Read Northwest Gbaya MARK 14 Bible Online

MARK 14 - Northwest Gbaya bible

MARK 14

¹Oi-aa ɓɔna zɛ yiitoo ha̧ gbaŋa Paska in wese nyɔŋa brɛt nɛ̀ hao bo sɛnɛ na mɛ hɔ, ɓɛɛ o gasa wan-ɗafi-sɔ̧ in o wi-usi-heembea kii war mɛ ba Jesu, nɛ̀ gɔna kɔ̧́ zaŋ, mɛ gbɛ a̧ yinɛ.

²Wa tɔ̧a̧: «K’ɛ́ɛ́ ba a̧ wese gbaŋa na, wen ká o bíí tɛ́ɛ̀ dik.»

³Jesu a̧a̧ so sɛn Betanii kɔ̧́ tua ko ŋma wi-doko nɛ̀ nin-a'e Simɔŋ. Ŋgimbi n'aa ɓɔna fara nyɔŋa mɔ, ŋma okoo yee tua nɛ̀ oi dak gba de nɔ̧́-nyama nɛ̀ gɛnɛ-a ɔ ŋgaya. Ɓɛɛ a̧ gbin kɔɗi-nú dak'i, tɛn nɔ̧́-nyama'i a zu Jesu.

⁴Nɛ́ mɔ'ɔ nɛ̀ see o ŋma bíí mgbara wa ɗaŋa, ɓɛɛ wa tɔ̧: «Ɛ̧ɛ̧ nɛ́ ge ɗaŋa mɔ ge?

⁵De nɔ̧́-nyama hegɔ'ɛ, wi tɛ̀ɛ́ ɗɔr so nɛ̀ ŋga gɛnɛ, gan kɔya-sede gɔmŋmaa-taar, mɛ ha̧ há̧ o wisan ɛ̧!» Ɓɛɛ see-wa ɗaŋ zu kóò‘i.

⁶Ɓɛɛ Jesu tɔ̧ ha̧ wa: «Ɛ̀nɛ̀ é a̧ sɛ́ɛ́m! Wen ge s’ɛ́nɛ́ tu̧ see-aa ge? Mɔ‘i n'aa dee in am'i, nɛ́ demɔ a̧ a̧ dea.

⁷K’ɛ́nɛ́, o wisan tɛ ya mgbara'nɛ́ ɓɔnsɛnɛ; ŋgimbi n’ɛnɛ kɔ̧a̧, ɓɛɛ ɛ́nɛ́ dee demɔ in wa. Ɓɛɛ kɔ‘m, mi beka duk mgbara'nɛ́ ɓɔnsɛnɛ na.

⁸Mɔ n'aa nyɛma so mɛ de'i, á̧ a̧ dea'i. A̧ aa nɔ̧́-nyama tɛ‘m wen guna'm.

⁹Nɛ́ kpasawen a̧‘m tɔ̧ h’ɛ́nɛ́; fara lɛŋ nɛ̀ bíí tɛ tɔ̧ De Mbe Wen sɛnɛ dam zaŋnu lɛŋ, wa tɛ we ɗoŋ mɔ nɛ̀ kóò'ɛ dee ha̧‘m kinii’ɛ, ha̧ tɛ bíí mɛ mbaŋ ɗoŋ-aa.»

¹⁰Judas Iskariot, ŋma bíí kpɔk mgbara o ŋgaiwi ko Jesu ɓu-zua-yiitoo, nɛ̀ɛ́ tɛ o gasa wan-ɗafi-sɔ̧, ha̧ a̧ mɛ e Jesu er wa.

¹¹Wa zia mɔ‘i, ɓɛɛ wa kpa desee, wa ha̧a̧ nú mɛ ha̧ sede ha̧ Judas. Nɛ́ mɔ'ɔ n'aa kia mɔ n'aa tɛ de mɛ ba nɛ̀ Jesu ha̧ wa tɛ de ŋgimbi.

¹²Kuti wese nyɔŋa brɛt nɛ̀ hao bo sɛnɛ na, wese gɔna be-sami Paska, o ŋgaiwi ko Jesu aka a̧: «Ɛ́nɛ́ kɔ̧ɔ̧ h’ɛ́ɛ́ mɛ nɛ̀ɛ́ ɗafi nyɔŋmɔ Paska h’ɛ́nɛ́ sɛn déè?»

