Read Northwest Gbaya MARK 1 Bible Online

MARK 1 - Northwest Gbaya bible

MARK 1

¹Ku̧u̧naŋ De Mbe Wen zu Jesu Krist Bem ko Sɔ̧ nɛ́ mɔ'ɔ.

²Wen’ɛ yɔra so zaŋ kalata ko wi-tɔ̧-wen oi nú Sɔ̧ Esaii: «Mi tom nɛ betom kɔ‘m yak ti ha̧ mɛ, mɛ́ ɗafi yuwar ha̧ mɛ.

³Ŋma bíí hiɗi nɛ́ mɔ ŋga-gbárà mɛ‘e: ‹Ɛ̀nɛ̀ ɗáfí yuwar ko Gasa Wan, ɛ̀nɛ̀ ɗáfí yuwar kɔ̧-a̧ nɛ̀ tana-a.› »

⁴Nyɛm nɛ̀ ɗoŋ wen'i, Jean Zui-bíí duk ŋga-gbárà mɛ tɔ̧ nɛnɛ ha̧ o bíí‘e ndé, wa a̧ kpáí duka-a kɔ-wa, ɓɛɛ wa a̧ kpɛ́k zuia wa, wen ha̧ Sɔ̧ mɛ e ɗaŋmɔ ha̧ wa.

⁵O bíí Judee in o bíí Jerusalɛm lɛŋ nɛ̀ɛ̀ sitɛ a̧, wa gbara ɗaŋmɔ kɔ-wa, ɓɛɛ a̧ zui wa ɗɔɔ Jurdɛn.

⁶Jean duka pi̧ nɛ́ laa ndàrá ŋgeloba, ɓɛɛ hɛr kanda guntir. Mɔɔ-nyɔŋ kɔ̧-a̧ nɛ́ gba-dɔya in gɔrɔ. A̧ tɔ̧ɔ̧ ha̧ wa'e ndé:

⁷«Ŋma bíí a̧a̧ sɛnɛ nɛ̀ tɛ́ ɗoŋ am, ŋgai kɔ̧-a̧ gana kɔ‘m, ɓɛɛ mi nyɛm mɛ gu nù ti a̧ mɛ bur nyak ndárà kɔ̧-a̧ na.

⁸Kɔ‘m, mi zui'nɛ́ nɛ̀ yì, ɓɛɛ kɔ̧-a̧, a̧ tɛ zui'nɛ́ nɛ̀ Sa̧a̧ Ɔmi.»

⁹Sɛn tɛ́ ŋgimbi'i, Jesu tɛ̀ɛ́ nɛ̀ Nazarɛt nú Galilee mɛ, ɓɛɛ Jean zui a̧ ɗɔɔ Jurdɛn.

¹⁰Ɓɛɛ hee mɔ'ɔ n'aa biti daŋa-a nɛ̀ ɗɔɔ yì ga, kà a̧ zɔk wó, yiwese hu̧i̧a̧, ɓɛɛ a̧ zɔk Sa̧a̧ Ɔmi fara zira-a pii zu a̧ hee gbaku̧i̧ ga.

¹¹Ɓɛɛ a̧ zii ŋma tiger nɛ̀ tɔ̧ɔ̧ wen tɛnɛ nɛ̀ yiwese mɛ‘e ndé: «Mɛ́ nɛ́ Bem kɔ‘m, n'am kɔ̧ɔ̧ nyɛmna, see-am lɛŋ a̧a̧ zu mɛ.»

¹²Ɗoŋ mɔ‘i, Sa̧a̧ Ɔmi foo a̧ si ŋga-gbárà mɛ.

¹³A̧ duka hi̧i̧ zɛ ɓu-naar, ɓɛɛ Wan-ɗaŋmɔ tɛ mɛ we a̧. Jesu duka mgbara o saɗi-zaŋbɛɛ, ɓɛɛ o betom mɛ yiwese tɛ́ɛ̀ duk in a̧ de nɛ̀ tom ha̧ a̧.

¹⁴Ɗoŋ nɛ̀ wa baa Jean pi̧ zɔɓɔ kaɗi, Jesu nɛ̀ɛ̀ si Galilee tɔ̧ nɛ̀ De Mbe Wen ko Sɔ̧ nɛnɛ‘e ndé:

¹⁵«Ŋgimbi hɔɔ kaɗi, ɓɛɛ Wan ko Sɔ̧ hɛɗa dɔ̧́ɔ̧́ kaɗi. Ɛ̀nɛ̀ kpáí duka-a k’ɛ́nɛ́, ɓɛɛ ɛ̀nɛ̀ kpɛ́k De Mbe Wen.»

