Read Northwest Gbaya LUK 21 Bible Online

LUK 21 - Northwest Gbaya bible

LUK 21

¹Jesu baa yí nɛ̀ ŋgɔn ɓɛɛ zɔk o wi nɛ̀ pi̧ ha̧a̧mɔ kɔ‘i sɛn kɔ̧̀ kuɓa; o wi nɔ‘i duka so nɛ́ o wanmbɔi.

²A̧ zɔka ŋma ko-gera-san fara aa be kɔya-sede yiitoo kɔ̧ kuɓa'i mbɛt,

³ɓɛɛ Jesu tɔ̧: «Nɛ́ kpasawen a̧‘m tɔ̧ h’ɛ́nɛ́, ko-gera’ɛ nɛ̀ oi san kɔ‘i ha̧a̧ mɔ gan oi dɔka bíí lɛŋ.

⁴Wen o dɔka bíí lɛŋ ha̧ nɛ́ mɔ nɛ̀ daŋ zu mbɔi kɔ‘i, ɓɛɛ kɔ̧-a̧, zu san kɔ̧-a̧‘i, a̧ ha̧a̧ nɛ́ sɔŋkur be mɔɔ-nyɔŋ-mɔ nɛ̀ ɓɔna er-a.»

⁵Hee mɔ'ɔ nɛ̀ o ŋma bíí ya zɔn nɛ̀ Tua ko Sɔ̧ in o de ta nɛ̀ wa ɗafa nɛnɛ, in o mɔ nɛ̀ bíí ha̧a̧ ha̧ Sɔ̧ ga, Jesu tɔ̧a̧:

⁶«Mɔ n’ɛnɛ zɔn’ɛ, ŋgimbi tɛ hɔ nɛ̀ ŋma ta kpɔk beka duk zu ŋmaa na; o bíí tɛ gbin a nù lɛŋ.»

⁷Nɛ́ mɔ'ɔ nɛ̀ wa aka a̧: «Wan-usi-mɔ, nɛ́ ge ŋgimbi ge a̧ mɔ‘i tɛ hɔ nɛnɛ ge? Ɓɛɛ nɛ́ ge a̧ tɛ usi'e mɔ‘i tɛ hɔ ge nde?»

⁸A̧ kifa nú: «Ɛ̀nɛ̀ zɔ́k tɛ‘nɛ́ wen ká o bíí tɛɛ ɔr'nɛ́, wen o bíí nɛ̀ dɔka-a tɛ́ tɛ nɛ̀ nin-am tɔ̧ nɛnɛ‘e, wi nɛ́ Krist, in mbɛt'e, ‹Ŋgimbi hɔɔ kaɗi!› K’ɛ́nɛ́ nɛ ɗoŋ wa na.

⁹Ŋgimbi n’ɛnɛ tɛ zii nyɛrɛ biro in o sakala-mɔ, k’ɛ́nɛ́ de kíì na, wen mɔ‘i tɛ hɔ kànà, ɓɛɛ sɔŋkur-mɔ bo a̧‘i na.»

¹⁰Ɓɛɛ Jesu tɔ̧ ha̧ wa: «O dukbíí tɛ bi ŋmaa, o wan tɛ duk zù nɛ̀ ŋmaa mbɛt.

¹¹Nù tɛ nak nɛ̀ ŋgaya-a, ŋga-zɛɛ in kaɓa tɛ tik nù fara nɛtɛ nɛtɛ; o mɔɔ-kifi, in o gasa mɔɔ-usi-mɔ tɛ́ tɛ̀ nɛ̀ yiwese mɛ mbɛt.»

¹²«Nɛti ha̧ mɔ‘i lɛŋ mɛ hɔ, wa tɛ ba'nɛ́, wa tɛ usi bɔnɛ h’ɛ́nɛ́, wa tɛ gbur'nɛ́ nɛnɛ si kɔ̧́ tua-mɔi̧a-a in si kɔ̧́ zɔɓɔ, wa tɛ mgbɔ‘nɛ́ nɛnɛ si ti o wannu in o wi-duk-zu zika-nù wen zu'm,

¹³ɓɛɛ mɔ‘i tɛ duk nɛ́ yuwar h’ɛ́nɛ́ mɛ de sedaako wen am.

¹⁴Ɛ̀nɛ̀ íŋ‘e ŋma mɔ n’ɛnɛ tɛ kii mɛ tɔ̧ sɛk’ɛ́nɛ́ foo nɛ̀ wen zu'nɛ́ yinɛ bo na,

¹⁵wen mi nɛ̀ tɛ‘m, mi tɛ ha̧ iŋa-mgbara-mɔ h’ɛ́nɛ́ in wen n’ɛnɛ tɛ tɔ̧, nɛ̀ ŋma wi sɛn'nɛ́ beka si kafɛ sɛnɛ, bɛ̧ nɛnɛ na mbɛt.

¹⁶O dáà k’ɛ́nɛ́ in nàà k’ɛ́nɛ́, o nya'nɛ́ in o nàm k’ɛ́nɛ́, gú nɛ̀ o sɛm k’ɛ́nɛ́ tɛ wuli'nɛ́ mbɛt, ɓɛɛ o bíí tɛ gɔn kita-fio zu o ŋma mgbara'nɛ́.

¹⁷O bíí lɛŋ tɛ sɛn'nɛ́ wen nin-am.

¹⁸Mɔ kpɔk, mui̧-zu'nɛ́ kpɔk beka yɔ na.

¹⁹Nɛ́ nɔɔ-ŋgiɗi k’ɛ́nɛ́ a̧ tɛ de h’ɛ́nɛ́ mɛ kpasi.