¹³Nɛ́ mɔ'ɔ n'aa toma o ŋma ŋgaiwi kɔ̧-a̧ yiitoo, ɓɛɛ tɔ̧ ha̧ wa: «Ɛ̀nɛ̀ nɛ́ saaye, ɓɛɛ ɛ́nɛ́ tɛ kpa ŋma wiwii nɛ̀ tui nɛ́ kpáná-yì, ɓɛɛ ɛ̀nɛ̀ ndák ɗoŋ-aa.

¹⁴Ɓɛɛ fara n'aa tɛ ye sɛnɛ‘i, ɛ̀nɛ̀ tɔ̧́ ha̧ wan-tua'e: ‹Wan-usi-mɔ tɔ̧a̧‘e fara nɛ‘i tɛ nyɔŋ mɔ sɛnɛ tɛ gbaŋa Paska in o ŋgaiwi kɔ‘i a̧a̧ déè nde?›

¹⁵Ɓɛɛ wi’ɛi tɛ usi ŋma gasa bɛr-tua mɛ́ ŋgɔ́n[7] nɛ̀‘i ɗafa nɛ̀ de-a, nɛ̀ mɔ lɛŋ a̧a̧ sɛnɛ, ɓɛɛ ɛ̀nɛ̀ ɗáfí mɔ hi̧i̧ h’ɛ́ɛ́.»

¹⁶O ŋgaiwi ko Jesu yiitoo'i yaka. Wa hɔɔ saaye, ɓɛɛ wa kpa mɔ lɛŋ hee mɔ'ɔ nɛ̀ Jesu bàá tɔ̧ ha̧ wa ga, ɓɛɛ wa ɗafi mɔ wen Paska.

¹⁷Mɔ ga̧a̧ kaɗi, ɓɛɛ Jesu hɔ in o ŋgaiwi kɔ‘i ɓu-zua-yiitoo.

¹⁸Ŋgimbi nɛ̀ wa a̧a̧ ká̧ taŋe fara nyɔŋ mɔ, Jesu tɔ̧a̧: «Nɛ́ kpasawen a̧‘m tɔ̧ h’ɛ́nɛ́, ŋma bíí kpɔk mgbara'nɛ́ tɛ e ɗɔra tɛ‘m; wi’ɛi nyɔŋ nɛ mɔ in am.»

¹⁹Wa kpaa ɗaŋsee nyɛmna, ɓɛɛ wa ku̧ naŋ aka a̧ kpɔk kpɔk ɗoŋ ŋmaa: «Nɛ́ mi nde?»

²⁰Ɓɛɛ a̧ kifi nú ha̧ wa: «Nɛ́ ŋma bíí kpɔk mgbara'nɛ́ ɓu-zua-yiitoo’ɛ; nɛ́ wi nɛ̀ pi̧ er kɔ̧́ tasi kpɔk in am.

²¹Bem ko bíí tɛ nɛ̀ kànà, hee mɔ'ɔ nɛ̀ bàá yɔr so wen-aa ga, ɓɛɛ fom a̧a̧ zu wi nɛ̀ tɛ́ e ɗɔra tɛ Bem ko bíí! Gana so ká‘i ko wi’ɛi na.»

²²Wa nyɔŋ nɛ mɔ, ɓɛɛ Jesu ba brɛt; ɗoŋ n'aa dee osoko ha̧ Sɔ̧ kaɗi, a̧ gbina ha̧ ha̧ wa, ɓɛɛ a̧ tɔ̧: «Ɛ̀nɛ̀ bá, mɔ'ɔ nɛ́ kiitɛ‘m.»

²³Hɔ-ɗoŋ-aa, a̧ baa be-ɗele, a̧ dee osoko ha̧ Sɔ̧, ɓɛɛ ha̧ ha̧ wa, ɓɛɛ wa nɔ dam wa lɛŋ.

²⁴Nɛ́ mɔ'ɔ n'aa tɔ̧ɔ̧ ha̧ wa: «Mɔ'ɔ nɛ́ tɔk-tɛ‘m, wan mɛ nɔɔ-tɔk nɛ̀ aa nù wen o bíí nɛ̀ dɔka-a.

²⁵Nɛ́ kpasawen a̧‘m tɔ̧ h’ɛ́nɛ́; mi beka nɔ́ yí waya nyak-dɔ̧ɔ̧'ɛ ɓɔna, hɔ wese n'am tɛ nɔ nɛ mbe-a tɛ Wan ko Sɔ̧.»

²⁶Ɗoŋ nɛ̀ wa bia gima gasi nɛ̀ Sɔ̧ kaɗi, wa gboo yak si zu Kaya Te-nɔ̧́ mɛ.

