Read Northwest Gbaya MATTHIEU 15 Bible Online

MATTHIEU 15 - Northwest Gbaya bible

MATTHIEU 15

¹O ŋma mgbara o Fariziɛn in o wi-usi-heembea mɛ Jerusalɛm tɛ̀ɛ́ tɛ Jesu ɓɛɛ tɔ̧ ha̧ a̧:

²«Wen ge sa o ŋgaiwi k’ɛ́nɛ́ e bɔɔ yuwar ɗafa-war-tɛ ko o zɔmdáa tɛ geemɔ ge? Wen wa tai er nɛti sɛka wa nyɔŋa mɔ na.»

³Jesu kifa nú ha̧ wa: «Nɛ̀ k’ɛ́nɛ́, wen ge s’ɛnɛ e bɔɔ heembea ko Sɔ̧ tɛ geemɔ, h’ɛ́nɛ́ mɛ ndak nɛ́ ɗoŋ yuwar deemɔ ko o zɔmdáa k’ɛ́nɛ́ ge?

⁴Wen Sɔ̧ tɔ̧ɔ̧ so'e: ‹A̧‘i tú̧ tɛ dáà in nàà kɔ‘i,› ɓɛɛ, ‹Wi nɛ̀ foma dáà kɔ‘i kóó nàà kɔ‘i, a̧‘i gbɛ́ wi’ɛi yinɛ.›

⁵Ɓɛɛ k’ɛ́nɛ́, ɛ́nɛ́ tɔ̧‘e, wi nɛ̀ tɔ̧ ha̧ dáà kɔ‘i kóó ha̧ nàà kɔ‘i ndé, mɔ nɛ̀‘i tɛ̀ɛ́ ha̧ so gbak nɛ̀ wa, wi ha̧a̧ ha̧ Sɔ̧ kaɗi, wó,

⁶ɓɛɛ ɛ́nɛ́‘e wi’ɛi beka gbak dáà kɔ‘i ɓɔna. Mɛ̀ nɛ́ tɛ́ mɔ‘i ɛ́nɛ́ ee nɛ̀ wen ko Sɔ̧ tɛ geemɔ, h’ɛ́nɛ́ mɛ ba nɛ́ yuwar deemɔ ko o zɔmdáa k’ɛ́nɛ́.

⁷Ɛ́nɛ́ o wi nɛ̀ a̧a̧ nɛ̀ see yiitoo, Esaii tɔ̧ɔ̧ wen oi nú Sɔ̧ zu'nɛ́ nyɛm sɛnɛ, ŋgimbi n'aa tɔ̧ɔ̧ nɛnɛ‘e:

⁸‹Dukbíí'ɛ zɔn am nɛ̀ ndàrá-nú, ɓɛɛ see-aa ɔ nyɛi̧a nɛ‘m.

⁹Wa gas'am sɔɔ géè, wen usamɔ kɔ-wa nɛ́ o geŋa ko bíí ɓɛɛ.› »

¹⁰Jesu saa o bíí pii katɛ wi, ɓɛɛ tɔ̧ ha̧ wa: «Ɛ̀nɛ̀ yéŋ zer'nɛ́, ɛ̀nɛ̀ zíí mgbara wen’ɛ nɛ̀ sa̧a̧-a̧.

¹¹Bó nɛ́ mɔ nɛ̀ ye kɔ̧̀ nú-wi a̧ ɗaŋ war-tɛ-bíí na, ɓɛɛ nɛ́ mɔ nɛ̀ gbo nɛ̀ kɔ̧̀ nú-wi.»

¹²Nɛ́ mɔ'ɔ nɛ̀ o ŋgaiwi kɔ̧-a̧ nɛɛ si katɛ a̧ ɓɛɛ tɔ̧ ha̧ a̧: «Ɛ́nɛ́ iŋ‘e o Fariziɛn sakala batɛ tɛ wen n’ɛ̀nɛ́ tɔ̧a̧'ɛ na nde?»

