Read Northwest Gbaya MATTHIEU 22 Bible Online

MATTHIEU 22 - Northwest Gbaya bible

MATTHIEU 22

¹Jesu tɔ̧ɔ̧ wen ha̧ o bíí nɛ̀ lizaŋ woyo.

²«Wan mɛ yiwese hɔɔ ŋmaa in ŋma wannu nɛ̀ dee gbaŋa-báá-kóò ko bem kɔ‘i.

³A̧ toma o wi-de-tom kɔ̧-a̧ nɛnɛ mɛ sa o bíí nɛ̀ wa saa so wen gbaŋa'i, ɓɛɛ o wi nɔ‘i kɔ̧ tɛa-a na.

⁴Ɓɛɛ a̧ tom o ŋma wi-de-tom woyo mɛ tɔ̧ ha̧ o wi n'aa saa so'e ndé, wi ɗafa mɔ kaɗi, wi gɔna o wiwii-ndai in o de ŋmaŋa saɗi kɔ‘i, wi ɗafa mɔ lɛŋ kaɗi; wa a̧ tɛ́ɛ̀ dé gbaŋa wo.

⁵Ɓɛɛ wen kɔ-wa bó nɛ̀ sara ko wannu na; ŋma yaka si kpɛɛfɔ kɔ‘i, ŋma yak mɛ ɗɔr mɔ kɔ‘i;

⁶ɓɛɛ o ŋma tik zu o wi-de-tom nɔ‘i, usi bɔnɛ ha̧ wa, ɓɛɛ gbɛ wa yinɛ.

⁷See wannu nyima nyɛmna, ɓɛɛ a̧ tom o wi-biro kɔ̧-a̧ mɛ nɛ̀ɛ́ gbɛ o wi-gbɛ-zu nɔ‘i, dɔ ye kɔ-wa a nù gbuɗuk.

⁸Ɓɛɛ wannu tɔ̧ ha̧ o wi-de-tom kɔ‘i: ‹Mi ɗafa mɔ wen gbaŋa kaɗi. O wi nɔ'ɔ n'am saa so’ɛ nyɛm so wen dee gbaŋa'i na.

⁹Ɛ̀nɛ̀ nɛ́ɛ̀ yá sasa-war. O bíí lɛŋ n’ɛnɛ tɛ kpa, ɛ̀nɛ̀ sá wa tɛnɛ mɛ de gbaŋa-báá-kóò in yɛɛ.›

¹⁰Nɛ́ mɔ'ɔ nɛ̀ o wi-de-tom nɔ‘i baa war nɛnɛ, ɓɛɛ sa o bíí nɛ̀ wa kpaa lɛŋ, o wi-de-demɔ gú nɛ̀ o wi-ɗaŋ; hegɔ tua-gbaŋa duna nɛ̀ o bíí.

¹¹«Nɛ́ mɔ'ɔ nɛ̀ wannu yee tua mɛ zɔk o bíí, ɓɛɛ zɔk ŋma bíí mgbara wa nɛ̀ pi̧ kɔ‘i laa gbaŋa na.

¹²Wannu aka a̧: ‹Sɛm kɔ‘m, dee bɔɔ hee ge sa mɛ yèé hɛ̧ɛ̧, mɛ pi̧ laa gbaŋa na’ɛ ge?› Ɓɛɛ wi’ɛi kpa ŋma wen mɛ tɔ̧ na.

¹³Ɓɛɛ wannu tɔ̧ ha̧ o wi-de-tom kɔ‘i: ‹Ɛ̀nɛ̀ hɛ́r naŋ-a in er-a, ɛ̀nɛ̀ síŋ a̧ pi̧ zan ti tum, fara'i nɛ́ fara-hi̧i̧-kɔ̧a̧ in fara-gɔfi-mɔ.›

¹⁴Wen Sɔ̧ saa bíí nɛ̀ dɔka-a, ɓɛɛ bíí n'aa hoka dɔk na.»

¹⁵Nɛ́ mɔ'ɔ nɛ̀ o Fariziɛn baa keta in o ŋmaa mɛ nɛ̀ɛ́ ba wen zaŋ Jesu.

