Read Northwest Gbaya MATTHIEU 6 Bible Online

MATTHIEU 6 - Northwest Gbaya bible

MATTHIEU 6

¹«K’ɛ́nɛ́ de tom ko Sɔ̧ wen yí bíí ha̧ wa mɛ zɔn'nɛ́ na; wen k’ɛ̀nɛ̀ nɛ́ dee hegɔ, ɛ́nɛ́ beka kpa mɔɔ-oi-aa er Dáà k’ɛ́nɛ́ nɛ̀ a̧a̧ yiwese na.

²«Kà mɛ nɛ́ ha̧a̧ mɔ ha̧ wi-kɔsa, ɓɛɛ ká mɛ tɔ̧ wen-aa dam nù hee mɔ'ɔ nɛ̀ o wi nɛ̀ a̧a̧ nɛ̀ see yiitoo de sɛn kɔ̧ tua-mɔi̧a-a in nɛ̀ o yuwar nɛnɛ'ɛ ga na. Wa de hegɔ wen ha̧ bíí mɛ zɔn wa. Nɛ́ kpasawen a̧‘m tɔ̧́ h’ɛ́nɛ́, wa kpaa mɔɔ-oi kɔ-wa kaɗi.

³Ɓɛɛ kɔ-mɛ, kà mɛ há̧ mɔ ha̧ wi-kɔsa, ká er-mɛ mɛ gale íŋ mɔ nɛ̀ wíí-er-mɛ ha̧‘i na.

⁴Ha̧a̧mɔ kɔ-mɛ a̧ dúk nɛ̀ hu̧sa-a, ɓɛɛ Dáà kɔ-mɛ nɛ̀ zɔk mɔ nɛ̀‘i de nɛ̀ hu̧sa-a tɛ ha̧ mɔɔ-oi-aa ha̧ mɛ.»

⁵«K’ɛ̀nɛ̀ kɔ́fí Sɔ̧, ɓɛɛ k’ɛ́nɛ́ zɔk ɗoŋ mɔ ko o wi nɛ̀ a̧a̧ nɛ̀ see yiitoo na, wen wa kɔ̧ɔ̧ yora ŋgɔn kɔ̧́ tua-mɔi̧a-a in sasa-war kɔfi nɛ̀ Sɔ̧ wen ha̧ o bíí mɛ zɔk wa. Nɛ́ kpasawen a̧‘m tɔ̧ h’ɛ́nɛ́, wa kpaa mɔɔ-oi kɔ-wa kaɗi.

⁶Ɓɛɛ kɔ-mɛ, kà mɛ kɔ̧́ mɛ́ kɔfi Sɔ̧, mɛ̀ yé kɔ̧ gɔna-bɛr-tua kɔ-mɛ si ndaa-a mɛ, mɛ̀ kpé nú tua, ɓɛɛ mɛ̀ kɔ́fí Dáà kɔ-mɛ nɛ̀ duk nɛ̀ hu̧sa̧-a̧, ɓɛɛ Dáà kɔ-mɛ nɛ̀ zɔk mɔ nɛ̀‘i de nɛ̀ hu̧sa-a tɛ ha̧ mɔɔ-oi-aa ha̧ mɛ.»

⁷«K’ɛ̀nɛ̀ kɔfi Sɔ̧ ɓɛɛ k’ɛ́nɛ́ tɔ̧ dɔka wen hee mɔ'ɔ nɛ̀ o bíí nɛ̀ iŋ kpasa Sɔ̧ na de’ɛ ga na, wen wa ta kɔ-wa'e, nɛ́ tɛ̀ tɔ̧ɔ̧ dɔka wen a̧ Sɔ̧ tɛ zii nɛ̀ kɔfa-sɔ̧ kɔ-wa.

⁸K’ɛ́nɛ́ zɔk ɗoŋ mɔ kɔ-wa na, wen Dáà k’ɛ́nɛ́ iŋa mɔ n’ɛ̀nɛ̀ kɔ̧a̧ nɛti sɛk’ɛnɛ ak er a̧.

⁹Ɛ́nɛ́ nɛ́ tɛ̀ɛ́ kɔ̀fì Sɔ̧, ɛ̀nɛ̀ tɔ̧́ hee mɔ'ɔ ga: ‹Dáà k’ɛ́ɛ́ nɛ̀ a̧a̧ yiwese, nin'nɛ a̧ húr.

¹⁰Ɛ̀nɛ̀ ɔ́ wan zu yɛ, mɔ n’ɛ̀nɛ́ kɔ̧ɔ̧ a̧ dé sɛn zaŋnu hee mɔ'ɔ nɛ̀ de yiwese mɛ ga.

