara kaya mɛ.

²⁹Filip nɛ gasa so kpɔk in a̧ baa wɔr-aa piinɛ; ɓɛɛ hee mɔ'ɔ n'aa dee so kii bem ko Antiɔkus ga, a̧ yuu mɔ si Egyptɛ, katɛ Ptolemee Filomɛtɔr.