Read Northwest Gbaya MATTHIEU 24 Bible Online

MATTHIEU 24 - Northwest Gbaya bible

MATTHIEU 24

¹Jesu gboo nɛ̀ kɔ̧́ Tua ko Sɔ̧ ɓɛɛ yak. Nɛ́ mɔ'ɔ nɛ̀ o ŋgaiwi kɔ̧-a̧ nɛ̀ɛ̀ si katɛ a̧, yeŋ nɛ̀ Tua ko Sɔ̧, ŋmaŋ nɛ̀ wen-aa ha̧ a̧;

²ɓɛɛ Jesu tɔ̧ ha̧ wa: «Ɛ́nɛ́ zɔka tua nɔ'ɔ lɛŋ nde? Nɛ́ kpasawen a̧‘m tɔ̧ h’ɛ́nɛ́, ŋma ta beka ɓɔn zu ŋmaa hɛ̧ɛ̧ na; o bíí tɛ gbin a nù lɛŋ.»

³Nɛ́ mɔ'ɔ nɛ̀ Jesu nɛ̀ɛ̀ duk nù zu Kaya Te-nɔ̧́, ɓɛɛ o ŋgaiwi kɔ̧-a̧ nɛ́ tɛ́ a̧ ɛ̀nɛ́-wa mɛ ak a̧‘e: «Mɔ‘i lɛŋ tɛ de mɛ gese ge? Mɔ nɛ̀ tɛ usi pia ɗoŋ k’ɛ́nɛ́ in kaɗa nù nɛ́ ge?»

⁴Ɓɛɛ Jesu kifi nú ha̧ wa: «Ɛ̀nɛ̀ zɔ́k tɛ‘nɛ́ ká ŋma bíí tɛɛ ɔr'nɛ́.

⁵Wen o bíí nɛ̀ dɔka-a tɛ́ tɛ̀ nɛ̀ nin-am. Wa tɛ́ tɔ̧‘e wi nɛ́ Mɛsii, ɓɛɛ wa tɛ ɔr bíí nɛ̀ dɔka-a.

⁶Ɛ́nɛ́ tɛ zii nyɛrɛ biro in gítí mɔɔ-biro mbɛt, ɓɛɛ k’ɛ́nɛ́ de kíì na, wen mɔɔ nɔ‘i tɛ hɔ kànà nɛ̀ mbetɛ, ɓɛɛ sɔŋkur mɔ bo a̧‘i na.

⁷Zuduk bíí tɛ kur in o ŋmaa nɛ̀ biro; o wan tɛ kur in o ŋmaa mbɛt; kaɓa tɛ tik nù fara nɛtɛ nɛtɛ, ɓɛɛ nù tɛ nak mbɛt.

⁸Mɔɔ nɔ‘i lɛŋ hɔɔ ŋmaa in ku̧u̧naŋ nyima-zaŋ-ko-bem.

⁹«Bíí tɛ usi bɔnɛ h’ɛ́nɛ́, wa tɛ gbɛ‘nɛ́, ɓɛɛ dukbíí lɛŋ tɛ sɛn'nɛ́ wen zu'm.

¹⁰O bíí nɛ̀ dɔka-a tɛ e yuwar ko Sɔ̧ duk, wa tɛ e ɗɔra tɛ ŋmaa, ɓɛɛ wa tɛ sɛn ŋmaa in o ŋmaa.

¹¹O gii wi-tɔ̧-wen oi nú Sɔ̧ ndela tɛ hɔ ɓɛɛ dea ha̧ o bíí mɛ yɔ nɛ̀ dɔka-a.

¹²Ɗaŋmɔ tɛ dɔk, o bíí beka kɔ̧ ŋmaa hee kuti-a ga ɓɔna.

¹³Ɓɛɛ wi nɛ̀ tɛ nɔ ŋgiɗi hɔ sɔŋkur-aa tɛ kpasi.

¹⁴Wa tɛ tɔ̧ wen Wan mɛ yiwese dam zaŋnu nɛ̀ mɔɔ-sedaako ha̧ o gɔni-dùk lɛŋ sɛka sɔŋkur mɔ hɔa.»

¹⁵«Ɛ́nɛ́ tɛ zɔk Ndiŋ Wi-ɗaŋ-mɔ nɛ̀ Daniɛl wi-tɔ̧-wen oi nú Sɔ̧, baa tɔ̧ so nɛnɛ, fara duka-a tɛ Sa̧a̧ Fara ko Sɔ̧ mɛ. (Wi-tɔr-wen’ɛ a̧ zíí gba̧a̧-a̧ ŋgaɓo!)

¹⁶Ŋgimbi'i, o bíí nɛ̀ ya Judee a̧ yú kɔ‘i mɔ si zu kaya mɛ;

¹⁷wi nɛ̀ duk zu tua a̧ ká zir si kɔ̧́ tua mɛ kai mɔ kɔ‘i na.

