Read Northwest Gbaya MATTHIEU 26 Bible Online

MATTHIEU 26 - Northwest Gbaya bible

MATTHIEU 26

¹Jesu usa mɔ‘i lɛŋ ha̧ o bíí kaɗi, ɓɛɛ a̧ tɔ̧ ha̧ o ŋgaiwi kɔ̧-a̧: «Ɛ́nɛ́ iŋa oi-aa ɓɔna nɛ́ zɛ yiitoo ɓɛɛ gbaŋa Paska dea.

²Ŋgimbi'i wa tɛ ha̧ Bem ko bíí wen ha̧ wa mɛ mgboi a̧ zu te-diŋa.»

³Nɛ́ mɔ'ɔ nɛ̀ o gasa wan-ɗafi-sɔ̧ in o gasawi ko o Juif mɔi̧a kpa ŋmaa kɔ̧́ tua ko gasa wan-ɗafi-sɔ̧ Kaif.

⁴Wa ee nú de nɛ̀ gɔn-ta mɛ ba Jesu mɛ gbɛ a̧ yinɛ,

⁵ɓɛɛ wa tɔ̧: «K’ɛ́ɛ́ ba a̧ wese gbaŋa na, wen ká foomɔ tɛɛ de mgbara bíí.»

⁶Jesu duka kɔ̧́ tua ko Simɔŋ, ŋma wi-doko sɛn Betanii;

⁷ɓɛɛ nɛ́ mɔ'ɔ nɛ̀ ŋma okoo ɗɔŋa pii katɛ a̧ nɛ̀ ŋma dak nɔ̧́-nyama nɛ̀ gɛnɛ-a ɔ ŋgaya, ɓɛɛ tɛn a zu a̧ ŋgimbi n'aa nyɔŋ nɛ̀ mɔ.

⁸See o ŋgaiwi ko Jesu ɗaŋa tɛ mɔ nɛ kóò‘i dea'i, ɓɛɛ wa tɔ̧: «Ɛ̧ɛ̧ nɛ́ ge ɗaŋa mɔ ge?

⁹De nɔ̧́-nyama hegɔ'ɛ, wi tɛ̀ɛ́ ɗɔr so ba nɛ̀ dɔka kɔya-sede mɛ ha̧ ha̧ o wisan ɛ̧!»

¹⁰Jesu kɔɓa wen kɔ-wa'i, ɓɛɛ tɔ̧ ha̧ wa: «Ɛ̧ɛ̧ nɛ́ ge wen ge n’ɛnɛ tɔ̧ ha̧ kóò'ɛ ge? Nɛ́ demɔ á̧ a̧ dee ha̧‘m.

¹¹K’ɛ́nɛ́, o wisan a̧a̧ in'nɛ̀ɛ́ ɓɔnsɛnɛ, ɓɛɛ kɔ‘m, mi beka duk in'nɛ̀ɛ́ ɓɔnsɛnɛ na.

¹²Nɔ̧́-nyama nɛ̀ kóò'ɛ aa zu'm’ɛ duk nɛ́ wen guna'm.

¹³Nɛ́ kpasawen a̧‘m tɔ̧ h’ɛ́nɛ́; fara lɛŋ zaŋnu nɛ̀ bíí tɛ tɔ̧ De Mbe Wen sɛnɛ, wa tɛ we ɗoŋ mɔ nɛ̀ kóò'ɛ dee ha̧‘m kinii’ɛ ha̧ tɛ bíí mɛ mbaŋ ɗoŋ mɔ n'aa dea’ɛ.»

¹⁴Nɛ́ mɔ'ɔ nɛ̀ Judas, kpɔk mgbara o ŋgaiwi ko Jesu ɓu-zua-yiitoo, nɛ̀ɛ́ tɛ o gasa wan-ɗafi-sɔ̧,

¹⁵ɓɛɛ tɔ̧ ha̧ wa: «Ɛ́nɛ́ tɛ ha̧ nɛ́ ge ha̧‘m mɛ e Jesu er'nɛ́ ge?» Ɓɛɛ o gasa wan-ɗafi-sɔ̧ ha̧ kɔya-sede ɓu-taar ha̧ a̧.

