Read Northwest Gbaya MATTHIEU 20 Bible Online

MATTHIEU 20 - Northwest Gbaya bible

MATTHIEU 20

¹«Ɛ̀nɛ̀ zii: Wan mɛ́ yiwese hɔɔ ŋmaa in ŋma bíí nɛ̀ a̧a̧ so nɛ̀ fɔ-nyak-dɔ̧ɔ̧ kɔ‘i. Nɛ́ mɔ'ɔ nɛ̀ wi’ɛi gboo mɛ tutuyɛ sut mɛ kii o bíí mɛ de tom kpɛɛfɔ‘i.

²A̧ ɗafa wen-tom in wa ha̧ wa mɛ ba nɛ́ kɔya sede kpɔk wese'i, ɓɛɛ a̧ tom wa si kpɛɛfɔ.

³Ɓɛɛ nɛ̀ wese daŋa ŋgai, wan-fɔ gboo si zan woyo, ɓɛɛ kpa o ŋma bíí nɛ̀ de tom na, nɛ ya bee-gara sɔɔ géè.

⁴Nɛ́ mɔ'ɔ n'aa tɔ̧ɔ̧ ha̧ wa: ‹Ɛ́nɛ́ mbɛt, ɛ̀nɛ̀ nɛ́ɛ̀ dé tom kpɛɛfɔ kɔ‘m, ɓɛɛ ɛnɛ tɛ kpa sede k’ɛ́nɛ́ nyɛm sɛnɛ.›

⁵Ɓɛɛ o wi nɔ‘i yak si kpɛɛfɔ. Kà wese tɛ hɔ bɛɗɛ-zu, ɓɛɛ wan-fɔ gbo; wese gira ɓɛɛ a̧ gbo woyo de kànà nɛ́ kale mɔ.

⁶Mɔ ga̧a̧ kaɗi, nɛ́ mɔ'ɔ n'aa gboo woyo, ɓɛɛ a̧ kpa o ŋma bíí nɛ̀ ya géè, ɓɛɛ a̧ ak wa: ‹Wen ge s’ɛnɛ ya hɛ̧ɛ̧ mɛ tutuyɛ hegɔɔ mɔ ga̧ nɛnɛ, ɛnɛ de tom na sɔɔ géè'ɛ ge?›

⁷Wa kifa nú: ‹Wen ŋma bíí sa ɛɛ tɛ tom na gɔ.› Sa a̧ tɔ̧ ha̧ wa: ‹Ɛ́nɛ́ mbɛt, ɛ̀nɛ̀ nɛ́ kpɛɛfɔ kɔ‘m.›

⁸«Zɛ a̧ de tɛnɛ‘i, ɓɛɛ a̧ sa wi-duk-zu-tom ɓɛɛ tɔ̧ ha̧ a̧: ‹Mɛ̀ mɔí̧ o wi-de-tom, mɛ̀ yóɓí wa, mɛ̀ kú̧náŋ nɛ̀ o wi nɛ̀ hɔɔ nɛ̀ ɗoŋ hɔ nɛnɛ tɛ o kuti-wi.›

⁹O wi nɛ̀ hɔɔ tɛ sɔŋkur ŋgimbi tɛ̀ɛ̀ ɓɛɛ ba kɔya sede kpɔk kpɔk dam wa lɛŋ.

¹⁰Nɛ́ mɔ'ɔ nɛ̀ o wi nɛ̀ ku̧u̧ naŋ tom mɛ tutuyɛ mɛ hɔa, wa ta kɔ-wa'e wi tɛ ba sede gan kɔya sede kpɔk wó, ɓɛɛ bo hegɔ na; kànà nɛ́ kɔya sede kpɔk a̧ wa baa dam wa lɛŋ mbɛt.

¹¹Baa sede nɛ̀ wa baa hegɔ, ɓɛɛ wa ku̧i̧ mɔ zu wan-fɔ, tɔ̧ nɛnɛ‘e:

¹²‹Ɛɛ dee tom tɛ gba ŋga wese mɛ tutuyɛ hegɔɔ wese ye nɛnɛ. Ɓɛɛ o wi nɔ'ɔ nɛ̀ hɔɔ nɛ̀ ɗoŋ'ɛ de kɔ‘i tom ɗoŋ-aa nyɛi̧ na, ɓɛɛ wa baa bɔɔ sede nyɛm ŋmaa in yɛ'ɛ hee ge?›

¹³Ɓɛɛ wan-fɔ kifi nú ha̧ kpɔk mgbara wa: ‹Sɛm kɔ‘m, mi de kɔ‘m ɗaŋmɔ in mɛɛ na. Bó nɛ́ ɛɛ ee so nú in ŋmaa wen kɔya sede kpɔk na nde?

¹⁴Mɛ̀ bá mɔ kɔ-mɛ mɛ̀ yàk. Nɛ́ mi a̧ kɔ̧ɔ̧ mɛ ha̧ mɔ ha̧ wi nɛ̀ tɛa nɛ̀ ɗoŋ'ɛ nyɛm ŋmaa in kɔ-mɛ.

¹⁵Bó nɛ́ mi nyɛma mɛ de mɔ nɛ̀ mbɔi kɔ‘m hee mi kɔ̧ɔ̧ ga na? Nɛ́ demɔ n'am dea'i a̧ ɗaŋ see-mɛ nde?›

¹⁶Hegɔ o wi mɛ ti, tɛ ya nɛ̀ ɗoŋ; ɓɛɛ o wi mɛ ɗoŋ, tɛ ya nɛ̀ ti.»

