Read Northwest Gbaya LUK 17 Bible Online

LUK 17 - Northwest Gbaya bible

LUK 17

¹Ɓɛɛ Jesu tɔ̧ ha̧ o ŋgaiwi kɔ‘i: «O mɔ nɛ̀ tɛ de ha̧ bíí mɛ tik a̧a̧ kànà sɛnɛ, ɓɛɛ bɔnɛ a̧a̧ zu wi nɛ̀ de ha'i mɛ tik.

²Gana so a'i kun ta-hɔ̧n-mɔ ger-a pi̧ a̧ ɗɔɔ ɗuka dir gba-tɔp ká̧ a̧ tɛɛ ɔr ŋma kpɔk mgbara o geɗek bem nɔ'ɔ pi̧ tɛ ɗaŋmɔ.

³Ɛ̀nɛ̀ zɔ́k tɛ‘nɛ́! «Kà nya-mɛ de ɗaŋmɔ in mɛɛ, mɛ̀ gáí a̧, ɓɛɛ kà see-aa ɗaŋ zu mɔ n'aa dea'i, ɓɛɛ mɛ̀ é ɗaŋmɔ kɔ̧-a̧ ha̧ a̧.

⁴Kà̧ a̧ de ɗaŋmɔ in mɛɛ kpɔk kale wese war mɔɔrɔ-ɗoŋ-yiitoo, ɓɛɛ ká̧ a̧ pii ɗoŋ dam ɗoŋ-aa mɛ́ tɔ̧ ha̧ mɛ: ‹See-am ɗaŋa zu mɔ n'am dee in mɛɛ!› ɓɛɛ mɛ tɛ e ɗaŋmɔ kɔ̧-a̧ ha̧ a̧.»

⁵O betom ko Gasa Wan tɔ̧ɔ̧ ha̧ a̧: «Ɛ̀nɛ̀ dé h’ɛ́ɛ́ mɛ duk nɛ̀ kɔ̧ɔ̧ɗɔɔwen gan kuti-a.»

⁶Ɓɛɛ Gasa Wan tɔ̧: «Kɔ̧ɔ̧ɗɔɔwen k’ɛ́nɛ́ a̧ bó so benaŋ kɛ̧́ɛ̧́ hee gba̧a̧ sunu[18] ga, ɛnɛ nyɛma mɛ tɔ̧ ha̧ gasa te mɛ̧‘i: ‹Mɛ̀ kúr fara’ɛ nɛ́ɛ̀ yor ɗɔɔ tɔp mɛ!› Ɓɛɛ te'i mboo zu h’ɛ́nɛ́.»

⁷«Nɛ́ o mgbara'nɛ́ o nɛ̀ a̧a̧ nɛ̀ ŋma wi-de-tom kɔ‘i nɛ̀ wa nɛ́ fɔ, kóó nɛ̀ dai nɛ́ o mɔ-dai, ɓɛɛ nɛ̀ tɛ tɔ̧ ha̧ wi-de-tom'i: ‹Mɛ̀ tɛ́ bee mɛ̀ nyɔ́ŋ mɔ,› ŋgimbi nɛ̀ wi-de-tom pii nɛ́ ɗoŋ nɛ̀ kpɛɛfɔ o nde?

⁸Bó nɛ́ wi’ɛi tɛ tɔ̧ ha̧ wi-de-tom kɔ‘i'e, a̧ a̧ pí̧ nɛ́ laa-de-tom, a̧ a̧ ɗáfí nyɔŋmɔ ha'i nyɔŋ, nɔ nɛ̀ mɔ kaɗi, sɛka wi-de-tom'i nyɔŋa war kɔ‘i, nɔ nɛ̀ mɔ mbɛt, na nde?

⁹A̧ tɛ de so osoko ha̧ wi-de-tom'i wen mɔ n'aa tɔ̧ ha̧ a̧ mɛ de n'aa dea'i nde?

