Read Northwest Gbaya MARK 6 Bible Online

MARK 6 - Northwest Gbaya bible

MARK 6

¹Jesu kura fara'i nɛ́ si nù kɔ‘i, ɓɛɛ o ŋgaiwi kɔ̧-a̧ nɛ́ in a̧.

²Wese-ɔm-tɛ, a̧ usa mɔ kɔ̧́ tua-mɔi̧a-a. O bíí nɛ̀ dɔka-a zia usamɔ‘i, ɗɛɗɛ-wa gɔna, ɓɛɛ wa tɔ̧: «A̧ kpaa mɔ‘i déè? Iŋa-mgbara-mɔ n'aa de nɛ̀ pɛrti mɔɔ-kifi nɔ'ɔ, a̧ kpaa bɔɔ déè?

³Bó nɛ́ a̧ nɛ́ wi-sɛk-te, bem ko Marii, ɓɛɛ bó nɛ́ o nya-a̧ nɛ́ Jak, in Jozɛs, in Judɛ ká bá nɛ̀ Simɔŋ na nde? Bó nɛ́ o boko-nya-a̧ duk in yɛ̀ɛ́ hɛ̧ɛ̧ na nde?» Ɓɛɛ nɛ́ mɔ‘i a̧ dee ha̧ wa mɛ sakali zu a̧.

⁴Ɓɛɛ Jesu tɔ̧ ha̧ wa: «O dɔka bíí yu wi-tɔ̧-wen oi nú Sɔ̧ yuu, ɓɛɛ kànà nɛ́ o bíí nù kɔ̧-a̧, in o bíí nutua kɔ̧-a̧ a̧ yu a̧ na ɓɛɛ.»

⁵Ɓɛɛ Jesu nyɛm mɛ de ŋma mɔɔ-kifi hi̧i̧ kpɔk yak zu nyɛi̧a er n'aa nyɛi̧a kpasi nɛ̀ o ŋma wi-zɛɛ na.

⁶Ɗɛɗɛ-a gɔna, wen wa kɔ̧ ɗɔaa ha̧ a̧ na. Jesu yara dam saaye lɛŋ nɛ̀ yaa zik fara'i, usi nɛ̀ mɔ.

⁷A̧ saa o ŋgaiwi kɔ̧-a̧ ɓu-zua-yiitoo, ɓɛɛ tom wa yiitoo yiitoo mɛ usi wen ko Sɔ̧ nɛnɛ, ɓɛɛ a̧ sur wa ha̧ wa mɛ kpa ŋgai zu o ɗaŋ-sɔ̧.

⁸A̧ tɔ̧a̧‘e ká wa ba ŋma mɔ er wa wen yuwar na, kànà nɛ́ dɔra kɔ-wa ɓɛɛ. Ká wa ba nyɔŋmɔ in ŋgoɓo sede na. Ká wa ba be kɔya sede ɓam tɛ kanda kɔ-wa na mbɛt.

⁹A̧ tɔ̧ɔ̧ ha̧ wa: «Ko ndárà, ɛ̀nɛ̀ á naŋ‘nɛ́, ɓɛɛ k’ɛ́nɛ́ kai laa yiitoo na.»

¹⁰A̧ tɔ̧ɔ̧ woyo: «K’ɛ̀nɛ̀ nɛ́ zira kɔ̧́ ŋma tua, ɓɛɛ ɛ̀nɛ̀ ɔ́ kànà kɔ̧̀ kpɔk tua'i hɔ wese n’ɛnɛ tɛ kur yak.

¹¹Ɓɛɛ fara nɛ̀ o bíí kpɛk'nɛ́ sɛnɛ na, nɛ̀ wa kɔ̧́ zia wen k’ɛ́nɛ́ sɛnɛ na mbɛt, ɛ̀nɛ̀ gbó hi̧i̧, ɓɛɛ ɛ̀nɛ̀ mgbɔ́ fuunu naŋ‘nɛ́ a nù fara'i; mɔ‘i tɛ duk nɛ́ mɔɔ-sedaako yí-wa.»

¹²Nɛ́ mɔ'ɔ nɛ̀ o ŋgaiwi nɔ‘i ɓu-zua-yiitoo'i yaka, ɓɛɛ wa tɔ̧ ha̧ o bíí mɛ kpai duka-a kɔ-wa.

¹³Wa ndaka o ɗaŋ-sɔ̧ nɛ̀ dɔka-a yinɛ tɛ o bíí, wa tɛna nɔ̧́ a zu o wi-zɛɛ nɛ̀ dɔka-a kpasi nɛ̀ wa mbɛt.

