Read Northwest Gbaya LUK 24 Bible Online

LUK 24 - Northwest Gbaya bible

LUK 24

¹Wese alat mɛ tutuyɛ sut, wa baa nɔ̧́-nyama nɛ̀ wa ɗafa nɛnɛ kɔ̧́ pɛsi-fio.

³wa yee kɔ̧́ pɛsi, ɓɛɛ wa kpa wɔr Gasa Wan Jesu na.

⁴Wa iŋ mɔ nɛ̀ wa tɛ de na, ɓɛɛ kà wa zɔk wó, bíí yiitoo nɛ̀ pi̧i̧ bu laa nɛ̀ tok tok a̧ yor ti wa’ɛ.

⁵Kíì dee wa, ɓɛɛ wa zum zu-wa; ɓɛɛ o wi nɔ‘i yiitoo'i tɔ̧ ha̧ wa: «Ɛ́nɛ́ kii wi nɛ̀ duk kpasa mgbara o fio wen ge?

⁶A̧ bo hɛ̧ɛ̧ na; a̧ kura kaɗi. Tɛ‘nɛ́'ɛ mbáŋ ɗoŋ wen n'aa tɔ̧ so h’ɛ́nɛ́ ŋgimbi n'aa duka so nɛnɛ Galilee.

⁷A̧ tɔ̧ɔ̧ so'e: ‹Wa tɛ ha̧ kànà Bem ko bíí mɛ ye er o ɗaŋwi, wa tɛ mgboi a̧ zu te-diŋa, ɓɛɛ ɗoŋ zɛ taar, a̧ kura ŋgɔn woyo.› »

⁸Ɓɛɛ tɛ-wa mbaŋ ɗoŋ wen n'aa tɔ̧ɔ̧ so'i.

⁹O okoo nɔ‘i sii ɗoŋ nɛ̀ nú pɛsi-fio, ɓɛɛ wa tɔ̧ mɔ‘i lɛŋ ha̧ o ŋgaiwi ko Jesu ɓu-zua-kpɔk in ha̧ o dɔka bíí lɛŋ mbɛt.

¹⁰Nɛ́ Marii Magdala, in Janɛ in Marii nàà ko Jak, ká bá nɛ̀ o ŋma okoo nɛ̀ nɛ̀ɛ̀ so in wa a̧ tɔ̧ɔ̧ wen mɔ‘i mbɛt ha̧ o betom ko Jesu.

¹¹O betom ko Jesu zii wen'i takaɗi, wa kpɛk na.

¹²Nɛ́ mɔ'ɔ nɛ̀ Pierre maa yì yak si nú pɛsi mɛ. A̧ guu nù zɔk mɔ si kɔ̧́ pɛsi, ɓɛɛ a̧ zɔk nɛ́ laa nɛ̀ wa kara so nɛ̀ tɛ Jesu ɓɛɛ. Nɛ́ mɔ'ɔ n'aa sii ɗoŋ si tɛ̀ kɔ̧-a̧ nɛ̀ gɔna ɗɛɗɛ nyɛmna wen mɔ nɛ̀ yaka'i.

¹³Kale wese'i, o ŋma bíí yiitoo mgbara wa baa war si ŋma saaye nɛ̀‘i sa'e Emaus. Nyɛi̧a-a tɛ duk hee kilomɛtrɛ ɓu-zua-kpɔk ga nɛ̀ Jerusalɛm.

¹⁴Wa duka tɔ̧ nɛ́ wen mɔ lɛŋ nɛ̀ yaka'i in ŋmaa.

¹⁵Ɓɛɛ hee mɔ'ɔ nɛ̀ wa tɔ̧ nɛ́ wen, si nɛ̀ kafɛ in ŋmaa ga, Jesu nɛ̀ tɛ-wi kpaa wa, ɓɛɛ ba war in wa.

¹⁶Wa zɔka a̧, ɓɛɛ ŋma mɔ dor wa mɛ iŋ ti a̧.

¹⁷A̧ aka wa: «Nɛ́ ge wen ge n’ɛnɛ tɔ̧ in ŋmaa nɛ̀ yuwar hegɔ'ɛ ge?» Ɓɛɛ wa yor nɛ̀ ɗaŋsee.

¹⁸Ɓii bíí nɛ̀‘i sa'e Kleopas, kifa nú ha̧ a̧: «Ɓaa bíí nɛ̀ tɛ̀ɛ́ Jerusalɛm nɛ̀ iŋ mɔ nɛ̀ yaka tɛ zɛ géè ndé'ɛ na, kànà nɛ́ mɛ́ ɓɛɛ.»

¹⁹Ɓɛɛ a̧ ak wa: «Nɛ́ ge a̧ yaka ge?» Wa kifa nú ha̧ a̧: «Ɛɛ tɔ̧ nɛ́ wen mɔ nɛ̀ kpaa Jesu be Nazarɛt nɛ̀ duka so nɛ́ wi-tɔ̧-wen oi nú Sɔ̧: nɛ́ tɛ ŋgayamɔ a̧ a̧ tɔ̧ɔ̧ nɛ̀ wen, de nɛ̀ tom sɛn ti Sɔ̧ in ti o bíí lɛŋ.