¹⁸Wi nɛ̀ duk kpɛɛfɔ a̧ ká si ɗoŋ saaye mɛ ba gasa laa kɔ‘i na mbɛt.

¹⁹Wese'i o nàá-zaŋ in nàá-wan-bem tɛ zɔk bɔnɛ batɛ.

²⁰Ɛ̀nɛ̀ áí nú ha̧ Sɔ̧ wen ká wese-yu-mɔ k’ɛ́nɛ́ tɛɛ hɔ tɛ ŋgimbi ɓar, kóó tɛ wese-ɔm-tɛ,

²¹wen wese'i gasa bɔnɛ nyɛmna tɛ hɔ. Nɛ̀ Sɔ̧ dèé nɛ̀ nù hɔ sɔsɔɔ, bíí tɛ zɔk pɛrti bɔnɛ‘i hɔ̧ɔ̧ na, ɓɛɛ pɛrti bɔnɛ‘i beka hɔ woyo na ɓɔnsɛnɛ.

²²Kà Sɔ̧ kɛ̧́ so ŋma nú zɛ-bɔnɛ‘i yinɛ na, bó nɛ́ bíí tɛ̀ɛ́ kpasi kpasi na; nɛ́ mɔ‘i a̧ Sɔ̧ tɛ kɛ̧ nɛ̀ ŋma nú zɛ bɔnɛ‘i yinɛ, wen zu o bíí n'aa hoka.

²³«Kà bíí tɔ̧ h’ɛ́nɛ́‘e: ‹Mɛsii a̧a̧ hɛ̧ɛ̧,› kóó: ‹A̧ a̧a̧ mɛ‘i,› wó, ɓɛɛ k’ɛ́nɛ́ kpɛk na.

²⁴O wi-ɔr-wi tɛ tɔ̧‘e ndé, wi nɛ́ Mɛsii, ɓɛɛ o ŋma tɛ tɔ̧ ndé, wi nɛ́ wi-tɔ̧-wen oi nú Sɔ̧. Wa tɛ de o ŋga mɔɔ-kifi in o mɔɔ-gɔn-ɗɛɗɛ-wi, ɓɛɛ kà bo so ha̧ wa mɛ kpa be yuwar tikiɗi wó, wa tɛ̀ɛ́ ɔr o bíí nɛ̀ Sɔ̧ hoka mbɛt.

²⁵Hegɔ, mi mbaŋa tɛ‘nɛ́ kaɗi.

²⁶«Kà wa tɔ̧ h’ɛ́nɛ́‘e: ‹Mɛsii a̧a̧ ŋga-gbárà mɛ‘i,› wó, ɓɛɛ k’ɛ́nɛ́ nɛ́ na; kóó: ‹A̧ hu̧sa̧ si mɛ‘i,› wó, ɓɛɛ k’ɛ́nɛ́ kpɛk na,

²⁷wen pia-ɗoŋ ko Bem ko bíí tɛ duk hee pi̧i̧-kórò nɛ̀ pi̧ nɛ̀ daŋa-wese si yee-wese’ɛ ga.

²⁸Fara nɛ̀ wɔr-mɔ a̧a̧ sɛnɛ a̧ o tama mɔi̧ sɛnɛ.

²⁹«Kaɗa-a nɛ̀ o bɔnɛ nɔ‘i tɛ kaɗi hegɔ, ɓɛɛ wese tɛ ba tum, nyaŋa-zɛ beka tok ɓɔna, sɔra tɛ ai a nù, ɓɛɛ o ŋgayamɔ mɛ yiwese tɛ nak.

³⁰Mɔɔ-usi-mɔ ko Bem ko bíí tɛ usi tɛ yiwese mɛ. O dukbíí zaŋnu lɛŋ tɛ mbɛr yí-see, ɓɛɛ wa tɛ zɔk Bem ko bíí fara tɛa-a tɛ bu-zan yiwese mɛ nɛ̀ ŋgayamɔ in gasamɔ.

³¹A̧ tɛ tom o betom kɔ̧-a̧ mɛ yiwese nɛ̀ gasa mbia mɛ mɔi̧ o bíí n'aa hoka dam mgbii-zan, nɛ̀ zu-zan hɔ ndaa-zan mɛ.»

³²«Ɛ̀nɛ̀ zíí lizaŋ ko te-mbɔra. Kà te-mbɔra ku̧ naŋ ɓɔa-a, ɓɛɛ ɛnɛ iŋa nú-kórò hɛɗa haɗi.

³³Kale-a hegɔ mbɛt, k’ɛ̀nɛ̀ nɛ́ zɔka o mɔɔ nɔ‘i lɛŋ hɔɔ kaɗi, ɓɛɛ ɛ̀nɛ̀ íŋ‘e Bem ko bíí hɔɔ nú tua kaɗi.

