Read Northwest Gbaya LUK 10 Bible Online

LUK 10 - Northwest Gbaya bible

LUK 10

¹Ɗoŋ mɔ‘i, Gasa Wan hoka o ŋma ŋgaiwi ɓu-mɔɔrɔ-ɗoŋ-yiitoo-zua-yiitoo[10], ɓɛɛ tom wa yiitoo yiitoo yak ti si saaye in fara lɛŋ n'aa tɛ nɛ̀ sɛnɛ.

²A̧ tɔ̧ɔ̧ ha̧ wa: «Nyɔnɔ dɛma nyɛmna, ɓɛɛ o wi-de-tom-aa dɔk na; wen hegɔ, ɛ̀nɛ̀ áí nú ha̧ wan-nyɔnɔ mɛ tom o wi-de-tom si fara-mɔi̧-nyɔnɔ kɔ̧-a̧.

³Ɛ̀nɛ̀ nɛ́! Mi tom nɛ́ ɛ́nɛ́ hee o be-sami mgbara o gbóò ga.

⁴K’ɛ́nɛ́ ba ŋgoɓo sede, ŋgoɓo-a-mɔ, in ndárà na, k’ɛ́nɛ́ fan bíí nɛ̀ yuwar na mbɛt.

⁵Nɛti h’ɛ́nɛ́ mɛ ye ŋma tua, ɛ̀nɛ̀ tɔ̧́‘e, ga̧a̧mɔ a̧ yé kɔ̧́ tua'i.

⁶Kà wan-tua'i nɛ́ duka nɛ́ bíí nɛ̀ kpɛka ga̧a̧mɔ ko Sɔ̧, ɓɛɛ ga̧a̧mɔ k’ɛ́nɛ́ tɛ duk zu-a; kà bó hegɔ na, ɓɛɛ ga̧a̧mɔ k’ɛ́nɛ́ tɛ pii ɗoŋ zu'nɛ́.

⁷Ɛ̀nɛ̀ ɔ́ kɔ̧́ tua'i, nyɔŋ nɛ̀ mɔ, nɔ nɛ̀ mɔ nɛ̀ wa tɛ ha̧‘nɛ́; wen wi-de-tom kpa kànà nɛ́ mɔɔ-oi-tom kɔ‘i. K’ɛ́nɛ́ ndɛn nɛ̀ kɔ̧́ tua nɛnɛ na.

⁸Ye n’ɛnɛ tɛ hɔ sɛnɛ lɛŋ, kà bíí kpɛk'nɛ́, ɓɛɛ ɛ̀nɛ̀ nyɔ́ŋ mɔ nɛ̀ wa tɛ ha̧ h’ɛ́nɛ́‘i;

⁹ɛ̀nɛ̀ kpásí o wi-zɛɛ nɛ a̧a̧ saaye'i, ɓɛɛ ɛ̀nɛ̀ tɔ̧́ ha̧ wa'e ndé: ‹Wan ko Sɔ̧ hɔɔ tɛ‘nɛ́ kaɗi.›

¹⁰Ɓɛɛ ye n’ɛnɛ tɛ hɔ sɛnɛ lɛŋ nɛ̀ wa beka kpɛk'nɛ́ na, ɛ̀nɛ̀ nɛ́ɛ̀ yór bee-gara, ɓɛɛ ɛ̀nɛ̀ tɔ̧́:

¹¹‹Géé fuunu saaye k’ɛ́nɛ́ nɛ̀ baa naŋ yɛ'ɛ, nɛ́ mɔ'ɔ n’ɛɛ mgbɔ a nù h’ɛ́nɛ́'ɛ. Ɓɛɛ ɛ̀nɛ̀ íŋ kana'e Wan ko Sɔ̧ hɔɔ kaɗi.›

¹²Nɛ́ mɔ‘i sa'm tɔ̧ h’ɛ́nɛ́‘e wese kita, kita tɛ ŋgai zu ye'i gan ko Sɔdɔm.»

¹³«Bɔnɛ a̧a̧ zu'nɛ́ o bíí Korazin! Bɔnɛ a̧a̧ zu'nɛ́ o bíí Bɛtsaida! Wen o mɔɔ-kifi nɛ̀ dee mgbara'nɛ́, a̧ dé so sɛn Tir in Sidɔŋ, o bíí ye nɔ‘i tɛ̀ɛ́ gaɓi so tɛ nɛ̀ bufu in wa tɛ̀ɛ́ a so bùk zu-wa mbɛt nɛ̀ haya-a mɛ usi'e wa kpaia duka-a kɔ-wa.

¹⁴Nɛ̀ mbetɛ, wese kita, kita tɛ ŋgai zu'nɛ́ gan ko o bíí Tir in Sidɔŋ.

¹⁵K’ɛ́nɛ́, o bíí Kafarnaum, ɛ́nɛ́ tá k’ɛ́nɛ́‘e, ɛ́nɛ́ tɛ kusi hɔ yiwese mɛ nde? Ɛ́nɛ́ tɛ zir zir hɔ fara ko o fio mɛ.