²⁰Nɛ́ mɔ'ɔ nɛ̀ o gasa wan-ɗafi-sɔ̧ k’ɛɛ in o gasawi k’ɛɛ baa a̧, gɔn kita-fio zu a̧, ɓɛɛ wa mgboi a̧ zu te-diŋa.

²¹Ɛɛ taa so k’ɛɛ‘e nɛ́ a̧ a̧ tɛ gbo Israɛl; ɓɛɛ zu-a'i, taar zɛ nɛ̀ mɔ‘i dee nɛnɛ nɛ́ mɔ'ɔ sɔsɔɔ'ɛ.

²²O ŋma okoo mgbara yɛ dee mɔɔ-gɔn-ɗɛɗɛ yɛ mbɛt. Wa nɛɛ so nú pɛsi-fio mɛ tuyɛ sut,

²³ɓɛɛ wa kpa wɔr Jesu na. Wa pia ɗoŋ tɔ̧ h’ɛ́ɛ́‘e, wi zɔka o betom ko Sɔ̧ nɛ̀ tɔ̧ɔ̧ ha'i'e Jesu dúk kpasa.

²⁴O ŋma sɛm k’ɛɛ nɛɛ nú pɛsi-fio, ɓɛɛ wa zɔk mɔ nyɛm kànà nɛ̀ ɗoŋ mɔ nɛ̀ o okoo nɔ‘i tɔ̧ɔ̧ so'i; ɓɛɛ wa zɔk Jesu na.»

²⁵Ɓɛɛ Jesu tɔ̧ ha̧ wa: «Ɛ́nɛ́ o wi nɛ̀ bó nɛ̀ taamɔ na’ɛ! Ɛ́nɛ́ nɛ̀ kpɛk wen nɛ̀ o wi-tɔ̧-wen oi nú Sɔ̧ bàá tɔ̧ so lɛŋ nɛ̀ haya-a na’ɛ!

²⁶Bó nɛ́ Mɛsii tɛ zɔk kànà bɔnɛ nɛti sɛka a̧ yee tɛ gasamɔ kɔ̧-a̧ na nde?»

²⁷Ɓɛɛ a̧ ku̧u̧naŋ nɛ̀ tɛ́ Moisɛ in o wi-tɔ̧-wen oi nú Sɔ̧, we nɛ̀ ɗoŋ mɔ lɛŋ nɛ̀ wa bàá yɔr so wen-aa.

²⁸Ŋgimbi nɛ̀ wa hɛɗa nɛ̀ ye nɛ̀ wa nɛ́ sɛnɛ‘i, Jesu dee hee tɛ yak nɛ́ wa e duk ga,

²⁹ɓɛɛ wa dor a̧, tɔ̧ nɛnɛ‘e: «Ɛ̀nɛ̀ dúk in yɛ̀ɛ́, mɔ ga̧a̧ kaɗi, dekpaa wese yea.» Ɓɛɛ a̧ ye tua mɛ duk in wa.

³⁰Ŋgimbi n'aa duka nù ká̧ nyɔŋmɔ in wa, a̧ baa brɛt, de osoko ha̧ Sɔ̧, ɓɛɛ gbin kɛ̧ nɛ̀ wa.

³¹Yí-wa hu̧i̧a̧, ɓɛɛ wa iŋ ti a̧. Ɓɛɛ a̧ yɔ yí-wa ɓɛlɛm.

³²Wa tɔ̧ɔ̧ sitɛ ŋmaa: «Bó nɛ́ see yɛ gbɛ̧ŋa ŋgimbi n'aa tɔ̧ɔ̧ nɛ̀ wen h’ɛ́ɛ́ yuwar, we nɛ̀ ɗoŋ mɔ nɛ̀ Yɔramɔ tɔ̧ɔ̧ so h’ɛ́ɛ́'ɛ na nde?»

³³Ɓɛɛ kale ŋgimbi'i, wa kura si ɗoŋ si Jerusalɛm. Wa kpaa o betom ɓu-zua-kpɔk nɛ̀ mɔi̧a ŋmaa hi̧i̧ in o sɛm kɔ-wa,

³⁴ɓɛɛ o wi nɔ‘i tɔ̧ ha̧ wa'e: «Nɛ́ kpasawen, Gasa Wan kura ŋgɔn tɛ fio ɓɛɛ usi tɛ ha̧ Simɔŋ!»

³⁵Wa mbɛt, wa wee ɗoŋ mɔ nɛ̀ yaka yuwar, in hee mɔ'ɔ nɛ̀ wa iŋa nɛ̀ ti Gasa Wan tɛ gbina brɛt n'aa gbina kɛ̧ nɛ̀ wa ga.

