Read Northwest Gbaya MARK 5 Bible Online

MARK 5 - Northwest Gbaya bible

MARK 5

¹Wa hɔɔ kur tɔp nù ko o bíí Gerasa.

²Jesu biti zira-a nɛ̀ kɔ̧́ kombon, ɓɛɛ ŋma bíí nɛ̀ ɗaŋ-sɔ̧ duk tɛ̀, we ti a̧ tɛnɛ. Wi’ɛi gboo nɛ̀ kɔ̧́ pɛsi-fio.

³Fara-ɔ-sɛnɛ kɔ̧-a̧ nɛ́ kɔ̧́ pɛsi-fio, ɓɛɛ bíí nyɛm so mɛ hɛr a̧ na, kóó nɛ̀ nyak-boi na mbɛt,

⁴wen wa duka so pi̧ nɛ́ poka naŋ-a nɛti hɛr nɛ̀ a̧ nɛ̀ nyak-boi, ɓɛɛ a̧ gbina poka'i, ŋman nɛ̀ nyak-boi tɛ-a yinɛ a nù. Ɓɛɛ ŋma bíí nyɛm so mɛ de ha̧ tɛ-a mɛ gbin na.

⁵Zɛ nɛ̀ wese wi’ɛi duk kɔ̧́ pɛsi-fio in sɛn zu kaya mɛ, hiɗi nɛ̀ mɔ, e nɛ̀ da̧i̧ tɛ̀ nɛ̀ ta.

⁶A̧ zɔka Jesu nɛ̀ nyɛi̧a-a, ɓɛɛ a̧ ma yì nɛ́ɛ̀ gu nù ti a̧,

⁷ɓɛɛ hiɗi mɔ tɔ̧ nɛnɛ‘e: «Jesu, Bem ko Sɔ̧ ŋgɔn mɛ! Ge a̧ mɛ kíí zu'm ge? Mi aia nú ha̧ mɛ nɛ̀ nin Sɔ̧, ká mɛ́ usi bɔnɛ ha̧‘m na.»

⁸(Wen Jesu tɔ̧ɔ̧ so kaɗi'e ndé: «Ɗaŋ-sɔ̧, mɛ̀ gbó tɛ̀ wi’ɛ!»)

⁹Ɓɛɛ Jesu ak ɗaŋ-sɔ̧‘i: «Nin-mɛ nɛ́ o?» A̧ kifa nú ha̧ Jesu: «Nin-am nɛ́ Gíí wi-biro, wen ɛ́ɛ́ ɔ dɔka.»

¹⁰Ɓɛɛ ɗaŋ-sɔ̧‘i ai nú ha̧ Jesu wen ká a̧ tɛ̀ɛ́ ndak wa gbonɛ tɛ nù‘i.

¹¹O gíí ŋgɔya yaa so nyɔŋ nɛ̀ mɔ ká̧ naŋ kaya hi̧i̧.

¹²Nɛ́ mɔ'ɔ nɛ̀ o ɗaŋ-sɔ̧ nɔ‘i aia nú ha̧ Jesu, ɓɛɛ tɔ̧ ha̧ a̧: «Mɛ̀ fó yɛ sitɛ o ŋgɔya nɔ'ɔ h’ɛ́ɛ́ yé tɛ-wa.»

¹³Ɓɛɛ Jesu e war ha̧ wa. Nɛ́ mɔ'ɔ nɛ̀ wa gboo, ye tɛ̀ o ŋgɔya nɔ‘i, ɓɛɛ ŋgɔya, hee booro-yiitoo ga, gbin nɛ̀ zu kaya a ɗɔɔ tɔp, ɓɛɛ fe yì lɛŋ.

¹⁴O wi-dai-ŋgɔya yuu mɔ, ɓɛɛ nɛ́ɛ̀ tɔ̧ nyɛrɛ mɔ nɛ̀ yaka sɛn tɛ gasa ye in tɛ o be ye, ɓɛɛ o bíí gar nɛnɛ mɛ zɔk mɔ nɛ̀ yaka'i.

¹⁵O bíí hɔɔ katɛ Jesu, ɓɛɛ wa zɔk wi nɛ̀ Gíí wi-biro ɗaŋ-sɔ̧ duka so tɛ-a'i fara duk nù; zu-a pia ɗoŋ, ɓɛɛ a̧ pi̧i̧ laa kaɗi mbɛt. Kíì dee wa nyɛmna.

