Read Northwest Gbaya MATTHIEU 7 Bible Online

MATTHIEU 7 - Northwest Gbaya bible

MATTHIEU 7

¹«K’ɛ́nɛ́ ɓa wen in bíí na wen ká Sɔ̧ tɛ̀ɛ́ ɓà wen in'nɛ̀ɛ́,

²wen a̧ tɛ gɔn kita zu'nɛ́ hee mɔ'ɔ n’ɛ̀nɛ̀ gɔn nɛ̀ kita zu ŋma bíí ga. Nɛ́ kale mɔɔ-we-mɔ n’ɛ̀nɛ̀ we nɛ̀ mɔ ha̧ o ŋma bíí a̧ a̧ tɛ we nɛ̀ mɔ h’ɛ́nɛ́ mbɛt.

³Wen ge mɛ́ zɔ́k be gbáá-kan nɛ̀ a̧a̧ yí nya-mɛ, ɓɛɛ mɛ́ zɔ́k kpíŋgíí-te mɛ yí-mɛ́ na ge?

⁴Kɔ-mɛ nɛ̀ kpíŋgíí-te a̧a̧ yí-mɛ́'ɛ, héé ge mɛ tɛ tɔ̧ ha̧ nya-mɛ‘e, ha'i ba gbáá-kan yí-a yinɛ ge?

⁵Mɛ́ wi nɛ̀ a̧a̧ nɛ̀ see yiitoo’ɛ, mɛ̀ bá kpíŋgíí-te yí-mɛ́ yinɛ nɛti ha̧ mɛ zɔk mɔ nɛ̀ sa̧a̧-a̧ kaɗi, sɛka mɛ bàà be gbáá-kan yí nya-mɛ‘i yinɛ!

⁶«K’ɛ́nɛ́ ha̧ mɔ ko Sɔ̧ ha̧ o toyo na. K’ɛ́nɛ́ a de kísí K’ɛ́nɛ́ ti o ŋgɔya na wen ká wa tɛ́ɛ̀ i̧si̧ ɗaŋ, ɓɛɛ wa zika tɛ́ɛ̀ nyɔŋ‘nɛ mbɛt.»

⁷«Ɛ̀nɛ̀ ák mɔ, ɓɛɛ Sɔ̧ tɛ ha̧ h’ɛ́nɛ́, ɛ̀nɛ̀ kíí mɔ, ɓɛɛ ɛ́nɛ́ tɛ kpa, ɛ̀nɛ̀ kɔ́n nú tua, ɓɛɛ Sɔ̧ tɛ hu̧i̧ h’ɛ́nɛ́.

⁸Wen nɛ́ wi-ak-mɔ a'i ha̧ mɔ ha̧ a̧, nɛ́ wi-kii-mɔ a̧ kpa mɔ, nɛ́ wi-kɔn-nú tua a'i hu̧i̧ nú tua ha̧ a̧.

⁹Nɛ́ ge dáa-wan-bem ge mgbara'nɛ́ a̧ tɛ ha̧ ta ha̧ bem kɔ‘i kà bem’ɛi nɛ́ aka nɛ́ kam er dáà kɔ‘i ge?

¹⁰Kóó kà a̧ nɛ́ aka nɛ́ zoro, ɓɛɛ a̧ ha̧a̧ nɛ́ gɔ́k ha̧ a̧ ge?

¹¹Ɓɛɛ ɛ́nɛ́ o ɗaŋwi nɛ̀ iŋa ha̧a̧ demɔ ha̧ o bem k’ɛ́nɛ́, bó nɛ́ Dáà k’ɛ́nɛ́ nɛ̀ a̧a̧ yiwese tɛ ha̧ demɔ ha̧ o bíí nɛ̀ ak mɔ er-a gan k’ɛ́nɛ́ na nde?

¹²«Mɔ lɛŋ n’ɛ̀nɛ́ kɔ̧ɔ̧ ha̧ ŋma bíí mɛ de h’ɛ́nɛ́, ɛ̀nɛ̀ dé kale mɔ‘i ha̧ wa mbɛt. Gba̧a̧ heembea ko Moisɛ in kalata ko o wi-tɔ̧-wen oi nú Sɔ̧ nɛ́ mɔ‘i.»

¹³«Ɛ̀nɛ̀ yé nɛ̀ geɗek nú-garo, wen gasa nú-garo in gba-war mgbɔ wi nɛnɛ sitɛ ɗaŋ fara, ɓɛɛ o bíí nɛ̀ dɔka-a bá nɛ́ war'i.