¹⁶Jesu ba nɛ́ ká̧ zaŋ tɔp Galilee nɛnɛ, ɓɛɛ a̧ zɔk Simɔŋ in Andre nya Simɔŋ fara pi̧i̧ yɔk, wen wa so nɛ́ o wi-gbɛ-zoro,

¹⁷ɓɛɛ Jesu tɔ̧ ha̧ wa: «Ɛ̀nɛ̀ tɛ́ ɗoŋ am, ɓɛɛ mi tɛ de h’ɛ́nɛ́ mɛ ya nɛ́ o wi-mɔi̧-bíí.»

¹⁸Soɓee, wa ee o yɔk kɔ-wa ɓɔn hi̧i̧, ɓɛɛ wa nɛ́ ɗoŋ-aa.

¹⁹A̧ nɛ̀ɛ̀ siti tikiɗi, ɓɛɛ a̧ zɔk Jak bem ko Zebedee in Jean nya Jak. Wa ya kɔ̧ kombon ɗafi nɛ̀ yɔk kɔ-wa.

²⁰Jesu saa wa, ɓɛɛ wa e dáà kɔ-wa in o wi-de-tom ɓɔn kɔ̧́ kombon, ɓɛɛ wa nɛ́ ɗoŋ-aa.

²¹Jesu yee saaye Kafarnaum in o ŋgaiwi kɔ‘i, ɓɛɛ wese-ɔm-tɛ, a̧ yee tua-mɔi̧a-a, ɓɛɛ a̧ ku̧ naŋ usa mɔ.

²²Ɗɛɗɛ o bíí gɔna zu usamɔ kɔ̧-a̧ wen usamɔ kɔ̧-a̧‘i ɔ dita, ɓɛɛ bó nɛ́ hee ko o wi-usi-heembea ga na.

²³Ŋma wiwii nɛ̀ ɗaŋ-sɔ̧ a̧a̧ tɛ-a duka kɔ̧́ tua-mɔi̧a-a‘i mbɛt, ɓɛɛ hiɗi mɔ nɛ̀ ŋgaya-a'e:

²⁴«Jesu, be Nazarɛt, ge a̧ mɛ kii zu yɛ ge? Mɛ tɛ̀ɛ̀ mɛ ɗaŋ yɛ yinɛ nde? Mi iŋa mɛ: mɛ́ nɛ́ Sa̧a̧-bíí ko Sɔ̧.»

²⁵Nɛ́ mɔ'ɔ nɛ̀ Jesu dee ŋmaa in ɗaŋ-sɔ̧ nɛ̀ a̧a̧ tɛ wi’ɛi nɛ̀ ŋgaya-a, ɓɛɛ tɔ̧: «Mɛ̀ kpé nú-mɛ́, mɛ̀ gbó tɛ̀ wi’ɛ.»

²⁶Ɓɛɛ ɗaŋ-sɔ̧ zar wi’ɛi pi̧ nù, hiɗi nɛ̀ mɔ nɛ̀ ŋgaya-a gbo nɛnɛ tɛ-a yak.

²⁷Ɗɛɗɛ o bíí lɛŋ gɔna, ɓɛɛ wa ak o ŋmaa: «Ɛ̧ɛ̧ nɛ́ ge? Mbe usamɔ ko wi’ɛ ŋgaia. A̧ tɔ̧ wen ha̧ o ɗaŋ-sɔ̧, ɓɛɛ wa mboo zu ha̧ a̧ mbɛt.»

²⁸Ɓɛɛ nyɛrɛmɔ kɔ̧-a̧ hur nɛ̀ haya-a dam nú Galilee lɛŋ.

²⁹Wa gboo kɔ̧́ tua-mɔi̧a-a, ɓɛɛ Jesu nɛ́ in Jak ká bá nɛ̀ Jean si kɔ̧́ tua ko Simɔŋ in Andre.

³⁰For Simɔŋ mɛ kóò ɔ nɛ́ nù wen tɛ-a ba nɛ́ wee, ɓɛɛ wa tɔ̧ wen-aa ha̧ Jesu.

³¹Nɛ́ mɔ'ɔ nɛ̀ Jesu nɛ̀ɛ̀ si katɛ a̧, kasi er-a, ɓɛɛ ba a̧ e ŋgɔn. Tɛ-a haia, ɓɛɛ a̧ ku̧ naŋ dee tom ha̧ wa.

