Read Northwest Gbaya LUK 22 Bible Online

LUK 22 - Northwest Gbaya bible

LUK 22

¹Gbaŋa brɛt nɛ̀ hao bo sɛnɛ na, nɛ̀‘i sa'e Paska, hɛɗa kaɗi,

²ɓɛɛ o gasa wan-ɗafi-sɔ̧ in o wi-usi-heembea kii war mɛ gbɛ Jesu; ɓɛɛ yuwar-a bo na, wen wa yu so nɛ́ o bíí.

³Nɛ́ mɔ'ɔ nɛ̀ Satan yee kɔ̧́ see Judas, nɛ̀ wa sa'e Iskariot; a̧ nɛ́ ŋma bíí mgbara o ŋgaiwi ko Jesu ɓu-zua-yiitoo mbɛt.

⁴A̧ nɛɛ mɛ e nú in o gasa wan-ɗafi-sɔ̧ in o gasawi ko o wi-pɛm Tua ko Sɔ̧, kii nɛ̀ war mɛ e Jesu er-wa.

⁵Wa kpaa desee, ɓɛɛ wa ha̧ nú mɛ ha̧ sede ha̧ Judas.

⁶Nɛ́ mɔ'ɔ nɛ̀ Judas kpɛka, ɓɛɛ kii war mɛ ba Jesu ha̧ wa nɛ̀ ti fui.

⁷Ŋgimbi nyɔŋa brɛt nɛ̀ hao bo sɛnɛ na hɔa; wese'i nɛ́ wese gɔna be-sami Paska.

⁸Nɛ́ mɔ'ɔ nɛ̀ Jesu toma Pierre in Jean, ɓɛɛ tɔ̧: «Ɛ̀nɛ̀ nɛ́, ɛ̀nɛ̀ ɗáfí nyɔŋmɔ Paska h’ɛ́ɛ́ nyɔŋ.»

⁹Ɓɛɛ wa ak a̧: «Ɛnɛ kɔ̧ɔ̧ h’ɛ́ɛ́ mɛ ɗafi nyɔŋmɔ‘i déè?»

¹⁰Ɓɛɛ a̧ kifi nú ha̧ wa: «Hɔa-a k’ɛ́nɛ́ saaye hegɔ, ɛnɛ tɛ kpa ŋma wiwii nɛ̀ tui yì nɛ̀ kpánà; ɛ̀nɛ̀ nɛ́ ɗoŋ-aa hɔ tɛ tua n'aa tɛ ye sɛnɛ,

¹¹ɓɛɛ ɛ̀nɛ̀ tɔ̧́ ha̧ wan-tua'i: ‹Wan-usi-mɔ toma yɛ mɛ ak'nɛ́‘e ndé, fara nɛ̀‘i tɛ nyɔŋ mɔ sɛnɛ tɛ gbaŋa Paska in o ŋgaiwi kɔ‘i a̧a̧ déè nde?›

¹²Ɓɛɛ a̧ tɛ usi ŋma bɛr-tua mɛ ŋgɔn nɛ̀‘i ɗafa nɛ̀ de-a h’ɛ́nɛ́; bɛr-tua'i ɔ gasa, ɓɛɛ nɛ́ hi̧i̧ ɛ̀nɛ̀ tɛ ɗafi mɔ sɛnɛ.»

¹³Nɛ́ mɔ'ɔ nɛ̀ o ŋgaiwi nɔ‘i yaka, ɓɛɛ wa kpa mɔ lɛŋ nyɛm ɗoŋ mɔ nɛ̀ Jesu tɔ̧ɔ̧ ha̧ wa; ɓɛɛ wa ɗafi nyɔŋmɔ Paska.

¹⁴Ŋgimbi hɔa, ɓɛɛ Jesu duk nù ká̧ nyɔŋmɔ in o betom kɔ‘i,

¹⁵ɓɛɛ tɔ̧ ha̧ wa: «Mi kɔ̧ɔ̧ so nyɛmna ha̧‘m mɛ nyɔŋ mɔ Paska'ɛ in'nɛ̀ɛ́ nɛti sɛka'm zɔka bɔnɛ.

¹⁶Ɓɛɛ mi tɔ̧ h’ɛ́nɛ́, mi beka nyɔŋ mɔ Paska ɓɔna hɔ wese nɛ̀ kpasa Paska tɛ de zaŋ Wan ko Sɔ̧.»

