Read Northwest Gbaya MARK 11 Bible Online

MARK 11 - Northwest Gbaya bible

MARK 11

¹Wa hɛɗa nɛ̀ Jerusalɛm, ká̧ Bɛtfage in Betanii, si ká̧ Kaya Te-nɔ̧́ mɛ kaɗi, ɓɛɛ Jesu tom o ŋma ŋgaiwi kɔ‘i yiitoo,

²ɓɛɛ tɔ̧ ha̧ wa: «Ɛ̀nɛ̀ nɛ́ tɛ be ye ti'nɛ́‘i. Hɔa-a k’ɛ́nɛ́ hegɔ, ɓɛɛ ɛ́nɛ́ tɛ kpa ŋma be tuifuu nɛ̀ wa kuna, nɛ̀ bíí tɛ daŋ zu a̧ nɛti na. Ɛ̀nɛ̀ búr a̧, ɓɛɛ ɛ̀nɛ̀ mgbɔ́ a̧ tɛnɛ ha̧‘m.

³Kà ŋma bíí nɛ́ aka'nɛ́‘e: ‹Ɛ́nɛ́ bur a̧ si déè?› Ɓɛɛ ɛ̀nɛ̀ kífí nú ha̧ a̧‘e: ‹Nɛ́ Gasa Wan a̧ kɔ̧ɔ̧ a̧, a̧ tɛ tom a̧ piinɛ ɗoŋ hɛ̧ɛ̧ kinii nɛ̀ haya-a.› »

⁴Nɛ́ mɔ'ɔ nɛ̀ wa yaka, ɓɛɛ wa nɛ́ɛ̀ kpa ŋma be tuifuu nɛ̀ bíí kuna zan ká̧ nú tua, nú war saaye, ɓɛɛ wa bur a̧.

⁵Ɓɛɛ o ŋma bíí nɛ̀ yaa so hi̧i̧ ak wa: «Nɛ́ ge'e de h’ɛ́nɛ́ mɛ bur be tuifuu ge?»

⁶Nɛ́ mɔ'ɔ nɛ̀ o ŋgaiwi ko Jesu kifa nú hee mɔ'ɔ nɛ̀ Jesu bàá tɔ̧ ha̧ wa ga, ɓɛɛ o wi nɔ‘i e ha̧ wa mɛ bur be tuifuu'i.

⁷Nɛ́ mɔ'ɔ nɛ̀ wa mgbɔɔ be tuifuu'i nɛnɛ ha̧ Jesu, wa tata laa kɔ-wa gɔn see-aa, ɓɛɛ Jesu daŋ duk sɛnɛ.

⁸O bíí nɛ̀ dɔka-a tata laa kɔ-wa yuwar, ɓɛɛ o ŋma gbin kɔ‘i nɛ́ wa̧a̧ nɛ̀ zaŋbɛɛ tɛ́ɛ̀ a yuwar.

⁹O wi-ya-ti Jesu in o wi-ya-ɗoŋ-aa gaia mɔ: «Oee! Toka-de-yoŋgo a̧ dúk zu wi nɛ̀ tɛ‘i nɛ̀ nin Gasa Wan!

¹⁰Toka-de-yoŋgo a̧ dúk zu mɔɔ-wan nɛ̀ tɛ‘i, wan ko dáà k’ɛɛ David! Osoko ha̧ Sɔ̧ yiwese ŋgɔn mɛ!»

¹¹Jesu hɔɔ Jerusalɛm, ɓɛɛ ye kɔ̧́ Tua ko Sɔ̧. Ɗoŋ n'aa kɛ̧i̧a̧ mɔ zik katɛ a̧ kpa lɛŋ, a̧ gboo yak si Betanii in o ŋgaiwi kɔ̧-a̧ ɓu-zua-yiitoo, wen mɔ ga̧a̧ so kaɗi.

¹²Nɛ́ mɔ sa̧a̧ kaɗi, ŋgimbi nɛ̀ wa gboo nɛnɛ nɛ̀ Betanii, wɔ gbɛɛ Jesu.