¹⁰Hegɔ, ɛ́nɛ́ mbɛt, k’ɛ̀nɛ̀ dé mɔ nɛ̀ wa usa h’ɛ́nɛ́ mɛ de lɛŋ kaɗi, ɓɛɛ ɛ̀nɛ̀ tɔ̧́‘e: ‹Ɛ́ɛ́ bó nɛ́ kpasa o wi-de-tom na, ɛɛ dee nɛ́ mɔ nɛ̀ wa usa h’ɛ́ɛ́ mɛ de ɓɛɛ.› »

¹¹Hee mɔ'ɔ nɛ̀ Jesu nɛ́ si Jerusalɛm ga, a̧ ɓira nɛ̀ nú Samarii in nú Galilee.

¹²Nɛ́ mɔ'ɔ n'aa yee ŋma saaye, ɓɛɛ o ŋma wi-doko ɓu we ti a̧ tɛnɛ, yor nɛ̀ nyɛi̧a-a,

¹³ɓɛɛ hiɗi mɔ: «Jesu, Wan-usi-mɔ, ɛ̀nɛ̀ dé ko h’ɛ́ɛ́.»

¹⁴Zɔka wa nɛ̀ Jesu zɔka hegɔ, ɓɛɛ a̧ tɔ̧ ha̧ wa: «Ɛ̀nɛ̀ nɛ́, ɛ̀nɛ̀ úsí tɛ‘nɛ́ ha̧ o wi-ɗafi-sɔ̧.» Wa biti nɛa-a, ɓɛɛ tɛ-wa sa̧.

¹⁵Ŋma mgbara wa zɔka'e doko kaɗa tɛ-wi, ɓɛɛ pii ɗoŋ gasi nɛ̀ Sɔ̧ nɛ̀ hee-ger.

¹⁶Nɛ́ mɔ'ɔ n'aa gbɛɛ zugur-aa nù, ba yí gu nù ti-bee Jesu de nɛ̀ osoko ha̧ a̧. Zuduk ko wi’ɛi so nɛ́ be Samarii.

¹⁷Ɓɛɛ Jesu ak mɔ: «Bó nɛ́ tɛ̀ o wi nɔ'ɔ ɓu’ɛ lɛŋ a̧ sa̧a̧ na nde? Ɓɛɛ oi o bíí mɔɔrɔ-ɗoŋ-naar a̧a̧ bɔɔ déè?

¹⁸Ŋma bíí kpɔk mgbara wa pii ɗoŋ mɛ gasi Sɔ̧ na; kànà nɛ́ gɛnɛ'ɛ a̧ pia ɗoŋ ɓɛɛ nde?»

¹⁹Ɓɛɛ Jesu tɔ̧ ha̧ wi’ɛi: «Mɛ̀ kúr, mɛ̀ yák, kɔ̧ɔ̧ɗɔɔwen kɔ-mɛ kpasa mɛ.»

²⁰Nɛ́ mɔ'ɔ nɛ̀ o Fariziɛn aka Jesu'e: «Wan ko Sɔ̧ tɛ hɔ bɔɔ mɛ gese ge?» Ɓɛɛ Jesu kifi nú ha̧ wa: «Bó nɛ́ Wan ko Sɔ̧ tɛ hɔ ha̧ bíí mɛ zɔk na.

²¹Bíí beka tɔ̧‘e: ‹Zɔ́k a̧ hɛ̧ɛ̧,› kóó: ‹Zɔ́k a̧ mɛ̧‘i,› na, ɓɛɛ ɛ̀nɛ̀ íŋ ndé Wan ko Sɔ̧ a̧a̧ mgbara'nɛ́ kinii.»

²²Ɓɛɛ Jesu tɔ̧ ha̧ o ŋgaiwi kɔ‘i woyo: «Ŋgimbi tɛ hɔ n’ɛnɛ tɛ kɔ̧ mɛ zɔk géé wese kó Bem ko bíí kpɔk, ɓɛɛ ɛ́nɛ́ beka zɔk na.