¹⁷Wa ha̧a̧ ŋma be-ɗele ha̧ Jesu, ɓɛɛ a̧ de osoko ha̧ Sɔ̧, tɔ̧ nɛnɛ‘e: «Ɛ̀nɛ̀ bá, ɛ̀nɛ̀ nɔ́ dam'nɛ́ lɛŋ,

¹⁸wen mi tɔ̧ h’ɛ́nɛ́, mi beka nɔ yì waya-nyak-dɔ̧ɔ̧ ɓɔna hɔ wese nɛ̀ Wan ko Sɔ̧ tɛ hɔ.»

¹⁹Hɔ-ɗoŋ-aa, a̧ baa brɛt, de osoko ha̧ Sɔ̧, ɓɛɛ gbin ha̧ ha̧ wa, tɔ̧ nɛnɛ‘e: «Mɔ'ɔ nɛ́ kiitɛ‘m [a̧‘m há̧ wen ɛ́nɛ́; ɛ̀nɛ̀ dé mɔ‘i ha̧ tɛ‘nɛ́ mɛ mbaŋ ɗoŋ am.»

²⁰Ɗoŋ nyɔŋmɔ, a̧ dee kale mɔ‘i nɛ̀ be-ɗele mbɛt; a̧ tɔ̧a̧: «Be-ɗele’ɛ nɛ́ mbe nɔɔ-tɔk nɛ̀ ɗoŋ tɔk-tɛ‘m nɛ̀ aa nù wen zu'nɛ́.»]

²¹«Zɔ́k, wi nɛ tɛ e ɗɔra tɛ‘m'i nyɔŋ nɛ́ mɔ kpɔk in am.

²²Wen Bem ko bíí tɛ fe nyɛm nɛ̀ ɗoŋ mɔ nɛ̀ gɔna so, ɓɛɛ bɔnɛ a̧a̧ zu wi nɛ̀ ee ɗɔra tɛ Bem ko bíí‘i!»

²³Ɓɛɛ wa ku̧ naŋ aka o ŋmaa: «Nɛ́ o mgbara yɛ a̧ tɛ de mɔ hegɔ o?»

²⁴Wa ku̧u̧ naŋ zaŋa wen ha̧ wa mɛ iŋ gasawi mgbara wa.

²⁵Ɓɛɛ Jesu tɔ̧ ha̧ wa: «O wannu ɔ wan zu o bíí kɔ‘i de nɛ̀ mɔɔ-wan zu wa, ɓɛɛ wa dee ha̧ o bíí nɛ̀ wa ɔ wan zu wa'i mɛ sa wa'e, o wi-de-mɔ nɛ̀ de-a.

²⁶K’ɛ́nɛ́, bo hegɔ na; gasawi mgbara'nɛ́ a̧ é tɛ hee geɗek wi ga, ɓɛɛ o wi nɛ̀ ɔ wan zu'nɛ́ a̧ é tɛ hee o wi-de-tom ga mbɛt.

²⁷Gasawi nɛ́ o? Nɛ́ wi nɛ̀ duk nù sɛn ká̧ nyɔŋmɔ náà, kóó nɛ́ wi nɛ̀ ha̧ nyɔŋmɔ nde? Kɔ‘m, mi duk mgbara'nɛ́ hee wi-de-tom ga!»

²⁸«K’ɛ́nɛ́, ɛ́nɛ́ duka nɛ̀ nɔɔ-ŋgiɗi in am ɓɔnsɛnɛ tɛ o bɔnɛ nɛ̀ kpaa so'm.

²⁹Ɓɛɛ mi tɛ de wan h’ɛ́nɛ́ hee mɔ'ɔ nɛ̀ Dáà kɔ‘m dee ha̧‘m ga.

³⁰Hegɔ, ɛ́nɛ́ tɛ nyɔŋ mɔ in ɛ́nɛ́ tɛ nɔ mɔ kpɔk in am tɛ Wan kɔ‘m, ɓɛɛ ɛ́nɛ́ tɛ ya nù zu o damti h’ɛ́nɛ́ mɛ gɔn kita zu o zuduk be Israɛl ɓu-zua-yiitoo!»