¹⁶Ɓɛɛ ɗoŋ mɔ‘i Judas kíí war mɛ e Jesu er wa.

¹⁷Kuti wese nyɔŋa brɛt nɛ̀ hao bo sɛnɛ na, o ŋgaiwi ko Jesu tɛ̀ɛ̀ tɛ a̧ ɓɛɛ ak a̧: «Ɛ́nɛ́ kɔ̧ɔ̧ h’ɛ́ɛ́ mɛ nɛ̀ɛ́ ɗafi nyɔŋmɔ Paska h’ɛ́nɛ́ sɛn de?»

¹⁸Ɓɛɛ Jesu kifi nú ha̧ wa: «Ɛ̀nɛ̀ nɛ́ saaye tɛ̀ ko ŋma bíí, ɛ̀nɛ̀ tɔ̧́ ha̧ a̧‘e, Wan-usi-mɔ tɔ̧a̧‘e ŋgimbi kɔ‘i hɔɔ kaɗi; wi tɛ de gbaŋa Paska in o ŋgaiwi kɔ‘i tɛ̀ k’ɛ́nɛ́ wo.»

¹⁹Ɓɛɛ o ŋgaiwi ko Jesu de hee mɔ'ɔ n'aa tɔ̧ɔ̧ ga, ɓɛɛ wa nɛ́ɛ̀ ɗafi nyɔŋmɔ Paska.

²⁰Mɛ́ ga̧a̧mɔ, Jesu nyɔŋa mɔ in o ŋgaiwi kɔ‘i ɓu-zua-yiitoo,

²¹ɓɛɛ nɛ̀ wa ɓɔna fara nyɔŋa mɔ, Jesu tɔ̧ɔ̧ ha̧ wa: «Nɛ́ kpasawen a̧‘m tɔ̧ h’ɛ́nɛ́, ŋma bíí kpɔk mgbara'nɛ́ tɛ e ɗɔra tɛ‘m.»

²²See-wa ɗaŋa nyɛmna, ɓɛɛ wa kpɔk kpɔk ku̧ naŋ aka a̧: «Gasa Wan, nɛ́ mi nde?»

²³Jesu kifa nú ha̧ wa: «Wi nɛ̀ pi̧i̧ er kɔ̧́ tasi in am kpɔk'i, wi-e-ɗɔra tɛ‘m a̧‘i.

²⁴Bem ko bíí tɛ nɛ̀ kànà hee mɔ'ɔ nɛ̀ bàá yɔr so wen-aa ga; ɓɛɛ bɔnɛ a̧a̧ zu wi nɛ̀ e ɗɔra tɛ Bem ko bíí. Gana so ká‘i ko so wi’ɛi na.»

²⁵Judas wi-e-ɗɔra tɛ-a'i aka a̧ mbɛt: «Nɛ́ mi nde, Wan-usi-mɔ?» Ɓɛɛ Jesu kifi nú ha̧ a̧: «Mɛ tɔ̧ɔ̧ kaɗi.»

²⁶Ŋgimbi nɛ̀ wa nyɔŋ nɛ́ mɔ, Jesu baa brɛt, de osoko ha̧ Sɔ̧, kɛ̧ ha̧ o ŋgaiwi kɔ‘i, ɓɛɛ tɔ̧ ha̧ wa: «Ɛ̀nɛ̀ bá ɛ̀nɛ̀ nyɔ́ŋ, mɔ'ɔ nɛ́ kiitɛ‘m.»

²⁷Nɛ́ mɔ'ɔ n'aa baa be-ɗele, de osoko ha̧ Sɔ̧, ha̧ ha̧ o ŋgaiwi kɔ̧-a̧, ɓɛɛ tɔ̧: «Ɛ̀nɛ̀ nɔ́ dam'nɛ́ lɛŋ,

²⁸mɔ'ɔ nɛ́ tɔk-tɛ‘m wan mɛ nɔɔ-tɔk wen o bíí nɛ̀ dɔka-a wen kpaa ea-ɗaŋmɔ. Tɔk’ɛ nɛ́ nɔɔ-tɔk ko Sɔ̧ in bíí.