¹³Jesu kifa nú: «Gùn nyɔnɔ lɛŋ nɛ̀ Dáà kɔ‘m nɛ̀ a̧a̧ yiwese gún na, wi tɛ zuɗi pi̧ nù.

¹⁴Ɛ̀nɛ̀ é o wi nɔ‘i duk! Nɛ́ o wi-boma-yí a̧ usi yuwar ha̧ o ŋmaa! Kà wi-boma-yí usi yuwar ha̧ ŋma ɓii-aa, wa tɛ tik kɔ̧̀ yiitoo lɛŋ.»

¹⁵Pierre tɔ̧ɔ̧ ha̧ a̧: «Ɛ̀nɛ̀ kɛ̧́ mgbara lizaŋ‘i h’ɛ́ɛ́.»

¹⁶Ɓɛɛ Jesu kifi nú ha̧ wa: «Ɛ́nɛ́ mbɛt, ɛ́nɛ́ tɛ iŋ mgbara mɔ na hɔ kinii nde?

¹⁷Ɛ́nɛ́ iŋ‘e, mɔ nɛ̀ ye kɔ̧̀ nú-wi zir zir si kɔ̧́ zaŋ-wi, ɓɛɛ gboo a nù na nde?

¹⁸Ɓɛɛ mɔ nɛ̀ nú-wi tɔ̧ tɛ́ nɛ̀ kɔ̧́ see-wi; mɛ̀ nɛ́ mɔ‘i a̧ ɗaŋ war-tɛ-bíí;

¹⁹wen nɛ́ o ɗaŋ taamɔ nɛ̀ tɛ́ nɛ̀ kɔ̧́ see-wi a̧ de ha'i mɛ gbɛ zu, ha'i mɛ de dàlà, ha'i mɛ de mɔ de na, ha'i mɛ zu̧ mɔ, mɛ de sedaako-ndela in ee ɗɔra tɛ ŋmaa.

²⁰Nɛ́ o mɔɔ nɔ‘i a̧ ɗaŋ war-tɛ-bíí; ɓɛɛ ka'i nɛ́ taia er-wi nɛti sɛka'i nyɔŋa mɔ na, i̧i̧ hi̧i̧ ɗaŋ kɔ‘i war-tɛ-bíí na.»

²¹Jesu kura yak fara'i si nù Tir in Sidɔŋ,

²²ɓɛɛ ŋma okoo Kanaŋ, zɔŋa nù‘i hiɗi mɔ‘e: «Gasa Wan, Bem ko David, ɛ̀nɛ̀ dé ko ha̧‘m! Ɗaŋ-sɔ̧ nukuri nɛ́ boko-bem kɔ‘m nyɛmna.»

²³Ɓɛɛ Jesu tɔ̧ wen kpɔk sitɛ a̧ na. O ŋgaiwi ko Jesu nɛɛ si katɛ Jesu ɓɛɛ tɔ̧ ha̧ a̧: «Ɛ̀nɛ̀ fó a̧ yaknɛ wen a̧ hiɗi nɛ́ mɔ tɛnɛ ɗoŋ yɛ.»

²⁴Ɓɛɛ Jesu kifi nú: «Sɔ̧ toma'm tɛnɛ mɛ kpasi nɛ́ dukbíí Israɛl nɛ̀ duk hee o sami nɛ̀ yɔa ga ɓɛɛ.»

²⁵Nɛ́ mɔ'ɔ nɛ̀ kóò‘i tɛɛ gu nù ti Jesu, ɓɛɛ tɔ̧: «Gasa Wan, ɛ̀nɛ̀ gbák am!»

²⁶Ɓɛɛ Jesu kifi nú ha̧ a̧: «Bó nɛ́ ɔ dee mɛ ba nyɔŋmɔ ko o bem pi̧ nù ha̧ o be toyo na.»

²⁷Ɓɛɛ kóò‘i tɔ̧: «Nɛ́ mɔ‘i, Gasa Wan, ɓɛɛ o be toyo nyɔŋ kànà nɛ́ ɓúsú nyɔŋmɔ nɛ̀ a nù er wan kɔ‘i.»