¹³Nɛ́ mɔ'ɔ n'aa zɔka ŋma te-mbɔra nɛ̀ oi wa̧a̧-a̧ nɛ̀ nyɛi̧a-a, ɓɛɛ a̧ nɛ́ si ká̧ a̧, gbak na, a̧ kpaa ŋma waya-a. Ŋgimbi n'aa ɗɔŋa siti, a̧ kpaa nɛ́ géé wa̧a̧-a̧ sɔɔ géè, wen ŋgimbi'i bo so nɛ́ ŋgimbi waya-a ko mbɔra na.

¹⁴Ɓɛɛ Jesu tɔ̧ ha̧ te-mbɔra'i: «Ká ŋma bíí nyɔŋ waya-mɛ ɓɔna ndó-ndó-ndó!» Ɓɛɛ o ŋgaiwi kɔ̧-a̧ zii wen'i.

¹⁵Nɛ́ mɔ'ɔ nɛ̀ wa hɔɔ Jerusalɛm. Jesu yee kɔ̧́ Tua ko Sɔ̧, ɓɛɛ ndak o wi nɛ yaa hi̧i̧ ɗɔr nɛ̀ mɔ, hi̧fi nɛ̀ mɔ, gbonɛ. Ɓɛɛ a̧ ndur o taŋe ko o wi-kpai-sede in o gboŋgoe ko o wi-ɗɔr-pola a nù;

¹⁶a̧ e ha̧ ŋma bíí mɛ tui mɔ, kóó nɛ́ ge ndé, ɓir nɛnɛ nɛ̀ kɔ̧́ Tua ko Sɔ̧ na.

¹⁷Ɓɛɛ a̧ usi mɔ, tɔ̧ nɛnɛ ha̧ wa'e: «Bó nɛ́ Yɔramɔ tɔ̧a̧‘e: ‹O bíí tɛ sa Tua kɔ‘m nɛ́ tua-kɔfi-sɔ̧ ko o dukbíí lɛŋ,› na nde? K’ɛ́nɛ́ nɛ́ mɔ'ɔ n’ɛnɛ zika tua'i e nɛ̀ di̧i̧ ko o kpɔ̧i̧-gba̧a̧-nin!»

¹⁸O gasa wan-ɗafi-sɔ̧ in o wi-usi-heembea zia nyɛrɛ mɔ‘i, ɓɛɛ wa kii yuwar nɛ̀ wa tɛ de mɛ gbɛ nɛ̀ Jesu, ɓɛɛ wa de nɛ kíí a̧ wen ɗɛɗɛ giiwi gɔna tɛ usamɔ kɔ̧-a̧.

¹⁹Mɛ́ ga̧a̧mɔ, ɓɛɛ Jesu in o ŋgaiwi kɔ‘i gbo saaye'i yak.

²⁰Tɛ̀ ɓira-a kɔ-wa yak mɛ tutuyɛ, wa zɔka te-mbɔra'i nɛ̀ kora hɔ tɛ gun-aa mɛ lɛŋ.

²¹Tɛ̀ Pierre mbaŋa ɗoŋ mɔ nɛ̀ Jesu tɔ̧ɔ̧ so, ɓɛɛ tɔ̧ ha̧ a̧: «Wan-usi-mɔ, ɛ̀nɛ̀ zɔ́k te-mbɔra n’ɛnɛ baa fom so’ɛ, nɛ́ mɔ'ɔ nɛ̀ kora lɛŋ'ɛ.»

²²Jesu kifa nú ha̧ wa, ɓɛɛ tɔ̧: «Ɛ̀nɛ̀ kɔ̧́ ɗɔaa ha̧ Sɔ̧.

²³Nɛ́ kpasawen a̧‘m tɔ̧ h’ɛ́nɛ́; kà ŋma bíí tɔ̧ ha̧ kaya’ɛ: ‹Mɛ̀ kúr, mɛ̀ gbín a ɗɔɔ gba-tɔp,› kà wi’ɛi nɛ́ sii kafɛ nɛ̀ kɔ̧́ see na, ɓɛɛ kà a̧ ta'e mɔ‘i tɛ de wó, mɔ‘i tɛ de kànà ha̧ a̧ nɛ̀ mbetɛ.