²⁹Mi tɔ̧ h’ɛ́nɛ́, mi beka nɔ yì waya-nyak-dɔ̧ɔ̧'ɛ ɓɔna hɔ wese n'am tɛ nɔ mbe-a in'nɛ̀ɛ́ tɛ Wan ko Dáà kɔ‘m yiwese mɛ.»

³⁰Ɗoŋ nɛ̀ wa bia gima kaɗi, wa gboo yak si zu Kaya Te-nɔ̧́.

³¹Ɓɛɛ Jesu tɔ̧ ha̧ wa: «Mɛ́ zɛ hɛ̧ɛ̧ ɛ́nɛ́ tɛ pɛsi e'm duk, wen wa bàá yɔr so hegɔ: ‹Mi tɛ gusi Wi-dai-sami, ɓɛɛ o sami tɛ pɛsi.›

³²Kà‘m kur ŋgɔn tɛ fio kaɗi, ɓɛɛ mi yaka ti h’ɛ́nɛ́ si Galilee.»

³³Ɓɛɛ Pierre tɔ̧ ha̧ a̧: «Kóó bíí lɛŋ ee'nɛ́ duk, kɔ‘m mi beka e'nɛ́ duk na ndó-ndó-ndó.»

³⁴Ɓɛɛ Jesu kifi nú ha̧ a̧: «Nɛ́ kpasawen a̧‘m tɔ̧ ha̧ mɛ, mɛ tɛ kaf'am mɛ zɛ hɛ̧ɛ̧ war taar nɛti sɛka kɔra hèé mɔ.»

³⁵Pierre tɔ̧ɔ̧ ha̧ a̧ woyo: «Kóó wa tɛ gbɛ‘m in'nɛ̀ɛ́, mi beka kafi'nɛ́ na.» Ɓɛɛ o ŋgaiwi ko Jesu lɛŋ tɔ̧ kpɔk mɔ‘i.

³⁶Nɛ́ mɔ'ɔ nɛ̀ Jesu nɛ̀ɛ in o ŋgaiwi kɔ‘i hɔ fara nɛ̀ wa sa'e Gɛtsemane, ɓɛɛ a̧ tɔ̧ ha̧ wa: «Ɛ̀nɛ̀ yá hɛ̧ɛ̧ ha̧‘m nɛ́ benaŋ si mɛ‘i a̧‘m kɔ́fí Sɔ̧ sɛ.»

³⁷A̧ mgbɔɔ Pierre in o bem ko Zebedee yiitoo nɛnɛ in a̧; ɓɛɛ a̧ ku̧ naŋ kpaa ɗaŋsee in dita-see nyɛmna.

³⁸A̧ tɔ̧ɔ̧ ha̧ wa: «See-am ɔ dita hee mi tɛ fe fee ga. Ɛ̀nɛ̀ yá hɛ̧ɛ̧, ɛ̀nɛ̀ pɛ́m mɔ in am.»

³⁹Nɛ́ mɔ'ɔ n'aa nɛɛ siti tikiɗi, ɓɛɛ a̧ hɔ̧fi̧ tik nù, ba sɔnti gu nù, ɓɛɛ kɔfi Sɔ̧ hee mɔ'ɔ ga: «Dáà kɔ‘m, kà ŋma yuwar nɛ́ boa, ɓɛɛ ɛ̀nɛ̀ bá be-ɗele-bɔnɛ'ɛ yinɛ zu'm. Ɓɛɛ bó hee mɔ'ɔ n'am kɔ̧a̧ ga na, ɓɛɛ nɛ́ hee ɛ́nɛ́ kɔ̧a̧ ga.»

⁴⁰Nɛ́ mɔ'ɔ n'aa pia ɗoŋ, ɓɛɛ a̧ kpa o ŋgaiwi kɔ̧-a̧ fara ɔ yá, ɓɛɛ a̧ tɔ̧ ha̧ Pierre: «Ɛ́nɛ́ nyɛm mɛ́ nyaŋ yá tɛ ŋgimbi tikiɗi pɛm nɛ̀ mɔ in am na nde?

