Read Northwest Gbaya LUK 7 Bible Online

LUK 7 - Northwest Gbaya bible

LUK 7

¹Ŋgimbi nɛ̀ Jesu tɔ̧ɔ̧ wen kɔ‘i lɛŋ ha̧ o bíí kaɗi, a̧ yee saaye Kafarnaum.

²Ŋma wi-duk-zu o wi-biro gɔmŋmaa a̧a̧ so nɛ̀ ŋma bara n'aa kɔ̧ɔ̧ nyɛmna, nɛ̀ ɔ nɛ́ zɛɛ; wi’ɛi hɛɗa so fio kaɗi.

³Zia nyɛrɛmɔ ko Jesu nɛ̀ gasawi'i zia hegɔ, ɓɛɛ a̧ tom o ŋma gasa Juif mɛ nɛ̀ɛ́ ai nú ha̧ Jesu mɛ nɛ̀ɛ́ kpasi bara kɔ̧-a̧.

⁴Wa hɔɔ katɛ Jesu, ɓɛɛ wa ai nú ha̧ a̧ nɛ̀ dɔka-a, wa tɔ̧a̧: «Wi’ɛi nɛ́ bíí h’ɛ́nɛ́ mɛ gbak,

⁵wen a̧ kɔ̧ɔ̧ tugun bíí k’ɛɛ nyɛmna, in nɛ́ a̧ a̧ dee tua-mɔi̧a-a h’ɛ́ɛ́ mbɛt.»

⁶Jesu baa yuwar yak in wa. A̧ hɛɗa nɛ̀ tua kaɗi, ɓɛɛ gasawi'i tom o sɛm kɔ‘i mɛ tɔ̧ ha̧ a̧: «Gasa Wan, k’ɛ́nɛ́ ɗaŋ tɛ‘nɛ́ tɛnɛ géè na, wen mi nyɛm h’ɛ́nɛ́ mɛ ye kɔ̧́ tua kɔ‘m na.

⁷Mɛ̀ nɛ́ wen mɔ‘i s'am zɔka'e mi nyɛm so mɛ nɛ̀ɛ́ kpa'nɛ́ na. Ɛ̀nɛ̀ tɔ̧́ nɛ́ géé wen mɛ nú‘nɛ́ kpɔk ɓɛɛ, ha̧ wi-de-tom kɔ‘m kpasi.

⁸Mi mbɛt, wi-duk-zu'm a̧a̧ sɛnɛ, ɓɛɛ mi a̧a̧ nɛ̀ o wi-biro n'am duk zu wa. Kà‘m tɔ̧ ha̧ ŋma kpɔk'e: ‹Mɛ̀ nɛ́!› Ɓɛɛ a̧ nɛa. Kà‘m tɔ̧ ha̧ ɓii-aa'e: ‹Mɛ̀ tɛ́!› Ɓɛɛ a̧ tɛa. Kà‘m tɔ̧́ ha̧ bara kɔ‘m'e: ‹Mɛ̀ dé mɔ'ɔ!› Ɓɛɛ a̧ dee mɔ‘i.»

⁹Jesu zia wen'i, ɓɛɛ yeŋ wi’ɛi. Nɛ́ mɔ'ɔ n'aa zika tɛ sitɛ giiwi nɛ̀ tɛɛ ɗoŋ-aa, ɓɛɛ tɔ̧: «Mi tɔ̧ h’ɛ́nɛ́, kóó sɛn Israɛl, mi tɛ zɔk pɛrti kɔ̧ɔ̧ɗɔɔwen hegɔ na.»

¹⁰O wi nɛ̀ wa toma'i sii ɗoŋ ɓɛɛ wa kpa bara'i nɛ̀ haya-tɛ.

¹¹Hɔ-ɗoŋ-aa, Jesu yaka si ŋma gasa ye nɛ̀‘i sa'e Nain, ɓɛɛ o ŋgaiwi kɔ̧-a̧ in giiwi yak in a̧.

¹²A̧ hɔɔ ká̧ nú garo saaye kaɗi, ɓɛɛ a̧ zɔk o bíí nɛ̀ gɔ fio nɛnɛ mɛ gun; nɛ́ kpɔk be-wiwii ko ŋma ko-gera a̧ fea. Giiwi saaye nɛ̀ dɔka-a nɛɛ so in ko-gera'i mbɛt.

