Read Northwest Gbaya MARK 15 Bible Online

MARK 15 - Northwest Gbaya bible

MARK 15

¹Mɛ́ tutuyɛ sut, o gasa wan-ɗafi-sɔ̧ baa keta, o kuti-wi, bá nɛ̀ o wi-usi-heembea in gasa-gɔna-kita nɛ̀ oi-aa lɛŋ. Wa hɛra Jesu kaɗi, ɓɛɛ wa mgbɔ a̧ yaknɛ, nɛ́ɛ̀ e er Pilat.

²Pilat aka a̧: «Mɛ́ nɛ́ Wannu ko o Juif nde?» Ɓɛɛ Jesu tɔ̧: «Nɛ́ mɛ́ a̧ tɔ̧.»

³Nɛ́ mɔ'ɔ nɛ̀ o gasa wan-ɗafi-sɔ̧ ɓira wen e nú-a nɛ̀ dɔka-a.

⁴Ɓɛɛ Pilat ak a̧ woyo: «Mɛ́ kifi ŋma nú-wen na nde? Mɛ́ zii gba wen nɛ̀ wa ɓir e nú mɛ'ɛ na?»

⁵Ɓɛɛ Jesu kifi ŋma nú-wen ɓukui na. Mɔ‘i gɔna ɗɛɗɛ Pilat batɛ.

⁶Tɛ́ wese gbaŋa lɛŋ, Pilat gbo nɛ́ ŋma wi-zɔɓɔ kpɔk pi̧ nù, wan nɛ̀ o bíí kɔ̧a̧.

⁷Ŋma bíí nin-a'e Barabas a̧a̧ kɔ̧ zɔɓɔ in o wi nɛ̀ gbɛɛ so bíí tɛ ŋgimbi báá-zu nɛ̀ ŋgɔn in o gasawi.

⁸Nɛ́ mɔ'ɔ nɛ̀ giiwi nɛ̀ɛ̀ tɛ́ Pilat, ɓɛɛ ak a̧ ha̧ a̧ mɛ gbo ŋma wi-zɔɓɔ kpɔk pi̧ nù ha̧ wa, hee mɔ'ɔ n'aa de ɓɔnsɛnɛ ga.

⁹Ɓɛɛ a̧ kifi nú ha̧ wa: «Ɛ́nɛ́ kɔ̧ɔ̧ a̧‘m gbo nɛ́ Wannu ko o Juif h’ɛ́nɛ́ nde?»

¹⁰Wen a̧ iŋa nɛ̀ de-a'e o gasa wan-ɗafi-sɔ̧ aa nɛ́ see mɔ in Jesu, e nɛ̀ a̧ er a̧,

¹¹ɓɛɛ o gasa wan-ɗafi-sɔ̧ a wen ha̧ giiwi mɛ ak Pilat mɛ gbo nɛ́ Barabas pi̧ nù ha̧ wa.

¹²Ɓɛɛ Pilat ak wa woyo: «Nɛ́ ge ɛ́nɛ́ kɔ̧a̧ ha̧‘m mɛ de in wi n’ɛnɛ sa'e Wannu ko o Juif ge nde?»

¹³Ɓɛɛ wa gai mɔ woyo: «Ɛ̀nɛ̀ mgbóí nɛ́ a̧ zu te-diŋa.»

¹⁴Ɓɛɛ Pilat tɔ̧ ha̧ wa: «Nɛ́ ge ɗaŋmɔ ge á̧ a̧ dee bɔɔ ge?» Ɓɛɛ wa gai mɔ nɛ̀ ŋgaya-a siti gan kuti-a: «Ɛ̀nɛ̀ mgbóí nɛ́ a̧ zu te-diŋa wa!»

¹⁵Nɛ́ mɔ'ɔ nɛ̀ Pilat gboo Barabas pi̧ nù ha̧ wa, wen ha̧ see-wa mɛ ga̧. A̧ ha̧a̧ nú, ɓɛɛ wa gusi Jesu, ɓɛɛ a̧ e a̧ er o wi-biro ha̧ wa mɛ nɛ̀ɛ́ mgboi a̧ zu te-diŋa.

¹⁶Nɛ́ mɔ'ɔ nɛ̀ o wi-biro mgbɔɔ Jesu si bee-gara, kɔ̧́ tua ko Pilat, ɓɛɛ wa mɔi̧ oi o dɔka wi-biro lɛŋ.