⁴¹Ɛ̀nɛ̀ pɛ́m mɔ, ɛ̀nɛ̀ kɔ́fí Sɔ̧ wen ká weamɔ tɛɛ gan'nɛ. Taamɔ ko bíí kɔ̧ɔ̧ mɛ de mɔ, ɓɛɛ kiitɛ-wi kpa ŋgai na.»

⁴²Ɓɛɛ a̧ si ɗoŋ woyo mɛ́ kɔfi Sɔ̧; war yiitoo-aa nɛ́ mɔ‘i. A̧ tɔ̧a̧: «Dáà kɔ‘m, kà be-ɗele’ɛ nɛ́ nyɛma mɛ yu zu'm ká‘m tɛɛ nɔ na, ɓɛɛ nɛ̀ mɔ n’ɛnɛ kɔ̧a̧ a̧ dé.»

⁴³Nɛ́ mɔ'ɔ n'aa pia ɗoŋ kpa wa fara ɔ yá woyo wen yá dita yí-wa,

⁴⁴ɓɛɛ a̧ e wa duk yak nɛ́ɛ̀ kɔfi Sɔ̧ woyo, war taar-a nɛ́ mɔ‘i, ɓɛɛ a̧ tɔ̧ kànà nɛ́ kpɔk wen n'aa tɔ̧ɔ̧ so nɛti'i.

⁴⁵Nɛ́ mɔ'ɔ n'aa sii ɗoŋ sitɛ o ŋgaiwi kɔ̧-a̧, ɓɛɛ tɔ̧ ha̧ wa: «Ɛ́nɛ́ ɓɔna ɔɔ yá, ɔm nɛ̀ tɛ‘nɛ́ nde? Ŋgimbi ha̧ Bem ko bíí mɛ ye er o ɗaŋwi hɛɗa kaɗi.

⁴⁶Ɛ̀nɛ̀ kúr, ɛ̀ɛ̀ yak! Wi-e-ɗɔra tɛ‘m hɔɔ kaɗi!»

⁴⁷Nú Jesu tɛ zɔm tɛ wen'i hɔ̧ɔ̧ na, ɓɛɛ Judas, ŋma bíí mgbara o ŋgaiwi ko Jesu ɓu-zua-yiitoo hɔ, in o bíí nɛ̀ o gasa wan-ɗafi-sɔ̧ in o gasawi ko o Juif toma nɛ̀ gba-paa in o ɓira-te er wa.

⁴⁸Wi nɛ̀ ee ɗɔra tɛ Jesu tɔ̧ɔ̧ so ha̧ wa nɛti'e, wi nɛ̀‘i tɛ dui nú-a'i, wi’ɛi a̧‘i, wa a̧ bá a̧!

⁴⁹Nɛ́ mɔ'ɔ nɛ̀ Judas ɗɔŋa si katɛ Jesu nɛ̀ haya-a, ɓɛɛ tɔ̧ ha̧ a̧: «Ɛ̀nɛ̀ wór mɔ, Wan-usi-mɔ!» Ɓɛɛ dui nú-a.

⁵⁰Jesu tɔ̧ɔ̧ ha̧ a̧: «Sɛm kɔ‘m, mɔ nɛ̀ mɛ tɛ̀ɛ̀ mɛ de'i, mɛ̀ dé nɛ́ dea-a.» Ɓɛɛ wa si zu a̧, ba a̧.

⁵¹Ɓɛɛ ŋma bíí kpɔk mgbara o wi nɛ̀ yaa in Jesu dak gba-paa kɔ‘i gɔm nɛ̀ wi-de-tom ko gasa wan-ɗafi-sɔ̧, ɓɛɛ ɓir zer-aa pi̧ nù.

⁵²Ɓɛɛ Jesu tɔ̧ ha̧ a̧: «Mɛ̀ pí̧ gba-paa kɔ-mɛ kɔ̧́ koɓo-a; wen kóó o ndé nɛ̀ dak gba-paa tɛ fe nɛ́ fio gba-paa.