¹¹Ɛ̀nɛ̀ há̧ mɔɔ-nyɔŋ nɛ̀ tɛ nyɛm ɛ́ɛ́ sɔsɔɔ h’ɛ́ɛ́.

¹²Ɛ̀nɛ̀ é ɗaŋmɔ k’ɛ́ɛ́ h’ɛ́ɛ́ hee mɔ'ɔ n’ɛ̀ɛ̀ e nɛnɛ ha̧ o bíí nɛ̀ de ɗaŋmɔ in yɛɛ ga.

¹³K’ɛ́nɛ́ e ha̧ weamɔ mɛ gan yɛ na,[4] ɓɛɛ ɛ̀nɛ̀ kpásí yɛ er Wan-ɗaŋmɔ.› [Wen wan, in ŋgayamɔ in gasamɔ nɛ́ k’ɛ́nɛ́ hegɔ ɓɔnsɛnɛ. Aamɛn.]

¹⁴«Wen k’ɛ̀nɛ̀ nɛ́ èè ɗaŋmɔ ko bíí ha̧ wa, Dáà k’ɛ́nɛ́ nɛ̀ a̧a̧ yiwese tɛ e ɗaŋmɔ k’ɛ́nɛ́ h’ɛ́nɛ́ mbɛt.

¹⁵Ɓɛɛ k’ɛ̀nɛ̀ nɛ́ èè ɗaŋmɔ ko bíí ha̧ wa na, Dáà k’ɛ́nɛ́ nɛ̀ a̧a̧ yiwese beka e ɗaŋmɔ k’ɛ́nɛ́ h’ɛ́nɛ́ na mbɛt.»

¹⁶«K’ɛ̀nɛ̀ zím yì, ɓɛɛ k’ɛ́nɛ́ kai sɔnti'nɛ hee mɔ'ɔ nɛ̀ o wi nɛ̀ a̧a̧ nɛ̀ see yiitoo de ga na, wen kɔ-wa wa kai nɛ́ sɔnti-wa ha̧ o bíí mɛ iŋ‘e wa zim nɛ́ yì. Nɛ́ kpasawen a̧‘m tɔ̧ h’ɛ́nɛ́, wa kpaa mɔɔ-oi kɔ-wa kaɗi.

¹⁷Ɓɛɛ kɔ-mɛ, kà mɛ zím yì, mɛ̀ táí yí-mɛ́ ɓɛɛ mɛ̀ sár zu-mɛ,

¹⁸wen ká o bíí tɛ́ɛ̀ iŋ‘e mɛ zim nɛ́ yì, ɓɛɛ nɛ́ Dáà kɔ-mɛ nɛ̀ duk nɛ̀ hu̧sa̧-a̧ a̧ tɛ́ iŋ ɓɛɛ; hegɔ, Dáà kɔ-mɛ nɛ̀ zɔk mɔ nɛ̀‘i de nɛ̀ hu̧sa̧-a̧ tɛ ha̧ mɔɔ-oi-aa ha̧ mɛ.»

¹⁹«K’ɛ́nɛ́ kusi mbɔi k’ɛ́nɛ́ zaŋnu na, wen mɛ̀ nɛ́ fara nɛ̀ zɛmɛ in gbɛɛ-dua-mɔ ɗaŋ mɔ sɛnɛ; nɛ́ fara nɛ̀ o wi-zuzu kom tua zu̧ nɛ̀ mɔ sɛnɛ.

²⁰Ɓɛɛ ɛ̀nɛ̀ kúsí mbɔi k’ɛ́nɛ́ a yiwese mɛ, wen fara'i zɛmɛ in gbɛɛ-dua-mɔ ɗaŋ mɔ sɛnɛ na, ɓɛɛ o wi-zuzu bó hi̧i̧ mɛ kom tua zu̧ nɛ̀ mɔ na mbɛt.

²¹Wen nɛ́ fara nɛ̀ mbɔi kɔ‘i a̧a̧ sɛnɛ a̧ see-wi duk sɛnɛ.»

²²«Yí-wí duk tɛ-wi hee lamba ga. Kà yí-mɛ́ zɔk mɔ nɛ̀ sa̧a̧-a̧, ɓɛɛ tɛ-mɛ duk tɛ sa̧a̧mɔ.

²³Ɓɛɛ kà yí-mɛ́ de na, tɛ-mɛ lɛŋ duk tɛ tum. Kà sa̧a̧mɔ nɛ̀ duk tɛ-mɛ nɛ́ bòò nɛ́ tum, ɓɛɛ tum'i nɛ́ ɗuka tum.»