¹⁷Wa pi̧i̧ gasa gbɛ̧ laa tɛ-a, kar tɛnmɔ gu zu-a,

¹⁸ɓɛɛ zɛkɛɗ‘a'e: «Ɛ̀nɛ̀ wór mɔ wa, wannu ko o Juif!»

¹⁹Wa gusa zu-a nɛ̀ tia, wa aa sap tɛ-a, ɓɛɛ wa gbɛ zugur nù ti a̧ gasi nɛ̀ a̧.

²⁰Wa zɛkɛɗa a̧ kaɗi, ɓɛɛ wa kpɔ̧i̧ gbɛ̧ laa yinɛ, pi̧ nɛ́ laa kɔ̧-a̧ tɛ-a woyo, ɓɛɛ wa mgbɔ a̧ si zan mɛ mgboi a̧ zu te-diŋa.

²¹Wa baa Simɔŋ be Sirɛn, dáà ko Alɛkzandrɛ in Rufus nɛ̀ pii kɔ‘i pii nɛ nú fɔ nɛ̀ mgbánà, ha̧ a̧ mɛ tui te-diŋa ko Jesu.

²²Ɓɛɛ wa mgbɔ Jesu nɛnɛ si fara nɛ̀ wa sa'e Gɔlgɔta, mɛ̀ nɛ́ wen nɛ̀ tɔ̧: «Fara Koŋgoi-zu».

²³Wa kɔ̧ɔ̧ so mɛ ha̧ dɔ̧ɔ̧ nɛ̀‘i zaŋa nɛ̀ ŋma siɗi-te ha̧ Jesu mɛ nɔ, ɓɛɛ a̧ nɔ na.

²⁴Nɛ́ mɔ'ɔ nɛ̀ wa mgboia a̧ zu te-diŋa, ɓɛɛ wa bi mbaɗi, kɛ̧ nɛ̀ laa kɔ̧-a̧ nɛ̀ er ŋmaa.

²⁵Ŋgimbi nɛ̀ wa mgboia nɛ̀ a̧ zu te-diŋa'i, ká wese daŋa ŋgai kaɗi.

²⁶Wa yɔra gba̧a̧ wen fio kɔ̧-a̧ e zu a̧, hee mɔ'ɔ ga: «Wi’ɛ nɛ́ Wannu ko o Juif.»

²⁷Wa hɛra o kpɔ̧i̧-gba̧a̧-nin yiitoo katɛ a̧, kpɔk nɛ̀ war wii-er-a, ɓii-aa nɛ̀ war gale, kóó o ndé zu te-diŋa kɔ‘i. [

²⁸Hegɔ, Yɔramɔ nɛ tɔ̧ɔ̧ so'e: «Wa tɔra a̧ mgbara o ɗaŋwi» wó‘i, hɔɔ gba̧a̧.]

²⁹O wi nɛ ɓir yak fara'i da̧a̧ a̧, wa mi̧a zu-wa, ɓɛɛ wa tɔ̧: «A̧i̧yoo! Mɛ́ yàá-gbin-tua ko Sɔ̧ yinɛ, ɓɛɛ mɛ mboo mbe-a zaŋ zɛ taar wó'ɛ,

³⁰mɛ̀ kpásí tɛ-mɛ nɛ̀ tɛ-mɛ, a̧ mɛ̀ zír zu te-diŋa’ɛ!»

³¹Nɛ́ mɔ'ɔ nɛ̀ o gasa wan-ɗafi-sɔ̧ in o wi-usi-heembea zɛkɛɗa a̧ mbɛt, tɔ̧ nɛnɛ ha̧ o ŋmaa'e: «A̧ baa kpasi so o ŋma bíí, ɓɛɛ sa a̧ nyɛm mɛ kpasi tɛ-a náà, hee ge?

³²Mɛsii, Wannu Israɛl a̧ zír zu te-diŋa kinii, h’ɛ́ɛ́ zɔk, ɛ̀ɛ̀ kɔ̧́ ɗɔaa ha̧ a̧ gɔ!» Ɓɛɛ o wi nɛ̀ wa hɛra zu te-diŋa katɛ a̧ da̧ a̧ mbɛt.

³³Ŋgimbi nɛ̀ wese hɔɔ see zu, tum baa nù fara lɛŋ, hɔ gira-wese.