¹⁶«Wi nɛ̀ zii wen nú‘nɛ́, zii nɛ́ wen nú‘m; ɓɛɛ wi nɛ̀ bɛ̧‘nɛ́, bɛ̧ nɛ́‘m mbɛt, ɓɛɛ wi nɛ̀ bɛ̧‘m, bɛ̧ nɛ́ wen nú wi nɛ̀ toma'm tɛnɛ.»

¹⁷Nɛ́ mɔ'ɔ nɛ̀ o ŋgaiwi ɓu-mɔɔrɔ-ɗoŋ-yiitoo-zua-yiitoo nɔ‘i pia ɗoŋ nɛ̀ desee ɓɛɛ tɔ̧: «Gasa Wan, o ɗaŋ-sɔ̧ mbɛt mbo nɛ́ zu h’ɛ́ɛ́ wen zu nin'nɛ́!»

¹⁸Ɓɛɛ Jesu tɔ̧ ha̧ wa: «Mi zɔka so Satan nɛ̀ hɔ̧fa̧ tik nù nɛ̀ yiwese hee pi̧i̧-kórò ga.

¹⁹Wen hegɔ, mi ha̧a̧ ŋgai h’ɛ́nɛ́ mɛ i̧si̧ o gɔ́k in o tore, in h’ɛ́nɛ́ mɛ gan zu ŋgayamɔ ko wisɛn lɛŋ mbɛt, ɓɛɛ ŋma mɔ beka de ɗaŋmɔ in'nɛ̀ɛ̀ na.

²⁰Ɓɛɛ ká tortɛ ba'nɛ́ wen nɛ̀ o ɗaŋ-sɔ̧ mbo nɛ́ zu h’ɛ́nɛ́ na, ɓɛɛ tortɛ a̧ bá‘nɛ́ wen nɛ̀ nin'nɛ́ yɔra yiwese mɛ kaɗi.»

²¹Ŋgimbi'i, Sa̧a̧ Ɔmi dee ha̧ tortɛ mɛ de Jesu, ɓɛɛ Jesu tɔ̧: «Mi gasi'nɛ́, Dáà, Gasa Wan nɛ̀ ɔ wan zu yiwese in nù wen n’ɛnɛ hu̧sa̧ mɔ‘i nɛ̀ o wi-iŋ-mgbara-mɔ in o wi-iŋ-mɔ, ɓɛɛ ɛ́nɛ́ usi ha̧ o geɗek wi. Íì Dáà, mɔ n’ɛnɛ taa so mɛ de zaŋ demɔ k’ɛ́nɛ́ nɛ́ mɔ nɛ̀ dea'i.

²²«Dáà kɔ‘m ee mɔ lɛŋ er-am, ɓɛɛ ŋma bíí iŋ Bem na, kànà nɛ́ Dáà a̧ iŋa a̧ ɓɛɛ; ŋma bíí iŋ Dáà na mbɛt, kànà nɛ́ Bem a̧ iŋa a̧, in wi nɛ̀ Bem kɔ̧ɔ̧ mɛ usi Dáà ha̧ a̧.»

²³Hɔ-ɗoŋ-aa, a̧ zika tɛ a̧ sitɛ o ŋgaiwi kɔ̧-a̧, ɓɛɛ a̧ tɔ̧ ha̧ wa: «O bíí nɛ̀ zɔk mɔ n’ɛnɛ zɔk’ɛ ya kɔ‘i nɛ̀ desee!

²⁴Mi tɔ̧ h’ɛ́nɛ́: o wi-tɔ̧-wen oi nú Sɔ̧ in o wannu nɛ̀ dɔka-a kɔ̧ɔ̧ so mɛ zɔk mɔ n’ɛnɛ zɔk’ɛ, ɓɛɛ wa zɔk na; wa kɔ̧ɔ̧ so mɛ zii mɔ n’ɛnɛ zii’ɛ, ɓɛɛ wa zii na mbɛt.»

²⁵Nɛ́ mɔ'ɔ nɛ̀ ŋma wi-usi-heembea kura ŋgɔn, ɓɛɛ ba wen zaŋ Jesu ak nɛ̀ a̧ hee mɔ'ɔ ga: «Wan-usi-mɔ, mɔ n'am tɛ de sɛka'm kpaa duka-kpasa kpoo nɛ kpoo nɛ̀ mɔɔ-oi nɛ́ ge?»

²⁶Ɓɛɛ Jesu kifi nú ha̧ a̧: «Mɔ nɛ̀ wa yɔra zaŋ heembea nɛ́ ge? Mɛ́ tɔra bɔɔ kɔ-mɛ hèè ge?»

²⁷Wi’ɛi kifa nú: «Mɛ̀ kɔ̧́ Gasa Wan Sɔ̧ kɔ-mɛ nɛ̀ see-mɛ lɛŋ, nɛ̀ sɔ̧-tɛ-mɛ lɛŋ, nɛ̀ ŋgai tɛ-mɛ lɛŋ, nɛ̀ taamɔ kɔ-mɛ lɛŋ; ɓɛɛ mɛ̀ kɔ̧́ ŋmà-mɛ hee kiitɛ-mɛ ga.»