²⁰«Ŋgimbi n’ɛnɛ tɛ zɔk'e ndé o wi-biro kɛra Jerusalɛm, ɓɛɛ ɛ̀nɛ̀ íŋ‘e ndé ye Jerusalɛm hɛɗa ɗaŋa-a kaɗi.

²¹Hegɔ, o bíí nɛ̀ tɛ ya sɛn Judee a̧ yú mɔ si mgbara kaya, o bíí nɛ̀ tɛ ya saaye a̧ gbó yak, ɓɛɛ o bíí nɛ̀ tɛ ya nú fɔ, ká wa pii ɗoŋ saaye na;

²²wen ŋgimbi'i tɛ duk nɛ́ ŋgimbi kifa-er, wen ha̧ mɔ lɛŋ nɛ̀ yɔra so mɛ hɔ gba̧a̧.

²³O nàá-zaŋ in o nana-oi-kɔra tɛ zɔk bɔnɛ wese'i, wen gasa bɔnɛ tɛ hɔ zu nù‘i in nyimsea nɛ̀ tɛ tik zu dukbíí‘i.

²⁴Wa tɛ gɔm wa nɛ̀ gba-paa gbɛ; wa tɛ kai wa nɛ̀ bara pɛsi dam mgbara o tugun bíí lɛŋ; ɓɛɛ o wi nɛ̀ iŋ kpasa Sɔ̧ na tɛ i̧si̧ Jerusalɛm nɛ̀ naŋ hɔ wese nɛ̀ ŋgimbi kɔ-wa tɛ nyɛm sɛnɛ.»

²⁵«O mɔɔ-usi-mɔ tɛ duk tɛ wese in tɛ nyaŋa-zɛ ká bá nɛ̀ o sɔra mbɛt; gasa kíì tɛ ba o tugun bíí zaŋnu, ɗɛɗɛ-wa tɛ gɔn wen gítí gba-tɔp in pɛŋa-yì;

²⁶bele tɛ zar o bíí wen o ŋgamɔ nɛ̀ tɛ hɔ zu nù, wen o ŋgayamɔ mɛ yiwese tɛ nak.

²⁷Ɓɛɛ wa tɛ zɔk Bem ko bíí fara tɛa-a nɛ̀ mgbara bu-zan nɛ̀ ŋgayamɔ in gasamɔ kɔ‘i.»

²⁸«Ŋgimbi nɛ̀ mɔ‘i tɛ ku̧ naŋ hɔa-a, ɛ̀nɛ̀ nɔ́ ŋgiɗi, ɛ̀nɛ̀ bá zu'nɛ́ nɛ̀ ŋgɔn, wen ɛnɛ hɛɗa mɛ kpasi kaɗi.»

²⁹Ɓɛɛ Jesu tɔ̧ ŋma lizaŋ ha̧ wa woyo: «Ɛ̀nɛ̀ zɔ́k te-mbɔra in o dɔka te lɛŋ.

³⁰Kà te-mbɔra nɛ́ ku̧u̧ naŋ ɓɔa-a, ɓɛɛ tɛ̀ zɔka wa, ɛnɛ iŋa'e nú-kórò hɛɗa kaɗi.

³¹Hegɔ mbɛt, ŋgimbi n’ɛnɛ tɛ zɔk o mɔɔ nɔ‘i lɛŋ hɔa, ɓɛɛ ɛ̀nɛ̀ íŋ‘e, Wan ko Sɔ̧ hɛɗa hɔa-a kaɗi.

³²Nɛ́ kpasawen a̧‘m tɔ̧ h’ɛ́nɛ́, o bíí nɛ̀ ya sɔsɔɔ beka fe lɛŋ na ɓɛɛ mɔɔ nɔ‘i lɛŋ hɔa.

³³Yiwese in nù tɛ kaɗi, ɓɛɛ wen kɔ‘m beka kaɗi na ɓɔnsɛnɛ.»

³⁴«Ɛ̀nɛ̀ dúk zu naŋ‘nɛ́, ɓɛɛ k’ɛ́nɛ́ e see'nɛ́ tɛ dee ndiŋmɔ nɛtɛ nɛtɛ gbɛ nɛ̀ dɔ̧ɔ̧, ai nɛ̀ nú wen mɔɔ-zaŋnu na, wen ká Wese'i tɛɛ tik zu'nɛ́, gbaŋ nɛ̀ ɛnɛ

³⁵hee yɔk ga; wen Wese'i tɛ hɔ zu o bíí zu nù'ɛ lɛŋ.

³⁶Wen hegɔ, ɛ̀nɛ̀ pɛ́m mɔ, ɛ̀nɛ̀ kɔ́fí Sɔ̧ ŋgimbi lɛŋ, h’ɛ́nɛ́ mɛ kpa ŋgai mɛ gbo ɗɔɔ o mɔɔ nɔ‘i lɛŋ nɛ̀ tɛ hɔ‘i, in h’ɛ́nɛ́ mɛ yor ti Bem ko bíí mbɛt.»

³⁷Mɛ wese, ɓɛɛ Jesu usa mɔ kɔ̧́ Tua ko Sɔ̧, ɓɛɛ mɛ zɛ a̧ yaka nɛ́ɛ̀ ɔ zu Kaya Te-nɔ̧́.

³⁸Ɓɛɛ mɛ tutuyɛ sút, o bíí lɛŋ nɛɛ tɛ a̧ kɔ̧́ Tua ko Sɔ̧ ha̧ wa mɛ zii wen kɔ̧-a̧.