¹⁶O wi nɛ̀ yaa oi mɔ‘i wee ɗoŋ mɔ nɛ̀ yaka tɛ wi nɛ̀ ɗaŋ-sɔ̧ duka so tɛ-a'i, in mɔ nɛ̀ hɔɔ zu o ŋgɔya, ha̧ wa.

¹⁷Ɓɛɛ o wi nɔ‘i ai nú ha̧ Jesu mɛ e nù kɔ-wa duk.

¹⁸Jesu yee kombon woyo, ɓɛɛ wi nɛ̀ ɗaŋ-sɔ̧ duka so tɛ-a'i ai nú mɛ nɛ in a̧.

¹⁹Jesu bɛ̧a̧, ɓɛɛ tɔ̧ ha̧ a̧: «Mɛ̀ sí ɗoŋ nutua kɔ-mɛ tɛ o bíí kɔ-mɛ, ɓɛɛ mɛ̀ wé ɗoŋ mɔ lɛŋ nɛ̀ Gasa Wan dee ha̧ mɛ tɛ deako kɔ̧-a̧.»

²⁰Nɛ́ mɔ'ɔ nɛ̀ wi’ɛi yaka, ɓɛɛ a̧ ku̧naŋ yara-a sɛn nú Dekapol, tɔ̧ nɛ̀ nyɛrɛ mɔ nɛ̀ Jesu dee ha̧ a̧, ɓɛɛ ɗɛɗɛ bíí lɛŋ gɔn.

²¹Ɗoŋ nɛ̀ Jesu kuu tɔp nɛ̀ kombon si ɗoŋ kur mɛ kaɗi, gba giiwi mɔi̧a ŋmaa katɛ a̧, ɓɛɛ a̧ duk kɔ̧-a̧ ká̧ ŋgere tɔp'i.

²²Jairus, ŋma kpɔk mgbara o wi-duk-zu tua-mɔi̧a-a, hɔa. Ŋgimbi n'aa zɔka Jesu, a̧ hɔ̧fa̧ tik nù ká̧ naŋ-a,

²³ɓɛɛ gɔm er ha̧ a̧‘e: «Boko-bem kɔ‘m hɛɗa mɛ fe kaɗi; ɛ̀nɛ̀ tɛ́ɛ̀ e er'nɛ́ zu a̧ ha̧ a̧ kpásí.»

²⁴Jesu yaka in Jairus, ɓɛɛ o giiwi nɛ́ ɗoŋ-aa nɔ nɛ̀ ŋmaa in a̧.

²⁵Ŋma okoo duka so hi̧i̧ mbɛt; dee pɛ ɓu-zua-yiitoo a̧ tɔk gbo nɛ̀ a̧.

²⁶A̧ zɔka bɔnɛ nyɛmna er o dɔka wi-de-nyina; a̧ ɗaŋa mɔ kɔ̧-a̧ lɛŋ wen zu nyina, ɓɛɛ zu-a'i tɛ-a kpa daama na. Zɛɛ kɔ̧-a̧‘i ŋgai ŋgai siti.

²⁷Ɓɛɛ nɛ́ mɔ'ɔ nɛ̀ kóò‘i zia nyɛrɛmɔ ko Jesu. A̧ wɛna giiwi tan nɛ̀ ɗoŋ Jesu, ɓɛɛ tam nú laa kɔ̧-a̧,

²⁸wen a̧ tàà so'e bàn nɛ̀‘i tam nɛ́ géé nú-laa kɔ̧-a̧, ɓɛɛ wi kpasa.

²⁹Ɓɛɛ tɔk nɛ̀ gboo so a̧‘i, gɔn tɛ́ kale kpɔk ŋgimbi'i, ɓɛɛ a̧ iŋ‘e wi kpasa kaɗi.

³⁰Soɓee, Jesu iŋa'e ŋma ŋgai gboo tɛ-wi. A̧ zika tɛ-a sitɛ giiwi, ɓɛɛ ak mɔ: «Nɛ́ o'o tama laa kɔ‘m o?»