³⁴Nɛ́ kpasawen a̧‘m tɔ̧ h’ɛ́nɛ́; o bíí tɛ ŋgimbi’ɛ beka fe lɛŋ na ɓɛɛ mɔɔ nɔ‘i hɔa.

³⁵Yiwese in nù tɛ kaɗi, ɓɛɛ wen kɔ‘m beka kaɗi na ɓɔnsɛnɛ.»

³⁶«Bíí nɛ̀ iŋa wese nɛ̀ mɔ‘i tɛ hɔ nɛnɛ bo na; o betom mɛ yiwese iŋ na, Bem iŋ na mbɛt, kànà nɛ́ Dáà a̧ iŋa kpɔk ɓɛɛ.

³⁷Mɔ nɛ̀ dee so ŋgimbi ko Nɔe tɛ de ŋgimbi pia-ɗoŋ ko Bem ko bíí mbɛt.

³⁸Nɛti ha̧ ha̧a̧-yì mɛ hɔ, o bíí yaa so nyɔŋ nɛ̀ mɔ, nɔ nɛ̀ mɔ, ba nɛ̀ kóò, mgbɔ nɛ̀ o bem kɔ-wa ha̧ wíì, hɔ nɛnɛ wese nɛ̀ Nɔe yee nɛ̀ kombon.

³⁹Wa ta mɔ na hɔ wese nɛ̀ ha̧a̧-yì hɔɔ di̧ wa yak nɛnɛ diyoŋ. Mɔ tɛ de kànà hegɔ wese pia-ɗoŋ ko Bem ko bíí mbɛt.

⁴⁰O bíí yiitoo tɛ ya kpɛɛfɔ in ŋmaa; Sɔ̧ tɛ ba kpɔk, ɓɛɛ ee ɓii-aa duk.

⁴¹O okoo tɛ ya yiitoo hɔ̧n nɛ̀ fuu; Sɔ̧ tɛ ba kpɔk, ɓɛɛ ee ɓii-aa duk.

⁴²Wen hegɔ, ɛ̀nɛ̀ pɛ́m mɔ, wen ɛ́nɛ́ iŋ wese nɛ̀ Gasa Wan k’ɛ́nɛ́ tɛ pii nɛ̀ ɗoŋ na.

⁴³Wen ɛ́nɛ́ iŋa, kà wan-tua iŋ so ŋgimbi nɛ̀ wi-zuzu tɛ̀ɛ́ tɛ nɛnɛ mɛ zɛ, a̧ tɛ̀ɛ́ pɛm so mɔ, ɓɛɛ bó nɛ́ a̧ tɛ̀ɛ́ e so ha̧ wi-zuzu mɛ kom ŋgeŋ tua kɔ̧-a̧ na.

⁴⁴Hegɔ, ɛ́nɛ́ mbɛt, ɛ̀nɛ̀ pɛ́m mɔ, wen Bem ko bíí tɛ pii ɗoŋ tɛ́ ŋma ŋgimbi n’ɛnɛ ta na.»

⁴⁵«Ɛ́nɛ́ ta k’ɛ́nɛ́‘e, wi-de-tom nɛ̀ ɔ haya nɛ̀ a̧a̧ nɛ̀ mboozu nɛ́ ge bíí ge? Mɛ̀ nɛ́ wi nɛ̀ wan-tua ee zu o bíí kɔ̧ tua kɔ‘i mɛ kɛ̧ nyɔŋmɔ ha̧ wa tɛ ŋgimbi lɛŋ.

⁴⁶Kà wan kɔ̧-a̧ pii ɗoŋ kpa a̧ fara dee tom, wi-de-tom'i tɛ duk nɛ̀ desee.

⁴⁷Nɛ́ kpasawen a̧‘m tɔ̧ h’ɛ́nɛ́: wan-tua tɛ e wi’ɛi zu mbɔi kɔ‘i lɛŋ.

⁴⁸Ɓɛɛ kà wi’ɛi nɛ́ bòò nɛ́ ɗaŋ wi-de-tom, kà a̧ ta'e wan-tua beka pii ɗoŋ kinii na wó,

⁴⁹ɓɛɛ kà a̧ ku̧ naŋ mbɛra o gbama wi-de-tom kɔ̧-a̧, kà̧ a̧ ku̧ naŋ nyɔŋa mɔ, nɔ nɛ̀ mɔ, gbɛ nɛ̀ dɔ̧ɔ̧,

⁵⁰wan-tua tɛ pii ɗoŋ tɛ́ ŋma wese n'aa beka ta na in ŋgimbi n'aa beka iŋ na,

⁵¹ɓɛɛ wan-tua tɛ ndak a̧ yinɛ ha̧ a̧ mɛ zɔk bɔnɛ in o wi nɛ̀ a̧a̧ nɛ̀ see yiitoo. Fara'i nɛ́ fara-hi̧i̧-kɔ̧a̧ in fara-gɔfi-mɔ.»