²⁷Ɓɛɛ Jesu tɔ̧ ha̧ wa: «Ɛ́nɛ́ tɛ yambali lɛŋ wen Yɔramɔ tɔ̧ɔ̧ so'e: ‹Mi tɛ gusi wi-dai-sami, ɓɛɛ o sami tɛ pɛsi.›

²⁸Ɓɛɛ ɗoŋ n'am tɛ kur ŋgɔn kaɗi, mi tɛ yak ti h’ɛ́nɛ́ si Galilee.»

²⁹Pierre kifa nú ha̧ a̧: «Kóó bíí lɛŋ ee'nɛ́ duk, kɔ‘m, mi beka e'nɛ́ duk, na.»

³⁰Jesu kifa nú ha̧ a̧: «Kɔ-mɛ, mi tɔ̧ nɛ́ kpasawen ha̧ mɛ, sɔsɔɔ‘i, mɛ zɛ hɛ̧ɛ̧, mɛ tɛ kaf'am war taar sɛka gata-kɔra hee mɔ war yiitoo.»

³¹Ɓɛɛ ko Pierre kànà nɛ́ tɔ̧a̧-a̧ ha̧ a̧‘e: «Kóó nɛ́ fea-a in'nɛ̀ɛ́, mi beka kafi'nɛ́ na.» Ɓɛɛ o ŋgaiwi ko Jesu lɛŋ tɔ̧ kpɔk mɔ‘i.

³²Wa hɔɔ fara nɛ̀ wa sa'e Getsemane, ɓɛɛ Jesu tɔ̧ ha̧ o ŋgaiwi kɔ‘i: «Ɛ̀nɛ̀ yá hɛ̧ɛ̧ ha̧‘m nɛ́ɛ̀ kɔfi Sɔ̧ sɛ́.»

³³Nɛ́ mɔ'ɔ n'aa mgbɔɔ Pierre, Jak in Jean nɛnɛ in a̧, ɓɛɛ kíì in dita-see ku̧ naŋ baa a̧.

³⁴A̧ tɔ̧ɔ̧ ha̧ wa: «See-am ɔ dita hee mi tɛ fe fee ga. Ɛ̀nɛ̀ yá hɛ̧ɛ̧, ɛ̀nɛ̀ pɛ́m mɔ.»

³⁵Nɛ́ mɔ'ɔ n'aa nɛ̀ɛ̀ siti tikiɗi, hɔ̧fi̧ tik nù, ɓɛɛ kɔfi Sɔ̧, gbak na, ŋgimbi'i yaka zu a̧.

³⁶A̧ tɔ̧a̧: «Aba, Dáà, ɛ́nɛ́ nyɛma mɛ de mɔ lɛŋ, ɛ̀nɛ̀ bá be-ɗele-bɔnɛ'ɛ yinɛ zu'm; ɓɛɛ bó nɛ́ hee mɔ'ɔ n'am kɔ̧ɔ̧ ga na, nɛ́ hee ɛ́nɛ́ kɔ̧ɔ̧ ga!»

³⁷A̧ pia ɗoŋ, tɛ́ɛ̀ kpa o ŋgaiwi kɔ̧-a̧ fara ɔ ya, ɓɛɛ a̧ ak Pierre: «Simɔŋ, mɛ ɔ nɛ ya? Mɛ kpa ŋgai mɛ pɛm mɔ tikiɗi na nde?

³⁸Ɛ̀nɛ̀ pɛ́m mɔ, ɛ̀nɛ̀ kɔ́fí Sɔ̧ wen ká weamɔ tɛ́ɛ̀ gan'nɛ́. Taamɔ ko bíí kɔ̧ɔ̧ mɛ de mɔ, ɓɛɛ kiitɛ-wi kpa ŋgai na.»

³⁹A̧ sii ɗoŋ woyo mɛ kɔfi Sɔ̧, ɓɛɛ a̧ tɔ̧ kànà nɛ́ kale kpɔk wen n'aa tɔ̧ɔ̧ nɛti'i.

⁴⁰A̧ pia ɗoŋ, kpa wa fara ɔ yá woyo, wen yá dita yí-wa nyɛmna; ɓɛɛ wa kpa ŋma wen mɛ tɔ̧ ha̧ a̧ na.

⁴¹War taar-a, a̧ pia ɗoŋ, ɓɛɛ tɔ̧ ha̧ wa: «Ɛ́nɛ́ ɓɔna ɔɔ yá ɔm nɛ̀ tɛ‘nɛ́ nde? Kaɗa! Ŋgimbi ha̧ Bem ko bíí mɛ́ ye er o ɗaŋwi hɔɔ kaɗi.