¹⁶Wa toma o ŋgaiwi kɔ-wa in o ŋma bíí ko Herod sitɛ a̧ mɛ tɔ̧ ha̧ a̧: «Wan-usi-mɔ, ɛɛ iŋa ɛ́nɛ́ de ndela na, ɛ́nɛ́ usi nɛ yuwar ko Sɔ̧ ha̧ o bíí nyɛm nɛ̀ ɗoŋ kpasawen, ɓɛɛ ɛnɛ yu kíí bíí na wen ɛnɛ kɛ̧ mgbara bíí na.

¹⁷Ɛ̀nɛ̀ tɔ̧́ taamɔ k’ɛ́nɛ́ tɛ wen’ɛ h’ɛ́ɛ́ zii: heembea k’ɛɛ ee h’ɛ́ɛ́ mɛ gbo garama ha̧ Sezar náà, kóó weyaa nde?»

¹⁸Soɓee, Jesu iŋa ɗaŋ taamɔ kɔ-wa kaɗi, ɓɛɛ ak wa: «Ɛ́nɛ́ o wi nɛ̀ a̧a̧ nɛ̀ see-yiitoo, wen ge s’ɛnɛ tui pɛ́r ha̧‘m ge?

¹⁹Ɛ̀nɛ̀ úsí sede n’ɛnɛ gbo nɛ̀ garama'i ha̧‘m zɔk.» Ɓɛɛ wa ha̧ ŋma kɔya sede ha̧ a̧.

²⁰Nɛ́ mɔ'ɔ n'aa aka wa: «Zu bíí in yɔramɔ nɛ̀ duk tɛ sede’ɛ nɛ́ ko o?»

²¹Ɓɛɛ wa kifi nú: «Nɛ́ ko Sezar.» Ɓɛɛ Jesu tɔ̧ ha̧ wa: «Ɛ̀nɛ̀ há̧ mɔ ko Sezar ha̧ Sezar, ɓɛɛ ɛ̀nɛ̀ há̧ mɔ ko Sɔ̧ ha̧ Sɔ̧.»

²²Ɗɛɗɛ wa gɔna tɛ wen'i, ɓɛɛ wa pɛsi e a̧ duk.

²³Kpɔk wese'i, o ŋma Saduseɛn nɛ̀ tɔ̧ kɔ‘i'e o bíí nɛ̀ fea beka kur ŋgɔn na, nɛ̀ɛ́ tɛ Jesu ɓɛɛ tɔ̧ ha̧ a̧:

²⁴«Wan-usi-mɔ, Moisɛ tɔ̧ɔ̧ so'e, ‹Kà ŋma bíí nɛ́ fea, bem bo na, nya-a̧ tɛ ba kó-oi-aa mɛ ko nɛ̀ bem nɛ̀ tɛ ba nin wan-fio e ŋgɔn.›

²⁵O ŋma nya-wi yaa so ye k’ɛɛ mɔɔrɔ-ɗoŋ-yiitoo. Nɛ́ mɔ'ɔ nɛ̀ kaya-wi baa kóò, ko bem na, ɓɛɛ fe, e kóò ha̧ yiitoo-aa.

²⁶Yiitoo-aa baa kóò‘i, ko bem na, ɓɛɛ fe mbɛt, taar-a mbɛt, nɛ́ kpɔk mɔ hegɔɔ hɔ nɛnɛ tɛ mɔɔrɔ-ɗoŋ-yiitoo bíí.

²⁷Ɗoŋ wa lɛŋ, kóò‘i fee mbɛt.

²⁸Wese kura-ŋgɔn ko o bíí nɛ̀ fea, kóò‘i tɛ duk nɛ́ kóò ko o mgbara wa mɔɔrɔ-ɗoŋ-yiitoo'i o? Wen wa lɛŋ baa so a̧ nɛ̀ kóò.»

²⁹Jesu kifa nú: «Ɛ́nɛ́ yɔɔ kaya, wen ɛ́nɛ́ iŋ Yɔramɔ in ŋgayamɔ ko Sɔ̧ na.