²⁴Nɛ́ wen mɔ‘i, s'am tɔ̧ h’ɛ́nɛ́‘e ndé, mɔ lɛŋ n’ɛnɛ ak tɛ̀ kɔfa-sɔ̧, ɛ̀nɛ̀ tá‘e wi kpaa mɔ‘i kaɗi, ɓɛɛ ɛ́nɛ́ tɛ kpa mɔ‘i.

²⁵Ɓɛɛ ŋgimbi n’ɛ̀nɛ̀ yor ŋgɔn kɔfi nɛ̀ Sɔ̧, k’ɛ̀nɛ̀ nɛ́ bòó nɛ̀ ŋma wen mgbara'nɛ́ in ŋma bíí, ɛ̀nɛ̀ é ɗaŋmɔ ha̧ wi’ɛi, wen ha̧ Dáà k’ɛ́nɛ́ nɛ̀ a̧a̧ yiwese mɛ e ɗaŋmɔ k’ɛ́nɛ́ h’ɛ́nɛ́ mbɛt. [

²⁶Ɓɛɛ k’ɛ̀nɛ̀ é ɗaŋmɔ ha̧ ŋma bíí na, Dáà k’ɛ́nɛ́ nɛ̀ a̧a̧ yiwese beka e ɗaŋmɔ k’ɛ́nɛ́ h’ɛ́nɛ́ na mbɛt.]»

²⁷Wa pia ɗoŋ Jerusalɛm woyo, ɓɛɛ hee mɔ'ɔ nɛ̀ Jesu duk yar nɛnɛ nɛ̀ kɔ̧́ Tua ko Sɔ̧ ga, o gasa wan-ɗafi-sɔ̧, o wi-usi-heembea in o kuti-wi tɛ̀ɛ̀ tɛ a̧,

²⁸ɓɛɛ ak a̧: «Mɔ nɛ̀ mɛ de’ɛ, mɛ de tɛ ŋgai ko o? Nɛ́ o'o ha̧ ŋgai'i ha̧ mɛ o?»

²⁹Ɓɛɛ Jesu kifi nú ha̧ wa: «Mi a̧a̧ nɛ̀ ŋma akamɔ mɛ ak nɛ̀ ɛ́nɛ́ mbɛt. Ɛ̀nɛ̀ kífí nú ha̧‘m, sɛka'm tɔ̧ɔ̧ ndaa ŋgai n'am de nɛ̀ mɔ'ɔ h’ɛ́nɛ́.

³⁰Zuia-bíí nɛ̀ Jean duka so zui nɛnɛ'ɛ, tɛ̀ɛ́ nɛ̀ tɛ́ Sɔ̧ náà, kóó tɛ̀ɛ́ nɛ̀ tɛ̀ bíí nde? Ɛ̀nɛ̀ kífí nú ha̧‘m!»

³¹Ɓɛɛ wa kii mɔ tɔ̧ nɛ̀ wen in o ŋmaa: «K’ɛ̀ɛ̀ tɔ̧‘e ndé, zuia-bíí nɛ̀ Jean zuia so'i, tɛ̀ɛ́ nɛ̀ tɛ́ Sɔ̧ wó, ɓɛɛ a̧ tɛ ak ɛɛ‘e ndé, wen ge s’ɛɛ kɔ̧ ɗɔɔ wen ko Jean na ge?»

³²A̧ k’ɛɛ tɔ̧‘e, tɛ̀ɛ́ nɛ̀ tɛ̀ bíí wó, o bíí tɛ de wen in yɛ̀ɛ́. Kíì giiwi de so nɛ́ wa, wen taamɔ ko bíí lɛŋ‘e Jean nɛ́ wi-tɔ̧-wen oi nú Sɔ̧ nɛ̀ mbetɛ.

³³Ɓɛɛ wa kifi nú ha̧ Jesu: «Ɛ́ɛ́ iŋ k’ɛ́ɛ́ na.» Ɓɛɛ Jesu tɔ̧ ha̧ wa: «Mi mbɛt, mi beka tɔ̧ ndaa ŋgai n'am de nɛ̀ mɔ‘i h’ɛ́nɛ́ na.»