²⁸Jesu kifa nú ha̧ a̧: «Kóò'ɛ, kɔ̧ɔ̧ɗɔɔwen kɔ-mɛ ɔ gasa. Mɔ nɛ̀ mɛ kɔ̧a̧‘i a̧ dé ha̧ mɛ.» Ɓɛɛ tɛ boko-bem kɔ̧-a̧ hai tɛ kpɔk kale ŋgimbi'i.

²⁹Jesu kura hi̧i̧ yak si ká̧ nú ŋgere tɔp Galilee. A̧ daŋa zu kaya ɓɛɛ duk nù.

³⁰O gba giiwi nɛ̀ɛ̀ tɛ a̧, ɓɛɛ wa kai o wi-kum, o wi-boma-yí, o kara-wi, o mukɛ̧ in o ŋma wi-zɛɛ nɛ̀ dɔka-a nɛnɛ ha̧ a̧. Wa aa wa ti naŋ-a ɓɛɛ a̧ kpasi wa lɛŋ.

³¹Ɗɛɗɛ o bíí gɔna nyɛmna wen wa zɔka o mukɛ̧ nɛ̀ tɔ̧ so wen na fara tɔ̧ wen, gba̧a̧-tɛ o kara-wi nyafa a yí ŋmaa ŋgai, o wi-kum nɛɛ nɔ̀ nɛ̀ de-a, in o wi-boma-yí zɔka mɔ mbɛt; ɓɛɛ wa zɔn Sɔ̧ ko Israɛl.

³²Nɛ́ mɔ'ɔ nɛ̀ Jesu saa o ŋgaiwi kɔ‘i, ɓɛɛ tɔ̧ ha̧ wa: «Ko de'm dee ha̧ o wi nɔ'ɔ nyɛmna wen kinii dee nɛ́ zɛ taar nɛ̀ wa ya nɛnɛ katɛ‘m, ŋma mɔɔ-nyɔŋ bo na. Mi kɔ̧ mɛ e ha̧ wa mɛ si nɛ̀ wɔ si fara kɔ-wa na, wen ká wa tɛɛ tik ŋgata nɛ̀ yuwar.»

³³Ɓɛɛ o ŋgaiwi kɔ̧-a̧ tɔ̧ ha̧ a̧: «Ɛɛ tɛ kpa bɔɔ nyɔŋmɔ nɛ̀ tɛ nyɛm gba giiwi hee mɔ'ɔ ga déè zaŋbɛɛ'ɛ ge?»

³⁴Ɓɛɛ Jesu ak mɔ: «Ɛ́nɛ́ a̧a̧ nɛ̀ brɛt géè?» Ɓɛɛ wa kifi nú: «Ɛɛ a̧a̧ nɛ̀ brɛt mɔɔrɔ-ɗoŋ-yiitoo in be zoro tikiɗi.»

³⁵Ɓɛɛ Jesu tɔ̧ ha̧ o giiwi mɛ ya nù.

³⁶Nɛ́ mɔ'ɔ n'aa kaia brɛt mɔɔrɔ-ɗoŋ-yiitoo in be zoro'i, de osoko ha̧ Sɔ̧, ɓɛɛ gbin brɛt ha̧ o ŋgaiwi kɔ̧-a̧, ɓɛɛ wa kɛ̧ nɛ̀ o giiwi.

³⁷O bíí lɛŋ nyɔŋa mɔ zaŋ sur, ɓɛɛ wa ndɛm oi nyɔŋmɔ dun gɛsɛ mɔɔrɔ-ɗoŋ-yiitoo.

³⁸O bíí nɛ̀ nyɔŋa mɔ nɛ́ wiwii booro-naar, wi tɔr okoo in obem na.

³⁹Nɛ́ mɔ'ɔ nɛ̀ Jesu ee ha̧ giiwi mɛ si ɗoŋ fara kɔ-wa, ɓɛɛ ye kɔ‘i kombon yak si nú Magadan mɛ.