Read Northwest Gbaya MARK 16 Bible Online

MARK 16 - Northwest Gbaya bible

MARK 16

¹Hɔ-ɗoŋ wese-ɔm-tɛ, Marii Magdala, Marii nàà ko Jak in Salomee hi̧fa nɔ̧́-nyama mɛ nɛ̀ɛ́ a tɛ wɔr Jesu.

²Wa kura yak si nú pɛsi-fio mɛ tutuyɛ sut, tɛ kuti wese'i, ɓɛɛ ká wese daŋa kaɗi.

³Ɓɛɛ wa ak ŋmaa: «Nɛ́ o'o tɛ kin ta yinɛ nú pɛsi-fio h’ɛ́ɛ́ o nde?»

⁴Kà wa ba yí-wa nɛ̀ ŋgɔn wó, wa zɔka ta kina so yinɛ kaɗi; ta'i duka so nɛ́ zɔm gasa ta nyɛmna.

⁵Wa yee kɔ̧́ pɛsi, ɓɛɛ wa zɔk ŋma be-ŋgaiwi nɛ̀ duk nú nɛ̀ war wii-er-wa; a̧ pi̧i̧ nɛ́ bu laa, ɓɛɛ kíì de wa nyɛmna.

⁶Nɛ́ mɔ'ɔ nɛ̀ be-ŋgaiwi'i tɔ̧ɔ̧ ha̧ wa: «K’ɛ́nɛ́ de kíì na; wi n’ɛnɛ kii'i nɛ́ Jesu be Nazarɛt, nɛ̀ wa mgboia zu te-diŋa: a̧ bo hɛ̧ɛ̧ na, a̧ kura ŋgɔn kaɗi, ɛ̀nɛ̀ zɔ́k fara nɛ̀ wa ee so a̧ sɛnɛ.

⁷Ɛ̀nɛ̀ nɛ́ɛ̀ tɔ̧́ ha̧ o ŋgaiwi kɔ̧-a̧ in ha̧ Pierre mbɛt'e, a̧ yaka ti h’ɛ́nɛ́ si Galilee mɛ; nɛ́ hi̧i̧ ɛ̀nɛ̀ tɛ zɔk a̧, hee mɔ'ɔ n'aa bàá tɔ̧ so h’ɛ́nɛ́ ga.»

⁸Nɛ́ mɔ'ɔ nɛ̀ wa gboo kɔ̧́ pɛsi-fio, ma yì yak nɛ̀ nyɛi̧a-a, wen kíì dee wa ɓɛɛ tɛ-wa nak nak. Wa tɔ̧ wen'i ha̧ ŋma bíí na, wen kíì hɛra zaŋ-wa. [

⁹Ɗoŋ nɛ̀ Jesu kura ŋgɔn tɛ kuti wese kaɗi, kuti wi n'aa usa tɛ-a ha̧ a̧ nɛ́ Marii Magdala n'aa bàá ndak so ɗaŋ-sɔ̧ mɔɔrɔ-ɗoŋ-yiitoo tɛ-a yinɛ‘i.

¹⁰Nɛ́ mɔ'ɔ nɛ̀ Marii Magdala nɛ̀ɛ̀ tɔ̧ nyɛrɛ mɔ‘i ha̧ o wi nɛ̀ duka so in Jesu, nɛ̀ ya hí̧í̧ nɛ̀ fio.

¹¹Ɓɛɛ wa kɔ̧ ɗɔɔ wen n'aa tɔ̧‘e, Jesu duk kpasa, in wi zɔka a̧‘i, na.

¹²Nɛ̀ ɗoŋ woyo, Jesu usa tɛ ha̧ o ŋma ŋgaiwi kɔ‘i yiitoo nɛ̀ yak si nú fɔ mbɛt.

¹³Nɛ́ mɔ'ɔ nɛ̀ wa pia ɗoŋ, we ɗoŋ wen'i ha̧ o dɔka ŋgaiwi ko Jesu, ɓɛɛ wa kɔ̧ ɗɔɔ wen'i na mbɛt.

¹⁴Sɔŋkur-aa, a̧ usa tɛ-a ha̧ o ŋgaiwi kɔ̧-a̧ ɓu-zua-kpɔk, ŋgimbi nɛ̀ wa nyɔŋ nɛ́ mɔ, ɓɛɛ a̧ tɔ̧ wen ha̧ wa, wen sii-kafɛ in ŋgaya-see kɔ-wa, wen wa kɔ̧ ɗɔɔ wen ko o bíí nɛ̀ zɔka'e a̧ kura ŋgɔn'i na.

¹⁵Ɓɛɛ a̧ tɔ̧ ha̧ wa: «Ɛ̀nɛ̀ nɛ́ dam fara lɛŋ, ɛ̀nɛ̀ úsí De Mbe Wen ko Sɔ̧ ha̧ o bíí lɛŋ.

¹⁶Wi nɛ̀ kɔ̧ɔ̧ ɗɔɔ wen'i, ɓɛɛ nɛ̀ wa tɛ zui a̧, wi’ɛi tɛ kpasi; ɓɛɛ wi nɛ̀ kɔ̧ ɗɔɔ wen'i na, kita tɛ tik a̧.

¹⁷O mɔɔ-kifi nɛ̀ o wi nɛ̀ tɛ kpɛk wen'i tɛ de, nɛ́ mɔ'ɔ: wa tɛ ndak o ɗaŋ-sɔ̧ yinɛ nɛ̀ nin-am, wa tɛ tɔ̧ nú nɛtɛ nɛtɛ;

¹⁸wa tɛ ba o gɔ́k nɛ̀ er-wa, ɓɛɛ kà wa nɔ ŋma ɔ̧nɔ̧, ɔ̧nɔ̧‘i beka de ŋma mɔ in wa na; wa tɛ e er zu o wi-zɛɛ, ɓɛɛ o wi-zɛɛ kpasa.»

¹⁹Gasa Wan Jesu tɔ̧ɔ̧ wen'i ha̧ wa kaɗi, ɓɛɛ daŋ si yiwese,[8] dúk nù nɛ̀ war wii-er Sɔ̧.

²⁰Ɓɛɛ kɔ-wa, Gasa Wan yora ɗoŋ wa, ha̧ nɛ̀ ŋgai ha̧ wa mɛ de o mɔɔ-kifi, wen ha̧ o bíí mɛ iŋ‘e wen nɛ̀ wa tɔ̧‘i nɛ́ kpasawen.]