Read Northwest Gbaya LUK 15 Bible Online

LUK 15 - Northwest Gbaya bible

LUK 15

¹O wi-ba-garama in o ɗaŋwi nɛɛ lɛŋ si katɛ Jesu ha̧ wa mɛ zii wen kɔ̧-a̧.

²Nɛ mɔ'ɔ nɛ o Fariziɛn in o wi-usi-heembea ku̧i̧a mɔ, ɓɛɛ tɔ̧: «Wi’ɛ kpɛk kɔ‘i nɛ o ɗaŋwi, nyɔŋ nɛ mɔ in wa!»

³Ɓɛɛ Jesu tɔ̧ lizaŋ'ɛ ha̧ wa:

⁴«Nɛ o ge mgbara'nɛ́, ká̧ a̧ nɛ boo nɛ sami gɔmŋmaa, ɓɛɛ kà kpɔk yɔ, nɛ beka e oi-aa ɓu-mɔɔrɔ-ɗoŋ-naar-zua-mɔɔrɔ-ɗoŋ-naar fara nyɔŋ mɔ, mɛ nɛɛ kii wan nɛ yɔa, hɔ ŋgimbi n'aa tɛ kpa a̧ kaɗi sɛ na o?

⁵Ŋgimbi n'aa kpaa a̧ kaɗi, a̧ tɛ ba a̧ nɛ desee e gun ger-a,

⁶si ɗoŋ tɛ kɔ̧-a̧; a̧ tɛ mɔi̧ o sɛm kɔ̧-a̧ in o wi nɛ ɔ katɛ a̧, ɓɛɛ a̧ tɔ̧ɔ̧ ha̧ wa: ‹Ɛnɛ de nyɛŋɛ in am wen n'am kpaa sami kɔ‘m nɛ yɔɔ so’ɛ.›

⁷Mi tɔ̧ h’ɛ́nɛ́, nɛ hegɔ a̧ wa tɛ duk nɛ desee yiwese mɛ, wen zu ɗaŋwi kpɔk nɛ kpaia duka-a kɔ‘i gan o wi-de-mɔ nɛ yuwar-a ɓu-mɔɔrɔ-ɗoŋ-naar-zua-mɔɔrɔ-ɗoŋ-naar, nɛ kɔ̧ mɛ kpai duka-a kɔ‘i na.

⁸«Ŋma woyo, nɛ ge okoo ge nɛ a̧a̧ nɛ kɔya-sede ɓu, ɓɛɛ kà kpɔk yɔ, nɛ beka e wee tɛ lamba, mbíí tua, kíí mɔ nɛ de-a hɔ ŋgimbi n'aa kpaa sede'i kaɗi sɛ na o?

⁹Ɓɛɛ ŋgimbi n'aa kpaa sede'i kaɗi, a̧ tɛ mɔi̧ o sɛm kɔ̧-a̧ in o wi nɛ ɔ katɛ a̧ ɓɛɛ tɔ̧ɔ̧ ha̧ wa: ‹Ɛnɛ de nyɛŋɛ in am wen mi kpaa kɔya-sede nɛ baa yɔ so’ɛ.›

¹⁰Mi tɔ̧ h’ɛ́nɛ́, nɛ hegɔ mbɛt a̧ o betom ko Sɔ̧ kpa nɛ desee wen zu ɗaŋwi kpɔk nɛ kpaia duka-a kɔ‘i.»

¹¹Jesu tɔ̧ɔ̧ woyo: «Ŋma bíí duka so nɛ̀ be-wiwii yiitoo.

¹²Nɛ mɔ'ɔ nɛ sɔŋkur bem tɔ̧ɔ̧ ha̧ dáà kɔ‘i: ‹Dáà, mbɔi n’ɛnɛ tɛɛ e h’ɛ́ɛ́, ɛnɛ kɛ̧ war kɔ‘m ha̧‘m.› Ɓɛɛ dáà kɔ-wa kɛ̧ mbɔi'i ha̧ wa.

¹³Zɛ tɛ dɔk ɗoŋ mɔ‘i na, ɓɛɛ sɔŋkur bem mɔi̧ mbɔi kɔ‘i lɛŋ, ɓɛɛ yak si ŋma nù nɛ nyɛi̧a-a. A̧ ɗaŋa mbɔi kɔ̧-a̧‘i lɛŋ tɛ gee tum-mɔ.

¹⁴Ŋgimbi n'aa ɗaŋa mbɔi kɔ̧-a̧ lɛŋ kaɗi, gasa kaɓa tika nu hi̧i̧, ɓɛɛ a̧ ku̧ naŋ zɔka bɔnɛ.

¹⁵Nɛ́ mɔ'ɔ n'aa nɛ̀ɛ́ ye tom er ŋma bíí nù‘i, ɓɛɛ wi’ɛi tom a̧ si kpɛɛfɔ kɔ‘i ha̧ a̧ mɛ dai o ŋgɔya.

¹⁶A̧ kɔ̧ɔ̧ so nyɛmna mɛ sam zak yàké[17] nɛ o ŋgɔya nyɔŋ, ɓɛɛ ŋma bíí ha̧ ha̧ a̧ na.