¹³Gasa Wan zɔka kóò‘i ɓɛɛ ko de a̧ ɓɛɛ a̧ tɔ̧ ha̧ kóò‘i: «Ká mɛ hi̧i̧ kɔ̧a̧ ɓɔna.»

¹⁴A̧ ɗɔŋa siti ɓɛɛ tam mɔɔ-gɔ-fio, ɓɛɛ o wi-gɔ-fio yor. Ɓɛɛ a̧ tɔ̧: «Be-ŋgaiwi’ɛ, mi tɔ̧ ha̧ mɛ, mɛ̀ kúr!»

¹⁵Nɛ́ mɔ'ɔ nɛ̀ fio kura dúk nù, ɓɛɛ ku̧ naŋ tɔ̧ɔ̧ wen. Ɓɛɛ Jesu ha̧ a̧ ha̧ nàà kɔ̧-a̧ woyo.

¹⁶Kíì hɛra zaŋ-wa lɛŋ, ɓɛɛ wa zɔn Sɔ̧ tɔ̧ nɛnɛ‘e: «Gasa wi-tɔ̧-wen oi nú Sɔ̧ hɔɔ mgbara yɛ, ɓɛɛ Sɔ̧ hɔɔ mɛ zɔk dukbíí kɔ‘i.»

¹⁷Ɓɛɛ nyɛrɛmɔ ko Jesu hur dam nú Judee, in o ye ká̧ fara'i lɛŋ.

¹⁸Nɛ́ mɔ'ɔ nɛ̀ o ŋgaiwi ko Jean tɔ̧ nyɛrɛmɔ nɛ̀ Jesu dea'i lɛŋ ha̧ Jean. Ɓɛɛ Jean sa o ŋma ŋgaiwi kɔ‘i yiitoo,

¹⁹ɓɛɛ tom wa mɛ ak Gasa Wan: «Wi nɛ̀ tɛ tɛ nɛ́ ɛ́nɛ́ náà, kóó ɛɛ tɛ zɛm nɛ́ ŋma mbe bíí nde?»

²⁰Wa nɛɛ hɔ tɛ Jesu ɓɛɛ wa tɔ̧ ha̧ a̧: «Jean Zui-bíí tom nɛ́ ɛɛ tɛnɛ mɛ ak'nɛ́‘e: ‹Wi nɛ̀ tɛ tɛ nɛ́ ɛ́nɛ́ náà, kóó ɛɛ tɛ zɛm nɛ́ ŋma mbe bíí nde?› »

²¹Ŋgimbi'i, Jesu kpasa o wi-zɛɛ nɛ̀ dɔka-a, in o wi-kum, in o bíí nɛ̀ ɗaŋ-sɔ̧ a̧a̧ tɛ, a̧ dee ha̧ o wi-boma-yí nɛ̀ dɔka-a mɛ zɔk mɔ;

²²a̧ kifa nú ha̧ o betom ko Jean: «Ɛ̀nɛ̀ nɛ́ɛ̀ tɔ̧́ mɔ n’ɛnɛ zɔka in mɔ n’ɛnɛ zia ha̧ Jean: o wi-boma-yí zɔk nɛ́ mɔ, o wi-kum nɛ́ nɛ́ nɔ̀ nɛ̀ tana-a, tɛ̀ o wi-doko sa̧a̧, o wi-mgbee-zer zii nɛ́ mɔ, o fio kur nɛ́ ŋgɔn, ɓɛɛ o bíí tɔ̧ nɛ́ De Mbe Wen ha̧ o wi-kɔsa mbɛt.

²³O wi nɛ beka sakali wen zu'm na duk kɔ‘i nɛ̀ desee!»

²⁴Nɛ́ mɔ'ɔ nɛ̀ o ŋgaiwi ko Jean sia, ɓɛɛ Jesu ku̧ naŋ tɔ̧ɔ̧ wen zu Jean ha̧ o giiwi ak nɛ̀ wa: «Ɛ́nɛ́ nɛ̀ɛ̀ mɛ zɔk nɛ́ ge sɛn ŋga-gbárà mɛ‘i ge? Géé kan nɛ̀ búk fo’ɛ nde?

²⁵Ɛ́nɛ́ nɛ̀ɛ̀ mɛ zɔk nɛ́ ge? Ŋma wi-pi̧-de-laa nde? O wi-pi̧-de-laa yá tɛ bɔtɛ, yá kɔ‘i nɛ̀nɛ́ kɔ̧̀ kira ko wannu mɛ ɛ̧.