⁴²Ɛ̀nɛ̀ kúr, ɛ̀ɛ̀ yák! Wi-e-ɗɔra tɛ‘m hɔɔ kaɗi!»

⁴³Kpɔk ŋgimbi nɛ̀ Jesu tɔ̧ nɛ̀ wen'i, Judas, ŋma kpɔk mgbara o ŋgaiwi kɔ̧-a̧ ɓu-zua-yiitoo, hɔɔ in o wi-ba-a nɛ̀ o gba-paa in o ɓira-te. Nɛ́ o gasa wan-ɗafi-sɔ̧ in o wi-usi-heembea, ká bá nɛ̀ o kuti-wi a̧ toma o wi nɔ‘i tɛnɛ.

⁴⁴Wi-e-ɗɔra tɛ Jesu bàá mbaŋ so tɛ-wa nɛti'e ndé: «Wi n'am tɛ dui nú-a'i nɛ́ wi’ɛi; ɛ̀nɛ̀ bá a̧, ɓɛɛ ɛ̀nɛ̀ pɛ́m a̧ nɛ̀ de-a mgbɔ nɛ̀ a̧ yaknɛ.»

⁴⁵Hɔa-a nɛ̀ wa hɔɔ hegɔ, a̧ nɛ̀ɛ̀ si katɛ Jesu, ɓɛɛ sa a̧: «Wan-usi-mɔ!» Ɓɛɛ a̧ dui nú-a;

⁴⁶hegɔ o dɔka bíí tika zu a̧, ɓɛɛ ba a̧.

⁴⁷Nɛ́ mɔ'ɔ nɛ̀ ŋma bíí kpɔk mgbara o wi nɛ̀ yaa in Jesu hi̧i̧ daka gba-paa, ɓɛɛ gɔm wi-de-tom ko gasa wan-ɗafi-sɔ̧, ɓir zer-aa pi̧ nù.

⁴⁸Ɓɛɛ Jesu tɔ̧ ha̧ wa: «Mi nɛ́ kpɔ̧i̧-gba̧a̧-nin s’ɛnɛ tɛ mɛ ba'm nɛ̀ gba-paa in ɓira-te nde?

⁴⁹Wese lɛŋ mi duka mgbara'nɛ́ usi nɛ mɔ kɔ̧́ Tua ko Sɔ̧, ɓɛɛ ɛ́nɛ́ ba'm na. Mɔ'ɔ dee hegɔ wen ha̧ Yɔramɔ mɛ hɔ gba̧a̧.»

⁵⁰Ɓɛɛ o ŋgaiwi kɔ̧-a̧ lɛŋ pɛsi, e a̧ duk.

⁵¹Ŋma be-ŋgaiwi nɛ̀ gaɓa goe nɛ̀ tɛ-wi nɛ̀ɛ́ ɗoŋ-aa. Nɛ́ mɔ'ɔ nɛ̀ wa baa a̧,

⁵²ɓɛɛ a̧ siŋ goe pi̧ kɔ̧̀ er-wa, yu mɔ yak nɛ̀ mgbii.

⁵³Wa mgbɔɔ Jesu nɛnɛ tɛ̀ ko gasa wan-ɗafi-sɔ̧. Ɓɛɛ o gasa wan-ɗafi-sɔ̧ lɛŋ, o gasawi in o wi-usi-heembea mɔi̧ ŋmaa kpa hi̧i̧.

⁵⁴Pierre yora nɛ̀ nyɛi̧a-a, ndak nɛ̀ ɗoŋ Jesu tɛnɛ hɔ bee-gara ko gasa wan-ɗafi-sɔ̧, ɓɛɛ a̧ duk nù in o wi-de-tom ɔ nɛ̀ wee.

⁵⁵Nɛ́ mɔ'ɔ nɛ̀ o gasa wan-ɗafi-sɔ̧ in gasa gɔna-kita nɛ̀ oi-aa lɛŋ kia bíí nɛ̀ tɛ́ de sedaako zu Jesu nɛ̀ tɛ́ nyɛm ha̧ wa mɛ gɔn kita-fio zu a̧, ɓɛɛ wa kpa na,

⁵⁶wen o bíí nɛ̀ dɔka-a ɓira wen e nú-a, ɓɛɛ wen kɔ-wa ye ŋmaa na.

⁵⁷O ŋma bíí kura ɓir wen e nú-a'e ndè:

⁵⁸«Ɛ́ɛ́ zia a̧ fara tɔ̧‘e ndé: wi tɛ gbin Tua ko Sɔ̧ nɛ̀ bíí dee nɛ̀ er yinɛ, ɓɛɛ zaŋ zɛ taar, wi mboo mbe-a nɛ̀ bó nɛ́ er bíí a̧ dee na.»