¹⁴Ɓɛɛ nɛ́ geɗek nú-garo in be war a̧ mgbɔ wi nɛnɛ tɛ̀ duka-kpasa, ɓɛɛ o wi nɛ̀ ba war'i dɔk na.»

¹⁵«Ɛ̀nɛ̀ zɔ́k tɛ‘nɛ nɛ̀ o wi-tɔ̧-wen oi nú Sɔ̧ ndela nɛ̀ tɛ́ tɛ‘nɛ hee o sami ga, ɓɛɛ nɛ̀ kɔ̧ see-wa, wa nɛ́ o ŋga ɓoŋgo.

¹⁶Ɛ́nɛ́ tɛ iŋ wa tɛ tom kɔ-wa. Wi ɓi so waya-nyak-dɔ̧ɔ̧ ɓii tɛ mgboi-gata, kóó mbɔra tɛ naakɔɓa nde?[6]

¹⁷De te lɛŋ wai nɛ́ de waya-a, ɓɛɛ ɗaŋ te wai nɛ́ ɗaŋ waya-a.

¹⁸De te beka wai ɗaŋ waya-a na, ɓɛɛ ɗaŋ te beka wai de waya-a na mbɛt.

¹⁹Te lɛŋ nɛ̀ wai de waya-a na, wi tɛ gɔm a̧ pi̧ tɛ wee.

²⁰Ɓɛɛ nɛ́ tɛ́ tom ko o wi-tɔ̧-wen oi nú Sɔ̧ ndela ɛ̀nɛ̀ tɛ́ iŋ nɛ̀ wa.»

²¹«Bó nɛ́ géé tɔ̧ɔ̧ wen nɛ̀ nú-wi'e: ‹Gasa Wan, Gasa Wan,› a̧ tɛ de ha̧ bíí mɛ ye tɛ Wan mɛ yiwese na, ɓɛɛ nɛ́ déé mɔ nɛ̀ Dáà kɔ‘m nɛ̀ a̧a̧ yiwese kɔ̧a̧.

²²Wese-gɔn-kita bé tɛ̀ɛ́ hɔ, o bíí nɛ̀ dɔka-a tɛ tɔ̧ ha̧‘m: ‹Gasa Wan, Gasa Wan, bó nɛ́ ɛ́ɛ́ bàá tɔ̧ so wen oi nú Sɔ̧ nɛ̀ nin'nɛ na nde? Bó nɛ́ ɛ́ɛ́ bàá ndak so o ɗaŋ-sɔ̧ yinɛ nɛ̀ nin'nɛ na nde? Bó nɛ́ ɛ́ɛ́ bàá de mɔɔ-kifi nɛ̀ dɔka-a nɛ̀ nin'nɛ na nde?›

²³Ɓɛɛ mi tɛ kifi nú ha̧ wa: ‹Ɛ́nɛ́ o wi-de-ɗaŋmɔ, ɛ̀nɛ̀ yú síɓí, mi iŋ‘nɛ na kóó tikiɗi!›

²⁴«Hégɔ́, kóó o ndé nɛ̀ zia wen n'am tɔ̧'ɛ, kà a̧ kásí, ɓɛɛ a̧ hɔɔ ŋmaa in ŋma wi-iŋ-mgbara-mɔ nɛ̀ mboo tua kɔ‘i zu ta.

²⁵Nɛ́ mɔ'ɔ nɛ̀ kórò hɔa, yì ha̧a̧, ŋga-búk yuu mbɛt, ɓɛɛ tua'i gbin na, wen wan-aa ee so naŋ-a zu ta.

²⁶Ɓɛɛ kóó o ndé nɛ̀ zia wen n'am tɔ̧'ɛ, kà a̧ kásí na, a̧ hɔɔ ŋmaa in ŋma mgbelewi nɛ̀ mboo tua kɔ‘i zu nyɛmɛ.

²⁷Nɛ́ mɔ'ɔ nɛ̀ kórò hɔa, yì ha̧a̧, ŋga-búk yuu mbɛt, ɓɛɛ tua'i gbin a nù gɛ́tɛ́-gɛ́tɛ́.»

²⁸Jesu usa mɔ hegɔ, ɓɛɛ ɗɛɗɛ bíí gɔn tɛ usamɔ kɔ̧-a̧;

²⁹ŋgai a̧a̧ tɛ́ wen kɔ̧-a̧ in ɔ dita, bó nɛ́ héé ko o wi-usi-heembea kɔ-wa ga na.