¹⁷Ŋgimbi daŋa-a si Jerusalɛm, Jesu saa o ŋgaiwi kɔ‘i ɓu-zua-yiitoo pii tɛ-wi, ɓɛɛ tɔ̧ ha̧ wa nɛ̀ yuwar:

¹⁸«Kinii, ɛɛ a̧ daŋ si Jerusalɛm’ɛ. Nɛ́ hi̧i̧ a̧ wa tɛ de nɛnɛ ha̧ Bem ko bíí mɛ ye er o gasa wan-ɗafi-sɔ̧ in o wi-usi-heembea, wa tɛ gɔn kita-fio zu a̧;

¹⁹wa tɛ e a̧ er o wi nɛ̀ iŋ kpasa Sɔ̧ na ha̧ wa mɛ zɛkɛɗ‘a, gusi nɛ̀ a̧, ɓɛɛ wa tɛ mgboi a̧ zu te-diŋa. Ɗoŋ zɛ yiitoo, taar-a, ɓɛɛ a̧ kpasa.»

²⁰Nɛ́ mɔ'ɔ nɛ̀ nàà ko Jak in Jean kaia wa a ká̧ tɛ, nɛ́ tɛ̀ Jesu, ɓɛɛ gbɛ zugur nù ti a̧ mɛ kɔf'a.

²¹Ɓɛɛ Jesu ak a̧: «Mɛ kɔ̧ɔ̧ nɛ́ ge?» A̧ tɔ̧a̧: «Ɛ̀nɛ̀ há̧ nú‘nɛ́‘e o bem kɔ‘m nɔ'ɔ tɛ ya nù ká̧ tɛ‘nɛ́ tɛ Wan k’ɛ́nɛ́, ɛ̧ɛ̧ kpɔk’ɛ nɛ̀ war wii-er'nɛ́, ɓii-aa nɛ̀ war gale.»

²²Jesu kifa nú: «Ɛ́nɛ́ iŋ mgbara mɔ n’ɛnɛ ak na. Ɛ́nɛ́ nyɛma mɛ nɔ be tasi n'am tɛ nɔ‘i nde?» Wa kifa nú: «Ɛɛ nyɛma mɛ nɔ.»

²³Ɓɛɛ Jesu tɔ̧ ha̧ wa: «Be tasi kɔ‘m, ɛnɛ tɛ nɔ; nɛ̀ ko duka-a nɛ̀ war wii-er-am in nɛ̀ war er-am mɛ gale, bó nɛ́ mi'i tɛ e bíí sɛnɛ na: fara nɔ‘i tɛ duk nɛ́ wen o bíí nɛ̀ Dáà kɔ‘m ɗafa so e wen wa nɛti kaɗi.»

²⁴O oi ŋgaiwi ɓu nɛ̀ zia wen'i kpaa ɗaŋsee zu o nya nɔ‘i yiitoo'i.

²⁵Jesu saa wa, ɓɛɛ tɔ̧ ha̧ wa: «Ɛ́nɛ́ iŋa'e, o wannu ɔ wan zu o bíí kɔ‘i, ɓɛɛ o gasawi duk zu o bíí kɔ‘i mbɛt;

²⁶nɛ̀ k’ɛ́nɛ́, mɔ beka de mgbara'nɛ́ hegɔ na, wen wi nɛ̀ kɔ̧ɔ̧ mɛ duk nɛ́ gasawi mgbara'nɛ́, a̧ a̧ dúk nɛ́ wi-de-tom k’ɛ́nɛ́;

²⁷ɓɛɛ wi nɛ̀ kɔ̧ɔ̧ mɛ duk nɛ́ kuti-wi mgbara'nɛ́, a̧ a̧ dúk nɛ́ bara k’ɛ́nɛ́.

²⁸Nɛ́ hegɔ a̧ Bem ko bíí tɛ̀ɛ́ nɛnɛ; bó nɛ́ ha̧ bíí mɛ de tom ha̧ a̧ na, ɓɛɛ ha̧ a̧ mɛ de tom ha̧ bíí, in ha̧ a̧ mɛ ha̧ tɛ-a gɔn nɛ̀ zu o dɔka bíí.»

²⁹Hee mɔ'ɔ nɛ̀ Jesu gboo Jeriko in o ŋgaiwi kɔ‘i ga, gba giiwi ndaka ɗoŋ-aa.

³⁰O ŋma wi-boma-yí yiitoo yaa so nù ká̧ war; ŋgimbi nɛ̀ wa zia'e Jesu a̧ ɓir yak'i wó, wa hiɗa mɔ tɔ̧ nɛnɛ‘e: «Gasa Wan, Bem ko David, ɛ̀nɛ̀ dé ko h’ɛ́ɛ́!»

³¹Ɓɛɛ giiwi gai wa'e, wa a̧ kpé nú-wa; ɓɛɛ wa hiɗi mɔ nɛ̀ ŋgaya-a gan kuti-a'e: «Gasa Wan, Bem ko David! Ɛ̀nɛ̀ dé ko h’ɛ́ɛ́ wa!»

³²Ɓɛɛ Jesu yor, sa wa, ɓɛɛ ak wa: «Nɛ́ ge ɛnɛ kɔ̧ɔ̧ ha̧‘m mɛ de h’ɛ́nɛ́ ge?»

³³Ɓɛɛ wa kifi nú: «Gasa Wan, ɛ́ɛ́ kɔ̧ɔ̧ h’ɛ́nɛ́ mɛ hu̧i̧ yí-ɛɛ!»

³⁴Ko dee Jesu, ɓɛɛ a̧ e er zu yí-wa; tɛ wen'i nú-wi'i, yí-wa hu̧i̧a̧, ɓɛɛ wa nɛ́ ɗoŋ-aa.