²⁶Ɛ́nɛ́ nɛ̀ɛ̀ bɔɔ mɛ zɔk nɛ́ ge? Ŋma wi-tɔ̧-wen oi nú Sɔ̧ nde? Mi tɔ̧ h’ɛ́nɛ́, wi n’ɛnɛ zɔka'i gana wi-tɔ̧-wen oi nú Sɔ̧.

²⁷Mɛ̀ nɛ́ wi nɛ̀ wa bàá yɔr so mɔ wen-aa'e ndé: ‹Mi tom nɛ betom kɔ‘m mɛ yak ti ha̧ mɛ, ha̧ a̧ mɛ ɗafi war ha̧ mɛ.›

²⁸Mi tɔ̧ h’ɛ́nɛ́, zu nù‘e mgbara o bíí nɛ̀ okoo kòò lɛŋ, ŋma bíí nɛ̀ gana Jean bo na; ɓɛɛ zu-a'i, geɗek-wi tɛ Wan ko Sɔ̧ gana a̧.»

²⁹Dukbíí nɛ̀ oi-aa in o wi-ba-garama nɛ̀ zia wen kɔ̧-a̧ iŋa'e Sɔ̧ nɛ́ wi-de-mɔ nɛ̀ yuwar-a ɓɛɛ wa kpɛk ha̧ Jean mɛ zui wa.

³⁰Ɓɛɛ o Fariziɛn in o wi-usi-heembea e ee-zu-mɔ ko Sɔ̧ nɛ̀ ɗafa ha̧ wa tɛ geemɔ wen nɛ̀ wa e ha̧ Jean Zui-bíí mɛ zui wa na.

³¹Jesu tɔ̧ɔ̧ woyo: «A̧‘m wé bɔɔ tugun bíí kinɛɛ nɛ̀ o? Wa hɔɔ ŋmaa in o?

³²Wa hɔɔ ŋmaa in o bem nɛ̀ ya nù bee-gara sa nɛ̀ ŋmaa tɔ̧ nɛnɛ‘e: ‹Ɛɛ dɔma fol h’ɛ́nɛ́, ɓɛɛ ɛ́nɛ́ yɔ yɔyɛ na. Ɛɛ bia gima fio, ɓɛɛ ɛnɛ hi̧i̧ kɔ̧a̧ na.›

³³Wen Jean Zui-bíí tɛa, a̧ nyɔŋ brɛt na, a̧ nɔ dɔ̧ɔ̧ na, ɓɛɛ ɛnɛ tɔ̧‘e ndé a̧ nɛ́ wi-dawa.

³⁴Nɛ́ mɔ'ɔ nɛ̀ Bem ko bíí tɛ̀ɛ̀ nyɔŋ nɛ̀ mɔ, nɔ nɛ̀ mɔ mbɛt, ɓɛɛ ɛ́nɛ́‘e ndé a̧ nɛ́ gba-gur-mɔ in wi-gbɛ-dɔ̧ɔ̧; ɛnɛ tɔ̧ɔ̧ mbɛt'e a̧ nɛ́ gbama-yari ko o wi-ba-garama in o ɗaŋwi.

³⁵Mɔ kpɔk, o bem ko Iŋa-mgbara-mɔ iŋa'e deemɔ kɔ-a duk nɛ̀ yuwar-a.»

³⁶Ŋma Fariziɛn saa Jesu mɛ nyɔŋ mɔ tɛ̀ kɔ‘i. Nɛ́ mɔ'ɔ nɛ̀ Jesu yee kɔ̧́ tua ko Fariziɛn'i, ɓɛɛ duk nù mɛ nyɔŋ mɔ.

³⁷Ŋma ko-de-ɗaŋmɔ saaye'i hɔa. A̧ zia so'e Jesu nyɔŋ nɛ́ mɔ tɛ̀ ko Fariziɛn wó, ɓɛɛ a̧ ba dak nɔ̧́-nyama tɛnɛ.

³⁸A̧ duka nɛ̀ ɗoŋ, hí̧í̧ nɛ̀ kɔ̧a̧, sɛn ká̧ naŋ Jesu; a̧ hi̧a̧ kɔ̧a̧ a zu naŋ Jesu, ɓɛɛ a̧ nyiŋ nɛ̀ mu̧i̧-zu-a; a̧ duia naŋ Jesu, ɓɛɛ a̧ a nɔ̧́-nyama sɛnɛ.