⁵³Mɛ́ íŋ‘e kà‘m kɔ̧ so gáà, bó nɛ́ mi nyɛma so mɛ tɔ̧ ha̧ Dáà kɔ‘m mɛ tom o betom nɛ yiwese, dùk-aa ɓu-zua-yiitoo tɛnɛ ha̧‘m na nde?

⁵⁴Ɓɛɛ kà‘m de so hegɔ, Yɔramɔ tɛ̀ɛ́ hɔ gba̧a̧ hee ge? Wen Yɔramɔ tɔ̧a̧‘e, mɔ tɛ de kànà hegɔ.»

⁵⁵Ɓɛɛ Jesu tɔ̧ ha̧ o bíí nɛ̀ tɛ̀ɛ̀ mɛ ba a̧: «Mi nɛ́ kpɔ̧i̧-gba̧a̧-nin s’ɛnɛ tɛ mɛ ba'm nɛ̀ gba-paa in o ɓira-te nde? Wese lɛŋ mi duka kɔ̧́ Tua ko Sɔ̧ usi nɛ̀ mɔ, ɓɛɛ ɛ́nɛ́ ba'm na.

⁵⁶Ɓɛɛ mɔ‘i lɛŋ dee ha̧ mɔ nɛ̀ wi-tɔ̧-wen oi nú Sɔ̧ bàá yɔr so mɛ hɔ gba̧a̧.» Ɓɛɛ o ŋgaiwi ko Jesu lɛŋ pɛsi yak e a̧ duk.

⁵⁷Nɛ́ mɔ'ɔ nɛ̀ o wi-ba Jesu mgbɔɔ a̧ nɛnɛ tɛ ko Kaif, gasa wan-ɗafi-sɔ̧, wi nɛ̀ o wi-usi-heembea in o kuti-wi mɔi̧a so tɛ̀ kɔ̧-a̧.

⁵⁸Pierre yora nɛ̀ nyɛi̧a-a ndak nɛ̀ ɗoŋ wa nɛnɛ hɔ tɛ̀ ko gasa wan-ɗafi-sɔ̧. Nɛ́ mɔ'ɔ n'aa yee bee-gara, ɓɛɛ duk nù mgbara o wi-de-tom ha̧ a̧ mɛ zɔk sɔŋkur mɔ nɛ̀ tɛ de.

⁵⁹O gasa wan-ɗafi-sɔ̧ in gasa gɔna-kita nɛ̀ oi-aa lɛŋ kia mɛ de ndela ɓir nɛ̀ wen e nú Jesu ha̧ wa mɛ gɔn kita-fio zu a̧,

⁶⁰ɓɛɛ wa kpa yuwar-a na; o bíí nɛ̀ dɔka-a ɓira wen e nú-a mbɛt takaɗi, ɓɛɛ sɔŋkur-aa o ŋma wi-sedaako-ndela yiitoo tɛa, ɓɛɛ tɔ̧:

⁶¹«Wi’ɛ bàá tɔ̧ so'e, wi nyɛma mɛ gbin Tua ko Sɔ̧ a nù, ɓɛɛ zaŋ zɛ taar wi mboo lɛŋ woyo.»

⁶²Nɛ́ mɔ'ɔ nɛ̀ gasa wan-ɗafi-sɔ̧ kura, ɓɛɛ ak Jesu: «Mɛ́ kífí nú-mɛ na nde? Mɛ́ zíí wen nɛ̀ o wi nɔ'ɔ tɔ̧ zu mɛ'ɛ na nde?»

⁶³Ɓɛɛ Jesu tɔ̧ wen na. Ɓɛɛ gasa wan-ɗafi-sɔ̧ tɔ̧ ha̧ a̧: «Mi ak mɛ́ nɛ̀ nin Sɔ̧ nɛ̀ duk kpasa, kà mɛ́ nɛ́ bòó nɛ́ Mɛsii, Bem ko Sɔ̧, ɓɛɛ mɛ̀ tɔ̧́ h’ɛ́ɛ́.»