³²Mɛ́ ga̧a̧mɔ ɗoŋ nɛ̀ wese yee kaɗi, wa mgbɔɔ o wi-zɛɛ lɛŋ in o wi nɛ̀ ɗaŋ-sɔ̧ a̧a̧ tɛ-wa tɛnɛ ha̧ a̧.

³³O bíí lɛŋ saaye'i mɔi̧a ŋmaa ya ɗoŋ nú tua,

³⁴ɓɛɛ Jesu kpasi o wi-zɛɛ nɛtɛ nɛtɛ nɛ̀ dɔka-a. A̧ ndaka o ɗaŋ-sɔ̧ nɛ̀ dɔka-a tɛ o bíí yinɛ, ɓɛɛ a̧ dor o ɗaŋ-sɔ̧ tɛ tɔ̧ɔ̧ wen, wen wa iŋa a̧.

³⁵Mɛ́ tutuyɛ sút, nɛti ha̧ mɔ mɛ gɔn, Jesu kura yak si sɛn ŋma hu̧sa̧ fara, ɓɛɛ duk hi̧i̧ kɔfi nɛ̀ Sɔ̧.

³⁶Simɔŋ in o gbama-yari kɔ‘i ndaka pata a̧ mɛ kii a̧.

³⁷Wa kpaa a̧, ɓɛɛ wa tɔ̧ ha̧ a̧: «Bíí nɛ̀ dɔka-a kii nɛ́ ɛ́nɛ́.»

³⁸Ɓɛɛ a̧ kifi nú ha̧ wa: «Ɛ̀ɛ̀ yák si tɛ̀ o ŋma ye nɛ̀ a̧a̧ katɛ yɛ ha̧‘m tɔ̧ wen ko Sɔ̧ sɛnɛ mbɛt, wen mɔ n'am kura[1] tɛnɛ wen-aa nɛ́ mɔ‘i.»

³⁹Nɛ́ mɔ'ɔ n'aa yara nú Galilee lɛŋ, tɔ̧ nɛ̀ wen ko Sɔ̧ kɔ̧ tua-mɔi̧a-a kɔ-wa, ndak nɛ̀ o ɗaŋ-sɔ̧ yinɛ tɛ o bíí.

⁴⁰Ŋma wi-doko tɛ̀ɛ́ tɛ Jesu, gbɛ zugur nù ti a̧, ɓɛɛ ai nú ha̧ a̧‘e: «K’ɛ̀nɛ̀ nɛ́ kɔ̧a̧, ɛ́nɛ́ nyɛma mɛ de ha̧ tɛ‘m mɛ sa̧.»

⁴¹Ko dee Jesu, nɛ́ mɔ'ɔ n'aa nyɛi̧a er tam tɛ wi-doko'i, ɓɛɛ tɔ̧ ha̧ a̧: «Mi kɔ̧ɔ̧ hegɔ; tɛ-mɛ a̧ sá̧.»

⁴²Soɓee, zɛɛ tɛ wi-doko'i wia, ɓɛɛ tɛ-a sa̧.

⁴³Jesu mboo nú-a nɛ̀ ŋgaya-a, ɓɛɛ fo a̧ yaknɛ nɛ̀ haya-a.

⁴⁴Jesu tɔ̧ɔ̧ ha̧ a̧: «Mɛ̀ zìì, ká mɛ tɔ̧ nyɛrɛ mɔ'ɔ ha̧ ŋma bíí na. Mɛ̀ nɛ́ɛ̀ usi tɛ-mɛ ha̧ wi-ɗafi-sɔ̧, ɓɛɛ mɛ̀ há̧ mɔɔ-ɗafi-sɔ̧ nɛ̀ Moisɛ bàá tɔ̧ so, wen tɛ-mɛ nɛ̀ sa̧a̧‘i; mɔ‘i tɛ duk nɛ́ mɔɔ-sedaako yí bíí.»

⁴⁵Ɗoŋ nɛ̀ wi’ɛi yuu ti Jesu kaɗi, a̧ ku̧u̧ naŋ pɛsa nyɛrɛ mɔ‘i ha̧ o bíí lɛŋ, ɓɛɛ Jesu kpa war mɛ ye saaye nɛ̀ yí bíí ɓɔna; a̧ duk nɛ̀ zan, fara nɛ̀ bíí bo sɛnɛ na. Ɓɛɛ o bíí gar nɛnɛ tɛ-a nɛ̀ fara lɛŋ.