³¹Ɓɛɛ Jesu tɔ̧: «Simɔŋ, Simɔŋ wa, Satan kpaa war mɛ́ zɛk'nɛ́ hee mɔ'ɔ nɛ̀‘i zɛk nɛ̀ alkamaari’ɛ ga.

³²Ɓɛɛ kɔ‘m, mi kɔfa Sɔ̧ wen ká kɔ̧ɔ̧ɗɔɔwen kɔ-mɛ tɛɛ kaɗi. Ɓɛɛ ŋgimbi nɛ̀ mɛ tɛ pii ɗoŋ tɛ‘m kaɗi, mɛ̀ há̧ nɔɔ-ŋgiɗi ha̧ o nya-mɛ.»

³³Ɓɛɛ Pierre tɔ̧: «Gasa Wan, kóó nɛ́ zɔɓɔ, mi tɛ ye in'nɛ̀ɛ́, kóó nɛ́ fio, mi tɛ fe in'nɛ̀ɛ́ mbɛt.»

³⁴Jesu kifa nú: «Pierre, mi tɔ̧ ha̧ mɛ, nɛti ha̧ gata-kɔra mɛ he mɔ sɔsɔɔ, mɛ tɛ kaf'am war taar'e, wi iŋ am na.»

³⁵Ɓɛɛ a̧ ak wa: «Ŋgimbi n'am toma so nɛ̀ ɛ́nɛ́ nɛ̀ géé er, ŋgoɓo-sede bo na, ŋgoɓo-a-mɔ sɛnɛ bo na, ndárà bo na, ŋma mɔ ɓana'nɛ́ nde?» Ɓɛɛ wa kifi nú: «Weyaa, ŋma mɔ ɓan yɛ na.»

³⁶Ɓɛɛ a̧ tɔ̧ ha̧ wa woyo: «Ɓɛɛ kinii, wi nɛ̀ a̧a̧ nɛ̀ ŋgoɓo-sede a̧ bá, wi nɛ̀ a̧a̧ nɛ̀ ŋgoɓo-a-mɔ, a̧ bá mbɛt, ɓɛɛ wi nɛ̀ bo nɛ̀ gba-paa na, a̧ bá gba-laa kɔ̧-a̧ ɗɔ́r hi̧fi̧ nɛ̀ gba-paa,

³⁷wen mi tɔ̧ h’ɛ́nɛ́, mɔ tɛ hɔ kànà zu'm nyɛm ɗoŋ mɔ nɛ̀ tɔ̧ɔ̧ zaŋ Yɔramɔ‘e: ‹Wa tɔra a̧ in o wi-de-ɗaŋmɔ kpɔk!› Hegɔ mɔ nɛ̀ wa tɔ̧ɔ̧ so zu'm'i tɛ hɔ gba̧a̧.»

³⁸Ɓɛɛ wa tɔ̧: «Gasa Wan, gba-paa yiitoo a̧a̧ hɛ̧ɛ̧.» Ɓɛɛ a̧ kifi nú ha̧ wa: «Nyɛma hegɔ.»

³⁹Jesu gboa, ɓɛɛ yak si sɛn zu Kaya Te-nɔ̧́ hee mɔ'ɔ n'aa de ɓɔnsɛnɛ ga. Ɓɛɛ o ŋgaiwi kɔ̧-a̧ ndak ɗoŋ-aa si mɛ.

⁴⁰Ɗoŋ nɛ̀ Jesu hɔɔ sɛn mɛ kaɗi, a̧ tɔ̧ɔ̧ ha̧ wa: «Ɛ̀nɛ̀ kɔ́fí Sɔ̧ wen ká weamɔ tɛɛ gan'nɛ.»

⁴¹A̧ yaka nyɛi̧ nɛ̀ wa tikiɗi, hee nyɛi̧a kii-ta nɛ̀‘i pi̧'ɛ ga, gbɛ zugur nù, ɓɛɛ kɔfi Sɔ̧ hee mɔ'ɔ ga:

⁴²«Dáà, k’ɛ̀nɛ̀ nɛ́ kɔ̧a̧, ɛ̀nɛ̀ bá be-ɗele-bɔnɛ'ɛ yinɛ zu'm! Ɓɛɛ bó nɛ́ hee mɔ'ɔ n'am kɔ̧ɔ̧ ga na, nɛ́ hee mɔ'ɔ n’ɛnɛ kɔ̧ɔ̧ ga!» [

⁴³Nɛ́ mɔ'ɔ nɛ̀ ŋma betom ko Sɔ̧ zira nɛ̀ yiwese mɛ tɛnɛ, ɓɛɛ ha̧ nɔɔ-ŋgiɗi ha̧ a̧.