²³Wa tɛ tɔ̧ h’ɛ́nɛ́‘e: ‹A̧ a̧a̧ hɛ̧ɛ̧! A̧ a̧a̧ mɛ̧‘i!› Ɓɛɛ k’ɛ́nɛ́ nɛ na, k’ɛ́nɛ́ ma yì si hi̧i̧ na mbɛt.

²⁴Hee mɔ'ɔ nɛ̀ pi̧i̧-kórò pi̧ nɛnɛ nɛ̀ zu-zan gɔm ndaa-zan mɛ ga, nɛ́ hegɔ a'i tɛ zɔk nɛ̀ Bem ko bíí wese pia-ɗoŋ kɔ̧-a̧.

²⁵Ɓɛɛ nɛti ha̧ mɔ‘i mɛ hɔ, a̧ tɛ zɔk kànà bɔnɛ nɛ̀ dɔka-a, ɓɛɛ tugun bíí tɛ ŋgimbi’ɛ tɛ bɛ̧ a̧.

²⁶Mɔ nɛ̀ dee ŋgimbi ko Nɔe tɛ de ŋgimbi ko Bem ko bíí mbɛt.

²⁷O bíí yaa so nyɔŋ nɛ̀ mɔ, nɔ nɛ̀ dɔ̧ɔ̧, ba nɛ̀ kóò, ba nɛ̀ wíì hɔ wese nɛ̀ Nɔe yee nɛ̀ kombon, ɓɛɛ ndiɓa kórò hɔ gbɛ wa lɛŋ.

²⁸Dee so hegɔ ŋgimbi ko Lot mbɛt. O bíí yaa so nyɔŋ nɛ̀ mɔ, nɔ nɛ̀ mɔ, hi̧fi̧ nɛ̀ mɔ, gun nɛ̀ mɔ, mbo nɛ̀ tua mbɛt;

²⁹ɓɛɛ wese nɛ̀ Lot gboo saaye Sɔdɔm yak, Sɔ̧ toma wee in baraadu hee kórò ga nɛ̀ yiwese gbɛ wa lɛŋ.

³⁰Kànà nɛ́ kpɔk mɔ‘i a̧ tɛ de wese nɛ̀ Bem ko bíí tɛ usi tɛ.

³¹«Wese'i, wi nɛ̀ tɛ duk zu tua, ɓɛɛ nɛ̀ a̧a̧ nɛ̀ mɔ kɔ‘i kɔ̧́ tua, a̧ ká‘i zir mɛ kai mɔɔ nɔ‘i na; wi nɛ̀ tɛ duk kpɛɛfɔ mbɛt, a̧ ká‘i pii ɗoŋ na.

³²Tɛ‘nɛ́ a̧ mbáŋ ɗoŋ kóò ko Lot.

³³Wi nɛ̀ kii mɛ duk kpasa, tɛ fe, ɓɛɛ wi nɛ̀ tɛ fe tɛ kpasi.

³⁴Mi tɔ̧ h’ɛ́nɛ́, wese'i, mɛ zɛ, bíí yiitoo tɛ ɔ gɔn gado kpɔk, wa tɛ ba kpɔk, e ɓii-aa duk.

³⁵Okoo yiitoo tɛ ya hɔ̧n nɛ̀ mɔ, wa tɛ ba kpɔk, e ɓii-aa duk. [

³⁶Wiwii yiitoo tɛ ya kpɛɛfɔ, wa tɛ ba kpɔk, e ɓii-aa duk mbɛt.]»

³⁷Ɓɛɛ o ŋgaiwi kɔ̧-a̧ ak a̧: «Gasa Wan, mɔ‘i tɛ de sɛn déè?» Ɓɛɛ Jesu kifi nú ha̧ wa: «Fara nɛ̀ wɔr saɗi a̧a̧ sɛnɛ, a̧ tama mɔi̧ sɛnɛ.»