³⁰Ɗoŋ kura-ŋgɔn ko o bíí nɛ̀ fea, wiwii beka ba kóò na in okoo beka ba wíì na mbɛt. O bíí tɛ ya hee o betom mɛ yiwese ga.

³¹Ɓɛɛ nɛ̀ ko kura-ŋgɔn ko o bíí nɛ̀ fea, ɛnɛ tɛ tɔr mɔ nɛ̀ Sɔ̧ tɔ̧ɔ̧ h’ɛ́nɛ́ na nde?

³²A̧ tɔ̧a̧: ‹Mi nɛ́ Sɔ̧ ko Abraham, Sɔ̧ ko Izak, in Sɔ̧ ko Jakob:› A̧ bo nɛ́ Sɔ̧ ko o fio na; a̧ nɛ́ Sɔ̧ ko o bíí nɛ̀ duk kpasa.»

³³Ɗɛɗɛ o dɔka bíí nɛ̀ zia wen'i gɔna tɛ usamɔ kɔ̧-a̧.

³⁴O Fariziɛn mɔi̧a ŋmaa nɛ́ tɛ̀ Jesu wen wa zia'e, Jesu kifa nú nɛ̀ de-a, ɓɛɛ o Saduseɛn kpa mbe wen mɛ tɔ̧ na;

³⁵nɛ́ mɔ'ɔ nɛ̀ ŋma kpɔk mgbara wa nɛ̀ duka nɛ́ wi-usi-heembea kia mɛ ba wen zaŋ Jesu, ɓɛɛ ak a̧:

³⁶«Wan-usi-mɔ, heembea nɛ̀ gana o ŋma heembea lɛŋ nɛ́ ge-aa ge?»

³⁷Ɓɛɛ Jesu kifi nú: «Mɛ̀ kɔ̧́ Gasa Wan Sɔ̧ kɔ-mɛ nɛ̀ see-mɛ lɛŋ, nɛ̀ sɔ̧-tɛ-mɛ lɛŋ, in nɛ̀ taamɔ kɔ-mɛ lɛŋ.

³⁸Kuti heembea nɛ̀ gana o oi-aa lɛŋ nɛ́ mɔ‘i.

³⁹Ɓɛɛ yiitoo-aa nɛ̀ hɔɔ ŋmaa in a̧ nɛ́ mɔ'ɔ: Mɛ̀ kɔ̧́ ŋmà-mɛ hee kiitɛ-mɛ ga.

⁴⁰Heembea nɔ‘i yiitoo'i nɛ́ gùn heembea in gùn wen nɛ̀ o wi-tɔ̧-wen oi nú Sɔ̧ tɔ̧ɔ̧ so lɛŋ.»

⁴¹Hee mɔ'ɔ nɛ̀ o Fariziɛn mɔi̧a ŋmaa ga, Jesu aka wa:

⁴²«Tɛ́ mɔ ko Mɛsii, ɛ́nɛ́ ta bɔɔ k’ɛ́nɛ́ hee ge? A̧ nɛ́ bezaŋ o?» Wa kifa nú ha̧ a̧: «A̧ nɛ́ bezaŋ David.»

⁴³Ɓɛɛ Jesu ak wa: «Dee bɔɔ hee ge sa Sa̧a̧ Ɔmi usa ha̧ David mɛ sa a̧‘e ndé Gasa Wan tɛ́ wen’ɛ ge:

⁴⁴‹Gasa Wan tɔ̧ɔ̧ ha̧ Gasa Wan kɔ‘m: Mɛ̀ dúk nɛ̀ war wii-er-am, hɔ ŋgimbi n'am tɛ de ha̧ mɛ mɛ kpa ŋgai zu o wisɛn kɔ-mɛ.›

⁴⁵Kà bo'e, a̧ nɛ́ bezaŋ David, ɓɛɛ David tɛ sa bɔɔ a̧‘e ‹Gasa Wan› kɔ‘i hee ge?»

⁴⁶Kóó bíí kpɔk mgbara wa nyɛm so mɛ kifi nú ha̧ a̧ na. Ɓɛɛ ɗoŋ wese'i ŋma bíí nɔ ŋgiɗi mɛ ak a̧ ɓɔna.