⁴⁴A̧ kpaa dita-see nyɛmna, a̧ kɔfa Sɔ̧ batɛ, ɓɛɛ sɔbɛɛ hui nɛ̀ tɛ-a a nù hee bɔra-tɔk ga.]

⁴⁵Ɗoŋ kɔfa-sɔ̧‘i, a̧ kura pii ɗoŋ pii tɛ o ŋgaiwi kɔ̧-a̧ ɓɛɛ kpa wa fara ɔɔ yá nɛ̀ ɗaŋsee.

⁴⁶Ɓɛɛ a̧ tɔ̧ ha̧ wa: «Nɛ́ ge! Ɛ́nɛ́ ɔ nɛ́ yá? Ɛ̀nɛ̀ kúr, ɛ̀nɛ̀ kɔ́fí Sɔ̧, wen ká weamɔ tɛɛ gan'nɛ.»

⁴⁷Jesu ɓɔna fara tɔ̧ɔ̧ wen ɓɛɛ o wi-ba-a hɔ. Duka nɛ́ ŋma ŋgaiwi nɛ̀ wa sa'e Judas mgbara o ŋgaiwi ko Jesu ɓu-zua-yiitoo a̧ duka so ti. Nɛ́ mɔ'ɔ n'aa ɗɔŋa si katɛ Jesu mɛ dui nú-a.

⁴⁸Ɓɛɛ Jesu ak a̧: «Nɛ́ tɛ̀ duia nú-wi a̧ mɛ e nɛ̀ ɗɔra tɛ Bem ko bíí nde?»

⁴⁹O ŋgaiwi ko Jesu nɛ̀ yaa katɛ a̧ zɔka mɔ nɛ̀ tɛ hɔ, ɓɛɛ wa ak a̧: «Gasa Wan, ɛ̀ɛ̀ gɔ́m wa nɛ̀ gba-paa nde?»

⁵⁰Ɓɛɛ ŋma ŋgaiwi gɔm wi-de-tom ko gasa wan-ɗafi-sɔ̧, ɓir zer-aa mɛ wiiko pi̧ nù.

⁵¹Ɓɛɛ Jesu tɔ̧: «Ɛ̀nɛ̀ é duk, nyɛma hegɔ.» Nɛ́ mɔ'ɔ nɛ̀ Jesu foo zer wi-de-tom'i, ɓɛɛ zer wi’ɛi si ɗoŋ duk oi-aa woyo.

⁵²Ɓɛɛ Jesu tɔ̧ ha̧ o wi nɛ̀ tɛɛ mɛ ba a̧, o gasa wan-ɗafi-sɔ̧, o gasawi ko o wi-pɛm Tua ko Sɔ̧ in o gasawi: «Mi nɛ́ kpɔ̧i̧-gba̧a̧-nin s’ɛnɛ tɛ mɛ ba'm nɛ̀ gba-paa in o ɓira-te nde?

⁵³Mi duka kɔ̧́ Tua ko Sɔ̧ in'nɛ̀ɛ́ wese lɛŋ, ɓɛɛ ɛnɛ ba'm na. Ɓɛɛ kinii nɛ́ ŋgimbi k’ɛ́nɛ́ in ko Wan-ɗaŋmɔ.»[21]

⁵⁴Wa baa Jesu, mgbɔ a̧ yaknɛ, ye nɛ̀ tua ko gasa wan-ɗafi-sɔ̧, ɓɛɛ Pierre yor nɛ̀ nyɛi̧a-a ndak nɛ̀ ɗoŋ wa.

⁵⁵O bíí yee so wee-gara ɔ nɛnɛ, ɓɛɛ Pierre hɔ duk mgbara wa.

⁵⁶Ŋma kó-de-tom zɔka Pierre nɛ̀ duk nù ká̧ wee, mbaɗ‘a, ɓɛɛ tɔ̧: «Wi’ɛ bàá duk in a̧ mbɛt!»