²⁴«Bíí kpɔk nyɛ́m mɛ de tom ha̧ wan yiitoo na. A̧ tɛ sɛn ɛ̧ɛ̧ kpɔk’ɛ, ɓɛɛ a̧ tɛ kɔ̧ ɓii-aa; a̧ tɛ ndaɗi in ɛ̧ɛ̧ kpɔk’ɛ, ɓɛɛ a̧ ee ɓii-aa hee geemɔ ga. Ɛ́nɛ́ nyɛm mɛ de tom ha̧ Sɔ̧ in ha̧ mbɔi mbɛt na.»

²⁵«Nɛ́ hegɔ s'am tɔ̧ h’ɛ́nɛ́‘e: tɛ̀ duka-a k’ɛ́nɛ́, k’ɛ́nɛ́ ai nú wen mɔ n’ɛ̀nɛ̀ tɛ nyɔŋ in mɔ n’ɛ̀nɛ̀ tɛ nɔ ká bá nɛ̀ laa-pi̧-tɛ na. Bó nɛ́ duka-kpasa gana nyɔŋmɔ na nde? Bó nɛ́ kiitɛ-wi gana laa na nde?

²⁶Ɛ̀nɛ̀ zɔ́k o nɔ̧́í̧ nɛ̀ bu̧i̧ nɛ̀ yiwese’ɛ. Wa gun nyɔnɔ na, wa mɔi̧ nyɔnɔ a kɔ̧ dam na mbɛt, ɓɛɛ Dáà k’ɛ́nɛ́ nɛ̀ a̧a̧ yiwese dai nɛ́ wa. Bó nɛ́ ɛ́nɛ́ gana wa na nde?

²⁷Nɛ́ o mgbara'nɛ́ tɛ̀ aia-nú kɔ‘i á̧ nyɛma mɛ e ŋma zɛ kpɔk zu zɛ nɛ̀ Sɔ̧ gɔna ha̧ a̧ kaɗi o?

²⁸«Wen ge s’ɛ́nɛ́ ai nú‘nɛ́ wen laa-pi̧-tɛ ge? Ɛ̀nɛ̀ zɔ́k hee mɔ'ɔ nɛ̀ o gba-dɛŋ hɔ nɛnɛ kpɛɛfɔ'ɛ ga. Wa de tom na, wa pir laa na,

²⁹ɓɛɛ mi tɔ̧ h’ɛ́nɛ́, kóó nɛ́ Salomɔŋ nɛ̀ oi gba zɔm mbɔi kɔ‘i lɛŋ pí̧ de laa nɛ̀ hɔɔ ŋmaa in o gba-dɛŋ na.[5]

³⁰Kà Sɔ̧ nɛ́ ɗafa zɔ̧-zaŋbɛɛ nɛ̀ duk sɔsɔɔ, ɓɛɛ mɔɔsa̧ wi pi̧i̧ wee sɛnɛ dɔ́ á nù'ɛ, bó nɛ́ a̧ tɛ zɔk'nɛ́ gan zu i̧i̧ na nde? Ɛ́nɛ́ nɛ̀ kɔ̧ɔ̧ɗɔɔwen k’ɛ́nɛ́ dɔk na’ɛ!

³¹«K’ɛ́nɛ́ ai nú tɔ̧ nɛnɛ‘e, nɛ́ ge ɛ̀ɛ̀ tɛ nyɔŋ ge, nɛ́ ge ɛ̀ɛ̀ tɛ nɔ ge, nɛ́ ge ɛ̀ɛ̀ tɛ pi̧ tɛ yɛ ge nde na;

³²wen nɛ́ o wi nɛ̀ iŋ kpasa Sɔ̧ na à̧ kíí o mɔɔ nɔ‘i. Ɓɛɛ Dáà k’ɛ́nɛ́ nɛ̀ a̧a̧ yiwese iŋa'e mɔɔ nɔ‘i nɛ́ o mɔ nɛ̀ tɛ gbak'nɛ mbɛt.

³³Ɛ̀nɛ̀ kíí nɛ́ Wan ko Sɔ̧ in deemɔ nɛ̀ yuwar-a nɛti, ɓɛɛ o mɔɔ nɔ‘i lɛŋ a̧ tɛ ha̧ e zu-a h’ɛ́nɛ́.

³⁴K’ɛ́nɛ́ ai nú wen mɔ mɛ sa̧a̧mɔ na, wen sa̧a̧mɔ a̧a̧ nɛ̀ aia-nú kɔ́‘i, wese kpɔk kpɔk a̧a̧ nɛ̀ bɔnɛ kɔ‘i mbɛt.»