¹⁴Wannu Herod zia nyɛrɛmɔ ko Jesu, wen nin-a hura so nyɛmna, o bíí duka so tɔ̧‘e: «Nɛ́ Jean Zui-bíí a̧ kura ŋgɔn tɛ fio, ɓɛɛ sa a̧ kpa ŋgai; nɛ mɔ'ɔ n'aa de nɛ̀ mɔɔ-kifi nɛnɛ'ɛ.»

¹⁵O ŋma bíí tɔ̧a̧: «Nɛ́ Elii.» Ɓɛɛ o ŋma tɔ̧ kɔ‘i'e: «Nɛ́ ŋma wi-tɔ̧-wen oi nú Sɔ̧ nɛ̀ hɔɔ ŋmaa in o wan nɛ̀ yaa so ɓeemɛ ɛ̧.»

¹⁶Herod zia wen'i hegɔ ɓɛɛ tɔ̧: «Nɛ́ Jean Zui-bíí n'am ɓira so zu-a pi̧ nù a̧ kura ŋgɔn woyo.»

¹⁷Wen mɛ̀ nɛ́ Herod a̧ bàá tom bíí mɛ ba Jean hɛr pi̧ kɔ̧́ zɔɓɔ wen zu Herodiad kóò ko Filip nya Herod. Herod bàà so Herodiad nɛ̀ kóò,

¹⁸ɓɛɛ Jean duka so tɔ̧ nɛnɛ ha̧ Herod'e ndé: «Heembea e war ha̧ mɛ mɛ ba kóò ko nya-mɛ na.»

¹⁹Herodiad sɛna Jean wen mɔ‘i. A̧ kia war mɛ gbɛ a̧, ɓɛɛ a̧ kpa war-a na,

²⁰wen Herod duka so yu Jean. Herod iŋa'e Jean nɛ́ bíí ko Sɔ̧ nɛ̀ de mɔ nɛ̀ yuwar-a, ɓɛɛ a̧ e ha̧ ŋma bíí mɛ de ɗaŋmɔ in a̧ na. Wen ko Jean sakala a̧, ɓɛɛ, zu-a'i, a̧ kɔ̧ɔ̧ mɛ zii wen'i mbɛt.

²¹Ŋma wese Herod dee gbaŋa wese nɛ̀ nàà kɔ̧-a̧ kòó nɛ̀ a̧, ɓɛɛ Herodiad kpa war mɛ de ha̧ wa mɛ gbɛ Jean. Wese'i Herod saa o gasa bíí kɔ‘i in o gasa wi-biro, ká bá nɛ̀ o gasawi nú Galilee mɛ, ha̧ wa mɛ tɛ̀ɛ́ nyɔŋ mɔ in a̧.

²²Ɓɛɛ boko-bem ko Herodiad tɛ̀ɛ̀ yɔ yɔyɛ, ɓɛɛ boko-bem’ɛi de tɛ Herod in o bíí n'aa saa so tɛnɛ‘i, ɓɛɛ Herod ha̧ nú ha̧ boko-bem’ɛi: «Mɔ nɛ̀ mɛ kɔ̧ɔ̧ lɛŋ, mɛ̀ ák er-am, ɓɛɛ mi tɛ ha̧ mɛ.»

²³Ɓɛɛ a̧ kan mɔ ti boko-bem’ɛi hee mɔ'ɔ ga: «Mɔ lɛŋ nɛ̀ mɛ tɛ ak er-am, mi tɛ ha̧ mɛ, kóó reeta mɔɔ-wan kɔ‘m mbɛt.»

²⁴Boko-bem’ɛi gboa, ɓɛɛ nɛ́ɛ̀ tɔ̧ ha̧ nàà kɔ‘i: «A̧‘m ák nɛ́ ge?» Ɓɛɛ nàà kɔ̧-a̧ kifi nú ha̧ a̧: «Mɛ̀ ák nɛ́ gɔ̀ɔ́-zu Jean Zui-bíí.»

²⁵Boko-bem’ɛi maa yì si ɗoŋ tɛ Herod ɓɛɛ tɔ̧ ha̧ a̧: «Mi kɔ̧ɔ̧ h’ɛ́nɛ́ mɛ ha̧ nɛ́ gɔ̀ɔ́-zu Jean Zui-bíí sɛn kɔ̧́ tasi ha̧‘m kinii kinii.»