²⁸Ɓɛɛ Jesu tɔ̧: «Mɛ kifa nú nɛ̀ de-a, mɛ̀ dé hegɔ, ɓɛɛ mɛ tɛ duk kpasa.»

²⁹Hee mɔ'ɔ n'aa kɔ̧ɔ̧ mɛ usi'e mɔ nɛ‘i ak'i duk nɛ̀ yuwar-a ga, a̧ tɔ̧a̧: «Ŋma'm nɛ́ o?»

³⁰Ɓɛɛ Jesu tɔ̧: «Ŋma bíí zira so nɛ̀ Jerusalɛm si Jeriko, ɓɛɛ tik er o kpɔ̧i̧-gba̧a̧-nin. Ɗoŋ nɛ̀ wa kaia mɔ er-a, gusi a̧ kaɗi, wa ee a̧ duk tɔ̀kɔ̀rɔ̀ hee fio ga, ɓɛɛ wa yak kɔ-wa.

³¹Ŋma wan-ɗafi-sɔ̧ zira so nɛ̀ yuwar'i, nɛ́ mɔ'ɔ n'aa zɔka wi’ɛi, ɓɛɛ mbaŋ nɛ̀ katɛ a̧ yak.

³²Ŋma be zuduk ko Levii mbɛt hɔɔ hi̧i̧ zɔ́k a̧, ɓɛɛ mbaŋ nɛ̀ katɛ a̧ yak mbɛt.

³³Nɛ́ mɔ'ɔ nɛ̀ ŋma be Samarii nɛ̀ nɛ́ kɔ‘i nɛ́ gɛnɛ hɔɔ katɛ wi’ɛi. A̧ zɔka wi’ɛi ɓɛɛ ko de a̧.

³⁴A̧ nɛɛ si katɛ a̧, hɛr da̧i̧ kɔ̧-a̧, a̧ nɔ̧́ in dɔ̧ɔ̧ sɛnɛ, ɓɛɛ hɔ-ɗoŋ-aa, ba a̧ e zu tuifuu kɔ‘i, ɓɛɛ mgbɔ a̧ nɛnɛ si kɔ̧́ tua-zir-gɛnɛ, ɓɛɛ zɔk a̧ nɛ̀ de-a.

³⁵Mɛ bin, a̧ kaia kɔya sede yiitoo ha̧ ha̧ wi-pɛm tua-zir-gɛnɛ, ɓɛɛ tɔ̧ ha̧ a̧: ‹Mɛ̀ zɔ́k a̧ nɛ̀ de-a; mɔ nɛ̀ mɛ tɛ ɗaŋ gan zu mɔ n'am ha̧a̧ ha̧ mɛ'ɛ, nɛ́ mi a̧‘m tɛ yoɓi wese n'am tɛ pii ɗoŋ.›

³⁶Tɛ̀ taamɔ kɔ-mɛ, mgbara o wi nɔ‘i taar'i, nɛ́ o a̧ deemɔ kɔ̧-a̧ usa'e a̧ nɛ́ ŋmà-wi ko wi nɛ̀ tika kɔ̧̀ er o kpɔ̧i̧-gba̧a̧-nin'i o?»

³⁷A̧ kifa nú-a: «Nɛ́ wi nɛ dee ko ha̧ a̧‘i!» Ɓɛɛ Jesu tɔ̧ ha̧ a̧: «Mɛ mbɛt, mɛ̀ nɛ́, ɓɛɛ mɛ̀ dé hegɔ.»

³⁸Jesu in o ŋgaiwi kɔ‘i a̧a̧ yuwar, ɓɛɛ Jesu ye ŋma ye, nɛ́ mɔ'ɔ nɛ̀ ŋma okoo, nin-a nɛ́ Marthe, mgbɔɔ Jesu si tɛ̀ kɔ‘i.

³⁹Marthe a̧a̧ nɛ̀ nya-wi, nin-a nɛ́ Marii, ɓɛɛ Marii duk nù ká̧ naŋ Gasa Wan zii nɛ̀ wen kɔ̧-a̧.

⁴⁰Marthe sakala tɛ dee tom kɔ̧́ tua nɛ̀ dɔka-a nyɛmna. Nɛ́ mɔ'ɔ n'aa nɛa, ɓɛɛ tɔ̧: «Gasa Wan, ea'm nɛ̀ nya'm e de nɛ̀ tom ɛ̀n'am'i de ŋma mɔ tɛ‘nɛ́ na nde? Ɛ̀nɛ̀ tɔ̧́ ha̧ a̧ gbák ám.»

⁴¹Gasa Wan kifa nú ha̧ a̧: «Marthe, Marthe, mɛ́ ta mɔ sakali nɛnɛ zu mɔ nɛtɛ nɛtɛ wen ge?

⁴²Mɔ kpɔk nyɛma, ɓɛɛ nɛ́ Marii a̧ hoka demɔ nɛ̀‘i beka ba er-a yinɛ na.»