¹⁷A̧ aa er zu-a, ta mɔ, ɓɛɛ tɔ̧: ‹O wi-de-tom ko dáà kɔ‘m nyɔŋ nɛ mɔ oi-aa ɓɔn, ɓɛɛ nɛ mɔ'ɔ n'am duk kɔ‘m hɛ̧ɛ̧ fe nɛ wɔ'ɛ!

¹⁸Mi tɛ si ɗoŋ tɛ dáà kɔ‘m, ɓɛɛ mi tɔ̧ɔ̧ ha̧ a̧: Dáà, mi dee ɗaŋmɔ ti Sɔ̧ in ti'nɛ́ mbɛt,

¹⁹mi nyɛm h’ɛ́nɛ́ mɛ sa'm'e bem k’ɛ́nɛ́ ɓɔna, ɛ̀nɛ̀ ba'm hee ŋma wi-de-tom k’ɛ́nɛ́ ga.› »

²⁰Ɓɛɛ a̧ kur si ɗoŋ tɛ dáà kɔ̧-a̧. «A̧ biti tɛa-a nɛ nyɛi̧a-a, ɓɛɛ dáà kɔ̧-a̧ kɔɓi a̧; ko dee dáà kɔ̧-a̧ ɓɛɛ war yi kɔŋgɔli ger-a, dui nú-a.

²¹Ɓɛɛ bem’ɛi tɔ̧ ha̧ dáà kɔ‘i: ‹Dáà mi dee ɗaŋmɔ ti Sɔ̧ in ti'nɛ́ mbɛt, mi nyɛm h’ɛ́nɛ́ mɛ sa'm'e bem k’ɛ́nɛ́ ɓɔna.›

²²Ɓɛɛ dáà kɔ̧-a̧ tɔ̧ ha̧ o wi-de-tom kɔ‘i: ‹Ɛ̀nɛ̀ ba gasa laa nɛ gana o ŋma nɛ de-a tɛnɛ nɛ haya-a pi̧ tɛ-a, ɛ̀nɛ̀ pi̧ wele er-a, ɓɛɛ ɛ̀nɛ̀ a ndárà naŋ-a mbɛt.

²³Ɛnɛ nɛ́ɛ̀ bá ŋmaŋa be ndai tɛnɛ, ɛnɛ gɔn, ɛɛ nyɔŋ mɔ, ɛɛ de nyɛŋɛ;

²⁴wen bem kɔ‘m hɛ̧ɛ̧ fee so, ɓɛɛ nɛ mɔ'ɔ n'aa kpasa woyo; a̧ yɔɔ so, nɛ mɔ'ɔ n’ɛɛ kpaa a̧ woyo!› Ɓɛɛ wa ku̧ naŋ dee nyɛŋɛ.

²⁵«Kaya-bem kɔ̧-a̧ ɓɔna so kɔ‘i kpɛɛfɔ mɛ. Ŋgimbi n'aa pia ɗoŋ hɛɗi ɗoŋ tua, a̧ zii nɛ gítí bi̧ɔ̧ in yɔɔ-yɔyɛ.

²⁶A̧ saa ŋma wi-de-tom, ɓɛɛ a̧ ak a̧ wen gítí mɔ‘i.

²⁷Ɓɛɛ wi-de-tom tɔ̧ ha̧ a̧: ‹Nɛ́ nya-mɛ a̧ pia, ɓɛɛ dáà kɔ-mɛ gɔn de ŋmaŋa be-ndai ha̧ a̧, wen n'aa pia nɛ haya-tɛ.›

²⁸Kaya-bem dee nyimsea ɓɛɛ bɛ̧ yee tua. Dáà kɔ̧-a̧ gboo zan ɓɛɛ ai nú ha̧ a̧ mɛ ye tua.

²⁹Ɓɛɛ a̧ tɔ̧ ha̧ dáà kɔ̧-a̧: ‹Kinii dee pɛ nɛ dɔka-a n'am de nɛ tom h’ɛ́nɛ́; mi de ŋgazu in'nɛ̀ɛ́ war kpɔk na, ɓɛɛ koo nɛ́ ŋma be-gbadua ɛ́nɛ́ ha̧ ha̧‘m de nɛ saa in o sɛm kɔ‘m na.

³⁰Ɓɛɛ war ko bem k’ɛ́nɛ́ hɛ̧ɛ̧, ɗoŋ n'aa ɗaŋa mbɔi k’ɛ́nɛ́ in o kó-de-mɔ nɛ mbɔɗɔnu kaɗi, a̧ pia ɗoŋ ɓɛɛ ɛnɛ gɔna de ŋmaŋa be ndai ha̧ a̧.›

³¹Ɓɛɛ dáà kɔ̧-a̧ tɔ̧ ha̧ a̧: ‹Bem kɔ‘m, mɛ́ duk kɔ-mɛ in am ɓɔnsɛnɛ, ɓɛɛ mɔ kɔ‘m lɛŋ nɛ́ mɔ kɔ-mɛ;

³²ɓɛɛ ɛɛ tɛ̀ɛ́ de so nɛ saa nɛ tortɛ wen nya-mɛ hɛ̧ɛ̧ fee so, nɛ mɔ'ɔ n'aa kpasa; a̧ yɔɔ so, nɛ mɔ'ɔ n’ɛɛ kpaa a̧ woyo’ɛ!› »