⁵⁹Ɓɛɛ tɛ wen'i wen kɔ-wa ye ŋmaa na mbɛt.

⁶⁰Ɓɛɛ gasa wan-ɗafi-sɔ̧ kur mgbara o bíí nɛ̀ mɔi̧a, ɓɛɛ ak Jesu: «Mɛ́ kifi nú tɛ wen nɛ̀ o wi nɔ'ɔ tɔ̧ a zu mɛ'ɛ na nde?»

⁶¹A̧ duka nɛ̀ oi nú-a, a̧ kifi ŋma nú-wen na. Ɓɛɛ gasa wan-ɗafi-sɔ̧ ak a̧ woyo: «Mɛsii Bem ko Wi nɛ̀ toka-de-yoŋgo duk zu-a’ɛ nɛ́ mɛ nde?»

⁶²Jesu kifa nú: «Nɛ́ mi; ɓɛɛ ɛ́nɛ́ tɛ zɔk Bem ko bíí fara duk nù nɛ̀ war wii-er Wan-ŋgayamɔ, ɛ́nɛ́ tɛ zɔk a̧ fara tɛa-a mgbara bu-zan yiwese.»

⁶³Nɛ́ mɔ'ɔ nɛ̀ gasa wan-ɗafi-sɔ̧ a̧ka̧ laa tɛ-wi, ɓɛɛ tɔ̧: «Ɛ́ɛ́ kíí bɔɔ mbe wi-sedaako si déè ɓɔ ge?

⁶⁴Ɛ́nɛ́ zɔka ɗaŋa nin Sɔ̧ n'aa ɗaŋ! Ɛ́nɛ́ ta bɔɔ k’ɛ́nɛ́ hee ge?» Ɓɛɛ o bíí lɛŋ tɔ̧‘e, a̧ nyɛma mɛ fe, a'i gɔ́n nɛ́ kita-fio zu a̧ ɓɛɛ.

⁶⁵Nɛ́ mɔ'ɔ nɛ̀ o ŋma bíí aa sap tɛ-a, wa hɛra yí-a nɛ̀ laa, gus'a, ɓɛɛ tɔ̧ ha̧ a̧: «Mɛ̀ sá nin wi nɛ̀ gusa mɛ!» Ɓɛɛ o wi-biro-pɛm-mɔ mbɛr yí-a.

⁶⁶Pierre duka bee-gara mɛ; nɛ́ mɔ'ɔ nɛ̀ ŋma kó-de-tom ko gasa wan-ɗafi-sɔ̧ tɛa,

⁶⁷ɓɛɛ zɔk a̧ fara ɔ wee, mbaɗ‘a, ɓɛɛ tɔ̧: «Mɛ mbɛt, mɛ baa duk so in Jesu, be Nazarɛt'i.»

⁶⁸Pierre kafa ɓɛɛ tɔ̧: «Mi iŋ na, mi zii mgbara wen nɛ̀ mɛ kɔ̧ɔ̧ mɛ tɔ̧‘i na.» Ɓɛɛ Pierre gbo yak si nú zala.

⁶⁹Kó-de-tom'i zɔka Pierre, ɓɛɛ tɔ̧ ha̧ o bíí nɛ̀ yaa hi̧i̧: «Wi’ɛ nɛ́ ŋma bíí mgbara wa mbɛt.»

⁷⁰Nɛ́ mɔ'ɔ nɛ̀ Pierre kafa woyo. Dekpaa, o bíí nɛ̀ yaa hi̧i̧ tɔ̧ɔ̧ ha̧ Pierre: «Nɛ́ kpasawen, mɛ́ nɛ́ ŋma bíí mgbara wa, wen mɛ́ nɛ́ be Galilee mbɛt.»

⁷¹A̧ kàná mɔ, be mɔ á tɛ̀ ɓɛɛ tɔ̧: «Mi iŋ kɔ‘m wi n’ɛnɛ tɔ̧ nɛnɛ‘i na.»

⁷²Soɓee, gata-kɔra hee mɔ, yiitoo héé-mɔ nɛ́ mɔ‘i. Ɓɛɛ tɛ̀ Pierre mbaŋ ɗoŋ wen nɛ̀ Jesu bàá tɔ̧ ha̧‘e ndé: «Mɛ́ tɛ́ kaf'am war taar, sɛka gata-kɔra hee mɔ war yiitoo.» A̧ gɔma gbo, ɓɛɛ a̧ hi̧i̧ kɔ̧a̧.