³⁴Mɛ́ gira-wese, Jesu hiɗa mɔ nɛ̀ ŋgaya-a tɔ̧ nɛnɛ‘e: «Eloi, Eloi, lama sabaktani.» Mɛ̀ nɛ́ wen nɛ̀ tɔ̧: «Sɔ̧ kɔ‘m, Sɔ̧ kɔ‘m wa! Wen ge s’ɛnɛ ea'm duk ge?»

³⁵O ŋma bíí nɛ̀ yaa so hi̧i̧, zia mɔ‘i, ɓɛɛ tɔ̧: «Ɛ̀nɛ̀ zíí, a̧ sa nɛ́ Elii.»

³⁶Ŋma bíí mgbara wa maa yì, nɛ́ɛ̀ pi̧ saala ɗɔɔ kpa̧i̧a̧ dɔ̧ɔ̧, sɔk nú tia, ɓɛɛ nyɛi̧ e nú Jesu mɛ zɔɓi, ɓɛɛ wi’ɛi tɔ̧: «Ɛ̀nɛ̀ é kaŋ; ɛ̀ɛ̀ zɔ́k kà Elii nɛ́ tɛ̀ɛ́ tɛ, mɛ́ zir a̧ zu te-diŋa e nù!»

³⁷Nɛ́ mɔ'ɔ nɛ̀ Jesu hiɗa mɔ nɛ̀ ŋgaya-a, ɓɛɛ fe.

³⁸Ɓɛɛ babir-laa kɔ̧́ Tua ko Sɔ̧ mbaŋ nɛ̀ ŋgɔn hɔ ɗɔɔ.

³⁹Wi-duk-zu o wi-biro gɔmŋmaa nɛ̀ yora ti Jesu, zɔka fea-a n'aa fea'i, ɓɛɛ tɔ̧: «Nɛ́ kpasawen, wi’ɛ duka so nɛ́ Bem ko Sɔ̧!»

⁴⁰O ŋma okoo yaa so sɛn hi̧i̧ nɛ̀ nyɛi̧a-a mbɛt, zɔk nɛ̀ mɔ. Marii Magdala, Marii nàà ko Jak geɗek-a in Jozɛs, ká bá nɛ̀ Salomee a̧a̧ so mgbara wa mbɛt.

⁴¹Wa duka so nɛ́ ɗoŋ Jesu, de nɛ̀ tom ha̧ a̧, ŋgimbi n'aa duka so nú Galilee mɛ. O ŋma okoo nɛ̀ dɔka-a, nɛ̀ daŋa so in a̧ si Jerusalɛm, yaa hi̧i̧ mbɛt.

⁴²Mɔ ga̧a̧ kaɗi, ɓɛɛ hee mɔ'ɔ nɛ̀ wese'i duka nɛ́ wese-ɗafi-mɔ ga, mɛ̀ nɛ́ wen nɛ tɔ̧, ɔɔ-zɛ kpɔk nɛti ha̧ wese-ɔm-tɛ,

⁴³Jozɛf be Arimatee, ŋma gasa wi-gɔn-kita ko o Juif, nɛ̀ pɛm nɛ́ Wan ko Sɔ̧ mbɛt, nɔɔ ŋgiɗi mɛ nɛ̀ɛ́ ak wɔr Jesu er Pilat.

⁴⁴Ɗɛɗɛ Pilat gɔna wen n'aa zia'e Jesu fee kaɗi, ɓɛɛ a̧ sa ŋma wi-duk-zu o wi-biro gɔmŋmaa, ɓɛɛ ak a̧ kà Jesu nɛ́ fee nɛ̀ mbetɛ.

⁴⁵Ɓɛɛ gasawi'i tɔ̧ ha̧ Pilat'e, Jesu fee kaɗi, ɓɛɛ Pilat e war ha̧ Jozɛf mɛ ba wɔr-aa.

⁴⁶Nɛ́ mɔ'ɔ nɛ̀ Jozɛf hi̧fa bu-ndɔmbɔ, ɓɛɛ zir Jesu zu te-diŋa, ye a̧ nɛ̀ bu-ndɔmbɔ‘i, ɓɛɛ nɛ́ɛ̀ gun a̧ sɛn kɔ̧́-fio nɛ̀ wa za̧a̧ so kɔ̧́ ta, ɓɛɛ a̧ kin ta kpe nɛ̀ nú-a.

⁴⁷Marii Magdala in Marii nàà ko Jozɛs yaa zɔk nɛ̀ fara nɛ̀ wa guna a̧ sɛnɛ‘i.