³⁶Wa ɓɔna fara tɔ̧ɔ̧ wen, ɓɛɛ Jesu hɔ duk mgbara wa, ɓɛɛ tɔ̧ ha̧ wa: «Ga̧a̧mɔ a̧ dúk in'nɛ̀ɛ́!»

³⁷Ɗɛɗɛ-wa gɔna, gasa kíì baa wa, ɓɛɛ wa ta kɔ-wa'e wa kpaa nɛ́ sɔ̧-tɛ-wi.

³⁸Ɓɛɛ Jesu tɔ̧ ha̧ wa: «Wen ge s’ɛnɛ de kíì hegɔ ge? Ɛnɛ si bɔɔ kafɛ nɛ̀ kɔ̧́ see'nɛ́ wen ge?

³⁹Ɛ̀nɛ̀ zɔ́k er-am in naŋ-am; mɛ̀ nɛ́ mi nɛ̀ mbetɛ! Ɛ̀nɛ̀ tám tɛ‘m, ɛ̀nɛ̀ zɔ̀k: wen sɔ̧-tɛ-wi bó nɛ̀ mur-tɛ in gba̧a̧-tɛ hee mɔ'ɔ n’ɛnɛ zɔk n'am a̧a̧ nɛnɛ kinii ga na.»

⁴⁰Tɛ tɔ̧ɔ̧ wen'i, a̧ usa er-a in naŋ-a ha̧ wa.

⁴¹Ɓɛɛ hee mɔ'ɔ nɛ̀ nyɛŋɛ pi̧ nɛ́ wa, ɓɛɛ wa kɔ̧ mɛ kpɛk wen n'aa tɔ̧‘i na ga, ɗɛɗɛ-wa gɔna, ɓɛɛ a̧ ak wa: «Ɛnɛ a̧a̧ nɛ̀ ŋma mɔɔ-nyɔŋ hɛ̧ɛ̧?»

⁴²Nɛ́ mɔ'ɔ nɛ̀ wa ha̧a̧ gbina dɔ́ɔ́ zoro ha̧ a̧,

⁴³ɓɛɛ a̧ ba nyɔŋ nɛ̀ yí-wa.

⁴⁴Hɔ-ɗoŋ-aa, ɓɛɛ a̧ tɔ̧ ha̧ wa: «Ɛ̀nɛ̀ zíí wen n'am bàá tɔ̧ so h’ɛ́nɛ́ ŋgimbi n'am duka so nɛnɛ in'nɛ̀ɛ́. Mɔ lɛŋ nɛ̀ yɔra zu'm zaŋ heembea ko Moisɛ, zaŋ yɔramɔ ko o wi-tɔ̧-wen oi nú Sɔ̧ in zaŋ Gima tɛ hɔ kànà gba̧a̧.»

⁴⁵Nɛ́ mɔ'ɔ n'aa hu̧i̧a̧ taamɔ kɔ-wa mɛ zii gba̧a̧ o Yɔramɔ.

⁴⁶Ɓɛɛ a̧ tɔ̧ ha̧ wa: «Wa bàá yɔr'e ndé: Mɛsii tɛ zɔk bɔnɛ, ɓɛɛ ɗoŋ zɛ taar a̧ kura ŋgɔn mgbara o fio,

⁴⁷ɓɛɛ wa tɛ tɔ̧ wen nɛ̀ nin-a wen kpaia-duka-a in ea-ɗaŋmɔ, ku̧u̧naŋ-a nɛ̀ Jerusalɛm mɛ hɔ nɛnɛ tɛ o tugun bíí lɛŋ.

⁴⁸Ɛnɛ nɛ́ o wi-sedaako mɔ‘i.

⁴⁹Ɓɛɛ kɔ‘m mi tɛ tom nɛ́ mɔ nɛ̀ Dáà bàá ha̧ so nú wen-aa'i pii zu'nɛ́. Ɛ̀nɛ̀ yá saaye hɛ̧ɛ̧ kaŋ, hɔ wese n’ɛnɛ tɛ kpa ŋgai mɛ yiwese mɛ sɛ́.»

⁵⁰Hɔ-ɗoŋ-aa, ɓɛɛ a̧ mgbɔ wa nɛnɛ hɔ Betanii; a̧ nyɛi̧a er-a si ŋgɔn, ɓɛɛ a̧ tok de yoŋgo zu wa.

⁵¹Hee mɔ'ɔ n'aa ɓɔna fara toka de yoŋgo zu wa ga, a̧ ee wa duk, ɓɛɛ daŋ si yiwese.[23]

⁵²Ɗoŋ nɛ wa gbɛɛ zugur-wa nù gasi nɛ̀ a̧ kaɗi, ɓɛɛ wa si ɗoŋ nɛ̀ gasa desee si Jerusalɛm.

⁵³Wa duka kɔ̧́ Tua ko Sɔ̧ ɓɔnsɛnɛ de nɛ̀ osoko ha̧ Sɔ̧.