²⁶See wannu ɗaŋa, ɓɛɛ a̧ kɔ̧ mɛ bɛ̧ na, wen zu kanamɔ n'aa kànà so in wen foe yí o bíí n'aa saa so'i,

²⁷ɓɛɛ a̧ tom ŋma wi-biro nɛ̀ pɛm a̧ nɛ̀ haya-a mɛ ba gɔ̀ɔ́-zu Jean Zui-bíí tɛnɛ. Wi-biro'i yaka nɛ́ɛ̀ ɓir zu Jean Zui-bíí kɔ̧́ zɔɓɔ mɛ,

²⁸ba piinɛ ɗoŋ kɔ̧́ tasi ha̧ boko-bem’ɛi, ɓɛɛ boko-bem’ɛi ba ha̧ nàà kɔ‘i.

²⁹O ŋgaiwi ko Jean zia nyɛrɛ mɔ‘i, ɓɛɛ wa tɛ́ɛ̀ ba wɔr-aa gun.

³⁰O betom ko Jesu pia ɗoŋ katɛ a̧, ɓɛɛ we ɗoŋ mɔ nɛ̀ wa dea in mɔ nɛ̀ wa usa lɛŋ ha̧ a̧.

³¹Ɓɛɛ a̧ tɔ̧ ha̧ wa: «Ɛ̀nɛ̀ tɛ́ in am si fara nɛ̀ bíí bo sɛnɛ na, h’ɛ́nɛ́ ɔ́m tɛ‘nɛ́ sɛ́.» Wen o bíí nɛ̀ tɛ́ tɛ̀ɛ́ in o wan nɛ̀ sí sìí dɔka nyɛmna, ɓɛɛ o ŋgaiwi ko Jesu kpa géé be ŋgimbi mɛ nyɔŋ mɔ na mbɛt.

³²Nɛ́ mɔ'ɔ nɛ̀ wa yee kombon, ɓɛɛ wa kai ŋmaa yak si fara nɛ̀ o bíí bo sɛnɛ na.

³³O bíí zɔka wa fara yaka-a, ɓɛɛ o ŋma dɔka bíí iŋ ti wa. Nɛ́ mɔ'ɔ nɛ̀ o bíí kura nɛ̀ tɛ o ye nɛtɛ nɛtɛ lɛŋ nɛ̀ naŋ. Wa maa yì ɓɛɛ wa hɔ fara'i ti ha̧ Jesu in o ŋgaiwi kɔ‘i.

³⁴Jesu zira kɔ̧ kombon, ɓɛɛ zɔk gba giiwi. Ko dee a̧ ha̧ wa wen wa ya hee o sami nɛ̀ wi-daia-a bo na ga; ɓɛɛ a̧ usi mɔ nɛ̀ dɔka-a ha̧ wa.

³⁵Mɔ ga̧a̧ kaɗi, ɓɛɛ o ŋgaiwi ko Jesu ɗɔli si katɛ a̧ tɔ̧ ha̧ a̧: «Fara’ɛ nɛ́ géé zaŋbɛɛ, ɓɛɛ mɔ ga̧a̧ kaɗi mbɛt.

³⁶Ɛ̀nɛ̀ tɔ̧́ ha̧ wa pɛsi sitɛ o be ye in si saaye nɛ̀ ya katɛ yɛ hɛ̧ɛ̧ ha̧ wa hí̧fí nyɔŋmɔ.»

³⁷Ɓɛɛ Jesu kifi nú ha̧ o ŋgaiwi kɔ‘i: «Ɛ́nɛ́ nɛ̀ tɛ̀‘nɛ́, ɛ̀nɛ̀ há̧ nyɔŋmɔ ha̧ wa.» Ɓɛɛ wa kifi nú ha̧ a̧: «Ɛ́nɛ́ kɔ̧ɔ̧ so ɛ̀ɛ̀ nɛ́ɛ̀ hi̧fi brɛt tɛ kɔya-sede gɔmŋmaa yiitoo sɛk’ɛɛ ha̧a̧ ha̧ wa nyɔŋ nde?»

³⁸Jesu tɔ̧ɔ̧ ha̧ wa: «Ɛ́nɛ́ a̧a̧ nɛ̀ brɛt er'nɛ́ géè? Ɛ̀nɛ̀ nɛ́ɛ̀ zɔ́k mɔ.» Wa zɔka mɔ kaɗi, ɓɛɛ wa tɔ̧ ha̧ Jesu: «Nɛ́ brɛt mɔɔrɔ in zoro yiitoo ɓɛɛ.»

³⁹Ɓɛɛ Jesu tɔ̧ ha̧ wa mɛ de ha̧ o bíí mɛ ya nù zu mbɔɗi zɔ̧ nɛ̀ dùk-aa,

⁴⁰tɛ̀ o dùk-aa gɔmŋmaa gɔmŋmaa in ɓu-mɔɔrɔ ɓu-mɔɔrɔ.