⁶⁴Jesu kifa nú ha̧ a̧: «Mɛ́ tɔ̧ɔ̧ kaɗi. Nɛ́ kpasawen a̧‘m tɔ̧ h’ɛ́nɛ́, ŋma wese ɛ́nɛ́ tɛ zɔk Bem ko bíí fara duka-a nɛ̀ war wii-er Wan nɛ̀ a̧a̧ nɛ̀ ŋgayamɔ lɛŋ in fara tɛa-a tɛ bu-zan yiwese mɛ mbɛt.»

⁶⁵Ɓɛɛ gasa wan-ɗafi-sɔ̧ a̧k laa tɛ̀ á nù ɓɛɛ tɔ̧: «Ei! A̧ ɗaŋa nin Sɔ̧! Ɛ́nɛ́ zia ɗaŋ wen n'aa tɔ̧ɔ̧ ha̧ Sɔ̧‘i? Ɛ̀ɛ̀ kíí bɔɔ mbe wi-sedaako si déè ɓɔ ge nde?

⁶⁶Ɛ́nɛ́ ta boo k’ɛ́nɛ́ hee ge?» Ɓɛɛ wa kifi nú: «A̧ nyɛ̀mà mɛ́ fè!»[18]

⁶⁷Nɛ́ mɔ'ɔ nɛ̀ wa aa sap yí-a, ɓɛɛ wa sɔm a̧; o ŋma mbɛra yí-a,

⁶⁸ɓɛɛ tɔ̧ ha̧ a̧: «Mɛsii, mɛ yàá-tɔ̧-wen oi nú Sɔ̧'ɛ, mɛ̀ sá nin wi nɛ̀ mbɛra mɛ!»

⁶⁹Pierre duka so kɔ‘i nù nɛ̀ zan bee-gara mɛ, ɓɛɛ nɛ́ mɔ'ɔ nɛ̀ ŋma kó-de-tom nɛ̀ɛ̀ sitɛ a̧ ɓɛɛ tɔ̧ ha̧ a̧. «Mɛ mbɛt, mɛ duka so in Jesu be Galilee’ɛ.»

⁷⁰Ɓɛɛ Pierre kafi a̧ ti o bíí lɛŋ‘e: «Weyaa, i̧i̧ wen'i nɛ̀ mɛ tɔ̧‘i yeka nɛ̀‘m.»

⁷¹Pierre kura yak si nú garo, ɓɛɛ nɛ́ mɔ'ɔ nɛ̀ ŋma kó-de-tom zɔka a̧ woyo, ɓɛɛ tɔ̧ ha̧ o wi nɛ ya hi̧i̧‘e: «Wi’ɛ duka so in Jesu be Nazarɛt’ɛ.»

⁷²Ɓɛɛ Pierre kafi woyo, kan mɔ, ɓɛɛ tɔ̧: «Mi iŋ kɔ‘m wi’ɛi na!»

⁷³Ɗoŋ-aa tɛ nyɛi̧ na, ɓɛɛ o wi nɛ̀ ya hi̧i̧ nɛ́ si katɛ a̧ ɓɛɛ tɔ̧: «Kpasawen, mɛ́ mbɛt nɛ́ ŋma bíí mgbara wa, wen tɔ̧ɔ̧-wen kɔ-mɛ usi hegɔ.»

⁷⁴Nɛ́ mɔ'ɔ nɛ̀ Pierre kàná mɔ, ɓɛɛ bé mɔ á tɛ‘e: «Mi iŋ kɔ‘m wi’ɛi na!» Ɓɛɛ soɓee, ká gata-kɔra hèé mɔ.

⁷⁵Tɛ̀ Pierre mbaŋa ɗoŋ wen nɛ̀ Jesu tɔ̧ɔ̧ so ha̧ a̧‘e: «Mɛ tɛ kaf'am war taar nɛti sɛka gata-kɔra hèé mɔ.» Nɛ́ mɔ'ɔ nɛ̀ Pierre gboo zan, ɓɛɛ hi̧i̧ kɔ̧a̧ nɛ̀ dita-see.