⁵⁷Ɓɛɛ Pierre kafi'e: «Kóò'ɛ, mi iŋ kɔ‘m wi’ɛi na.»

⁵⁸Nɛ̀ ɗoŋ tikiɗi, ŋma bíí zɔka Pierre, ɓɛɛ tɔ̧: «Mɛ́ nɛ́ ŋma bíí mgbara wa mbɛt!» Ɓɛɛ Pierre tɔ̧: «Weyaa, bó nɛ́ mí na!»

⁵⁹Dekpaa, ŋma bíí tɔ̧ɔ̧ woyo: «Kafɛ bo na, wi’ɛ bàá duk so in a̧; a̧ nɛ́ be Galilee mbɛt!»

⁶⁰Ɓɛɛ Pierre tɔ̧: «Wi’ɛ, mi zii mgbara mɔ nɛ̀ mɛ kɔ̧ɔ̧ mɛ tɔ̧‘i na.» Tɛ́ kale ŋgimbi'i, hee mɔ'ɔ nɛ̀ Pierre ɓɔna fara tɔ̧ɔ̧ wen ga, gata-kɔra hèé mɔ.

⁶¹Nɛ́ mɔ'ɔ nɛ̀ Gasa Wan zika tɛ mbaɗi Pierre, ɓɛɛ tɛ Pierre mbaŋ ɗoŋ wen nɛ̀ Gasa Wan bàá tɔ̧ so ha̧ a̧‘e: «Nɛti ha̧ gata-kɔra mɛ he mɔ sɔsɔɔ, mɛ tɛ kaf'am war taar.»

⁶²Nɛ́ mɔ'ɔ nɛ̀ Pierre gboa, ɓɛɛ hi̧i̧ kɔ̧a̧ nɛ̀ dita-see.

⁶³O bíí nɛ̀ pɛma Jesu zɛkɛɗa a̧, ɓɛɛ wa gusi a̧.

⁶⁴Wa hɛra yí-a nɛ̀ laa, ɓɛɛ wa tɔ̧ ha̧ a̧: «Mɛ yàá-tɔ̧-wen oi nú Sɔ̧'ɛ, mɛ̀ sá nin-wi nɛ̀ mbɛra yí-mɛ́!»

⁶⁵Ɓɛɛ wa da̧ a̧ nɛ̀ o dara nɛtɛ nɛtɛ nɛ̀ dɔka-a.

⁶⁶Mɔ sa̧a̧ kaɗi, ɓɛɛ o gasawi mɔi̧ ŋmaa in o gasa wan-ɗafi-sɔ̧ in o wi-usi-heembea. Wa mgbɔɔ Jesu nɛnɛ ti gasa-gɔna-kita kɔ-wa,

⁶⁷ɓɛɛ wa tɔ̧ ha̧ a̧: «Kà mɛ̀ nɛ́ bòò nɛ́ Mɛsii, nɛ̀ mɛ̀ tɔ̧́ h’ɛ́ɛ́.» A̧ kifa nú ha̧ wa: «Kà‘m tɔ̧́ h’ɛ́nɛ́, ɛ́nɛ́ beka kpɛk wen kɔ‘m na.

⁶⁸Ɓɛɛ kà‘m ak'nɛ́, ɛ́nɛ́ beka kifi nú ha̧‘m na mbɛt.

⁶⁹Kinii hegɔ yak nɛnɛ, Bem ko bíí tɛ́ duk nɛ̀ war wii-er Sɔ̧ Wan ŋgayamɔ.»

⁷⁰Ɓɛɛ wa lɛŋ ak mɔ: «Hegɔ, mɛ́ nɛ́ Bem ko Sɔ̧ gɔ?» Ɓɛɛ a̧ tɔ̧́ há̧ wa: «Ɛ́nɛ́ nɛ̀ nú‘nɛ́ a̧ tɔ̧a̧‘e, mi nɛ́ Bem ko Sɔ̧ kaɗi.»

⁷¹Wa tɔ̧a̧: «Ɛ̀ɛ̀ kíí bɔɔ mbe wi-sedaako si déè ɓɔ ge? Ɛɛ nɛ tɛ yɛ zia wen n'aa tɔ̧ɔ̧ nɛ̀ nú-a kaɗi.»