⁴¹Nɛ́ mɔ'ɔ nɛ̀ Jesu kaia brɛt mɔɔrɔ in zoro yiitoo'i, ɓɛɛ a̧ ɓer yí-a si yiwese, de osoko ha̧ Sɔ̧, ɓɛɛ gbin brɛt'i ha̧ ha̧ o ŋgaiwi kɔ̧-a̧ mɛ kɛ̧ nɛ́nɛ́ ha̧ o bíí. A̧ kɛ̧ɛ̧ zoro nɔ‘i yiitoo'i dam nɛ̀ bíí lɛŋ mbɛt.

⁴²Bíí lɛŋ nyɔŋa mɔ zaŋ sur,

⁴³ɓɛɛ wa ndɛm oi brɛt in zoro nɛ̀ ɓɔna dun gɛsɛ ɓu-zua-yiitoo.

⁴⁴Wiwii lɛŋ nɛ̀ nyɔŋa mɔ duka nɛ́ bíí booro-mɔɔrɔ.

⁴⁵Ɗoŋ mɔ‘i, ɓɛɛ Jesu tɔ̧ ha̧ o ŋgaiwi kɔ‘i mɛ ye kombon mɛ ku yì yak ti si Bɛtsaida mɛ, ha̧ a̧ mɛ fo o giiwi sinɛ.

⁴⁶A̧ foo wa sinɛ kaɗi, ɓɛɛ a̧ daŋ zu kaya mɛ nɛ̀ɛ́ kɔfi Sɔ̧.

⁴⁷Mɛ́ fi̧i̧-mɔ, kombon a̧a̧ see yì, ɓɛɛ a̧ biti zan mɛ ɛ̀nɛ́-a.

⁴⁸Jesu zɔka'e o ŋgaiwi kɔ‘i ba kombon takaɗi wen nɛ̀ búk yu yuu kpai nɛ̀ wa; ɓɛɛ mɛ hèèmɔ-kɔra kpɔk, a̧ nɛ̀ɛ́ nɔ̀ nɛ̀ zu yì sitɛ wa; a̧ kɔ̧ɔ̧ so mɛ ɓir wa yak.

⁴⁹Wa zɔka a̧ fara nɛ́ɛ́ nɔ̀ nɛ̀ zu yì, ɓɛɛ wa ta kɔ-wa'e nɛ́ hɔɔ-tɛ-bíí, ɓɛɛ wa a nú tɛ hiɗimɔ.

⁵⁰Wa lɛŋ zɔka a̧, ɓɛɛ kíì de wa nɛ̀ dɔka-a. Soɓee, a̧ tɔ̧ɔ̧ wen sitɛ wa'e: «Ɛ̀nɛ̀ nɔ́ ŋgiɗi, mɛ nɛ́ mi, k’ɛ́nɛ́ de kíì na.»

⁵¹A̧ daŋa kombon sitɛ wa, ɓɛɛ búk kaɗi yua-a; ɗɛɗɛ-wa gɔna nyɛmna tɛ mɔ‘i,

⁵²ɓɛɛ wa iŋ mgbara mɔɔ-kifi n'aa dee so nɛ̀ brɛt'i na mbɛt, wen see-wa ɔ ŋgaya.

⁵³Wa kuu yì hɔ nú Genezarɛt, ɓɛɛ wa kun kombon.

⁵⁴Nɛ̀ wa zira mbɔɗɔnu kaɗi, o bíí iŋa'e mɛ̀ nɛ́ Jesu;

⁵⁵ɓɛɛ o bíí ma yì dam fara lɛŋ tɛ nù‘i, ɓɛɛ wa gɔ o wi-zɛɛ nɛ̀ o mɔɔ-gɔ-wi nɛnɛ ha̧ a̧, si fara nɛ̀ wa iŋa'e a̧ a̧a̧ sɛnɛ‘i.

⁵⁶Fara nɛ̀ Jesu hɔ sɛnɛ lɛŋ, kóó nɛ́ geɗek ye, kóó nɛ́ gasa ye, kóó nɛ́ ye nú-fɔ mbɛt, wa kai nɛ́ o wi-zɛɛ a bee-gara, ɓɛɛ wa gɔma er ti Jesu mɛ e ha̧ o wi-zɛɛ nɔ‘i mɛ tam géé nú-laa kɔ̧-a̧, ɓɛɛ o wi nɛ̀ tama nú-laa'i lɛŋ kpasa.