³⁹Tɛ̀ zɔka mɔ‘i, Fariziɛn nɛ̀ saa Jesu mɛ nyɔŋ mɔ taa nɛ̀ kɔ̧ see: «Kà wi’ɛ a̧ bó so nɛ́ wi-tɔ̧-wen oi nú Sɔ̧ gáà, a̧ tɛ̀ɛ́ iŋ so kóò'ɛ nɛ̀ tam tɛ-a’ɛ, in yí-tom n'aa de mbɛt: a̧ nɛ́ ko-de-ɗaŋmɔ.»

⁴⁰Ɓɛɛ Jesu tɔ̧ ha̧ Simɔŋ: «Mi a̧a̧ nɛ̀ ŋma wen mɛ tɔ̧ ha̧ mɛ.» Simɔŋ kifa nú: «Ɛ̀nɛ̀ tɔ̧̀, Wan-usi-mɔ.»

⁴¹Ɓɛɛ Jesu tɔ̧ ha̧ a̧: «Ŋma wanmbɔi a̧a̧ so nɛ̀ bíí yiitoo n'aa ndak nɛ̀ nyamandoi. Kpɔk baa so kɔya-sede gɔmŋmaa-mɔɔrɔ, ɓii-aa ɓu-mɔɔrɔ.

⁴²Hee mɔ'ɔ nɛ̀ wa bó nɛ̀ sede-gbo-nyamandoi na ga, a̧ gbɛɛ nyamandoi ha̧ wa yiitoo'i lɛŋ. Mgbara wa yiitoo'i nɛ́ o'o tɛ kɔ̧ a̧ gan o nde?»

⁴³Simɔŋ kifa nú: «Mi taa nɛ́ wi n'aa ee dɔka sede ha̧ a̧‘i.» Ɓɛɛ Jesu tɔ̧ ha̧ a̧: «Mɛ́ kɛ̧ɛ̧ mgbara wen'i nɛ̀ de-a.»

⁴⁴Jesu zika tɛ sitɛ kóò‘i, ɓɛɛ tɔ̧ ha̧ Simɔŋ: «Mɛ zɔka kóò'ɛ nde? Mi yee kɔ̧́ tua kɔ-mɛ, ɓɛɛ mɛ fɔr naŋ-am na; kɔ̧-a̧, a̧ hi̧a̧ kɔ̧a̧ a̧ zu naŋ-am, ɓɛɛ a̧ nyiŋ nɛ̀ mu̧i̧-zu-a.

⁴⁵Mɛ́ dui nú‘m na, ɓɛɛ ko kóò'ɛ nɛ̀ yee nɛ̀ tua mɛ, a̧ kaɗi nyíŋá[8] naŋ-am na.

⁴⁶Mɛ́ sɔ̧ de pɛr nɔ̧́ zú‘m na; kɔ̧-a̧ a̧ gbaia nɔ̧́-nyama a̧ zu naŋ-am.

⁴⁷Hegɔ, mi tɔ̧ ha̧ mɛ, dɔka ɗaŋmɔ kɔ̧-a̧ lɛŋ bó zu a̧ ɓɔna, wen a̧ usa kɔ̧ɔ̧mɔ ha̧‘m nyɛmna. Wen wi nɛ̀‘i e ɗaŋmɔ ha̧ a̧ tikiɗi, usi kànà kɔ̧ɔ̧mɔ tikiɗi mbɛt.»

⁴⁸Ɓɛɛ Jesu tɔ̧ ha̧ kóò‘i: «Ɗaŋmɔ kɔ-mɛ bó zu mɛ ɓɔna.»

⁴⁹O bíí nɛ̀ yaa ká̧ nyɔŋmɔ lɛŋ taa mɔ: «Ɛ̧ɛ̧ nɛ́ ge bíí ge nɛ̀ e nɛ́ ɗaŋmɔ ha̧ o bíí mbɛt’ɛ ge?»

⁵⁰Ɓɛɛ Jesu tɔ̧ ha̧ kóò‘i: «Nɛ́ kɔ̧ɔ̧ɗɔɔwen kɔ-mɛ a̧ kpasa mɛ, mɛ̀ yák zaŋ ga̧a̧mɔ.»