³¹Ɓɛɛ o ŋgaiwi kɔ̧-a̧ kifi nú ha̧ a̧‘e: «Ɛ́nɛ́ zɔka giiwi nɔ́ nɛ́ ŋmaa in'nɛ̀ɛ́, ɓɛɛ ɛ́nɛ́ tɛ ak bɔɔ mɔ‘e, nɛ́ o'o foo'nɛ́ o ndé wó'ɛ, héé ge?»

³²Jesu zɔka mɔ katɛ zik kpa ɗɛ́kɛ́t mɛ iŋ wi nɛ̀ dee mɔ‘i.

³³Kíì dee kóò‘i, ɓɛɛ a̧ tɛ nɛ̀ naka-tɛ, wen a̧ iŋa mɔ nɛ̀ hɔa'i; a̧ guu nù ti Jesu, ɓɛɛ tɔ̧ kpasawen lɛŋ ha̧ a̧.

³⁴Ɓɛɛ Jesu tɔ̧ ha̧ a̧: «Boko-bem kɔ‘m, nɛ́ kɔ̧ɔ̧ɗɔɔwen kɔ-mɛ a̧ kpasa mɛ; mɛ̀ yák zaŋ ga̧a̧mɔ, ɓɛɛ zɛɛ kɔ-mɛ a̧ káɗí.»

³⁵Jesu ɓɔna fara tɔ̧ɔ̧ wen, ɓɛɛ o ŋma bíí gɔm nɛ̀ tɛ̀ ko wi-duk-zu tua-mɔi̧a-a, ɓɛɛ tɔ̧: «Boko-bem kɔ-mɛ fee kaɗi, ká mɛ́ gba zu Wan-usi-mɔ sɔɔ géè na.»

³⁶Jesu bɔŋ kɔ‘i wen'i na, ɓɛɛ tɔ̧ ha̧ wi-duk-zu tua-mɔi̧a-a: «Ká mɛ de kíì na; mɛ̀ kɔ̧́ ɗɔaa ɓɛɛ!»

³⁷Jesu e ha̧ ŋma bíí mɛ nɛ in a̧ na, kànà nɛ́ Pierre, in Jak in Jean nya Jak ɓɛɛ.

³⁸Wa hɔɔ tɛ̀ ko wi-duk-zu tua-mɔi̧a-a, ɓɛɛ Jesu kpa o bíí fara zaŋ wen, wa hi̧i̧ nɛ́ kɔ̧a̧, hiɗi nɛ̀ mɔ nɛ̀ ŋgaya-a.

³⁹Jesu yee tua, ɓɛɛ tɔ̧ ha̧ wa: «Ɛ́nɛ́ zaŋ wen, hi̧i̧ nɛ̀ kɔ̧a̧ hegɔ, wen ge? Bem’ɛ fe na, a̧ ɔ mɔ kɔ̧-a̧ nɛ́ yá.»

⁴⁰Ɓɛɛ wa zɛkɛɗ‘a. A̧ foo bíí lɛŋ si zan kaɗi, ɓɛɛ a̧ mgbɔ dáà in nàà ko bem’ɛi, ká bá nɛ̀ o wi nɛ tɛ̀ɛ̀ in a̧, si kɔ̧́ tua, ɓɛɛ a̧ ye si fara nɛ̀ bem’ɛi ɔ nù sɛnɛ‘i.

⁴¹A̧ kasa er-a, ɓɛɛ a̧ tɔ̧ ha̧ a̧: «Talita kum!» Mɛ̀ nɛ́ wen nɛ tɔ̧‘e: «Be-okoo’ɛ, mi'e mɛ̀ tún!»

⁴²Soɓee, ká boko-bem’ɛi kura katak, ɓɛɛ nɛ́ nɔ̀, wen a̧ a̧a̧ nɛ̀ pɛ ɓu-zua-yiitoo. Ɓɛɛ ɗɛɗɛ bíí lɛŋ gɔn.

⁴³Jesu mboo nú-wa wen ká wa tɛ́ɛ̀ tɔ̧ nyɛrɛ mɔ‘i ha̧ ŋma bíí, ɓɛɛ a̧ tɔ̧ ha̧ wa mɛ ha̧ nyɔŋmɔ ha̧ bem’ɛi.